Chacaría 13:1 - Tupanaarü Ore

¹ Nüma ya Cori ya Tupana rü ñanagürü ta: —Ngẽma ngunexü̃gu rü tá ningẽnaxü̃ i wüxi i dexáarü chuchuxü̃ nax ngẽmawa Dabítaagü rü Yerucharéü̃cüã̱xgü nügü iyauxgüxü̃ca̱x i norü pecadugü rü norü ãũãchixü̃gü.

Chacaría 13:1 Referans Kwoze

Wiyaegü 51:2

¡Rü choxü̃́ nüxü̃ irüngüma i guxü̃ma i chorü chixexü̃gü! ¡Rü choxü̃́ ínapi i chorü pecadugü!

1 Corintios 6:11

Rü yexgumarüü̃tama pixĩgü ga ñuxre ga pema ga ü̃pax. Natürü i ñu̱xma ya Tupana rü marü pexü̃́ ínanapi i perü chixexü̃ nax noxrüxicatama pixĩgüxü̃ca̱x. Rü ñu̱xma rü nape̱xewa pime yerü Naãxẽ ya Üünexü̃ rü tórü Cori ya Ngechuchu ya Cristuégagu marü perü pecaduna pexü̃ ínanguxü̃xẽxẽ.

Ore i mexü̃ ga Cuáü̃ ümatüxü̃ 1:29

Rü moxü̃ãcü ga Cuáü̃ rü Ngechuchuxü̃ nadau ga naxca̱x nax yaxũxü̃. Rü ñanagürü ga Cuáü̃: —¡Dücax! Daa nixĩ ya yimá Tupanaarü Carnéruxacü ya núma namuãcü nax yanaxoxẽẽãxü̃ca̱x i ñoma i naanecüã̱x i duü̃xü̃güarü pecadugü.

Echequié 36:25

Rü dexá i mechiüxü̃wa tá pexü̃ chixaiyagü. Rü guxü̃ma i perü chixexü̃wa tá pexü̃ chingematagüxẽxẽ. Rü ngẽma nax tupananetagümaxã petupanaã̱xgüxü̃ rü tá nüxna pexü̃ chixĩgachixẽxẽ nax ngẽmaãcü aixcüma pimexü̃ca̱x.

Nüxíraxü̃xü̃ ga popera ga Cuáü̃ ümatüxü̃ 5:6

Rü nüxü̃ tacua̱x nax aixcüma Tupana Nane yixĩxü̃ ya Ngechuchu. Yerü yexguma ñoma ga naanewa nayexmagu rü dexáwa ínabaiegu, rü nümatama ga Tupana nüxü̃ nixu nax Nane yixĩxü̃. Rü yexguma curuchagu nayu̱xgu rü nagü inabaãgu ga Ngechuchu, rü Tupana rü wenaxarü inanawe̱x nax aixcüma Nane nax yixĩxü̃. Rü yexgumarüxü̃ ta ga Naãxẽ ya Üünexü̃ i taguma idoraxü̃, rü tüxü̃ nüxü̃ nacua̱xẽxẽ nax aixcüma Tupana Nane nax yixĩxü̃.

Nüxíraxü̃xü̃ ga popera ga Cuáü̃ ümatüxü̃ 1:7

Natürü ngẽxguma chi Tupanarüxü̃ ngóonexü̃wa imaxẽgu, rü yigütanüxü̃ tixĩgü, rü Tupana Nane ya Ngechuchu rü nagümaxã tüxü̃́ inayanaxoxẽxẽ i guxü̃ma i pecadugü.

Yeremía 17:13

Pa Corix, cuwa nixĩ i ínanguxẽẽgüãxü̃ i Iraétanüxü̃ nax ícunapoxü̃xü̃. Rü guxü̃ma i ngẽma cuxü̃ íta̱xgüxü̃ rü tá naxãnee. Rü guxü̃ma i ngẽma cuxna ixĩgachitanüxü̃ rü ñoma wüxi i duü̃xü̃éga i waixü̃müte̱xegu naxümatüxü̃rüxü̃ inayarüxomare, nagagu nax cuxü̃ ínata̱xgüxü̃, Pa Tupanax. Rü cuma nixĩ i toxna cunaxãxü̃ i maxü̃ ñoma dexá i nutawa chuxchuxü̃rüxü̃.

Chacaría 12:3

Rü ngẽma ngunexü̃gu rü Yerucharéü̃ rü wüxi ya nuta ya yaxüchicüxü̃ tá chayanguxuchixẽxẽ na̱xcha̱xwa i ngẽma togü i nachixü̃anegü. Rü tü̱xchiama tá tayapi̱x ya texé ya nangenagüchaü̃xe. Rü guxü̃ma i ngẽma nachixü̃anegü rü tá nügü nanutaque̱xegü nax Yerucharéü̃maxã nügü nada̱i̱xü̃ca̱x.

