Amúx 5:16 - Tupanaarü Ore

^16-17 Rü ñanagürü ya Cori ya Tupana ya Guxãétüwa Ngẽxmacü: —Ngẽxguma tá ngéma chaxũxgu nax chayapoxcuexü̃ca̱x i ngẽma duü̃xü̃gü i chixexü̃gu maxẽxü̃ rü guxü̃ ya ĩanegüarü plazagüwa rü duü̃xü̃gü tá naxauxe. Rü namagüwa rü duü̃xü̃gü rü tá nixaixcha erü poraãcü nüxü̃́ nangu̱x. Rü tá tümaca̱x nangema ya yíxema naanewa puracüexe. Rü ngẽxgumarüxü̃ tá ta naxca̱x nangema i ngẽma auxewa diẽru ngĩxü̃ yauxgüxü̃. Rü guxü̃ma i úbanecügüwa rü tá naxauxe i duü̃xü̃gü i ngẽxguma petanüwa chaxũxgu nax pexü̃ chapoxcuexü̃ca̱x —ñanagürü ya Cori ya Tupana.

Amúx 5:16 Referans Kwoze

Joel 1:11

Rü pema nax naanewa pepuracüexü̃ rü penatoxü̃ ga úbagü rü trigugü rü chebádagü ¡rü poraãcü pengechaü̃güãcüma pexauxe! Erü ngẽma trigu rü chebáda ga petogüxü̃ rü pexü̃́ nayue, rü ngẽmaca̱x taxuxü̃ma pibuxgü.

Yeremía 9:10

Rü duü̃xü̃gü rü yima ma̱xpǘnegüca̱x rü wocachitaü̃güca̱x naxaxu rü ningü̃necüü, erü nixae rü marü taxúema ngéma taxüpetü. Rü marü taxuxü̃ma i wocagaxü̃ taxĩnü. Rü werigü rü naeü̃gü i idüraexü̃ rü nibuxmü.

Yema Cuáü̃ nüxü̃ dauxü̃ i yixcüra tá ngupetüxü̃chiga 18:19

Rü norü ngechaü̃maxã nügüétügu tá waixü̃mü nagünagügü, rü tá poraãcü naxauxe, rü tagaãcü ñanagürügü tá: “Nangechaü̃tümüxü̃, nangechaü̃tümüxü̃ ya yima ĩane ya itaxü̃ne. Rü noxri rü norü yemaxü̃gümaxã nügü nimuarü diẽruã̱xẽẽgü ga guxü̃ne ga wapurugüarü yoragü. Natürü i ñu̱xma rü ngürüãchi wüxi i oragutama rü inayarüxo i guxü̃ma i ngẽma.

Yema Cuáü̃ nüxü̃ dauxü̃ i yixcüra tá ngupetüxü̃chiga 18:10

Rü ngẽma ãẽ̱xgacügü rü ngẽxguma nüxü̃ nadaugügu i ngẽma ãũcümaxü̃ i norü poxcu ya yima ĩane rü norü muü̃maxã tá yáxü̃wa nüxü̃ narüdaunü, rü ñanagürügü tá: “Cungechaü̃tümüxü̃, Cungechaü̃tümüxü̃, Pa Taxü̃ne ya Ĩane ya Babirónia ya Guxü̃ i Nachixü̃anegümaxã Icuáxü̃nex. Erü wüxitama i oragu cuxca̱x ínangu i curü poxcu ya Tupana cuxca̱x íngu̱xẽẽxü̃”, ñanagürügü tá.

Miquéa 2:4

Rü ngẽma ngunexü̃gu rü perü uanügü i pexü̃ igagüxü̃ rü ngechaü̃arü wiyaegu tá pexca̱x nawiyaegü. Rü pexü̃ nacugüãcüma tá ñaãcü nawiyaegü: “Aixcümaxü̃chi taxuwama time. Rü yíxema i Cori ya Tupanaarü duü̃xü̃gü rü togü i duü̃xü̃güme̱xẽwa tangexmagü rü taxúema taétüwa tachogü. Rü ngẽma taanegü rü nügü nayanugü i ngẽma tüxü̃ igagüxü̃”, ngẽmaãcü tá nawiyaegü —ñanagürü ya Tupana.

Miquéa 1:8

Rü Miquéa rü ñanagürü ta: —Ngẽmaca̱x taxü̃ i chorü ngechaü̃maxã tá chaxaxu, rü ngearü chapatuã́xẽ rü ngexchiruxe tá chixũ, rü airu i dauxchitacüã̱xrüxü̃ tá chaxaxu rü ngẽma abetrúxacürüxü̃ aita tá chaxü.

Amúx 8:10

Rü ngẽma perü petachigagü rü ngechaü̃xü̃ tá chayanguxuchixẽxẽ erü yuexü̃ca̱x tá pexauxe. Rü ngẽma perü wiyaegü rü ngechaü̃arü wiyaexü̃ tá chayanguxuchixẽẽgü. Rü ngechaü̃chirugu tá pexü̃ chicu̱xgüxẽxẽ. Rü ngechaü̃maxã tá pegü pibaierugü. Rü yíxema tümane i nügümaxã wüxicacü i yuxü̃ca̱x auxexü̃rüxü̃ tá pexauxe. Rü guxü̃táma taxü̃ i guxchaxü̃gu nayagu”, ñachagürü.

Amúx 5:27

Rü ngẽmaca̱x i choma rü ĩane ya Damácuarü yáxü̃wa tá pexü̃ chawogü. Rü choma ya Cori ya Tupana ya Guxãétüwa Ngẽxmacü nixĩ i ngẽma ñachaxü̃. Rü ngẽma nixĩ i chauéga —ñanagürü.

