Chofonía 1:14 - Tupanaarü Ore

¹⁴ ¡Rü marü ningaica i ngẽma Cori ya Tupanaarü ngunexü̃ i ãũcümaxü̃! ¡Marü ningaica erü nüma rü paxatáma ínangu! Rü ngẽma ngunexü̃ i Cori ya Tupana nua nagu ũxü̃gu rü tá nüxü̃ taxĩnüe i nagagü i poraãcü ngechaü̃ gagüxü̃. Rü woo ngẽma nügü írüporaexü̃ rü tá tagaãcü naxauxe.

Chofonía 1:14 Referans Kwoze

Maraquía 4:5

Rü dücax, nua tá pexca̱x chanamu ya chorü orearü uruxü̃ ya Ería naxü̃pa i ngẽma ngunexü̃ i ãũcümaxü̃ i nagu chapoxcuexü̃ i ngẽma chixexü̃ ügüxü̃.

Echequié 30:3

Erü marü ningaica i ngẽma ngunexü̃ i Cori ya Tupana tá nagu curü poxcu ínguxẽẽxü̃. Rü ngẽma rü wüxi i ngunexü̃ i waanexü̃ rü ãũcümaxü̃ tá nixĩ naxca̱x i guxü̃ma i nachixü̃anegü.

Chofonía 1:7

¡Rü Cori ya Tupanape̱xewa perüchianegü! Erü ngẽma norü ngunexü̃ i ãũcümaxü̃ i nagu tá napoxcuexü̃ i ngẽma chixexü̃ ügüxü̃ rü marü ningaica. Rü nüma rü marü nüxna naxu i ngẽma to i nachixü̃anecüã̱x nax nadaiaxü̃ca̱x i ngẽma nüxna ixĩgachitanüxü̃.

Joel 2:11

Rü nüma ya Cori ya Tupana rü nape̱xegu nixũ i ngẽma munügü i ñoma muxũchixü̃ i churaragürüxü̃ ixĩxü̃. Rü nüma ya Tupana rü tagaãcü nanamu i ngẽma munügü, rü nüma rü naga naxĩnüe. Rü ngẽma nax namuxũchixü̃ rü taxucürüwama texé tayaxugü. Rü poraãcü naxãũcüma i ngẽma ngunexü̃ i nagu Tupana tüxü̃ poxcuexü̃, rü taxúema tapora nax ítayachaxãchixẽẽxü̃.

1 Tesalonicenses 4:16

Erü nümatama ya Cori rü daxũwa tá ínarüxĩ, rü tá nüxü̃ taxĩnüe i wüxi i naga i daxũwa inaxũxü̃ i tüxü̃ muxü̃, rü naga i Tupanaarü orearü ngeruxü̃güarü ãẽ̱xgacü. Rü tá nüxü̃ taxĩnüe nax yacuexü̃ ya Tupanaarü cornéta. Rü ngẽxguma i ngẽma yuexü̃ i Cristuaxü̃́ yaxõgüxü̃ rü tá nüxíra ínarüdagü.

Echequié 7:12

Marü nawa nangu i ngẽma ngunexü̃, rü ínangu i ngẽma ora. Rü ngẽma taxetanüxü̃ rü taxuca̱xma ta̱xacüca̱x nataãxẽ, rü ngẽma naxca̱x taxexü̃ rü taxuca̱xma ta̱xacüca̱x nangechaxü̃. Erü chorü numaxã tá chanapoxcu i guxü̃ma i ngẽma Iraétanüxü̃ i ñu̱xma nügü icua̱xüü̃güxü̃.

Ichaía 33:7

Dücax, ñuxãcü ĩanearü namagüwa aita naxüexü̃ i ngẽma Iraétanüxü̃arü churaragüerugü, rü ñuxãcü norü ngechaü̃maxã naxauxexü̃ i ngẽma ãẽ̱xgacüarü orearü ngeruü̃gü i Achíriaanecüã̱xgüxü̃ rüngüxmüxẽẽchaü̃güxü̃.

Ichaía 15:4

Rü duü̃xü̃gü i Ebóü̃cüã̱xgü rü Erarécüã̱xgü rü tagaãcü ngü̃xẽẽca̱x ínacagü, rü ĩane ya Yaáchagu nüxü̃ naxĩnügagü. Rü ngẽmaca̱x i Moátanüxü̃arü churaragü rü poraãcü ínayamuü̃ãchitanü.

Popera ga Chantiágu ümatüxü̃ 5:9

Pa Chauenexẽgüx, name nixĩ i nüxü̃ perüxoe nax pegü pixuechaü̃ nax tama ngẽmaca̱x pexna naca̱xaxü̃ca̱x ya Tupana. Erü marü ningaica nax ínanguxü̃ nax duü̃xü̃güxü̃ yacagüxü̃ca̱x i norü maxü̃chiga.

