Amúx 5:5 - Tupanaarü Ore

⁵ ¡Rü taxṹ i Betéarü tupananetachicüna̱xãca̱x peyadauxü̃! ¡Rü taxṹ i Guirigáwa pexĩxü̃! ¡Rü taxṹ i Bechébagu pichocuxü̃! Erü ngẽma Guirigácüã̱xgü rü to i naanewa tá nagagü, rü yima Beté rü tá nagu napogüe —ñanagürü.

Amúx 5:5 Referans Kwoze

Ochéa 4:15

Pa Iraéanecüã̱xgüx, pema rü woo nüxü̃ picua̱xüü̃güamagu i ngẽma tupananetagü, natürü tama chanaxwa̱xe nax ngẽma Yudáanecüã̱xgü rü ta nagu naxĩxü̃ i ngẽma nacümagü i chixexü̃. ¡Rü taxṹ i nüxü̃ picua̱xüü̃güxü̃ i ngẽma naxchicüna̱xãgü i Guirigáwa rü Bex-abéü̃wa ngẽxmagüxü̃! ¡Rü taxṹ i chauégagu ipexunetaxü̃!

Amúx 8:14

Rü ngẽma duü̃xü̃gü i Chamáriaarü tupananetagüaxü̃́ yaxõgüxü̃, rü tá inayayitanü rü tagutáma ínarüdagü. Rü ngẽxgumarüxü̃ tá ta namaxã nangupetü i ngẽma Dáü̃tanüxü̃ i norü tupananetagüaxü̃́ yaxõgüxü̃ rü ngẽma Bechébacüã̱xgü i norü tupananetagüaxü̃́ yaxõgüxü̃” —ñanagürü.

Amúx 4:4

Rü nüma ya Cori ya Tupana rü ñanagürü: —¡Betéwa rü Guirigáwa pexĩ, rü ngéma yexera i chixexü̃ peyaxü̱x! ¡Rü ẽxü̃wa ngéma penana i perü carnérugü nax perü tupananetagüca̱x peyaguxü̃ca̱x! ¡Rü wüxichigü i tomaepü̱x i ngunexü̃gu ngéma penana i perü diésmu naxca̱x i perü tupananetagü!

Naanearü ügüchiga 21:33

Rü nüma ga Abraáü̃ rü yexma Bechébagu nanato ga wüxi ga nanetü ga tamaríscogu ãégaxü̃. Rü yematüü̃wa nixĩ ga Abraáü̃ rü Cori ya Tupana ya guxü̃guma maxü̃cümaxã yadexaxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 18:17

Natürü ngürüãchi nagu̱x i guxü̃ma i ngẽma ĩanearü meruü̃gü”, ñanagürügü tá. Rü guxü̃ne ya wapurugüarü yoragü, rü guxü̃ma ya yima wapurugüwa puracüexü̃, rü guxü̃ma i duü̃xü̃gü ya yima wapurugügu ĩxü̃, rü guxü̃ma i taxetanüxü̃ i wapurugügu yarüxĩĩü̃xü̃, rü yáxü̃wa tátama nayachaxgütanüãchi, rü ngéma tá nüxü̃ narüdaunü.

1 Corintios 2:6

Natürü pemaxã nüxü̃ chixu, rü ngẽxguma natanüwa tangexmagu i ngẽma marü meama yaxõgüxü̃, rü ngẽxguma nixĩ i nüxü̃ cua̱xüchixü̃ãcü tanangúexẽẽxü̃ i ngẽma ore. Natürü ngẽma cua̱x rü tama ñoma i naanewa ne naxũ, rü bai i ñoma i naanearü ãẽ̱xgacügü i paxa tá iyarüxoxü̃wa ne naxũ.

