Danié 9:11 - Tupanaarü Ore

¹¹ Rü guxü̃ma i chautanüxü̃ i Iraétanüxü̃ rü tama naga naxĩnüe i curü mugü. Rü cuxna nixĩgachi rü tama naga naxĩnüe i curü ucu̱xẽgü. Rü yemaca̱x ga yema poxcu ga curü duü̃ ga Moichéwa nüxü̃ quixuxü̃ rü togu nangu.

Danié 9:11 Referans Kwoze

Yeremía 9:26

Rü ngẽmaãcü tá chanapoxcue i ngẽma Equítuanecüã̱xgü, rü Yudátanüxü̃, rü Edóü̃tanüxü̃, rü Amóü̃tanüxü̃, rü Moátanüxü̃, rü ñu̱xũchi guxü̃ma i ngẽma duü̃xü̃gü i ínachianexü̃wa maxẽxü̃ rü nügü idüerugüxü̃ i nügü iwiü̃cha̱xmüü̃pe̱xechiraü̃gümarexü̃ natürü tama chauga ĩnüexü̃. Rü tá chanapoxcue i guxü̃ma i ngẽma Iraétanüxü̃ erü chixexü̃gu namaxẽ rü tama chauga naxĩnüe —ñanagürü.

Ichaía 1:3

Rü ngẽma woca rü norü yoraxü̃ nacua̱x, rü ngẽma búru rü nüxü̃ nacua̱x i norü chibüchica i norü yora naxca̱x üxü̃, natürü ngẽma chorü duü̃xü̃gü i Iraétanüxü̃ rü tama choxü̃ nacua̱xgü rü tama naãẽxü̃ nicua̱x —ñanagürü ya Tupana.

Ichaía 43:28

Rü ngẽma perü ãẽ̱xgacügü rü chixexü̃ nawa naxügü ga chopata ya taxü̃ne. Rü yemaca̱x nixĩ ga nüxna chixũgachixü̃ ga Acóbuarü duü̃xü̃gü ga Iraétanüxü̃ nax norü uanügü nada̱i̱xü̃ca̱x rü chixexü̃ namaxã yaxugüexü̃ca̱x —ñanagürü ya Tupana.

Yeremía 2:29

¿Rü ta̱xacüca̱x nixĩ i chauchiga pidexagüxü̃? Rü guxãma i pema nixĩ i chomaxã perüxuanüxü̃. Rü choma ya Cori ya Tupana nixĩ i pemaxã nüxü̃ chixuxü̃ i ngẽma.

Yeremía 32:23

Natürü yexguma torü o̱xigü ñaa naanewa ngugügu rü nayauxgüãgu, rü tama cuga naxĩnüe rü tama nagu naxĩ ga yema ucu̱xẽgü ga namaxã nüxü̃ quixuxü̃. Rü taxuxü̃ma naxügü ga yema namaxã nüxü̃ quixuxü̃. Rü ngẽmagagu toxca̱x ícunangu̱xẽxẽ i guxü̃ma i ngẽma guxchaxü̃gü i ñu̱xma nawa tangexmagüxü̃.

Yeremía 40:3

Rü ñu̱xma rü marü ningu ga yema guxchaxü̃ ga namaxã pexü̃ naxãxũnexü̃. Erü ngẽma cutanüxü̃ rü Cori ya Tupanape̱xewa chixexü̃ naxügü, rü ngẽmaca̱x nixĩ i ngẽmaãcü pexü̃ nangupetüxü̃ erü tama naga pexĩnüe.

Yeremía 44:23

Rü ngẽma guxchaxü̃ i ñu̱xma nawa pengẽxmagüxü̃ rü marü pexca̱x ínangu nagagu nax yema tupananetagüca̱x pumarate̱xe pegugüxü̃. Rü yemaacü Cori ya Tupanape̱xewa poraãcü chixexü̃ pexü yerü tama naga pexĩnüe ga norü ucu̱xẽgü rü norü mugü, rü tama peyangu̱xẽxẽ ga yema pemaxã nüxü̃ yaxuxü̃ —ñanagürü.

Danié 9:5

Rü toma rü poraãcü pecadu cupe̱xewa taxüe rü chixexü̃ taxüe. Rü tamaxẽmare rü tama cugu tarüxĩnüe. Rü nüxü̃ tarüxoe i curü mugü rü curü ucu̱xẽgü.

Danié 9:13

Rü guxü̃ma ga yema chixexü̃ rü toxna nangu yematama Moiché ümatüxü̃ ga mugüwa nüxü̃ ixuxü̃rüxü̃. Natürü ga toma rü tama cuxca̱x tadaugü, Pa Cori Pa Torü Tupanax. Rü tama nüxü̃ tarüxoe ga yema torü chixexü̃gü, rü tama nagu tamaxẽ ga curü ore i aixcüma ixĩxü̃.

