Danié 2:47 - Tupanaarü Ore

⁴⁷ Rü yemawena rü Daniéxü̃ ñanagürü: —Aixcümaxü̃chima ya yimá perü Tupana nixĩ ya guxü̃ma i togü i tupanagüxü̃ rüporamaecü. Rü nüma rü guxü̃ma i ãẽ̱xgacügüarü Cori nixĩ. Rü nüma rü inanawe̱x i ngẽma ẽxü̃guxü̃ rü ngẽmaca̱x cuxü̃ nüxü̃ nacua̱xẽxẽ i ngẽma chaunegü —ñanagürü.

Danié 2:47 Referans Kwoze

Danié 2:28

Natürü nangẽxma ya wüxi ya Tupana i daxũguxü̃ i naanewa ya nüxü̃ cuácü i ẽxü̃guxü̃ i ore, Pa Ãẽ̱xgacüx, rü nüma nixĩ i cuxü̃ nüxü̃ nacua̱xẽẽxü̃ i ngẽma tá yixcüra ngupetüxü̃. Rü tá cumaxã nüxü̃ chixu, Pa Ãẽ̱xgacüx, ga yema nüxü̃ cudauxü̃ ga cunegüwa ga yexguma cupegu.

Danié 2:22

Rü nüma rü tüxü̃ nüxü̃ nacua̱xẽxẽ i ngẽma cua̱x i ẽxü̃guxü̃. Rü nüxü̃ nacua̱x i ngẽma ẽanexü̃wa üxü̃ erü nüma rü ngóonexü̃wa nangẽxma.

Amúx 3:7

Rü nüma ya Cori ya Tupana rü taguma ta̱xacü naxü ega tama noxri norü orearü uruxü̃gümaxã nüxü̃ yaxuxgu.

Danié 11:36

Rü ngẽma Nórtearü ãẽ̱xgacü rü guxü̃ma i ngẽma nüma nanaxwa̱xexü̃ tá naxümare. Rü tá nügü nicua̱xüxü̃ rü tá nügügu nayaxõ nax guxü̃ma i tupananetagüarü yexera naporamaexü̃. Rü Tupanamaxã tá naguxchiga. Rü guxü̃táma i ngẽma naxüxü̃wa rü mea tá nüxü̃́ ínanguxuchi rü ñu̱xmata Tupana naxca̱x ínanguxẽxẽ i norü poxcu. Erü ngẽma Tupana ueguxü̃ rü tá nayanguxẽxẽ.

Wenaxarü naxümatü ga Tupanaarü mugü 10:17

Erü yimá perü Cori ya Tupana rü ngẽma duü̃xü̃gü namaxã tupanaã̱xgüxü̃étüwa nangẽxma, rü guxü̃ma i ãẽ̱xgacügüétüwa nangẽxma. Rü nüma nixĩ i poraxüchicü rü ãũcümacü rü guxü̃maxã icuácü. Rü naxca̱x rü guxãma i yixema rü tawüxigu, rü tama diẽru nayaxu ega texé tügü ütanüchaü̃gu.

Yema Cuáü̃ nüxü̃ dauxü̃ i yixcüra tá ngupetüxü̃chiga 19:16

Rü naxchirugu rü naperemagu naxümatü ga wüxi ga naéga ga ñaxü̃: “Guxü̃ma i Nachixü̃anegüarü Ãẽ̱xgacügüarü Ãẽ̱xgacü, rü Guxü̃ma i Corigüarü Cori Ixĩcü”, ñaxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 17:14

Rü ñu̱xũchi i ngẽma ãẽ̱xgacügü rü ngẽma ngo̱xo rü tá nügü nadai namaxã ya yimá Carnéruxacü. Natürü ya yimá Carnéruxacü rü tá nüxü̃ narüyexera, erü nüma rü guxü̃ i corigüarü Cori nixĩ, rü guxü̃ i nachixü̃anegüarü ãẽ̱xgacügüarü Ãẽ̱xgacü nixĩ. Rü yíxema namücügü ixĩgüxe, rü yíxemagü tixĩgü ya Tupana tümaca̱x caxe rü tüxü̃ nadexe rü naga ĩnüexe”, ñanagürü choxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 1:5

Rü ngẽxgumarüxü̃ ta chanaxwa̱xe nax pexü̃ nangü̃xẽẽxü̃ rü pexü̃ nataãẽxẽẽxü̃ ya Ngechuchu ya Cristu ga meama nüxü̃ ixucü ga Tupanachiga ga ñoma ga naanewa. Rü nüma nixĩ ga nüxíra yuwa ínadaxü̃. Rü nüma nixĩ i namaxã inacuáxü̃ i guxü̃ma i ñoma i naanewa ngẽxmagüxü̃ i nachixü̃anegüarü ãẽ̱xgacügü. Rü nüma rü tüxü̃ nangechaü̃, rü nagümaxã tüxü̃́ inayanaxoxẽxẽ i tórü pecadugü.