1 Corintios 1:28

Rü Tupana nanade ga yema duü̃xü̃gü ga togü nüxü̃ oexü̃, rü ñoma i naanewa taxuxü̃ma ixĩgüxü̃ rü taxuxü̃ma nüxü̃́ ngẽxmagüxü̃. Rü yemaacü Tupana nanaxãneexẽxẽ i ngẽma duü̃xü̃gü i ñoma i naanewa tachigagüxü̃.

Amúx 7:17

Natürü i ñu̱xma rü ñaa nixĩ i ngẽma ore i Cori ya Tupana cumaxã nüxü̃ ixuxü̃, rü ñanagürü: “Cuxma̱x rü daa ĩanewa tátama ngexü̃ i ngeãẽxü̃ tixĩ. Rü ngẽma cunegü i iyatüxü̃ rü ñu̱xũchi yíxema cuxacügü ya ingexe rü taramaxã tá tüxü̃ nadai. Rü ngẽma cuanegü rü ngẽma uanügü rü sortéuãcüma tá nügü nayanu. Rü cuma rü duü̃xü̃gü i tama Tupanaxü̃ cua̱xgüxü̃arü nachixü̃anegu tá cuyayu. Rü norü uanügü i ngẽma Iraétanüxü̃ rü Iraéanearü yáxü̃wa tá nanagagü” —ñanagürü ya Cori ya Tupana.

Ochéa 12:11

Rü Garaáxanewa nangẽxma i muxü̃ma i tupananetagümare, natürü ngẽmagü rü natüca̱xmamare nixĩgü. Rü Guirigáwa rü tupananetagüca̱x nanadai rü nayagu ga muxü̃ma ga woca i yatüxü̃. Natürü ngẽma norü ãmarearü guruü̃güarü nutagü rü naanegügu tá nixãũxchitachigümare —ñanagürü.

Ochéa 10:8

Rü tá nagu napogüe i napatagü i ngẽma tupananetagü ga Iraéanecüã̱xgü chixexü̃ nawa ügüxü̃. Rü ngẽma norü ãmarearü guruü̃güétüwa tá narüxügü i chuxchuxü̃gü rü toragü. Rü nüma i ngẽma duü̃xü̃gü rü tá ngẽma ngüchitaerugüxü̃ ñanagürügü: “¡Toétüwa pebuemügü!” ñanagürügü. Rü yima ma̱xpǘnegüxü̃ tá ñanagürügü: “¡Toétügu peyi!” ñanagürügü —ñanagürü ga Ochéa.

Ochéa 9:15

Tupana rü ñanagürü: —Pemax, Pa Iraéanecüã̱xgüx, rü Guirigáwa nixĩ ga penaxüxü̃ ga naguxü̃raü̃xü̃ ga chixexü̃. Rü yéma nixĩ ga ichaxügüxü̃ nax pexchi chaxaixü̃. Rü ngẽma perü chixexü̃gagu rü tá pexü̃ íchawoxü̃ i chorü naanewa. Rü marü taxũtáma pexü̃ changechaü̃ erü guxü̃ma i perü ãẽ̱xgacügü rü tama chauga naxĩnüe.

Ichaía 29:20

Rü ngẽma tama ixĩnüechaü̃xü̃ rü tá nagu̱x. Rü ngẽma nügü írütagüxü̃ rü ngẽma chixexü̃ ügüechaxü̃ rü tá inayarüxo.

Ichaía 8:10

Rü woo chi ngẽma nagu perüxĩnüexü̃ãcüma penaxü̱xgu, natürü tá peyueama. Rü woo pegümaxã nüxü̃ pixuxgu i ngẽma penaxwa̱xexü̃ nax penaxüxü̃, natürü tagutáma pexü̃́ ningu, Pa Nachixü̃anegü i Yáxü̃wa Ngẽxmagüxü̃. Erü Tupana rü tomaxã inarüxã̱ũ̱x.

Wiyaegü 33:10

Rü nüma ya Cori ya Tupana rü nagu nayanaxoxẽxẽ i ngẽma nagu naxĩnüexü̃ i ngẽma duü̃xü̃gü i tama nüxü̃́ yaxõgüxü̃.