Chacaría 7:12

Rü ñoma nuta i diamánterüxü̃ nügü nataiarü maxü̃neã̱xgü nax tama naga naxĩnüexü̃ca̱x ga yema Tupanaarü ucu̱xẽ rü norü mugü ga Tupana ya Guxãétüwa Ngẽxmacü Naãxẽ ya Üünecüwa rü nũxcümaü̃güxü̃ ga norü orearü uruü̃gümaxã nüxü̃ ixuxü̃. Rü yemaca̱x ga Cori ya Tupana rü düxwa poraãcü namaxã nanu.

Chacaría 8:13

Rü pemax, Pa Yudáanecüã̱xgüx rü Pa Iraéanecüã̱xgüx, rü woo nax chixexü̃ pemaxã naxuegugüxü̃ i ngẽma togü i nachixü̃anegü, natürü i choma rü tá pexü̃ íchanguxü̃xẽxẽ. Rü pema rü ngẽma togü i nachixü̃anegüarü ngü̃xẽẽruü̃gü tá pixĩgü. ¡Rü ngẽmaca̱x pora pexüe rü taxṹ i pemuü̃exü̃! —ñanagürü.

Wenaxarü naxümatü ga Tupanaarü mugü 8:20

Rü ngẽxguma taxũtáma Cori ya perü Tupanaga pexĩnüegu rü nüma ya Cori ya Tupana rü tá pexü̃ nadai yema nachixü̃anegü ga nawa pichopetüetanüxü̃ nadaixgurüxü̃ —ñanagürü ga Moiché.

Norü taxre ga popera ga ãẽ̱xgacügüchiga 18:12

Rü yema nangupetü yerü yema Iraéanecüã̱xgü rü tama Cori ya norü Tupanaga naxĩnüe rü nüxü̃ naxoe ga yema uneta ga norü o̱xigümaxã nüxü̃ yaxuxü̃. Rü tama naga naxĩnüe ga guxü̃ma ga yema mugü ga Cori ya Tupanaarü duü̃ ga Moiché nüxü̃ ixuxü̃ rü ñu̱xũchi tama yema mugügu namaxẽ.

Yeremía 6:19

¡Pa Duü̃xü̃gü i Ñoma i Naanewa Maxẽxü̃x rü nüxü̃ pexĩnüe i ñaa ore! Rü ñaa chorü duü̃xü̃güca̱x tá íchananguxẽxẽ i wüxi i taxü̃ i guxchaxü̃ i ãũcümaxü̃, nagagu i ngẽma chixexü̃ i nagu naxĩnüexü̃. Erü tama naga naxĩnüechaü̃ i chorü ucu̱xẽgü. Rü ñu̱xũchi nüxü̃ naxoe i ngẽma chorü mugü.

Yeremía 16:11

Rü cuma rü ñaãcü tá cunangãxü̃gü: “Cori ya Tupana rü nüxü̃ nixu rü ñanagürü: ‘Rü ngẽma tá pexü̃ nangupetü yerü yema nũxcümaü̃güxü̃ ga perü o̱xigü rü choxna nixĩgachi rü tupananetachicüna̱xãgüwe narüxĩ, rü naxca̱x nangutaque̱xegü rü nüxü̃ nicua̱xüü̃gü. Rü nümagü rü choxü̃ ínata̱xgü rü tama nayanguxẽẽgü ga yema ucu̱xẽgü ga choma namaxã nüxü̃ chixuxü̃.

Yeremía 30:14

Rü yema nachixü̃anegü ga nüxü̃́ peyaxõgüxü̃ nax pexü̃ ínapoxü̃xü̃ca̱x rü pexü̃ inarüngü̃mae. Erü choma nixĩ i pexü̃ chapoxcuexü̃ ñoma wüxi i perü uanürüxü̃. Rü poraãcü pexü̃ chapoxcue nagagu ga yema muxũchixü̃ ga perü chixexü̃gü rü yema pecadugü ga taxucürüwa texé ixugüxü̃.

Yeremía 44:22

Natürü nüma ga Cori rü marü tama yáxna namaxã naxĩnü ga yema chixexü̃ ga pexügüxü̃ ga nüma poraãcü naxchi naxaixü̃. Rü yemaca̱x ga pechixü̃ane rü ñu̱xma rü nachitaxü̃xicatama ínayaxü, rü taxúema nawa tamaxẽ. Rü ngẽmaãcü i ñu̱xma rü pechixü̃ane rü chixexü̃arü cua̱xruxü̃ nixĩ rü duü̃xü̃gü rü poraãcü namuü̃e i ngẽxguma nüxü̃ nadaugügu ga yema pechixü̃anemaxã ngupetüxü̃.

Chacaría 1:6

Natürü yema chorü ore rü yema chorü mugü ga chorü orearü uruü̃güme̱xẽgu chaxüxü̃, rü perü o̱xigüwa nangu. Rü ñuxre ga nümagü rü cha̱u̱xca̱x nawoegu, rü naxca̱x ínicua̱xgü ga chixexü̃ nax naxügüxü̃, rü ñanagürügü: ‘Rü aixcüma nüma ya Cori ya Tupana ya Guxãétüwa Ngẽxmacü rü ngẽma tórü chixexü̃ãcütama tüxü̃ napoxcue’, ñanagürügü” —ñanagürü ga Tupana.