Chofonía 1:12 - Tupanaarü Ore

¹² Rü ngẽma ngunexü̃gu rü choma ya Tupana rü omügümaxã guxü̃wama i Yerucharéü̃wa tá mea naxca̱x chadau i ngẽma duü̃xü̃gü i chixexü̃ ügüxü̃. Rü tá chanapoxcue i ngẽma duü̃xü̃gü i ñoma bínu ya marü tama ichicacürüxü̃ ixĩgüxü̃. Rü nümagü rü inarüchomare rü taxuguma narüxĩnüe. Rü nügümaxãtama ñanagürügü: “Nüma ya Cori ya Tupana rü taxuxü̃táma i mexü̃ rüe̱xna chixexü̃ tamaxã naxü”, ñanagürügü.

Chofonía 1:12 Referans Kwoze

Amúx 6:1

—¡Pegümaxã pengechaxü̃gü, Pa Chióü̃cüã̱x! Pema rü perü ĩanena perüyoü̃ rü petaãxẽgü erü nagu perüxĩnüe rü taxuxü̃táma pexü̃ nangupetü. Rü ngẽxgumarüxü̃ ta ¡pegümaxã pengechaxü̃gü i pema i Chamáriaarü ĩanena rüyoü̃xẽ! Pema rü nagu perüxĩnüe nax naporaxü̃ ya yima ĩane rü ngẽmaca̱x taxuxü̃táma pexü̃ nangupetü. Rü pema i Iraéanecüã̱x rü ngẽma ĩanearü ãẽ̱xgacügüaxü̃́ peyaxõ erü nagu perüxĩnüe rü tá pexü̃ ínapoxü̃gü.

Yeremía 48:11

Rü ngẽma Moácüã̱xgü rü guxü̃guma taãẽwa nayexma rü taguma togü ga nachixü̃anewa nagagü i norü duü̃xü̃gü. Rü ñoma bínu ya meama wüxitama ya nachiü̃wa ngẽxmacü rü taguma to i nachiü̃wa bacürüxü̃ nixĩ. Rü ngẽmaca̱x ya yimá bínu rü napora rü taguma inayagoema. Rü ngẽma Moácüã̱xgü rü ngẽxgumarüxü̃ nixĩgü.

Echequié 8:12

Rü yexguma ga nüma ya Tupana rü choxna naca rü ñanagürü choxü̃: —¿Nüxü̃ cudauxü̃ i ngẽma Iraétanüxü̃arü ãẽ̱xgacügü cúãcü norü tupananetachicüna̱xãgüpe̱xegu ixügüxü̃? Rü wüxichigü i ngẽma ãẽ̱xgacügü rü ngéma ẽanexü̃wa noxrütama tupananetachicüna̱xãxü̃ nicua̱xüü̃gü. Rü nümagü rü nagu naxĩnüegu nax choma rü marü nüxna chixũgachixü̃ i ngẽma nachixü̃ane, rü ngẽmaca̱x marü tama nüxü̃ chadauxü̃ i ngẽma inaxügüxü̃ —ñanagürü choxü̃.

Echequié 9:9

Rü nüma ga Cori ya Tupana rü choxü̃ nangãxü̃ga rü ñanagürü: —Ngẽma Iraéanecüã̱xgüarü pecadu rü ngẽma Yudáanecüã̱xgüarü pecadu rü nataxüchi. Rü ngẽma nachixü̃ane rü máetagüxü̃maxã nanapá. Rü yima ĩane ya Yerucharéü̃wa rü norü duü̃xü̃gü rü chixeãcü nügümaxã inacua̱xgü. Rü nüma nagu naxĩnüegu rü marü nüxna chixũ i ngẽma nachixü̃ane, rü ngẽmaca̱x tama nüxü̃ chadau i ngẽma naxügüxü̃.

Wiyaegü 94:7

Rü nümagü rü ñanagürügü: —Yimá Cori ya Acóbuarü Tupana rü tama nüxü̃ nadau i ngẽma ixüxü̃ rü taxũtáma nüxü̃ nacua̱x —ñanagürügü.

