Danié 4:35 - Tupanaarü Ore

³⁵ Rü ngẽma duü̃xü̃gü i ñoma i naanewa maxẽxü̃ rü cupe̱xewa, Pa Tupanax, rü taxuxü̃ma nixĩgü. Rü cuma cunaxwa̱xexü̃ãcü namaxã icucua̱x i dauxü̃guxü̃ i naane rü ñoma i naane. Rü tataxuma ya texé ya curü poraxü̃ rüyexeraxe. Rü tataxuma ya texé ya tüxü̃́ nangẽxmaxe i pora nax cuxna taca̱xaxü̃ rü ‘¿tü̱xcüü̃ cunaxü i ngẽma cuxüxü̃?’ ñachagürü.

Danié 4:35 Referans Kwoze

Wiyaegü 135:6

Rü nüma ya Cori ya Tupana rü nanaxü i guxü̃ma i ta̱xacü i nüma nanaxwa̱xexü̃ i daxũguxü̃ i naanewa rü ñoma i naanewa. Rü ngẽxgumarüxü̃ ta nanaxü i ngẽma nüma nanaxwa̱xexü̃ i márwa rü natamawa.

Yox 42:2

—Nüxü̃ chacua̱x nax guxü̃ma cuxü̃́ tauxchaxü̃, rü nataxuma i ta̱xacü i cuxü̃́ guxchaxü̃ nax cunaxüxü̃.

Wiyaegü 115:3

Natürü tanangãxü̃ rü ñatagürügü: —Torü Tupana rü daxũguxü̃ i naanewa nangẽxma. Rü nüma rü nanaxü i guxü̃ma i ta̱xacü i nüma nanaxwa̱xexü̃ —ñatagürügü.

Efesios 1:11

Yerü woetama nũxcüma ga Tupana rü tamaxã nanaxuegu nax Cristugagu tá nayauxgüxü̃ i maxü̃ i taguma gúxü̃, yerü yema nixĩ ga nagu naxĩnüxü̃ ga Tupana ya norü ngúchaü̃ãcü naxücü i guxü̃ma.

Ichaía 43:13

Rü choma nixĩ i guxü̃guma Tupana chixĩxü̃. Rü cho̱xme̱xwa rü taxúema tümaarü poramaxã tügü ítapoxü̃. Rü ngẽma choma chaxüxü̃ rü taxúema tayanaxoxẽxẽ —ñanagürü.

Ngechuchuarü ngúexü̃gü ga yamugüxü̃arü puracüchiga 4:28

Rü yemaacü ga yema ãẽ̱xgacügü rü nayanguxẽxẽ ga guxü̃ma ga yema cuma nũxcümama nagu curüxĩnüxü̃ rü nüxü̃ quixuxü̃ rü tá nax yanguxü̃.

1 Corintios 10:22

¿Rü ñuxũ ñapegüxü̃ i ñu̱xmax? ¿Ẽ̱xna penanuxẽẽchaü̃ ya tórü Cori? ¿Ẽ̱xna pexca̱x rü nüxü̃ tarüporamaegü i yixemax?

1 Corintios 2:16

Rü Tupanaarü ore i ümatüxü̃wa rü ñanagürü: “¿Texé nüxü̃ tacua̱x nax ta̱xacügu naxĩnüxü̃ ya tórü Cori? ¿Rü texé nüxü̃ tacua̱x nax Tupanaxü̃ taxucu̱xẽxü̃?” ñanagürü. Natürü yixema nixĩ i aixcüma nüxü̃ icuáxü̃ i ngẽma Cristu nagu rüxĩnüxü̃.

Yox 40:2

—Rü ñu̱xma i choma nax guxãétüwa changexmaxü̃ rü cuxna chaca i cumax nax chomaxã curüxutagaxü̃ rü ¿ẽ̱xna tá quidexachigüamaxü̃ nax choxü̃ cungãxü̃xü̃? —ñanagürü.

Yox 23:13

Rü nüma ya Tupana rü ngẽxguma ta̱xacü naxüxchaü̱̃xgu rü nanaxü. Rü taxúema texé tanaxüchicüxü i ngẽma norü ĩnü.

Yox 34:29

Rü ngẽxguma chi Tupana rüchianegu ¿rü texé tá nüxü̃ tixu nax chixexü̃ taxüxü̃? Rü ngẽxguma duü̃xü̃gücha̱xwa nügü yacu̱xgu ¿rü texé tá nüxü̃ tadauama? Rü nüma nixĩ i nüxna nadauxü̃ ya ĩanegü rü duü̃xü̃gü nax tama namaxã inacua̱xgüxü̃ca̱x i ngẽma ãẽ̱xgacügü i chixexü̃ i duü̃xü̃güxü̃ womüxẽẽxü̃.

Yox 9:4

Rü nüma ya Cori ya Tupana rü naporaxüchi rü ñu̱xũchi nüxü̃ nacua̱xüchi. ¿Rü texé chi Tupanaxü̃ nüxü̃ tarücua̱xmae nax ngẽmaãcü tama tüxna naca̱xaxü̃ca̱x naxca̱x i tümaarü chixexü̃?

1 Chamué 3:18

Rü nüma ga Chamué rü guxü̃xü̃ma Erímaxã nixu rü taxuxü̃ma inicu̱x. Rü nüma ga Erí rü naba̱i̱xãchi rü ñanagürü: —Nüma nixĩ i Cori ya Tupana yixĩxü̃. ¡Ẽcü naxü i ngẽma naxca̱x rümemaexü̃! —ñanagürü.

