Chacaría 10:3 - Tupanaarü Ore

³ Rü ngẽmaca̱x ñanagürü ya Cori: —Choma rü namaxã chanu i ngẽma perü ãẽ̱xgacügü i pemaxã icua̱xgüxü̃ rü tá chanapoxcue —ñanagürü. Rü Cori ya Guxãxétüwa Ngẽxmacü ya norü duü̃xü̃güna daucü rü Yudátanüxü̃xü̃ tá naporaexẽxẽ ñoma cowaru i daica̱x poraexü̃rüxü̃.

Chacaría 10:3 Referans Kwoze

Echequié 34:2

—Cumax, Pa Yatüx, ¡rü chauégagu namaxã idexa i ngẽma dauruü̃gü i namaxã icua̱xgüxü̃ i chorü duü̃xü̃gü i Iraétanüxü̃ i ñoma carnérugürüxü̃ ixĩgüxü̃! ¡Rü ngẽma dauruü̃gümaxã nüxü̃ ixu i ñaa chorü ore rü ñaxü̃! “Pegümaxã pengechaxü̃gü, Pa Chorü Carnérugüarü Dauruü̃güx erü pegünaxicatama pedaugü. Natürü ngẽma penaxwa̱xexü̃ nixĩ nax mea nüxna pedaugüxü̃ i ngẽma chorü carnérugü.

Chacaría 11:17

¡Rü nügümaxã nangechaü̃ i ngẽma carnéruarü dauruxü̃ i tama mea norü carnérugüna dauxü̃ rü tüxü̃ ngéma wogümarexü̃! Rü norü poxcu tá nixĩ nax tara i taxrewa ãmaguxü̃maxã nacachacüüxü̃ rü nacaxetüxü̃ i norü tügünexetüwa! Rü tá ninachacüxü rü norü tügünexetüwa rü tá nangexetü. ¡Rü ngẽmaãcü ya nachacüxü rü tá nipamare rü tá nangexetü i norü tügünexetüwa! —ñanagürü.

Chofonía 2:7

Rü ngẽma Yudátanüxü̃ i duü̃xü̃gü i íyaxügüxü̃ rü ngẽxguma Tupana nüxü̃ rüngü̃xẽẽgu rü tá nanayauxgü i ngẽma naane i márpechinüwa ngẽxmaxü̃. Rü ngéma tá nanachibüexẽxẽ i norü carnérugü, rü chütacü tá nagu nape ya yima ĩpatagü i Acharóü̃wa ngẽxmagüne.

Yeremía 25:34

¡Ẽcü pexauxe, Pa Duü̃xü̃güarü Ãẽ̱xgacügüx! ¡Rü pema i duü̃xü̃gümaxã ipecuáxü̃ rü waixü̃müanegu pidixgü! Erü marü nawa nangu i ngunexü̃ nax pexü̃ nada̱i̱xü̃ ñoma carnérugü i ngüexü̃ ida̱i̱xü̃rüxü̃. Rü ñoma wüxi i axepáü̃ i mexẽchixü̃ irünguxü̃rüxü̃ tá perüyi.

Ucu̱xẽgüchiga 21:31

Ngẽma churara rü nanamexẽxẽ i norü cowaru nax daiwa naxũxü̃ca̱x. Natürü Tupana nixĩ ya yimá pora nüxna ãcü nax norü uanügüxü̃ naporamaexü̃ca̱x.

Nüxíraxü̃xü̃ ga popera ga Pedru ümatüxü̃ 2:12

Rü name nixĩ i mea pemaxẽ nape̱xewa i ngẽma duü̃xü̃gü i tama Tupanaxü̃ cua̱xgüxü̃. Rü woo ñu̱xma chixri pechiga yadexagügu, natürü tá nüxü̃ nadaugü i ngẽma mexü̃ i pexügüxü̃, rü tá Tupanaxü̃ nicua̱xüü̃gü i ngẽma ngunexü̃ i nagu Tupana guxãxü̃ma icagüxü̃gu.

Ore i mexü̃ ga Luca ümatüxü̃ 1:68

Rü ñanagürü: “Namecümaxüchi ya tórü Cori ga tórü o̱xi ga Iraéarü Tupana. Erü núma tatanüwa nangu nax tüxü̃ nangü̃xẽẽxü̃ca̱x i yixema i norü duü̃xü̃gü nax ixĩgüxü̃.

Rux 1:6

Rü wüxi ga ngunexü̃gu ga Noemí ga yexguma Moáanewa nayexmayane, rü nüxü̃ ixĩnü ga guma ngĩrü ĩane ga Beréü̃wa rü marü nax nataxuxü̃ma ga taiya, yerü Tupana rü namaxã nixãũãchi.

Ínachoxü̃xü̃chiga 4:31

Rü nüma ga duü̃xü̃gü rü aixcüma nayaxõgü. Rü yexguma nüxü̃ yacua̱xãchitanügu nax Cori ya Tupana rü nüxü̃́ nüxü̃ naxĩnüxü̃ ga norü yumüxẽ rü nüxü̃ nax nadauxü̃ ga ñuxãcü ngúxü̃ nax yangegüxü̃, rü yemaca̱x nüma ga duü̃xü̃gü rü nataãẽgü. Rü ñaxtüanegu nanangücuchitanü, rü Tupanaxü̃ nicua̱xüü̃gü.

