Wenaxarü naxümatü ga Tupanaarü mugü 12:10 - Tupanaarü Ore

¹⁰ Natürü ngẽxguma marü pichoü̃gu i ngẽma natü i Yudáü̃ rü nawa pemaxẽgu i ngẽma naane i Cori ya Tupana tá pexna ãxü̃, rü nüma rü tá pexna nadau rü tá pexü̃ ínapoxü̃ naxme̱xwa i ngẽma perü uanügü i pexü̃ íchomaeguãchixü̃ rü taxuca̱xtama pemuü̃e rü pexoegaãẽgü.

Wenaxarü naxümatü ga Tupanaarü mugü 12:10 Referans Kwoze

Echequié 34:28

Rü taxuxü̃táma i togü i nachixü̃anegü chorü duü̃xü̃gümaxã inacua̱x. Rü woo ngẽma naeü̃gü i düraexü̃ rü taxũtáma wena nanangõ̱xcu i chorü duü̃xü̃gü. Rü taãẽãcüma tá namaxẽ rü taxuca̱xtama namuü̃e.

Yeremía 33:11

Rü tá nüxü̃ pexĩnüe nax taãẽãcüma aita naxüexü̃ i duü̃xü̃gü rü tá nüxü̃ pexĩnüe nax taãẽãcüma nügümaxã yadexagüxü̃ i ngẽma ãxma̱xgüchaü̃xü̃ rü ãtegüchaü̃xü̃. Rü duü̃xü̃gü rü ñanagürügü tá: “¡Moxẽ nüxna pexã ya yima Cori ya Tupana ya Guxãétüwa Ngẽxmacü, erü nüma rü namecüma rü norü ngechaü̃ rü tagutáma nagu̱x!” ñanagürügü tá. Rü pema rü chopatawa tá penana i perü ãmaregü i namaxã moxẽ choxna pexãgüxü̃. Rü choma rü tá nüxü̃ charüngü̃xẽxẽxü̃ i ñaa naanearü duü̃xü̃gü nax noxrirüxü̃ nataãẽgüxü̃ca̱x. Rü choma ya Cori ya Tupana nixĩ i nüxü̃ chixuxü̃ i ngẽma —ñanagürü.

Wenaxarü naxümatü ga Tupanaarü mugü 11:31

Pemax rü marü pichoü̃chaü̃ i ngẽma natü i Yudáü̃ nax nagu pichocuxü̃ca̱x i ngẽma naane i perü Cori ya Tupana tá pexna ãxü̃. Rü ngẽxguma tá marü peyapuxgu rü nawa pemaxẽgu i ngẽma naane, ¡rü nagu pexĩ i guxü̃ma i ngẽma mugü rü ucu̱xẽgü i ñu̱xma pexna chaxãxü̃!

Wenaxarü naxümatü ga Tupanaarü mugü 4:22

Rü ngẽmaãcü i choma rü ñaa tátama i naanegu chayu, rü taxũtáma chixüe i ngẽma natü i Yudáü̃. Natürü i pema rü tá pichoü̃ rü tá peyapu i ngẽma naane i mexü̃.

Wenaxarü naxümatü ga Tupanaarü mugü 3:27

¡Rü yima ma̱xpǘne ya Pichátape̱xegu naxĩnagü rü ngẽma nórteguama, rü súrguama, rü ésteguama, rü oésteguama nadawenü! ¡Natürü taxũtáma quixüe i ngẽma natü i Yudáü̃!

Echequié 38:8

Rü mucü ya taunecü ngupe̱xtüguwena rü cuxca̱x tá ínangu i wüxi i mu nax naxca̱x ícuyagoõchixü̃ca̱x i wüxi i nachixü̃ane ga daiwa yexmaxü̃ natürü i ñu̱xma rü wenaxarü marü mexü̃. Rü yema duü̃xü̃gü rü noxri muxü̃ma ga nachixü̃anegu nawoonemare rü norü naane rü poraãcü nangeãcu. Natürü wenaxarü Iraéane i máxpü̱xanexü̃ca̱x nawoegu. Rü ñu̱xma rü guxü̃ma i nümagü rü ngéma nangẽxmagü rü taãẽãcü ngéma namaxẽ.

Echequié 34:25

Rü chorü carnérugümaxã tá chanaxü i chorü uneta nax taãxẽwa nangẽxmagüxü̃ca̱x. Rü nachixü̃anewa tá chayanaxoxẽxẽ i ngẽma aigü i düraexü̃ nax ngẽmaãcü taãẽãcüma ngẽma naanewa namaxẽxü̃ca̱x rü naixnecügu napegüxü̃ca̱x.

