Wenaxarü naxümatü ga Tupanaarü mugü 10:2 - Tupanaarü Ore

² Rü ngẽxguma i choma rü ngẽma nutatachinügügu tá chanaxümatü ga yematama ore ga noxri nagu chaxümatüxü̃ ga yema nüxíraxü̃xü̃ ga nutatachinü ga quipuxẽẽxü̃. Rü ñu̱xũchi ngẽma baúgu tá namaxã cunguxü̃!” ñanagürü choxü̃ ga Tupana.

Wenaxarü naxümatü ga Tupanaarü mugü 10:2 Referans Kwoze

Nüxíraxü̃xü̃ ga popera ga ãẽ̱xgacügüchiga 8:9

Rü yema baúwa nayexma ga yema taxre ga nutatachinü ga yexma nucuxü̃ ga Moiché ga yexguma ma̱xpǘne ga Oréxwa nayexmagügu. Rü yema nutatachinügügu naxümatü ga yema Tupanaarü uneta ga Iraétanüxü̃maxã naxüxü̃ ga yexguma Equítuanewa ínachoxü̃gu.

Popera ga Yudíugü ga yaxõgüxü̃ca̱x ümatüxü̃ 9:4

Rü yéma nayexma ga yema mecha ga úirunaxca̱x ga nawa yagugüãxü̃ ga pumara ga yixixü̃. Rü yéma nayexma ta ga yema baú ga guxü̃wama úirumaxã tüxünexü̃ ga Tupanaarü mugü nagu nucuxü̃. Rü yematama baúarü aixepewa nayexma ga wüxi ga napaxü̃ ga úirunaxca̱x ga maná ga daxũwa rüyixü̃maxã ããcuxü̃. Rü yexgumarüxü̃ ta yema baúarü aixepewa nayexma ga Aróü̃arü caxü̃ruxü̃ ga rüxüxü̃ne, rü gumá nutagü ga Tupanaarü mugü nagu ümatügüxü̃.

Wenaxarü naxümatü ga Tupanaarü mugü 10:5

Rü yexguma ga choma rü ícharüxĩ nawa ga guma ma̱xpǘne. Rü ñu̱xũchi yema baúgu chananucu ya yema taxre ga nutatachinügü, yema Cori ya Tupana chomaxã nüxü̃ ixuxü̃rüxü̃. Rü ñu̱xma rü ta rü ngématama nangẽxmagü —ñanagürü ga Moiché.

Wenaxarü naxümatü ga Tupanaarü mugü 4:13

Rü nüma ga Cori ya Tupana rü pexü̃ nüxü̃ nacua̱xẽxẽ ga yema norü unetagü ga 10 i mugü ixĩxü̃ ga taxre ga nutatachinügu naxümatüxü̃. Rü ñu̱xũchi pexü̃ namu nax aixcüma peyanguxẽẽxü̃ca̱x.

Ínachoxü̃xü̃chiga 40:20

Rü yemawena ga Moiché rü nanade ga yema nutatachinügü ga Tupanaarü mugü nagu ümatüxü̃, rü yema baúgu nayanucu. Rü ñu̱xũchi nananucu ga naxpawerugü ga yema baú rü nayaxǘcuchi ga naxã́taxü̃. Rü Tupanapataarü aixepegu nayaxǘ. Rü ñu̱xũchi nananucu ga yema tüyemachiãruxü̃ rü yemamaxã nayatüyepe̱xe ga yema baú yema Cori ya Tupana namaxã nüxü̃ ixuxü̃ãcü.

Ínachoxü̃xü̃chiga 34:1

Rü nüma ga Cori ya Tupana rü Moichéxü̃ ñanagürü: —¡Ẽcü, cumatama naxü i taxre i nutatachinügü i ngẽma nanoxriraxü̃xü̃tama, nax ngẽmagu chanaxümatüxü̃ca̱x i ngẽma chorü mugü ga yema quipuexẽẽxü̃ ga nutatachinügügu chaxümatüxü̃!

Norü taxre ga to ga popera ga ãẽ̱xgacügüchiga ümatüxü̃ 5:10

Rü yema baúwa rü nüxicatama nayexma ga yema taxre ga nutatachinügü ga nawa naxümatüxü̃ ga Tupanaarü uneta ga Iraétanüxü̃gümaxã naxüxü̃. Rü yexguma Equítuanewa ínachoxü̃gu rü Ma̱xpǘne ga Oréxwa nayexmagu rü yexguma nixĩ ga Moiché ga yema baúgu nanucuãxü̃ ga yema taxre ga nutatachinü.

Ínachoxü̃xü̃chiga 32:19

Rü yexguma nüma ga Moiché yema duü̃xü̃gü ípegüxü̃wa nanguxgu, rü nüxü̃ nadau ga yema wocaxacüchicüna̱xã, rü nüxü̃ nadau ga nax ínapetaegüxü̃ rü íyaxü̃ãchitanüxü̃ ga duü̃xü̃gü. Rü yemaca̱x nanuxũchi ga Moiché rü norü numaxã inayachi̱x ga yema taxre ga nutatachinü ga Tupanaarü mugü nagu ümatüxü̃. Rü ma̱xpǘnepechinügu nawoonetüchimare.