Danié 9:15 - Tupanaarü Ore

¹⁵ Natürü ga cumax, Pa Cori Pa Torü Tupanax, rü nũxcüma icunawe̱x ga yema taxü̃ ga curü pora ga yexguma Equítuanewa ícunguxü̃xẽẽgu ga curü duü̃xü̃gü. Rü yemaacü cugü cutachigaxẽxẽ ñu̱xmata ñoma i ngunexü̃wa nangu. Natürü ga toma rü poraãcü cupe̱xewa chixexü̃ taxü.

Danié 9:15 Referans Kwoze

Neemía 9:10

Rü cuma rü Faraóü̃pe̱xewa rü guxü̃ma ga norü ngü̃xẽẽruü̃güpe̱xewa, rü guxü̃ma ga yema nachixü̃anecüã̱xgü ga duü̃xü̃güpe̱xewa, rü cuyaxüchigüama ga taxü̃ ga mexü̃gü ga curü üünemaxã cuxüxü̃. Yerü nüxü̃ cudau ga ñuxãcü totanüxü̃maxã chixri inacua̱xgüxü̃, rü ngẽmaca̱x cutachiga i ñu̱xmax.

Danié 9:5

Rü toma rü poraãcü pecadu cupe̱xewa taxüe rü chixexü̃ taxüe. Rü tamaxẽmare rü tama cugu tarüxĩnüe. Rü nüxü̃ tarüxoe i curü mugü rü curü ucu̱xẽgü.

Neemía 1:10

Toma rü curü duü̃xü̃gü i curü puracütanüxü̃ tixĩgü, rü cuma rü curü poramaxã torü uanügüme̱xẽwa toxü̃ ícunguxü̃xẽxẽ.

Ínachoxü̃xü̃chiga 32:11

Natürü nüma ga Moiché rü ñaa dexamaxã Cori ya Tupanaxü̃ narüngüxmüxẽẽchaü̃: —Pa Corix, ¿tü̱xcüü̃ poraãcü namaxã cunu i ngẽma curü duü̃xü̃gü ga cumatama curü poramaxã ícunguxü̃xẽẽxü̃ ga Equítuanewa?

Ínachoxü̃xü̃chiga 14:18

Rü ngẽxguma Faraóü̃pe̱xewa rü guxü̃ma i ngẽma norü churaragüpe̱xewa chaugü chawe̱xgu nax ñuxãcü chaporaxü̃, rü nüma i Equítuanecüã̱xgü rü tá nüxü̃ nicua̱xãchitanü nax aixcüma Cori ya Tupana chixĩxü̃ —ñanagürü.

Ínachoxü̃xü̃chiga 6:1

Rü nüma ga Cori ya Tupana rü Moichéxü̃ nangãxü̃, rü ñanagürü: —Ñu̱xma rü tá nüxü̃ cudau i ngẽma Faraóü̃maxã tá chaxüxü̃. Erü cho̱xme̱x ya poranemaxã tá guxchaxü̃ naxca̱x íchananguxẽxẽ. Rü ngẽmaãcüxicatama tá nixĩ i chorü duü̃xü̃güxü̃ yangexü̃. Rü nüma rü tá nuãcü nachixü̃anewa ínanamuxü̃ —ñanagürü ga Tupana.

2 Corintios 1:10

Rü Tupana rü toxü̃ ínanguxü̃xẽxẽ nawa ga yema guxchaxü̃ ga yuwa toxü̃ gagüchaü̃xü̃. Rü ngẽxgumarüxü̃ tá ta toxü̃ ínanguxü̃xẽxẽ nawa i ñaa taxü̃ i guxchaxü̃ i ñu̱xma toxü̃́ ngẽxmaxü̃. Rü aixcüma tayaxõgü nax nüma rü guxü̃gutáma ngẽmaãcü toxü̃ nangü̃xẽẽxü̃.

Ore i mexü̃ ga Luca ümatüxü̃ 18:13

Natürü ga gumá yatü ga Rómaarü ãẽ̱xgacüca̱x diẽru ngĩxü̃ decü, rü yáxü̃gu narüxã̱ũ̱x. Rü namuü̃ ga daxũ nax nadawenüxü̃, rü yema norü ngechaü̃maxã nügü napaxremü, rü ñanagürü: “Pa Tupanax, ¡Cuxü̃́ changechaü̃tümüxü̃! Erü wüxi i pecaduã́xü̃ chixĩ”, ñanagürü ga gumá yatü.

