Danié 11:25 - Tupanaarü Ore

²⁵ Rü ngẽma nax nügü nacuáxü̃ nax naporaxü̃ rü tama namuü̃xü̃ rü ngẽmaca̱x i nüma i Nórteanearü ãẽ̱xgacü rü muxü̃ma i norü churaragümaxã tá ngẽma Súranearü ãẽ̱xgacüca̱x ínayagoõchi. Rü nüma i ngẽma Súranearü ãẽ̱xgacü rü tá nügü namaxã nadai, natürü taxũtáma nüxü̃ narüporamae erü namücügütama tá nanaechitaegü.

Danié 11:25 Referans Kwoze

Danié 11:2

Ñu̱xma rü tá cuxü̃ nüxü̃ chacua̱xẽxẽ i ngẽma aixcüma ixĩxü̃: Rü marü tomaepü̱x i ãẽ̱xgacügü Pérchiaanemaxã icua̱xguwena, rü tá nixücu i norü ãgümücü i ãẽ̱xgacü. Rü nüma rü tá ngẽma tomaepü̱xü̃arü yexera nadiẽruã̱xü̃chi. Rü ngẽma norü diẽrumaxã tá nügü ínarüpora rü Gréchiacüã̱xgümaxã tá nügü nadai.

Ucu̱xẽgüchiga 28:25

Yíxema diẽruguxicatama rüxĩnüxe, rü nu ítanguxẽxẽ. Natürü yíxema Cori ya Tupanana rüyoexe, rü nüma rü tüxü̃ narüngü̃xẽxẽ.

Ucu̱xẽgüchiga 15:18

Texé ya nuwa̱xexe, rü dai ítanguxẽxẽ. Natürü yíxema mecümaxe, rü itanaxoxẽxẽ i nu.

Danié 11:10

Natürü ngẽma nórtearü ãẽ̱xgacü nanegü rü daixca̱x tá nügü ínamexẽẽgü, rü muxü̃tama i churaragü tá nanutaque̱xegü. Rü wüxi i ngẽma nane rü norü churaragümaxã tá súranegu naxücu, rü guxü̃táma inayarüxoxẽxẽ ñoma mucü ya tacü ya guxü̃ma irüxoxẽẽcürüxü̃. Ngẽmawena rü wena tá ngẽma súrcüã̱xü̃ nadai rü ñu̱xmata ngẽma súranearü ãẽ̱xgacüarü poxü̃chicawa nangugü.

Danié 11:5

Rü ngẽma ãẽ̱xgacü i súranemaxã icuáxü̃ rü tá naporaxüchi. Natürü wüxi i ngẽma norü churaragüeru rü tá yexera nüxü̃ narüporamae rü muxü̃ma i nachixü̃anemaxã tá inacua̱x.

Danié 11:40

Rü ngẽxguma nawa nanguxgu nax nügü nada̱i̱xü̃ rü ngẽma súr-arü ãẽ̱xgacü rü tá ngẽma nórtearü ãẽ̱xgacüca̱x ínayagoõchi. Natürü ngẽma nórtearü ãẽ̱xgacü rü ñoma wüxi ya buanecü ya íxãũxẽmacürüxü̃ tá naxca̱x niñaama. Rü carugü i dairuxü̃ ixĩgüxü̃maxã, rü churaragü i cowarutagu ixĩxü̃maxã tá nayapaxẽxẽ i ngẽma nachixü̃ane. Rü tá namu ya norü wapurugü.