Wenaxarü naxümatü ga Tupanaarü mugü 12:3 - Tupanaarü Ore

³ ¡Rü nagu pepogüe i norü ãmarearü guruü̃gü, rü íxraxü̃gu penapo ya yima nutagü ya namaxã natupanaã̱xgücü. Rü ípenagu i ngẽma Acheráchicüna̱xã i nainaxca̱x i nüxü̃ yacua̱xüü̃güxü̃. Rü nagu pepogüe i norü tupanachicüna̱xãgü! ¡Rü ípenapigü i naégagü i ngẽma norü tupanagü nax taxuwama nüxna nacua̱xãchiegüxü̃ca̱x!

Wenaxarü naxümatü ga Tupanaarü mugü 12:3 Referans Kwoze

Chacaría 13:2

Rü guxü̃wama i ñaa nachixü̃anewa rü tá ichayanaxoxẽxẽ i woo i naégagü i ngẽma tupananetachicüna̱xãgü nax ngẽmaãcü tama nüxü̃ yacua̱xüü̃güxü̃ca̱x i duü̃xü̃gü. Rü ñaa nachixü̃anewa rü ngẽxgumarüxü̃ tá ta ichayanaxoxẽxẽ i ngẽma tupananetagüarü orearü uruü̃gü rü guxü̃ma i chixexü̃ i naãẽgü. Rü choma ya Cori ya Tupana nixĩ i ngẽma ñachaxü̃.

Wiyaegü 16:4

Natürü ngẽma naxchicüna̱xãgüxü̃ icua̱xüü̃güxü̃ rü tá ngúxü̃ ningegü. Rü choma rü tagutáma norü tupananetagüca̱x ãmareruxü̃ i nagü chaba. Rü bai i cha̱u̱a̱xmaxã tá nüxü̃ chixu i naégagü i ngẽma tupananetagü.

Wenaxarü naxümatü ga Tupanaarü mugü 7:5

Rü ngẽmaca̱x tá penaxwa̱xe i noxtacüma nagu pepogüe i ngẽma ãmarearü guruü̃gü i ngextá ngẽma duü̃xü̃gü norü tupanagüca̱x naxü̃nagü nawa ínaguxü̃. Rü ngẽxgumarüxü̃ tá ta nagu pepogüe ya yimá norü nutagü rü naigü i namaxã natupanaã̱xgüxü̃. Rü tá ípenagu i norü tupanachicüna̱xãgü.

Ínachoxü̃xü̃chiga 23:13

¡Rü peyangu̱xẽxẽ i guxü̃ma i ngẽma pemaxã nüxü̃ chixuxü̃! Rü tama chanaxwa̱xe nax ñuxgu tá pea̱xwa nüxü̃ chaxĩnüxü̃ i ta̱xacürü tupananetagüéga.

Yema Cuáü̃ nüxü̃ dauxü̃ i yixcüra tá ngupetüxü̃chiga 13:1

Rü nüxü̃ chadau ga wüxi ga ngo̱xo ga taxü̃ ga márwa íxüãchixü̃. Rü nüxü̃́ nayexma ga 7 ga naerugü rü 10 ga naxchata̱xcuregü. Rü wüxichigü ga naxchata̱xcu̱xre rü nüxü̃́ nayexma ga norü nga̱xcueruxü̃. Rü yema 7 ga naerugü rü nixãéga. Rü yema naégagü rü Tupanachiga chixexü̃ nixugü.

Miquéa 5:14

Rü tá chanapuxü̃ i ngẽma perü naigü i namaxã petupanã̱xgüxü̃ rü ñu̱xũchi wüxicana tá ichayanaxoxẽxẽ ya yima perü ĩanegü ya nawa ngẽxmagüne i perü tupananetagü.

Ochéa 2:17

Rü tá nüxna chanachu̱xu nax tagutáma wena namaxã nadexaãchigüxü̃ca̱x i ngẽma tupananeta i Baágüéga.

Yeremía 17:2

Rü penegü rü pexacügü rü ta nüxna nacua̱xãchie i ngẽma tupananetachicüna̱xãgüarü ãmaregüarü guruü̃gü rü ngẽma Acheráchicüna̱xãgü ga naigü ga itaetaxü̃tüxü̃wa rü ngüchitaerugüxü̃wa rü naanegüwa yexmagüxü̃. Rü ngẽma perü pecadugügagu rü tá togüxü̃ chanadexẽxẽ i ngẽma perü ngẽmaxü̃gü rü perü diẽrugü rü ngẽma perü tupananetachicüna̱xãgü i guxü̃ma i perü naanewa ngẽxmagüxü̃.