Echequié 28:26

Rü ngéma rü tá taãẽãcüma namaxẽ rü taxúetama tanachixewegü. Rü tá naxüpatagü rü úbamaxã tá natoegü. Rü choma rü tá chanapoxcue i guxü̃ma i ngẽma nachixü̃anegü i nüxna ngaicamagüxü̃ i guxchaxü̃ naxca̱x ínguxẽẽxü̃. Rü ngẽmaãcü i ngẽma duü̃xü̃gü rü tá nüxü̃ nacua̱xgü nax choma yixĩxü̃ i Iraétanüxü̃arü Cori ya Tupana chixĩxü̃” —ñanagürü ga Tupana.

Yeremía 32:37

Rü yexguma chorü duü̃xü̃gümaxã poraãcü chanuxgu rü muxü̃ma ga nachixü̃anegu chanawoone. Natürü wena tá chananutaque̱xe i ngẽma chorü duü̃xü̃gü rü daa Yerucharéü̃cax tá chanawoeguxẽxẽ. Rü ngẽxguma i nümagü rü taãẽãcüma tá namaxẽ rü taxũtáma ãũcümaxü̃wa nangẽxmagü.

Yeremía 23:6

Rü ngẽxguma nüma ãẽ̱xgacü yixĩxgu rü Yudáane rü taxũtáma to i nachixü̃ane namaxã inacua̱x rü ngẽma Iraéanearü duü̃xü̃gü rü taxuca̱xtama namuü̃e. Rü ngẽma tá namaxã naxugüãxü̃ ya yimá ãẽ̱xgacü rü “Cori ya Tamaxã Poracü”, tá nixĩ i naéga —ñanagürü ga Tupana.

Ucu̱xẽgüchiga 1:33

Natürü yíxema chauga ĩnüxe rü taãẽgu tá ítamaxü̃, rü taxuca̱xma ta̱xacürü ãũcümaxü̃ca̱x tamuü̃ —ñanagürü i ngẽma cua̱x.

Wiyaegü 4:8

Choma rü taãẽãcü ichayacaãchi rü ngẽxgumatama mea chape, erü nüxü̃ chacua̱x, Pa Corix, nax cuma rü choxna cudauxü̃.

Nüxíraxü̃xü̃ ga popera ga ãẽ̱xgacügüchiga 4:25

Rü yexguma Charomóü̃ maxü̃gu rü ga Yudáanecüã̱xgü rü yema togü ga Iraéanecüã̱xgü rü nügü nangechaü̃gü rü taãẽãcü ínamaxẽ. Rü nórtewaama rü ĩane ga Dáü̃wa inaxügü ñu̱xmata ĩane ga Bechébawa nangu ga súrwaama rü wüxichigü taãẽãcü namaxẽ natüxü̃wa ga nanetügü ga igueragü ga napataxü̃ tüpechitaxü̃.

1 Chamué 7:12

Yemawena ga Chamué rü wüxi ga nuta nayaxu, rü ĩane ga Mispá rü ĩane ga Chéü̃arü ngãxü̃gu nanaxǘ ga gumá nuta. Rü Ebéü̃-échegu nanaxüéga. Rü ñu̱xũchi ñanagürü: —Nüma ya Cori ya Tupana rü ñu̱xmarüta taguma nüxü̃ narüchau nax tüxü̃ nangü̃xẽẽxü̃ —ñanagürü.

Yochué 4:12

Rü yexgumarüxü̃ ta naxnemaxã Yudáü̃wa nichoü̃ ga yema daiwa ĩxü̃ ga Rubéü̃tanüxü̃, rü Gáxtanüxü̃, rü ngãxü̃tücumü ga Manachétanüxü̃. Rü nüma rü yema togü ga Iraétanüxü̃pe̱xe naxĩ, yema Moiché namaxã nüxü̃ ixuxü̃rüxü̃.

Yochué 3:17

Rü yemaacü ga guxü̃ma ga yema duü̃xü̃gü rü paanexü̃wa nichoü̃ nawa ga yema natü ga Yudáü̃. Rü yexgumayane ga yema chacherdótegü ga yangegüxü̃ ga yema baú ga Cori ya Tupanaarü mugüchixü̃ rü natüarü ngãxü̃tamawa namaxã nayachaxãchitanü ga paanexü̃wa.