Wiyaegü 51:7

¡Rü ẽcü ngẽma maxcuruü̃maxã choxü̃ namaxcuxü̃ne nax iyanaxoxü̃ca̱x i chorü chixexü̃! Rü ngẽmaãcü i chorü maxü̃ rü cupe̱xewa rü gáuxü̃te̱xe i cómüxü̃arü yexera tá nacómüxü̃.

Echequié 36:29

Rü pexna tá chayaxũgachixẽxẽ i guxü̃ma i ta̱xacü i chixexü̃ i nagu perüxĩnüexü̃ rü perü maxü̃ chixexẽẽxü̃. Rü tá chayamuxẽxẽ i perü trigu. Rü taxũtáma wena taiya pexca̱x íchanguxẽxẽ.

Echequié 36:17

—Pa Yatüx, yema Iraétanüxü̃ rü yexguma norü naanewa nayexmagügu, rü nacüma ga chixexü̃ ga nagu namaxẽxü̃maxã nanaxãũxãchigü ga yema norü naane. Rü yema nacüma ga nagu namaxẽxü̃ rü cha̱u̱xca̱x rü naxãũãchi rü nawa chanaxoxéga.

Ichaía 4:4

Rü nüma ya Cori ya Tupana rü taxü̃ i norü ngechaü̃maxã rü norü poramaxã tá ínanapi namaxã ga yimá nagü ga Yerucharéü̃cüã̱xgü inabaxẽẽgücü, rü tá nanayaxu i norü ãũãchixü̃ i ngẽma Chióü̃cüã̱xgü i ngexü̃gü.

Yeremía 2:13

Rü ngẽma chorü duü̃xü̃gü rü taxre ga pecadu nixĩ ga chope̱xewa naxügüxü̃. Rü choxna nixĩgachi ga choma nax dexá i maxü̃xü̃ chixĩxü̃. Rü ñu̱xũchi nügüca̱x nanaxügü ga norü puchugü ga tama dexá nawa yexmaechaxü̃.

Yeremía 29:26

‘Pa Chofoníax, cuma nax chacherdóte quixĩxü̃ rü Cori ya Tupana rü cuxü̃ naxuneta nax Tupanapataarü ãẽ̱xgacü quixĩxü̃ca̱x nachicüxü i chacherdóte i Yoiadá. Rü ngẽxguma ngéma nanguxgu i wüxi i ãũãẽxü̃ i ñoma wüxi i orearü üruü̃ãcü idexaxü̃, rü choma cuxü̃ chamu nax chotapararuü̃wa cunachoxtaparaxü̃ rü cadénamaxã cuyanaíxü̃.

Yeremía 33:8

Rü guxü̃ma ga norü chixexü̃gü ga chope̱xewa naxügüxü̃ rü tá nüxü̃́ íchayanaxoxẽxẽ. Rü tá nüxü̃́ nüxü̃ ichayarüngüma ga yema chixexü̃ ga naxügüxü̃ ga yexguma tama chauga naxĩnüegu rü chomaxã nanuegu.

Echequié 47:1

Rü yemawena ga gumá yatü rü wenaxarü Tupanapata ga taxü̃nearü ĩã̱xwa choxü̃ namu. Rü yexguma yema ĩã̱xwa changuxgu rü nüxü̃ chadau ga dexá ga yema ĩã̱xtüxü̃wa ibaibexü̃ ga éstewaama yáxü̃ ga Tupanapata ídaxü̃chixü̃waama. Rü yema dexá rü Tupanapataarü tügünecüwaguama nida ga ãmarearü guruü̃arü súrcüwawa.

Chacaría 12:14

Rü ngẽxgumarüxü̃ ta i guxü̃ma i ngẽma duü̃xü̃gü i íyaxügüxü̃ rü wüxichigü ya ĩpatawa ngẽxmagüxü̃ rü naxma̱xgümaxã wüxigu tá nangechaxü̃gü —ñanagürü.

Lebítanüxü̃arü puracüchiga 11:36

Rü guxãma ya yíxema nüxü̃ ingógügüxe i ngẽma naeü̃ i yuxü̃ rü taxãũãchi. Natürü ngẽma puchu i dexá i axexü̃ nawa ngẽxmaxü̃ rü tagutáma naxãũãchi.

Ichaía 12:3

Rü pema rü tá taãẽãcüma nawa pexaxegü i ngẽma dexá i maxü̃ tüxna naxãxü̃.

Miquéa 5:12

Rü tá chanadai i ngẽma perü yuüexü̃ rü taxuxü̃táma i yuüxü̃ íchayaxüxẽxẽ.

Ore i mexü̃ ga Cuáü̃ ümatüxü̃ 5:4

Yerü ñuxguacü rü gumá puchugu ínarüxĩĩxü̃ ga wüxi ga daxũcüã̱x ga Tupanaarü orearü ngeruxü̃, rü nayaxĩã̱xchíücüüxẽẽxü̃. Rü guxema tüxíra tügü yéma táexe nachiü̃wa ga gumá puchu ga yexguma yaxĩã̱xchíücüügu, rü tümaca̱x nitaane woo ga ngexü̃rüüxü̃mare ga da̱xawe tüxü̃́ yexmaxẽ.