Yema Cuáü̃ nüxü̃ dauxü̃ i yixcüra tá ngupetüxü̃chiga 2:23

Rü ngẽmawa guxü̃ma i ngẽma yaxõgüxü̃ tá nüxü̃ nacua̱xgü nax aixcüma nüxü̃ chacuáxü̃ i norü maxü̃ rü ngẽma naãxẽwa nagu naxĩnüexü̃. Rü wüxichigü i pemax rü tá pexü̃́ chanaxütanü ngẽxgumarüxü̃ nax ñuxãcü cha̱u̱xca̱x pemaxẽxü̃.

Abdía 1:6

¡Dücax, nüxü̃ nadau i ñu̱xma nax guxü̃ma i curü ngẽmaxü̃güca̱x cuxü̃́ nangĩ̱xgüxü̃, Pa Edóü̃anecüã̱xgüx i Echaútanüxü̃x! Rü cuxü̃́ naxca̱x nangĩ̱xgü i guxü̃ma i curü ngẽmaxü̃gü.

Yeremía 10:5

Rü ngẽma naxchicüna̱xãgü rü ñoma naanegu pugüxü̃ i duü̃xü̃chicüna̱xãgü i werigüarü muü̃xẽẽruü̃rüxü̃mare nixĩgü. Rü tama nidexagü, rü nanaxwa̱xe nax yangegüxü̃ erü taxuacüma inaxĩ. ¡Rü taxṹ i nüxü̃ pemuüẽxü̃! Erü taxúexü̃ma nachixexẽxẽ, rü taxúeca̱x mexü̃ naxü —ñanagürü.

Ichaía 5:19

Rü pema rü ñaperügügü: —¡Paxa naxü ya Cori ya Tupana i ngẽma naxüxchaü̃xü̃, nax nüxü̃ idauxü̃ca̱x! ¡Rü Tupana ya Üünecü ya Iraéanearü Tupana rü paxa yanguxẽẽã i ngẽma nagu naxĩnüxü̃ nax nüxü̃ icuáxü̃ca̱x i ngẽma tá naxüxü̃! —ñaperügügü.

Wiyaegü 14:1

Rü ngẽma duü̃xü̃gü i naechitamare maxẽxü̃ rü nagu narüxĩnüe nax nataxuxü̃ ya Tupana. Rü guxü̃ma i ngẽma duü̃xü̃gü rü chixexü̃gu narüxĩnüe rü nanaxügü i ngẽma Tupanape̱xewa chixexü̃chixü̃. Rü bai i wüxi i mexü̃ üxü̃.

Yox 21:15

¿Rü texé nixĩ ya yimá Tupana ya Guxãétüwa Ücü rü ngẽmaca̱x nanaxwa̱xexü̃ nax naga taxĩnüexü̃? ¿Rü ta̱xacüwa chi toxü̃́ name ega ngẽxguma nape̱xewa tayumüxẽgügu?” ñanagürügü.

Echequié 9:4

Rü ñanagürü nüxü̃: —¡Ẽcü, nagu ixũãgüchigü ya daa ĩane ya Yerucharéü̃ rü yaxüégacatü i guxü̃ma i ngẽma duü̃xü̃gü i ñaa ĩanearü chixexü̃gagu ngechaü̃güxü̃ rü ngúxü̃ ingegüxü̃! —ñanagürü.

Maraquía 2:17

Rü pema rü perü dexamaxã marü düxwa peyapaxẽxẽ ya Tupana. Rü ngẽmaétüwa i pemax rü ípecagüama rü ñaperügügü: —¿Rü ñuxũ ñatarügügü i tomax rü ngẽmaca̱x tayapaxẽẽxü̃ nax toxü̃ naxĩnüxü̃? —ñaperügügü. Rü pema rü ñaperügügü: —Nüma ya Cori ya Tupana rü namaxã nataãxẽ i ngẽma duü̃xü̃gü i chixexü̃ ügüxü̃ rü taxũtáma nanapoxcue —ñaperügügü. ¿Tama ẽ̱xna peyaxõgü nax Tupana rü aixcümacü yixĩxü̃?

Wiyaegü 10:4

Rü ngẽma yatü i chixexü̃ rü nügü nicua̱xüxü̃ rü ñanagürü: —Nataxuma ya Tupana. Rü taxúetama choxna taca nachiga i ngẽma chaxüxü̃ —ñanagürü. Rü ngẽmaguxicatama narüxĩnü.