Ore i mexü̃ ga Luca ümatüxü̃ 15:21

Rü yexguma ga nüma ga tümane rü ñanagürü tüxü̃: “Pa Papax, marü chixexü̃ Tupanape̱xewa chaxü, rü cupe̱xewa rü ta. Rü ngẽmaca̱x marü tama name nax ‘chaune’, ñacuxü̃ choxü̃”, ñanagürü.

Yeremía 32:10

Rü naxca̱x chadau ga ñuxre ga duü̃xü̃gü, rü yemape̱xewa chanaxümatü nax aixcüma naxca̱x chataxexü̃ ga yema naane. Rü ñu̱xũchi chauéga nagu chaxümatü ga yema popera rü chanaxütanü ga yema naane.

Ichaía 55:13

Rü ngẽma tuxugü írüxügüchiréxü̃wa rü tá narüxügü i pinugü. Rü ngẽma naxcugü írüxügüchiréxü̃wa rü tá narüxügü i nanetügü i yixixü̃ i mirtu. Rü guxü̃ma i ñoma i naanewa ngẽxmagüxü̃ rü tá Tupanaxü̃ nicua̱xüü̃gü rü ngẽmaãcü i duü̃xü̃gü rü tá nüxü̃ nacua̱xgü nax Tupana rü guxü̃guma nangẽxmaechaxü̃ —ñanagürü ya Tupana.

Wiyaegü 106:8

Natürü nüma ga Tupana rü Equítuanecüã̱xarü ãẽ̱xgacüme̱xẽwa ínananguxü̃xẽẽama yerü taxucürüwama inayanaxoxẽxẽ ga norü uneta ga marü Abraáü̃maxã nüxü̃ yaxuxü̃.

Nüxíraxü̃xü̃ ga popera ga ãẽ̱xgacügüchiga 8:51

Erü curü duü̃xü̃gü nixĩ rü cuma nixĩ ga Equítuanewa ícunagaxü̃xü̃ ga ngextá poraãcü ngúxü̃ íyangegüxü̃wa.

Ínachoxü̃xü̃chiga 9:16

Rü ñu̱xmarüta cuxü̃ chamaxẽxẽ rü tama cuxü̃ chiima̱x, erü cuxü̃ nüxü̃ chadauxẽẽchaü̃ nax ñuxãcü chaporaxüchixü̃. Erü chaugü nüxü̃ chacua̱xẽẽchaü̃ i guxü̃ma i duü̃xü̃gü i ñaa naanewa maxẽxü̃.

Ínachoxü̃xü̃chiga 6:6

¡Rü ngẽmaca̱x i ñu̱xma rü namaxã nüxü̃ yarüxu i Iraétanüxü̃, rü choma ya Cori ya Tupana rü tá Equítuanecüã̱xme̱xẽwa íchananguxü̃xẽxẽ! Rü ngẽma yáxü̃ i puracügü i Equítuanecüã̱x naétüwa ngẽxmaxẽẽxü̃wa tá íchananguxü̃xẽxẽ. Rü tá ichanawe̱x i chorü pora, rü taxü̃ i ãũcümaxü̃gümaxã tá íchananguxü̃xẽxẽ.

Wenaxarü naxümatü ga Tupanaarü mugü 5:15

¡Rü nüxna nacua̱xãchi ga Equítuanewa rü cuma rü norü mugüruxü̃ quixĩxü̃, rü choma nax curü Tupana chixĩxü̃ rü yema chorü pora ga taxü̃maxã cuxü̃ íchagaxüchi! Rü ngẽmaca̱x i choma nax perü Cori ya Tupana chixĩxü̃ rü pexü̃ chamu nax nagu perüngü̃ẽxü̃ i ngẽma ngü̃xchigaarü ngunexü̃.

Ínachoxü̃xü̃chiga 13:3

Rü nüma ga Moiché rü Iraétanüxü̃xü̃ ñanagürü: —¡Nüxna tá pecua̱xãchie i ñaa ngunexü̃ i nagu Cori ya Tupana taxü̃ i norü poramaxã pexü̃ ímuxü̃xü̃ ga Equítuanewa i ngexta chixri pemaxã inacua̱xgüxü̃wa rü norü puracütanüxü̃xü̃ pexü̃ yaxĩgüxẽẽxü̃wa! Rü ngẽmaca̱x i ngẽxguma penaxüchigagügu i ñaa ngunexü̃ rü taxũtáma paũ i pu̱xẽẽruü̃ã́xü̃ pengõ̱xgü.