Norü taxre ga to ga popera ga ãẽ̱xgacügüchiga ümatüxü̃ 34:3

Rü yexguma marü 8 ga taunecü ãẽ̱xgacü yixĩxgu rü woo nax nangextü̱xüxü̃ ga Yochía, rü inanaxügü nax nũxcümaü̃cü ga norü o̱xi ga Dabíarü Tupanaca̱x nadauxü̃. Rü yexguma marü 12 ga taunecü ãẽ̱xgacü yixĩxgu rü Yudáanewa rü Yerucharéü̃wa inanaxügü nax nagu napogüxü̃ ga yema nachicagü ga ma̱xpǘnegüwa yexmagüxü̃ ga nawa tupananetagüxü̃ yacua̱xüü̃güxü̃. Rü ínanawogü ga Acheráchicüna̱xãgü, rü yema togü ga naxchicüna̱xãgü rü yema naxchicüna̱xãgü ga bróũchewa naxügüxü̃.

Norü taxre ga to ga popera ga ãẽ̱xgacügüchiga ümatüxü̃ 31:1

Rü yexguma marü nagu̱xgu ga guxü̃ma ga yema peta, rü guxü̃ma ga yema Iraétanüxü̃ ga yéma yexmagüxü̃, rü Yudáanearü ĩanegüwa naxĩ. Rü nagu nayapogüe ga gumá nutagü ga duü̃xü̃gü namaxã tupanaã̱xgücü, rü nagu napogüe ga yema Acheráchicüna̱xãgü, rü ñu̱xũchi nagu napogüe ta ga yema tupananetagüarü ãmarearü guruü̃gü ga ma̱xpǘnegüwa yexmagüxü̃. Rü yemaacü nanaxügü rü ñu̱xmata nagu̱xẽẽgüã ga guxü̃ma ga yema nüxü̃ yacua̱xüü̃güxü̃ ga Yudáanewa rü Bẽyamíü̃anewa yexmagüxü̃, rü ñu̱xũchi Efraíü̃anewa rü Manachéanewa yexmagüxü̃. Rü yemawena ga guxü̃ma ga yema Iraéanecüã̱xgü rü wüxichigü norü ĩanegüca̱x nawoegu.

Norü taxre ga to ga popera ga ãẽ̱xgacügüchiga ümatüxü̃ 19:3

Natürü nayexma ga ta̱xacü ga mexü̃ ga cuxüxü̃ ga Tupana naxca̱x cumaxã taãẽxü̃. Rü yema nixĩ nax nagu quipogügüxü̃ ga yema Acheráchicüna̱xãgü ga ñaa nachixü̃anewa yexmagüxü̃. Rü ñu̱xũchi nagu curüxĩnü nax Tupanaca̱x cudauxü̃ —ñanagürü.

Norü taxre ga popera ga ãẽ̱xgacügüchiga 23:14

Rü yemawena rü guma nutagü ga duü̃xü̃güca̱x üünegücü rü nagu nipogügü, rü guma naigü ga naxca̱x üünegüne rü nayawa̱xgüxẽxẽ. Rü yema nachicagü ga yema nutagü rü naigü nawa yexmagüchiréxü̃ rü duü̃xẽchina̱xãmaxã nanapaxẽxẽ.

Norü taxre ga popera ga ãẽ̱xgacügüchiga 18:4

Rü nüma ga Echequía nixĩ ga duü̃xü̃güxü̃ namuxü̃ nax nagu napogüexü̃ca̱x ga yema nachicagü ga tupananetachicüna̱xãgü nawa yexmagüxü̃. Rü guma nutagü ga duü̃xü̃gü nüxü̃ icua̱xüü̃gücü rü íxraxü̃gu nanapo. Rü yema Acheráchicüna̱xãgü rü nayapuexẽxẽ. Rü nagu nabügüe ga yema ãxtapechicüna̱xã ga bróũchenaxca̱x ga Moiché üxü̃ ga Iraéanecüã̱xgü nape̱xewa pumarate̱xe igugüxü̃. Rü yema ãxtapechicüna̱xã rü Neucháü̃gu nanaxüéga.

Nüxíraxü̃xü̃ ga popera ga ãẽ̱xgacügüchiga 15:13

Rü ñu̱xũchi norü noxẽ ga Maacámaxã nanaxuegu nax tüma rü tama ãẽ̱xgacüarü noxẽ tixĩxü̃, yerü tüma ga norü noxẽ rü tanamu nax tüxü̃́ naxüxchicüna̱xãgüãxü̃ ga tupananeta ga Acherá. Rü nüma ga Achá rü nayawa̱xẽxẽ ga yema naxchicüna̱xã rü Chedróü̃arü ngatewa nayagu.

