Wenaxarü naxümatü ga Tupanaarü mugü 10:9 - Tupanaarü Ore
9 Rü yema Lebítanüxü̃ rü taxuxü̃ma ga naane nüxna naxǘ natanüwa ga yema togü ga Iraétanüxü̃. Yerü nümatama ga Cori ya Tupana nixĩ ga nüxna ücü norü ãmareruxü̃.
Rü ngẽma chacherdótegü rü taxũtáma ngẽma togü i Iraétanüxü̃rüxü̃ nüxü̃́ nangẽxma i norü naane i Iraéanewa. Rü choma tá nixĩ i norü naanerüxü̃ chixĩxü̃ i Iraéanewa. Rü ngẽmaãcü i choma rü tá ngẽma chacherdótegüarü chixĩ.
Natürü nüma ga Moiché rü natü ga Yudáü̃arü tocutüwa rü marü ü̃pa nüxíra nüxü̃ nayanu ga norü naane ga Rubéü̃tücumü rü Gáxtücumü rü ngãxü̃tücumü ga Manachétanüxü̃. Natürü ga Lebítanüxü̃ rü taxuxü̃ma ga naane nüxna naxã.
Rü yexguma yaxugüãgu ga guxü̃ma ga yatügü ga Lebítanüxü̃ ga wüxi ga tauemacü rüe̱xna yexera nüxü̃́ yexmagüxü̃ rü 23,000 nixĩ ga norü mu. Rü yemagü rü tama togü ga Iraétanüxü̃rüxü̃ iwǘgüéga, yerü taxuxü̃ma ga norü naane nüxna naxãgü.
Rü ngẽma nachicawa i Cori ya Tupanape̱xewa rü tá penaxüchiga wüxigu namaxã i penegü rü pexacügü rü perü puracütanüxü̃ rü ngẽma Lebítanüxü̃ i petanüwa maxẽxü̃. Erü nümagü i Lebítanüxü̃ rü taxuxü̃ma i naanegü nayauxgü i perü naanewa.
Rü ngẽmaãcü i ngẽma Lebítanüxü̃ i ngearü naaneã̱xgüxü̃ rü ngẽma to i nachixü̃anecüã̱x i perü ĩanewa ngẽxmagüxü̃ rü tá naxãwemügü ñu̱xmata mea nüxü̃́ yangu. Rü ngẽmaãcü i nüma ya Cori ya perü Tupana rü tá pexü̃ narüngü̃xẽxẽ nawa i guxü̃ma i ta̱xacü i pexüxü̃.