Nüxíraxü̃xü̃ ga popera ga Timutéuca̱x naxümatüxü̃ ga Pauru 6:15

Erü ngẽma ngunexü̃ ya Tupana nagu naxwa̱xexü̃gu rü tá Cristuxü̃ nango̱xẽxẽ. Erü nüma ya Tupana rü nüxicatama Tupana nixĩ, rü nüma nixĩ i aixcüma mecü yixĩxü̃ rü guxü̃étüwama nangẽxmaxü̃, rü guxü̃ i ãẽ̱xgacügüarü Ãẽ̱xgacü yixĩxü̃, rü guxü̃ i corigüarü Cori yixĩxü̃.

Danié 2:37

Rü cuma nixĩ, Pa Ãẽ̱xgacüx, i guxü̃ma i togü i ãẽ̱xgacügüétüwa cuxüxü̃ i ñu̱xmax, erü nüma ya Tupana ya daxũgucü rü cuxü̃ inamu nax ãẽ̱xgacü quixĩxü̃ca̱x rü cuporaxü̃ca̱x rü guxü̃ma i nachixü̃anegü cuxü̃ cua̱xüü̃güxü̃ca̱x.

Wiyaegü 136:2

¡Moxẽ nüxna pexã ya yimá Tupana ya guxü̃ma i tupananetagüétüwa ngẽxmacü! Erü ngẽma norü ngechaü̃ rü taguma inayagu̱x.

Wiyaegü 82:1

Rü Tupana ãẽ̱xgacü íyixĩxü̃wa i daxũguxü̃ i naanewa rü inachi nax poxcu namaxã naxueguxü̃ca̱x i ngẽma ãẽ̱xgacügü i guxchaxü̃arü mexẽẽruü̃gü i chixri norü duü̃xü̃gümaxã icua̱xgüxü̃. Rü ñanagürü:

Wiyaegü 72:11

Rü guxü̃ma i togü i nachixü̃anegüarü ãẽ̱xgacügü, rü name nixĩ i torü ãẽ̱xgacüpe̱xegu nacaxã́pü̱xügü. Rü guxü̃ma i ngẽma togü i nachixü̃anegüarü duü̃xü̃gü, rü name nixĩ i torü ãẽ̱xgacüaxü̃́ napuracüe.

Naanearü ügüchiga 41:39

Rü yexguma ga Faraóü̃ rü Yúchexü̃ ñanagürü: —Dücax, rü nataxuma i cuxü̃ rüyexeraxü̃ nax nüxü̃ nacuáxü̃, erü cuma nixĩ ya Tupana cuxü̃ nüxü̃ cua̱xẽẽxü̃ i guxü̃ma i ngẽma nagu chaxãnegüxü̃.

Danié 4:32

Rü duü̃xü̃güna tá quixũgachi rü naxü̃natanüwa tá cumaxü̃, rü wocagürüxü̃ tá maxẽmaxã cuxãwemü i 7 ya taunecü. Rü ngẽmaãcü tá quixĩ ñu̱xmatáta nüxna cucua̱xãchi nax Tupana yixĩxü̃ ya yimá nüxü̃́ nangẽxmacü i pora nax namaxã inacuáxü̃ i guxü̃ma i nachixü̃anegü i ñoma i naanewa ngẽxmagüxü̃. Rü nüma nixĩ i tüxü̃ yangucuchixẽẽxü̃ nax ãẽ̱xgacü tixĩxü̃ ya yíxema nüma norü me ixĩxẽ —ñanagürü.

Danié 4:17

Rü yema nixĩ ga yema naimaxã naxuegugüxü̃ ga yema ixüünexü̃ ga dauxü̃cüã̱x ga dauruü̃gü ixĩgüxü̃. Yerü nanaxwa̱xegü nax guxü̃ma i duü̃xü̃gü nüxü̃ cua̱xgüxü̃ nax nüma ya Tupana ya Guxãétüwa Ngẽxmacü rü nüxü̃́ nangẽxmaxü̃ i pora nax namaxã inacuáxü̃ i ngẽma nachixü̃anegüarü ãẽ̱xgacügü i ñoma i naanewa ngẽxmagüxü̃. Rü nüma nixĩ i nüxü̃ naxunetaxü̃ i ngẽma nüma nanaxwa̱xexü̃ nax ãẽ̱xgacügü yixĩgüxü̃. Rü nüma rü nüxü̃́ nangẽxma i pora nax nachixü̃anearü ãẽ̱xgacüxü̃ yangucuchixẽẽãxü̃ i ngẽma duü̃xü̃ i noxri taxuxü̃ma ixĩxü̃’, ñanagürü ga yema dauxü̃cüã̱x.