Yox 8:22

Natürü ngẽma curü uanügü rü ãne tá ningẽgü. Rü napatagü i ngẽma chixexü̃arü üruü̃gü rü wüxicana tá inayarüxogü —ñanagürü ga Biridá.

1 Chamué 11:14

Rü nüma ga Chamué rü guxü̃ma ga Iraéanecüã̱xgüxü̃ ñanagürü: —¡Ngĩxã rü Guirigáwa taxĩ nax ngéma yanangucuchixẽxẽxü̃ca̱x ya tórü ãẽ̱xgacü! —ñanagürü.

1 Chamué 7:16

Rü guxcüma ga taunecügu rü ĩanegü ga Betéwa rü Guirigáwa rü Mispáwa naxũũxü̃ nax yema Iraéanecüã̱xgüxü̃ yanangü̃xẽẽxü̃ca̱x nax yamexẽẽãxü̃ca̱x ga norü guxchaxü̃gü.

Wenaxarü naxümatü ga Tupanaarü mugü 28:41

Rü tá pexü̃́ nangẽxma i penegü rü pexacügü, natürü taxũtáma pexü̃tawa nangẽxmagü erü perü uanügü rü to i nachixü̃anewa tá nanagagü.

Naanearü ügüchiga 21:31

Rü Abraáü̃ rü Abimeréxmaxã yema nachicawa nügümaxã inaxüga, rü yemaca̱x ga yema nachica rü Bechébagu naxãéga.

1 Chamué 8:2

Rü guma nüxíraü̃cü ga nane rü Yoégu naxãéga. Rü guma norü taxre ga nane rü Abíagu naxãéga. Rü ĩane ga Bechébawa nixĩ ga ãẽ̱xgacü yixĩgüxü̃.

Nüxíraxü̃xü̃ ga popera ga ãẽ̱xgacügüchiga 12:28

Rü norü ucu̱xẽruü̃güna naca ga yemachiga. Rü yemawena ga nüma ga ãẽ̱xgacü ga Yeruboáü̃ rü taxre ga wocaxacü ga úirunaxca̱x naxüxẽxẽ rü duü̃xü̃güxü̃ ñanagürü: —Pemax, Pa Iraéanecüã̱xgüx, rü wüxi i taxü̃ i guxchaxü̃ nixĩ nax Yerucharéü̃wa pexĩĩxü̃ nax ngéma Tupanapata ya taxü̃newa nüxü̃ peyarücua̱xüü̃güxü̃ca̱x. Rü dücax, ñaa wocaxacüchicüna̱xãgü nixĩ i perü tupanagü ga Equítuanewa pexü̃ ígaxü̃xü̃ —ñanagürü.

Nüxíraxü̃xü̃ ga popera ga ãẽ̱xgacügüchiga 12:29

Rü yexguma rü ĩane ga Betégu nanaxǘ ga wüxi ga yema wocaxacüchicüna̱xã, rü yema to rü ĩane ga Dáü̃gu nanaxǘ.

Amúx 7:10

Rü Amachía nixĩ ga chacherdóte ga Betéwa. Rü yexguma nüxü̃ nacua̱xgu ga yema Amú nüxü̃ ixuxü̃, rü paxãma wüxi ga norü orearü ngeruü̃xü̃ Iraéanearü ãẽ̱xgacü ga Yeruboáü̃xü̃tawa namu nax namaxã nüxü̃ yanaxuxü̃ca̱x ga ore ga ñaxü̃: —Amú rü Iraécüã̱xgü i duü̃xü̃gütanügu nixũgüchigü rü cumaxã nananuexẽxẽ, Pa Ãẽ̱xgacüx. Rü curü duü̃xü̃gü rü marü tama yáxna namaxã naxĩnüe nax ngẽmaãcü yadexaxü̃.