Ngechuchuarü ngúexü̃gü ga yamugüxü̃arü puracüchiga 5:39

Natürü ngẽxguma Tupanaarü yixĩxgu i ñaa naxügüxü̃, rü taxuacüma ipeyanaxoxẽxẽ. ¡Rü pexuãẽgü nax tama ngürüãchi Tupanamaxã yixĩxü̃ i penuexü̃! —ñanagürü. Rü guxü̃ma ga yema ãẽ̱xgacügü rü naga naxĩnüe ga yema norü ucu̱xẽ.

Ucu̱xẽgüchiga 21:30

Tupanape̱xewa rü nataxuma i duü̃xü̃arü cua̱x i mexü̃, rü tataxuma ya texé ya nüxü̃ cuáxe, rü nataxuma i ĩnü i aixcüma mexü̃.

Ngechuchuarü ngúexü̃gü ga yamugüxü̃arü puracüchiga 9:5

Rü Chauru nanangãxü̃, rü ñanagürü: —¿Rü texé quixĩ, Pa Corix? —ñanagürü. Rü nüma ga Cori rü nanangãxü̃ rü ñanagürü: —Choma nixĩ ya Ngechuchu, rü chowe nixĩ i quingẽchigüxü̃.

Ichaía 26:9

Chütacü rü guxü̃ma i chorü ngúchaü̃maxã cugu charüxĩnü. Rü aixcüma chorü maxü̃nemaxã cuxca̱x chadau. Rü ngẽxguma cuma ñoma i naanewa cuxũxgu nax nüxna cucaxü̃ca̱x i duü̃xü̃gü naxca̱x i norü maxü̃, rü ngẽxguma tá nixĩ i aixcüma nüxü̃ nacua̱xgüxü̃ i ta̱xacü nixĩ i ngẽma cupe̱xewa mexü̃.

Ngechuchuarü ngúexü̃gü ga yamugüxü̃arü puracüchiga 11:17

Rü pema nüxü̃ pecua̱x nax ñuxãcü Tupana tüxna nanguxẽẽxü̃ ga Naãxẽ ya Üünecü i yixema nax Cori ya Ngechuchu ya Cristuaxü̃́ yaxõgüxü̃. Rü ñu̱xma nax taxrüxü̃ Tupana yema duü̃xü̃güna nanguxẽẽxü̃ ga Naãxẽ ya Üünecü, ¿rü ñuxũcürüwa i choma i nüxü̃ chaxoxü̃ nax naga chaxĩnüxü̃ ya Tupana? —ñanagürü ga Pedru.

Wiyaegü 49:1

¡Dücax, Pa Guxü̃ma i Duü̃xü̃gü i Ñoma i Naanewa Maxẽxü̃x, rü mea iperüxĩnüe i ñaa ore!

Wiyaegü 33:14

Rü ngẽma daxũguxü̃ i naane i nawa nangẽxmaxü̃wa nixĩ i tüxü̃ nangugüxü̃ ya yíxema ñoma i naanewa ngẽxmagüxe.

Wiyaegü 39:5

Erü ñaa maxü̃ i choxna cuxãxü̃ rü aixcüma nanuxũ. Rü cupe̱xewa rü chorü maxü̃ rü wüxi i paxaãchica̱x nixĩ. Rü wüxichigü i duü̃xü̃arü maxü̃ rü ñoma wüxi i ngü̃ãcüürüxü̃ nixĩ.

Ngu̱xẽẽtaeruü̃arü ore 8:4

Rü ngẽma ãẽ̱xgacüarü ore rü napora. Rü taxúema tapora nax nüxna naxca̱x tacaxü̃ i ngẽma naxüxü̃.

Ichaía 19:17

Rü ngẽma Equítuanecüã̱xgü i duü̃xü̃gü rü Yudáanecüã̱xgüxü̃ tá namuü̃e. Rü ngẽxguma ngẽma Yudáanecüã̱xgüna nacua̱xãchiemaregu rü tá naba̱i̱xãchie, erü tá nüxna nacua̱xãchie i ngẽma ãũcümaxü̃ i poxcu i Cori ya Tupana ya Guxãétüwa Ngẽxmacü namaxã ueguxü̃ i Equítuane.

Danié 6:27

Nüma rü tórü poxü̃ruxü̃ nixĩ, rü tórü nguxü̃xẽẽruxü̃ nixĩ. Rü nüma inanawe̱x i cua̱xruü̃gü i mexü̃ i dauxü̃guxü̃ i naanewa rü ñoma i naanewa. Rü nüma nixĩ ga Daniéxü̃ ínapoxü̃xü̃ natanüwa ga leóü̃gü —ñanagürü.

Yoná 1:14

Rü yexguma ga nümagü rü Cori ya Tupanana nacagüe rü ñanagürügü: —Pa Cori Pa Tupanax ¡Taxṹ i nuxã toxü̃ cuyuexẽxẽxü̃ nagagu i ñaa yatü! Rü ngẽxguma chi taxuxü̃ma i chixexü̃ naxü̱xgux rü ¡taxṹ i cuyatoguãchixẽxẽxü̃ nax nayuxü̃! Erü cumax, Pa Corix, Pa Tupanax, rü cunaxü i ta̱xacü i cuma cunaxwa̱xexü̃ãcüma —ñanagürügü.

Yochué 2:2

Natürü nayexmaama ga wüxi ga duü̃xü̃ ga Yericúarü ãẽ̱xgacümaxã nüxü̃ ixuxü̃, rü ñanagürü nüxü̃: —Ñuxre i Iraétanüxü̃ nua nangugü i ngewa̱xarü chütaxü̃gu nax yangugügüãxü̃ca̱x i ñaa naane —ñanagürü.