Amúx 3:13

Rü Cori ya Tupana ya Guxãétüwa Ngẽxmacü rü ñanagürü: —¡Iperüxĩnüe i pemax! ¡Rü Acóbutanüxü̃maxã nüxü̃ pixu! Rü ngẽma ngunexü̃ i nagu Iraétanüxü̃na norü chixexü̃güca̱x nüxna chacaxgu, rü tá nagu chapogü i ngẽma norü tupananetagüarü ãmarearü guruü̃gü i Betéwa ngẽxmagüxü̃. Rü nagu tá chapogü i ngẽma ãmarearü guruü̃chata̱xcuregü rü waixü̃müanegu tá nayi.

Joel 1:14

¡Rü naxca̱x pengẽma i guxü̃ma i duü̃xü̃gü nax aureãcüma nayumüxẽgüxü̃ca̱x! ¡Rü Cori ya Tupanapata ya taxü̃negu penangutaque̱xexẽxẽ i perü ãẽ̱xgacügü i yaxguã̱xgü, rü guxü̃ma i duü̃xü̃gü i ñaa nachixü̃anecüã̱xgü! ¡Rü ngéma perü yumüxẽwa Tupanana peca nax pexü̃ nangü̃xẽxẽxü̃ca̱x!

Joel 1:8

Rü chorü duü̃xü̃gü rü naxauxe ngĩrüxü̃ i wüxi i pacü i ngechaü̃chirugu icu̱xcü erü ngẽma ngextü̱xücü i namaxã naxãtechaü̃xü̃ rü nayu.

Yeremía 4:31

Nüxü̃ chaxĩnü i naga i ñoma wüxi ya ngexe ya ngexwaca íxraxacüxerüxü̃ ixĩxü̃. Rü ngẽma naga rü Chióü̃cüã̱xgüga nixĩ. Rü nümagü rü naxugüme̱xẽãcü ñaãcü naxauxe: —¡Chaugümaxã changechaü̃, erü choxü̃ tá nadai i ngẽma máetatanüxü̃! —ñaxü̃.

Ichaía 22:12

Rü ngẽma ngunexü̃gu rü nüma ya Cori ya Tupana ya Guxãétüwa Ngẽxmacü rü pemaxã nüxü̃ nixu nax pexauxexü̃ rü témüxü̃ i naxchirugu picu̱xgüxü̃ rü pegü pidüerugüxü̃ nax ngẽmaãcü penawéxü̃ca̱x nax aixcüma tá naga pexĩnüexü̃.

Ichaía 15:8

Rü guxü̃ma i Moátanüxü̃arü naanewa rü nüxü̃ taxĩnü nax duü̃xü̃gü ngü̃xẽẽca̱x ínacagüxü̃. Rü ngẽma naga nax naxauxexü̃ i ngẽma duü̃xü̃gü rü ñu̱xmata ĩane ya Egraíü̃gu rü ĩane ya Beéx-eríü̃gu nüxü̃ taxĩnü.

Norü taxre ga to ga popera ga ãẽ̱xgacügüchiga ümatüxü̃ 35:25

Rü nüma ga Yeremía rü nanaxümatü ga wüxi ga wiyae ga Yochíaarü yuxchigagu ixuxü̃. Rü yexguma naxümatügucürüwa ga yema wiyae rü nüma ga Iraétanüxü̃ ga wiyaetanüxü̃ ga iyatüxü̃ rü ngexü̃gü rü nagu nawiyaegü ga yema wiyae. Rü ñu̱xma rü ta rü Iraéanewa nagu nawiyaegü i ngẽma wiyae. Rü ngẽmaãcü nüxna nacua̱xãchie ga Yochíaarü yu. Rü ngẽma wiyae rü ngechaü̃ i wiyaegüpanegu nixĩ i naxümatüxü̃.

Yeremía 30:5

Rü ñanagürü: —Nüxü̃ taxĩnüe nax norü muü̃maxã rü baixãchiãẽmaxã aita naxüexü̃ i duü̃xü̃gü. Rü nataxuma i taãxẽ.

Ochéa 4:3

Rü ngẽmaca̱x i ñaa nachixü̃ane rü poraãcü ngechaü̃ nüxü̃́ nangu̱x rü naanegüwa rü taxuxü̃ma narüxü. Rü duü̃xü̃gü rü nida̱xawee rü nayue, rü ngẽxgumarüxü̃ ta i ngẽma naeü̃gü i naixnecücüã̱x rü werigü rü choxnigü i márcüã̱x rü nigúetanü.

Joel 1:15

Erü marü ningaica i Tupanaarü poxcu. Rü ngẽma ngunexü̃ rü poraãcü tá naxãũcüma erü Yimá Guxãétüwa Ngẽxmacü rü tá taxü̃ i poxcu taxca̱x ínanguxẽxẽ.

Amúx 8:3

Rü ñanagürü ta: —Ngẽma ngunexü̃gu rü ngẽma ãẽ̱xgacüpatawa taãẽãcü nax nawiyaegüxü̃ rü tá ngechaü̃xü̃ nananguxuchi. Erü ngẽma ngunexü̃gü rü muxü̃tama i duü̃xü̃gü nayue. Rü bexma tá düxétüguama ínanawoxü̃ i ngẽma yuexü̃ —ñanagürü ya Cori ya Tupana.

Yeremía 9:16

Rü nagu tá chanawoone i nachixü̃anegü i nümagü rü nanatügü rü woo norü o̱xigü tama nüxü̃ cua̱xgüxü̃. Rü norü uanügü rü taramaxã tá nawe changegüxẽxẽ nax nadaiaxü̃ca̱x nax ngẽmaãcü bai i wüxi íyaxüxü̃ca̱x” —ñanagürü ga Cori ya Tupana.