Amúx 7:13

Rü tama chanaxwa̱xe i nua Betéwa nüxü̃ quixuxü̃ i ngẽma ore. Erü nua nixĩ i nangẽxmaxü̃ i ñaa nachixü̃anearü ãẽ̱xgacüarü ãmarearü guruxü̃. Rü ñu̱xũchi nua nixĩ i nangẽxmaxü̃ i ñaa nachixü̃anearü tupauca ya taxü̃ne —ñanagürü.

Naanearü ügüchiga 26:23

Rü yemawena ga Ichaá rü Bechébawa naxũ.

Naanearü ügüchiga 26:33

Rü gumá puchu rü Chebágu nanaxüéga ga Ichaá. Rü woo ñu̱xmatama ya yima ĩane ya daa puchu nawa ngẽxmane rü Bechébamaxã nanaxugü.

Yochué 5:9

Rü yexguma nüma ga Cori ga Tupana rü Yochuéxü̃ ñanagürü: —Rü ñaa wíü̃cha̱xmüü̃pe̱xechiraü̃maxã rü marü pexna chanayaxu i perü ãne ga noxri pexü̃́ yexmaxü̃ ga yexguma Equítuanecüã̱xme̱xẽwa peyexmagügu —ñanagürü. Rü ngẽmaca̱x i ngẽma nachica rü ñu̱xma rü ta Guirigátama nixĩ i naéga.

Norü taxre ga popera ga ãẽ̱xgacügüchiga 23:8

Yemawena rü nüma ga Yochía rü Yerucharéü̃wa naxca̱x nangema ga guxü̃ma ga yema tupananetagüarü chacherdótegü ga Yudáanearü ĩanegüwa yexmagüxü̃. Rü ínanawogü ga guxü̃ma ga yema tupananetagüarü ãmarearü guruü̃gü. Rü ĩane ga Guébawa inanaxügü rü ñu̱xmata ĩane ga Bechébawa nangu nax ínawogüãxü̃ ga yema tupananetagüarü ãmarearü guruü̃gü ga chacherdótegü pumarate̱xe nawa yagugüxü̃. Rü yexgumarüxü̃ ta nagu napogü ga yema tupananetagüarü ãmaregüarü guruü̃gü ga Yerucharéü̃arü ãẽ̱xgacü ga Yochuépatacüwawa yexmagüxü̃ rü yema ãmaregüarü guruü̃gü ga guma ĩaneca̱x ixücuxü̃arü to̱xwecüwawa yexmagüxü̃.

Yeremía 48:13

Rü ñu̱xũchi i Moá rü tá naxãnee nagagu i norü tupananeta i Quemó, yexgumarüxü̃ ga Iraétanüxü̃ nax naxãneexü̃ nagagu ga yema norü tupananeta ga Betéwa yexmaxü̃ ga nüxü̃́ yaxõgüãxü̃.

Amúx 1:5

Rü tá chayaponaama i Damácuarü poxeguxü̃arü ĩã̱x. Rü tá chayama̱x i norü ãẽ̱xgacü i Bicax-abéü̃wa ãẽ̱xgacü ixĩxü̃. Rü ngẽxgumarüxü̃ tá ta chayama̱x i norü ãẽ̱xgacü i Bex-edéü̃wa ãẽ̱xgacü ixĩxü̃. Rü norü uanügü rü tá Quíruwa nanagagü i ngẽma Chíriacüã̱xgü —ñanagürü ya Cori ya Tupana.

Amúx 7:9

Rü ngẽma ãmarearü guruü̃gü i nawa Iraétanüxü̃ norü tupananetagüca̱x ãmaregü igugüxü̃ rü tá chayanaxoxẽxẽ. Rü yima Iraétanüxü̃arü tupananetagüpataxü̃gü rü nagu tá chipogügü. Rü taramaxã tá chanadai i ngẽma Yeruboáü̃tanüxü̃ —ñanagürü ga Cori ya Tupana.