Wenaxarü naxümatü ga Tupanaarü mugü 33:28

Rü pemax, Pa Iraétanüxü̃x, rü taxuxü̃táma pexü̃ nachixewe i perü naanewa. Rü petaagü rü taãẽãcüma tá nawa namaxẽ. Rü perü naanewa rü tá pexü̃́ nangẽxma i perü triguchitaü̃gü rü úbachitaxü̃gü. Rü tagutáma pexü̃́ nataxu ya pucü ya dauxü̃wa ne ũcü.

Wenaxarü naxümatü ga Tupanaarü mugü 33:12

Rü nüma ga Moiché rü Bẽyamíü̃tanüxü̃chiga nidexa rü ñanagürü: —Cori ya Tupana pexü̃ nangechaxü̃ rü ngẽmaca̱x taãẽãcüma pemaxẽ. Rü nüma rü guxü̃guma pexna nadau rü guxü̃gutáma naxme̱xtüü̃wa pengẽxmagü —ñanagürü.

Wenaxarü naxümatü ga Tupanaarü mugü 9:1

Moiché rü Iraétanüxü̃xü̃ ñanagürü: —¡Iperüxĩnüe, Pa Iraétanüxü̃x! Marü nawa nangu nax pichoü̃xü̃ i ngẽma natü i Yudáü̃ rü nagu pichocuxü̃ i ngẽma naane rü ípenawoxü̃xü̃ i ngẽma duü̃xü̃gütücumügü i pexü̃ rümumaegüxü̃ rü pexü̃ rüporamaegüxü̃ i nawa maxẽxü̃ ya yima ĩanegü ya itaxü̃ne ya ima̱xtapü̱xarü poxeguã̱xgüne.

Ínachoxü̃xü̃chiga 33:14

Rü yexguma ga Tupana rü Moichéxü̃ nangãxü̃ rü ñanagürü: —Chomatátama cuxü̃ chaxümücü, rü tá cuxü̃ charüngü̃xẽxẽxü̃ —ñanagürü.

Yochué 11:23

Rü yemaacü nixĩ ga Yochué ga napuxü̃ãxü̃ ga yema naanegü yema Cori ya Tupana Moichémaxã nüxü̃ ixuxü̃rüxü̃. Rü ñu̱xũchi yema Iraétücumügüxü̃ nayanu ga yema naane nax wüxitücumüchigü nüxü̃́ yexmaxü̃ca̱x ga noxrütama naane. Rü yemawena rü marü nataxuma ga dai ga yema naanewa.

Nüxíraxü̃xü̃ ga popera ga ãẽ̱xgacügüchiga 8:56

—Poraãcü tamaxã namecüma ya tórü Cori ya Tupana ya tüxü̃ ípoxü̃cü nüxna i tórü uanügü, yema inaxunetaxü̃rüxü̃, yerü nüma rü aixcüma nayanguxẽxẽ ga guxü̃ma ga yema norü unetagü ga mexü̃ ga norü duü̃ ga Moichéwa nüxü̃ yaxuxü̃.

Yochué 14:1

Rü nüma ga Yochué rü gumá chacherdóte ga Ereachá, rü ñu̱xũchi yema Iraétanüxü̃arü ãẽ̱xgacügü nixĩ ga nüxü̃ yanuxü̃ ga yema Canaáü̃arü naane.

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 22:18

Rü ñanagürü: —Cori ya Tupana rü petanüwa nayexma, rü ngẽmaca̱x i ngẽma togü i nachixü̃anegü rü tama pemaxã daigu narüxĩnüe rü guxü̃wama taãẽwa pengẽxmagü. Rü nüma ya Tupana rü cho̱xme̱xwa nanangexmagüxẽxẽ i guxü̃ma i duü̃xü̃gü i ñaa nachixü̃anewa maxẽxü̃. Rü ñu̱xmax rü Tupaname̱xẽwa rü norü duü̃xü̃güme̱xẽwa nangẽxma i ñaa naane.

Echequié 38:11

Rü cuma rü tá ñacurügü: ‘Naxca̱x tá íchayagoõchi i wüxi i nachixü̃ane i turaxü̃ i tama nüxü̃ cuáxü̃ nax nügü ínapoxü̃xü̃ rü ngẽma norü duü̃xü̃gü rü taãẽãcü imaxẽxü̃ rü nagu rüxĩnüexü̃ nax taxuxü̃táma i ta̱xacü nüxü̃́ ngupetüxü̃. Rü guxü̃nema ya yima norü ĩanegü rü nataxuma i norü poxeguxü̃gü rü nataxuma i norü ĩã̱xgü rü nataxuma i norü wãxtaruü̃gü.