Danié 2:19

Rü yema chütaxü̃gu rü Tupana Daniéca̱x nanango̱xẽxẽ ga ta̱xacüchiga nax yixĩxü̃ ga yema ãẽ̱xgacü nagu ãnegüxü̃. Rü yemaca̱x nüma ga Danié rü Tupanaxü̃ nicua̱xüxü̃ rü ñanagürü:

Yox 12:19

Rü norü puracüwa ínanawoxü̃ i chacherdótegü. Rü ínanawoxü̃ i ngẽma ãẽ̱xgacügü ixĩgüxü̃.

Yochué 22:22

—Cori ya Tupana ya gúxü̃ i tupananetagüarü Tupana ixĩcü rü nüxü̃ nacua̱x nax tama namaxã tanuexü̃ca̱x rüe̱xna nüxna tixĩgachixü̃ca̱x nixĩ i tanaxüxü̃ i ñaa ãmarearü guruxü̃. Rü tanaxwa̱xe nax guxãma i pema rü ta nüxü̃ pecuáxü̃ i ngẽma. Rü ngẽxguma chi tama Tupanaga taxĩnüexü̃ca̱x, rüe̱xna nüxna tixĩgachitanüxü̃ca̱x tanaxü̱xgu i ñaa ãmarearü guruxü̃, rü ẽcü toxü̃ pedai. Rü toxü̃ napoxcu ya Cori ya Tupana ega tóxrütama ãmarearü guruxü̃ taxü̱xgu nax ngéma naxca̱x tayaguxü̃ca̱x i ãmaregü.

Danié 4:25

Erü cumax, Pa Ãẽ̱xgacüx, rü taxũtáma duü̃xü̃gütanüwa cungexma, rü naxü̃nagütanüwa tá cumaxü̃ rü wocagürüxü̃ tá maxẽ cunangõ̱x, rü cherena rü tá cuxü̃ niwaixẽxẽ. Rü ngẽmaãcü tá cumaxü̃ i 7 ya taunecü ñu̱xmatáta naxca̱x íquicuáx nax texé yixĩxü̃ ya yimá namaxã icuácü i guxü̃ma i ãẽ̱xgacügü i ñoma i naanewa ngẽxmagüxü̃. Erü nüma nixĩ i tüxü̃ yamucuchixü̃ ya yíxema nüma natümawa̱xéxe nax ãẽ̱xgacü tixĩxü̃ca̱x.

1 Corintios 14:25

Rü ngẽmaãcü tá nango̱x i ngẽma chixexü̃ i nüxicatama nüxü̃ nacuáxü̃ rü ngẽxma tá nacaxã́pü̱xü, rü tá Tupanaxü̃ nicua̱xüxü̃. Rü tá nüxü̃ nixu nax aixcüma Tupana petanüwa nangẽxmaxü̃.

Wiyaegü 136:3

¡Rü moxẽ nüxna pexã ya Cori ya Tupana ya guxü̃ma i corigüarü ãẽ̱xgacü ixĩcü! Erü ngẽma norü ngechaü̃ rü taguma inayagu̱x.

Echequié 26:7

Rü choma ya Cori ya Tupana rü nórtewaama tá cuxca̱x íchanaxũxẽxẽ ya Babiróniaanearü ãẽ̱xgacü i Nabucudonochó i guxü̃ i ãẽ̱xgacügüxü̃ rüporamaexü̃. Rü nüma rü tá cuxca̱x ínayagoõchi, Pa Tírux, namaxã i muxü̃ma i norü churaragü i cowarugu ĩxü̃ rü carugu ĩxü̃ rü nacutügu ĩxü̃.

Danié 2:29

Rü cumax, Pa Ãẽ̱xgacüx, rü curü pechicawa cuyexma rü nagu curüxĩnü ga ta̱xacü tá nax ngupetüxü̃ ga yixcüra. Rü yexguma cuxãnegügu rü nüma ya Tupana ya nango̱xẽẽcü i ngẽma ẽxü̃guxü̃ rü cuxü̃ nüxü̃ nacua̱xẽxẽ i ngẽma tá ngupetüxü̃.