Ngechuchuarü ngúexü̃gü ga yamugüxü̃arü puracüchiga 2:20

Rü üa̱xcü rü tá nixoema rü tauemacü rü tá nagürüxü̃ naduema naxü̃pa nax wenaxarü núma naxũxü̃ ya Cori. Rü ngẽma ngunexü̃ i nagu núma naxũxü̃, rü wüxi i ngunexü̃ i poraãcü ãũcümaxü̃ tá nixĩ.

Joel 1:15

Erü marü ningaica i Tupanaarü poxcu. Rü ngẽma ngunexü̃ rü poraãcü tá naxãũcüma erü Yimá Guxãétüwa Ngẽxmacü rü tá taxü̃ i poxcu taxca̱x ínanguxẽxẽ.

Norü taxre ga popera ga Pedru ümatüxü̃ 2:3

Rü ngẽma ngu̱xẽẽruü̃netagü rü diẽruguxicatama narüxĩnüe, rü ngẽmaca̱x i ngẽma norü ngu̱xẽẽtae i doramare ixĩxü̃, rü tá pemaxã nanaxãtanü nax ngẽmaãcü petanüwa ngĩxü̃ nayauxgüxü̃ca̱x i perü diẽru. Natürü tá napoxcue i ngẽma duü̃xü̃gü, rü taxũtáma nibuxmü. Erü Tupana rü woetama nũxcümama poxcu namaxã naxuegu.

Joel 2:31

Rü yimá üa̱xcü rü tá nixo rü yimá tauemacü rü ñoma nagürüxü̃ tá naduema naxü̃pa i ngẽma ngunexü̃ i nagu tá chanapoxcuxü̃ i ñoma i naane. Rü ngẽma ngunexü̃ rü tá poraãcü naxãũcüma —ñanagürü.

Chofonía 1:10

Rü nüma ya Cori ya Tupana rü ñanagürü ta: —Ngẽma ngunexü̃gu rü tá nüxü̃ taxĩnüe i duü̃xü̃gü i aita üexü̃ nax ngü̃xẽẽca̱x ínacagüxü̃ i Choxnigüarü ĩã̱xwa. Rü yima Ngexwacaxü̃ ya Ĩanewa ngẽxmagüxü̃ i duü̃xü̃gü rü tá ta aita naxüe. Rü ngẽxgumarüxü̃ tá ta nüxü̃ taxĩnüe nax tagaãcü nawĩẽmügüxü̃ ya yima ma̱xpǘnegü.

Joel 3:16

Nüma ya Cori ya Tupana rü ngẽxguma yima ma̱xpǘne ya Chióü̃ ya Yerucharéü̃wa ngẽxmanewa yadexaxgu, rü ngẽma naga rü ñoma duruanexü̃rüxü̃ nixĩ. Rü ngẽxguma i ngẽma daxũguxü̃ i naane rü ñoma i naane rü nidu̱xru. Natürü i nüma ya Cori ya Tupana rü wüxi i poxü̃ruxü̃ nixĩ naxca̱x i Iraétanüxü̃ i norü duü̃xü̃gü ixĩgüxü̃.

Joel 2:1

¡Rü yima ma̱xpǘne ya Chióü̃wa peyacue ya cornéta! ¡Rü yima ma̱xpǘne ya Tupanapata nawa ngẽxmanewa rü tagaãcü peyacue ya cornéta ya ãũcümaxü̃xü̃ ixüxü̃ne! ¡Rü muü̃maxã pidu̱xrue i guxãma i pema i Yudáanewa pemaxẽxü̃! Erü Cori ya Tupanaarü ngunexü̃ rü marü ningaica. Rü ngẽma ngunexü̃ rü taxü̃ i waanexü̃ tá nixĩ. Rü tá narüxcaixane rü caixanexü̃ i pamüemaxü̃ tá nangẽxma. Rü muxũchixü̃ i munügü tá ínangugü. Rü ñoma wüxitücumü i churaragü i poraexü̃ rü muxũchixü̃rüxü̃ tá nixĩgü. Rü ñoma ngexwaca yangunegu rü guxü̃wama ma̱xpǘneétüwa nangu nax yangóonexü̃ rü ngẽxgumarüxü̃ tá nixĩgü nax guxü̃wama nangugüxü̃ i ngẽma munügü. Rü nũxcüma rü taguma ngẽxgumarüxü̃ ixĩxü̃xü̃ tadau, rü tagutáma wena nüxü̃ tadau i ta̱xacü i nangexgumaraxü̃xü̃.