Norü taxre ga to ga popera ga ãẽ̱xgacügüchiga ümatüxü̃ 14:3

Rü nayanaxoxẽẽgü ga yema tupananetagüarü ãmarearü guruü̃gü. Rü yexgumarüxü̃ ta nagu napogüe ga guma ĩpatagü ga nawa duü̃xü̃gü tupananetagüxü̃ icua̱xüü̃güne ga ma̱xpǘnegüwa. Rü nagu napogüe ga guma nutagü ga duü̃xü̃gü namaxã tupanaã̱xgücü. Rü yexgumarüxü̃ ta nagu napogüe ga tupananeta ga Acheráchicüna̱xãgü.

Ínachoxü̃xü̃chiga 23:24

¡Rü taxũtáma nagu quixũ i nacüma i chixexü̃ i nagu namaxẽxü̃ i ngẽma nachixü̃anecüã̱xgü! ¡Rü taxũtáma nape̱xegu cucaxã́pü̱xü rü nüxü̃ quicua̱xüxü̃ i norü tupananetagü! Rü name nax nagu quipogügüxü̃ i norü tupananetachicüna̱xãgü rü norü nutagü ga namaxã natupanaã̱xgücü.

Ínachoxü̃xü̃chiga 34:13

Rü chanaxwa̱xe nax nagu nüxü̃́ pepogüexü̃ i ngẽma norü ãmarearü guruü̃gü rü noxtacüma peyanaxoxẽẽxü̃ i ngẽma norü nutagü rü naigü i namaxã natupanaã̱xgüxü̃.

Wenaxarü naxümatü ga Tupanaarü mugü 7:25

Pemax rü tá ípenagu i ngẽma norü tupananetachicüna̱xãgü, natürü taxũtáma pegüaxü̃́ penade i ngẽma úiru rü diẽrumü i namaxã yatüxünexü̃. Erü ngẽxguma pegüaxü̃́ penadexgu rü wüxi i taxü̃ i chixexü̃ tá pexü i Cori ya Tupanape̱xewa.

Wenaxarü naxümatü ga Tupanaarü mugü 12:4

Rü pema rü ngẽxguma perü Cori ya Tupanaxü̃ picua̱xüü̃gügu ¡rü taxũtáma ngẽma duü̃xü̃gücümagu pexĩ!

Nüxíraxü̃xü̃ ga popera ga ãẽ̱xgacügüchiga 14:15

Rü nüma ya Cori ya Tupana rü taxü̃ i guxchaxü̃maxã tá Iraéanexü̃ nixĩãcüüxẽxẽ ñoma dexá i poraxü̃chíüxü̃ i dexnegüxü̃ ixĩãxtanücüüxẽẽxü̃rüxü̃. Rü ñaa naane i mexü̃ ga nüxíraxü̃güxü̃ ga petanüxü̃na naxãxü̃wa tá pexü̃ ínawoxü̃. Rü tá natü i Eufrátearü yéama pexü̃ nawogü nagagu nax penaxüxü̃ ga yema tupananeta i Ataréchicüna̱xãgü. Rü yemaca̱x nixĩ ga penanuxẽẽxü̃ ga Cori ya Tupana.

Norü taxre ga popera ga ãẽ̱xgacügüchiga 11:18

Rü ñu̱xũchi guxü̃ma ga duü̃xü̃gü rü Baáxarü ngutaque̱xepataü̃wa naxĩ rü nagu napogüe. Rü nagu napogüe ta ga guxü̃ma ga yema Baáxarü ãmarearü guruü̃gü rü naxchicüna̱xãgü. Rü guma Baáxarü chacherdóte ga Matáü̃ rü Baáxarü ãmarearü guruü̃xü̃tagu nayadaerugü. Rü yemawena rü Tupanapata ga taxü̃neca̱x nawoegu rü nüma ga chacherdóte ga Yoiadá rü yexma Tupanapata ga taxü̃negu nanamugü ga dauxü̃taeruü̃gü nax nüxna nadaugüxü̃ca̱x.

Ichaía 27:9

Natürü nüma ya Cori ya Tupana rü tá nüxü̃́ nüxü̃ inayarüngüma i ngẽma Iraétanüxü̃arü chixexü̃gü rü tá ínanapi i norü pecadugü i ngẽxguma nagu napogüegu i norü tupananetagüarü ãmarearü guruü̃güarü nutagü, ñoma nuta ya cal íxraxü̃gu pocürüxü, rü ngẽxguma ínawogüãgu i ngẽma naigü i Acheráchicüna̱xãgü i namaxã natupanaã̱xgüxü̃ rü nagu napogüegu i ngẽma guruü̃gü i nawa norü tupananetagüca̱x pumarate̱xe ínagugüxü̃.

Norü taxre ga to ga popera ga ãẽ̱xgacügüchiga ümatüxü̃ 14:2

Rü nüma ga Achá rü Tupanaga naxĩnü rü norü Cori ga Tupanape̱xewa mexü̃ naxü.