Danié 2:30

Rü ngẽxgumarüxü̃ ta ya Tupana rü cha̱u̱xca̱x nanango̱xẽxẽ ga yematama cuma nagu cuxãnegüxü̃. Natürü tama ngẽma togüarü yexera nüxü̃ charücua̱xmaexü̃ca̱x nixĩ i choxü̃ nüxü̃ nacua̱xẽẽxü̃ i ngẽma. Rü cha̱u̱xca̱x nanango̱xẽxẽ nax cumaxã nüxü̃ chixuxü̃ca̱x nax ta̱xacüchiga yixĩxü̃ ga yema cunegü nax ngẽmaãcü cuma rü ta nüxü̃ cucuáxü̃ca̱x.

Danié 3:15

Rü ngẽxguma yacuegüã̱xgu i ngẽma paxetaruü̃gü ¿rü pemax rü ípememarexü̃ nax nape̱xegu pecaxã́pü̱xügüxü̃ rü nüxü̃ picua̱xüxü̃güxü̃ i ngẽma naxchicüna̱xã i choma duü̃xü̃güxü̃ chaxüxẽxẽxü̃? Erü ngẽxguma taxũtáma ñu̱xmatama nüxü̃ picua̱xüxü̃gügu, rü ngẽma poxcuchicaxü̃ i íya̱u̱xraxü̃gu tá pexü̃ chawocu. ¿Rü ta̱xacürü tupana tá pexü̃ nawa ínanguxü̃xẽxẽ i ngẽma? —ñanagürü.

Danié 3:28

Rü yexgumatama ga nüma ga Nabucudonochó rü ñanagürü: —¡Ngĩxã nüxü̃ ticua̱xüü̃gü ya norü Tupana i Chadrá rü Mechá rü Abex-negó ya núma namucü i ngẽma dauxü̃cüã̱x nax íyapoxü̃ãxü̃ca̱x i norü duü̃xü̃gü i tama ãẽ̱xgacüga ĩnüechaü̃xü̃! Yerü yema tomaepü̱xca̱x rü narümemae nax nayuexü̃ naxü̃pa nax togümare ga tupanaxü̃ yacua̱xüü̃güxü̃.

Danié 3:29

Rü ngẽmaca̱x i ñu̱xma rü chanaxunagü rü ngexerüxüxe ya duü̃xẽ ya nachiga chixri idexaxe ya norü Tupana i ñaa tomaepü̱x i ngextü̱xüxü̃gü rü noxtacüma ãgümücügu tá tüxü̃ tarüchexte, rü tümapata rü tá nagu napogü rü natüchixica tá ngéma ninuagü. Rü nüetama ega woo ngexnerüxünemare ya ĩanecüã̱x tixĩxgu, rü ngexü̃rüüxü̃ i nachixü̃anecüã̱x tixĩxgu, rü ngexü̃rüüxü̃ i nagawa tidexagux. Erü nataxuma i to i tupana i ngẽmaãcü norü duü̃xü̃güxü̃ ípoxü̃xü̃ —ñanagürü.

Danié 5:11

Erü nua cuxme̱xwa nangẽxma i wüxi i yatü ya Tupana ya Üünecüãxẽ nawa ngẽxmaxü̃. Rü yexguma guma cunatü ya Nabucudonochó ãẽ̱xgacü ixĩxgu, rü yema yatü inanawe̱x nax tupanagürüxü̃ aixcüma naãẽxü̃ nacuáxü̃. Rü yemaca̱x ga guma cunatü rü guxü̃ma ga norü ucu̱xẽruü̃güeru nayaxĩxẽxẽ.

Norü taxre ga popera ga ãẽ̱xgacügüchiga 5:15

Rü yexguma ga nüma ga Naamáü̃ rü guxü̃ma ga yema namücügü rü Erichéuxü̃tawa naxĩ. Rü yexguma Erichéuxü̃tawa nangugügu, rü nüma ga Naamáü̃ rü ñanagürü nüxü̃: —Ñu̱xma waxi nixĩ i aixcüma chayaxõxü̃ rü guxü̃wama i ñoma i naanewa rü nataxuma i to ya Tupana, rü yimá Iraéanecüã̱xgüarü Tupanaxicatama nixĩ ya aixcüma Tupana ixĩcü. Rü ngẽmaca̱x cuxü̃ chachixewe nax choxü̃́ cunayaxuxü̃ i ñaa wüxi i ãmare i cuxna chaxãxchaü̃xü̃ —ñanagürü.

Wiyaegü 96:4

Erü nüma ya Cori ya Tupana rü guxãétüwa nangẽxma, rü ngẽmaca̱x name nax nüxü̃xicatama icua̱xüü̃güxü̃. Erü nüma rü naxãũcümaxü̃chi rü guxü̃ma i ngẽma duü̃xü̃gü namaxã tupanaã́xü̃étüwa nangẽxma.