Ínachoxü̃xü̃chiga 13:9

Rü ngẽma nax penaxüchigaxü̃ i ngẽma Üpetüchiga rü ñoma wüxi i perü cua̱xruxü̃ i pechacüxüwa rüe̱xna pecatüwa ngẽxmaxü̃ tá pexna nüxü̃ nacuã̱xãchixẽxẽ nax guxũgutáma Cori ya Tupanaarü ucu̱xẽxü̃ pixuxü̃, erü nüma nixĩ ga norü poramaxã Equítuanewa pexü̃ ínanguxü̃xẽẽxü̃.

Ínachoxü̃xü̃chiga 13:14

Rü ngẽxguma tá penegü pexna cagügu rü ñaxgu: “¿Ta̱xacüchiga nixĩ i ñaa pexüxü̃?” ñaxgu, rü pema rü ñaãcü tá penegüxü̃ pengãxü̃: “Yexguma Equítuanewa tayexmagügu, rü nüma ga Cori ya Tupana rü norü poramaxã toxü̃ ínanguxü̃xẽxẽ. Yerü ga Equítuanecüã̱xgü rü ngúxü̃ toxü̃ ningexẽẽgü rü poraãcü puracü toétü nanugü.

Ínachoxü̃xü̃chiga 13:16

Rü ngẽma nax tanaxüchigaxü̃ i ngẽma Üpetüchiga rü ñoma wüxi i perü cua̱xruxü̃ i pechacüxüwa rüe̱xna pecatüwa ngẽxmaxü̃ tá pexna nüxü̃ nacuã̱xãchixẽxẽ nax ñuxãcü Cori ya Tupana norü poramaxã Equítuanewa toxü̃ ínguxü̃xẽẽxü̃” —ñanagürü ga Moiché.

Norü taxre ga popera ga ãẽ̱xgacügüchiga 21:15

Erü ngẽma chope̱xewa naxügüxü̃ i chorü duü̃xü̃gü rü nachixe. Rü choxü̃ nanuxẽẽgü ga yexguma norü o̱xigü Equítuanewa íchoxü̃gucürüwa rü ñu̱xmata ñoma i ngunexü̃wa nangu” —ñanagürü ga Tupana.

Norü taxre ga to ga popera ga ãẽ̱xgacügüchiga ümatüxü̃ 6:37

rü ngẽxguma ngẽma nachixü̃ane i nawa nagagüãxü̃wa rü cuxna nacua̱xãchiegu, rü cuxna nacagügu, rü cumaxã nüxü̃ yaxugügu nax chixexü̃ naxügüxü̃,

Neemía 1:6

Rü ngẽmaca̱x i ñu̱xma rü cuxü̃ chaca̱a̱xü̃ nax choxü̃́ nüxü̃ cuxĩnüxü̃ i ñaa chorü yumüxẽ i chütacü rü ngunecü cumaxã nüxü̃ chixuxü̃ naxca̱x i ngẽma curü duü̃xü̃gü i Iraétanüxü̃. Rü nüxü̃ chacua̱x nax cupe̱xewa chixexü̃ taxüxü̃ i toma i Iraétanüxü̃, rü woo i choma rü chautanüxü̃ rü cupe̱xewa chixexü̃ taxügü.

Ichaía 64:4

Rü nũxcümacürüwa taguma texé nachiga taxĩnü rü texé nüxü̃ tadau i to i Tupana i naxüxü̃ i ngẽma cuma cuxüxü̃ tümaca̱x ya yíxema cuxü̃́ yaxõgüxe.

Yeremía 14:20

Rü nüxü̃ tacua̱x, Pa Corix, nax poraãcü chixexü̃ taxüxü̃, naxrüxü̃ ga yema nũxcümaü̃güxü̃ ga torü o̱xigü. Rü cupe̱xewa nixĩ i chixexü̃ taxügüxü̃.

Auxexü̃chiga 3:42

Pa Corix, toma rü chixexü̃ taxü rü tama cuga taxĩnüe. Rü ngẽma rü cuma rü tama cunangupetüxẽẽmare.

Echequié 5:6

Natürü yema norü duü̃xü̃gü ya yima ĩane ya Yerucharéü̃ rü chomaxã nanue rü tama naga naxĩnüechaü̃ i chorü mugü rü ucu̱xẽgü. Rü guxü̃nema ya yima togü i nachixü̃anegüarü ĩanegü ya nüxna ngaicamanearü duü̃xü̃güarü yexera chixexü̃gu namaxẽ i ngẽma Yerucharéü̃cüã̱x rü tama naga naxĩnüe i ngẽma chorü mugü rü chorü ucu̱xẽgü.