Echequié 12:23

¡Rü namaxã nüxü̃ ixu i ñaa ore i ñaxü̃: “Cori ya Tupana rü ñanagürü: ‘Choma rü tá chayanaxoxẽxẽ i ngẽma dexa nax tama marü Iraéanewa nüxü̃ yaxugüxü̃ca̱x i ngẽma dexa’, ñanagürü! ¡Rü ñu̱xũchi namaxã nüxü̃ ixu nax marü yangaicaxü̃ i ngẽma ngunexü̃ i nagu tá yanguxü̃ i guxü̃ma i ngẽma chorü orearü uruxü̃xü̃ naxca̱x chango̱xetüxẽxẽxü̃!

Yeremía 48:41

Rü Moáanearü ĩanegü rü norü poxeguruü̃gü rü ngẽma uanügüme̱xẽgu tá nayi. Rü ngẽma ngunexü̃gu rü Moáanearü churaragü rü tá norü muü̃maxã nidu̱xrue ñoma wüxi i ngexe i íxraxacüxchaü̃xü̃rüxü̃.

Yeremía 30:7

Rü marü ningaica i ngẽma ngunexü̃ i ãũcümaxü̃chixü̃ i taguma nüxü̃ idauxü̃. Rü ngẽma ngunexü̃gu rü poraãcü tá ngúxü̃ ningẽgü i Iraétanüxü̃ i Acóbutanüxü̃ ixĩgüxü̃. Natürü i choma rü tá ngẽma ngúxü̃wa íchananguxü̃xẽxẽ.

Yeremía 25:36

Rü ngẽma nachixü̃anegüarü ãẽ̱xgacügü rü aixta naxüe. Rü ngẽma togü i ãẽ̱xgacü i duü̃xü̃gümaxã icuáxü̃ rü taiyamaxã aita naxüe. Erü Cori ya Tupana rü marü inayanaxoxẽxẽ i norü naanegü rü ngẽmaca̱x nataxuma nax ta̱xacü nangõ̱xgüxü̃.

Ichaía 66:6

Rü ĩanewa rü Tupanapata ya taxü̃newa inanaxũ i wüxi i naga. Rü ngẽma naga nixĩ i Tupanaga i namaxã yangagüãxü̃ i norü uanügü.

Popera ga Yudíugü ga yaxõgüxü̃ca̱x ümatüxü̃ 12:26

Rü yexguma Moichéwe naxĩxgu ga tórü o̱xigü, rü Tupana rü nagamaxã nayadu̱xruxẽxẽ ga ñoma ga naane. Natürü i ñu̱xma rü ñanagürü: “Wena táxarü chayadu̱xruxẽxẽ i ñoma i naane. Natürü tama ñoma i naanexica tá chidu̱xruxẽxẽ, natürü ngẽma daxũwa ngẽxmaxü̃ rü tá ta chayadu̱xruxẽxẽ”, ñanagürü.

Filipenses 4:5

Rü chanaxwa̱xe i mea pemaxẽ nax guxü̃ma i duü̃xü̃gü pexü̃ nacua̱xgüxü̃ca̱x nax aixcüma mexü̃ i duü̃xü̃gü pixĩgüxü̃. ¡Rü nüxna pecua̱xãchie nax tórü Cori rü paxa tá nataeguxü̃ nax núma naxũxü̃!

Ichaía 8:22

Rü ñu̱xũchi tá ñaa waixü̃müanegu narüdaunü, rü ngẽma nüxü̃ nadaugüxü̃ tá nixĩ nax nataxuma i ta̱xacürü õna. Rü ẽanexü̃xü̃xica tá nadaugü rü ngúxü̃ tá ningegü. Rü guxü̃watáma nachüta rü nawaanemare.

Echequié 7:16

Rü woo togü rü máxpüxanexü̃wa nabuxmügu ñoma muxtucugü i baixãchiexü̃rüxü̃, natürü guxãtáma tümaarü pecadugagu tayueama.

Joel 3:14

Rü marü muxü̃ma i duü̃xü̃gü ngẽma doxonexü̃gu nangutaque̱xegü, erü marü ningaica i ngẽma ngunexü̃ i nagu Cori ya Tupana tá namaxã naxueguxü̃ i ngẽma nachixü̃anegüarü poxcu.

Yeremía 46:5

¿Natürü ta̱xacü nixĩ i nüxü̃ chadauxü̃? Ngẽma churaragü rü taxü̃ i norü muü̃maxã nügü nawoegu. Rü norü uanügücha̱xwa nügü nawoone. Rü nibuxmü rü tama nügü ínidaugü. Rü guxü̃wama nangẽxma i taxü̃ i ãũcümaxü̃. Rü choma ya Cori ya Tupana nixĩ i ngẽma ñachaxü̃.