Chofonía 1:8

Rü nüma ya Cori ya Tupana rü ñanagürü: —Ngẽma ngunexü̃ i nagu tá nadaiaxü̃ i ngẽma duü̃xü̃gü rü tá chanapoxcue i ngẽma Yudáanearü ãẽ̱xgacügü rü ngẽma ãẽ̱xgacügü nanegü rü guxü̃ma i ngẽma chorü duü̃xü̃gü i to i nachixü̃anearü tupananetaxü̃ icua̱xüü̃güxü̃.

Yeremía 50:6

Chorü duü̃xü̃gü rü ñoma carnérugü i rütauxexü̃rüxü̃ nixĩgü. Rü norü dauruü̃gü rü chixri nüxna nadaugü, rü yemaca̱x máxpü̱xanexü̃gu narütauxe rü ínatüe. Rü düxwa nüxü̃ narüngümae ga napüxü̃ rü tama nüxü̃ nacua̱xgü nax ngexta nayexmaxü̃.

Yeremía 25:12

Rü ngẽxguma 70 ya taunecü ínguxgu nax ngéma nangẽxmagüxü̃ i ngẽma duü̃xü̃gü, rü choma rü tá Babiróniaanearü ãẽ̱xgacüna chaca naxca̱x i ngẽma norü chixexü̃. Rü ngẽma Babiróniacüã̱x i Cadéugü rü choma rü tá íchayanaxoxẽxẽxü̃chi i ngẽma nachixü̃ane. Rü chomatama ya Cori ya Tupana nixĩ i nüxü̃ chixuxü̃ i ngẽma ore.

Yeremía 11:22

Rü nüma ya Cori ya Tupana ya Guxãétüwa Ngẽxmacüx rü ñanagürü nüxü̃: —Choma rü tá wüxi i guxchaxü̃ naxca̱x íchanguxẽxẽ. Rü guxü̃ma i norü ngextü̱xücügü rü daigu tá nayue, rü yíxema nanegü rü naxacügü rü taiyamaxã tá tayue.

Yeremía 10:21

Rü ngẽma ñaa duü̃xü̃gümaxã icua̱xgüxü̃ rü naechitamare namaxẽ, rü tama Cori ya Tupanaca̱x nadaugü. Rü ngẽmaca̱x nixĩ i nagu yanachixegüxü̃, rü ñu̱xũchi nawoonexü̃ i ngẽma norü duü̃xü̃gü.

Ichaía 24:21

Rü ngẽma ngunexü̃gu ya Cori ya Tupana rü tá nanapoxcue i ngẽma naãẽgü i chixexü̃ i dauxü̃wa ngẽxmagüxü̃ rü ñu̱xũchi ngẽma ñoma i naanewa ngẽxmagüxü̃ i ãẽ̱xgacügü i chixexü̃gü. Rü tá nanangutaque̱xexẽxẽ, rü wüxi i poxcuchicaxü̃gu tá nanawocu rü ngẽxma tá nanawãxtaxü̃. Rü ñu̱xũchi muxü̃tama i ngunexü̃güwena rü tá namaxã nanaxuegu i norü poxcu.

Ichaía 10:12

Rü ngẽxguma Cori ya Tupana yanguxẽẽgu i ngẽma poxcu naxca̱x i ngẽma duxü̃xü̃gü i ma̱xpǘne ya Chióü̃wa maxẽxü̃ rü yima ĩane ya Yerucharéü̃wa maxẽxü̃, rü tá Achíriaanearü ãẽ̱xgacüxü̃ napoxcu naxca̱x nax nügü ínataxü̃ rü nügü yacua̱xüxü̃xü̃.

Charumóü̃arü wiyae 1:9

Rü cumax, Pa Pacü i Cuxü̃ Changechaü̃xü̃chicüx, rü cha̱u̱xca̱x rü ñoma wüxi i cowaru i ngexü̃ i mexẽchixü̃ i Faraóü̃arü caru itúchigüxü̃rüxü̃ cumexẽchi.

Echequié 34:12

Rü ñoma carnérugüarü dauruxü̃ i norü carnérugüca̱x oegaãẽxü̃ i ngẽxguma nawoonegu, rü ngẽxgumarüxü̃ tá ta i choma rü naxca̱x chaxoegaãxẽ i ngẽma chorü carnérugü. Rü wüxi ga ngunexü̃ ga ẽanexü̃gu rü taxü̃ ga buanecü ixüxgu rü nügü nawoonemare, natürü i choma rü wena táxarü chayagagü i ngexta ínawoonexü̃wa nax wüxiwa nangẽxmagüxü̃ca̱x.

Danié 11:32

Rü nüma i ngẽma ãẽ̱xgacü rü tá ãmaregü nüxna naxãgü i ngẽma Tupanana ixĩgachixü̃. Natürü ngẽma Iraétanüxü̃ i aixcüma Tupanaga ĩnüexü̃ rü taxũtáma ngẽma ãẽ̱xgacüga naxĩnüe.

Yox 39:25

Rü ngẽxguma nagu yacuegügu ya cornétagü nax nügü nada̱i̱xü̃ca̱x rü ngẽma cowaru rü nanugamaraü̃. Rü yáxü̃gu nüxü̃ napa i naema i ngẽma dai, rü nüxü̃ naxĩnü i churaragüerugü nax tagaãcü norü churaragüxü̃ namuxü̃ nax nügü nada̱i̱xü̃ca̱x.

Echequié 34:11

Rü choma ya Cori ya Tupana rü ñachagürü: —Chomatátama nüxna chadau i ngẽma chorü carnérugü.