Amúx 4:9 - Tupanaarü Ore

⁹ Rü ñanagürü ta: —Buanecü ga naiemacü rü naweanegü pexca̱x íchanguxẽxẽ rü yemaacü narüñexgü ga penetügü rü perü úbanecü. Rü munügü nanangõ̱x ga perü igunecü rü perü oribunecü. Natürü ga pemax rü woo yema pexü̃ nax ngupetüxü̃ rü tama cha̱u̱xca̱x pewoegu —ñanagürü ya Cori ya Tupana.

Amúx 4:9 Referans Kwoze

Aguéu 2:17

Rü yemaacü pexü̃ nangupetü yerü choma rü da̱xaweanegümaxã rü gáuxü̃pü̱xümaxã chanadai ga yema perü nanetügüarü o ga poraãcü naxca̱x pepuracüexü̃. Natürü ga pemax rü tama cha̱u̱xca̱x pewoegu ga yexguma. Rü choma ya Cori ya Tupana nixĩ i pemaxã nüxü̃ chixuxü̃ i ngẽma.

Wenaxarü naxümatü ga Tupanaarü mugü 28:22

Rü pexca̱x tá ngéma nanamu i da̱xaweanegü i pexü̃ daixü̃, rü axü̃negü i poraxü̃ i tama paxa pexü̃ ngupetüxü̃, rü perü chaxünegü, rü naiane i tama namaxã peporaexü̃. Rü perü trigu i peanewa ngẽxmaxü̃ rü tá nipagü erü dexá rü tá nichegü rü ñu̱xũchi naweane rü norü da̱xaweane tá naxca̱x ínangugü. Rü ngẽma da̱xaweanegü rü tagutáma pexna nangupetü ñu̱xmatáta pexü̃ nadai.

Amúx 4:6

Rü choma nixĩ ga taiya pexca̱x íchanguxẽẽxü̃ ga guxü̃nema ga perü ĩanegüwa. Rü choma nixĩ ga pexü̃́ chanatauxẽẽxü̃ ga õna ga guxü̃nema ga perü ĩanexacügüwa. Natürü woo nax yema pexca̱x íchanguxẽẽxü̃ rü tama cha̱u̱xca̱x pewoegu. Rü choma ya Cori ya Tupana nixĩ i pemaxã nüxü̃ chixuxü̃ i ngẽma.

Amúx 4:8

Rü duü̃xü̃gü rü ĩanegügu nixĩgüetanü nax dexáca̱x nadaugüxü̃, natürü taxuxü̃ma ga taxü̃ ga dexáxü̃ inayangaugü nax yemaacü nüxü̃́ yanguxü̃ca̱x nax yata̱xawaexü̃. Natürü woo yema pexü̃ nax ngupetüxü̃ ga pemax rü tama cha̱u̱xca̱x pewoegu —ñanagürü ya Cori ya Tupana.

Joel 2:25

Rü nüma ya Cori ya Tupana rü ñanagürü pexü̃: —Choma rü tá pexü̃́ chanatáeguxẽxẽ ga yema penetügü ga ñuxre ga taunecü pexü̃́ nax nangóoxü̃ ga yema munügü ga yéma chamugüxü̃.

Joel 1:7

Rü ngẽma munügü rü tórü úbanecügu rü tórü igunecügu nawagüe rü nayangeatüxẽxẽ rü ngẽmaãcü nacho̱xtanümare i nachacüxü.

Yeremía 5:3

Pa Corix, ngẽma naxca̱x cudauxü̃ nixĩ i duü̃xü̃gü i aixcüma cuga ĩnüexü̃. Natürü woo cunapoxcue, rü tama cuga naxĩnüechaü̃. Rü cunadai, natürü tama inaxĩnüechaü̃. Yerü nutaarü yexera nataiarü maxü̃ã̱xgü, rü tama nüxü̃ narüxoechaü̃ i nacüma i chixexü̃.

Yeremía 3:10

Rü naétüwa ga yema chixexü̃ ga naxügüxü̃ ga yema Yudáanecüã̱xgü ga choxna ĩgüxü̃, rü choxü̃ nawomüxẽẽgümare rü tama aixcüma cha̱u̱xca̱x nawoegu. Rü chomatama ya Cori ya Tupana nixĩ i nüxü̃ chixuxü̃ i ngẽma —ñanagürü.

Ichaía 1:5

Rü pema rü Tupanamaxã penue rü tama naga pexĩnüe. Rü ngẽmaca̱x taxuwama marü pexna nanacua̱i̱xcaéga, erü peeruwa rü marü guxü̃wama penapi̱xerugü rü marü pingearü poraxã̱x i ñu̱xmax.

Norü taxre ga to ga popera ga ãẽ̱xgacügüchiga ümatüxü̃ 6:28

Rü ngẽxguma ñaa nachixü̃anewa nangemagu i taiya, rüe̱xna ínanguxgu i nanetüarü da̱xaweane, rüe̱xna naianexü̃maxã nayuegu i nanetügü, rüe̱xna ínangugügu i munügü, rüe̱xna õxmigü, rüe̱xna naweanegü, rüe̱xna torü uanügü nüxü̃ íchomaeguãchigu i torü ĩanegü, rüe̱xna ta̱xacürü to i guxchaxü̃ rüe̱xna da̱xaweanegü toxca̱x ínguxgu, natürü ngẽxguma wüxi i curü duü̃xü̃ rüe̱xna guxü̃ma i curü duü̃xü̃gü i Iraétanüxü̃ nüxü̃ icua̱xãchigügu nax norü chixexü̃gagu ngúxü̃ yangegüxü̃ rü daa cupata ya taxü̃newa naxunagüãcüma yayumüxẽgügu, ¡rü daxũguxü̃ i naanewa nüxü̃ naxĩnü rü nüxü̃́ nüxü̃ irüngüma i norü chixexü̃gü! ¡Rü nüxü̃́ naxütanü i wüxichigü i duü̃xü̃ ngẽxgumarüxü̃ nax ñuxãcü cupe̱xewa namaxü̃xü̃! Erü cuxicatama nixĩ i nüxü̃ cucuáxü̃ i wüxichigüarü maxü̃.

Nüxíraxü̃xü̃ ga popera ga ãẽ̱xgacügüchiga 8:37

Rü ngẽxguma ñaa nachixü̃anewa nangemagu i taiya, rüe̱xna ínanguxgu i nanetüarü da̱xaweane, rüe̱xna naianexü̃maxã nayuegu i nanetügü, rüe̱xna ínangugügu i munügü, rüe̱xna õxmigü, rüe̱xna naweanegü, rü ngẽxguma torü uanügü nüxü̃ íchomaeguãchigu i torü ĩanegü nax toxü̃ nada̱i̱xü̃ca̱x, rüe̱xna ta̱xacürü to i guxchaxü̃, rüe̱xna da̱xaweanegü toxca̱x ínguxgu, natürü ega curü duü̃xü̃gü i Iraétanüxü̃ nüxü̃ naxoegu i norü chixexü̃gü rü daa cupata ya taxü̃newa yayumüxẽgügu, ¡rü daxũguxü̃ i naanewa nüxü̃́ nüxü̃ naxĩnü rü nüxü̃́ nüxü̃ irüngüma i norü chixexü̃gü! ¡Rü nüxü̃́ naxütanü i wüxichigü i duü̃xü̃ ngẽxgumarüxü̃ nax ñuxãcü cupe̱xewa namaxü̃xü̃! Erü cuxicatama nixĩ i nüxü̃ cucuáxü̃ i wüxichigüarü maxü̃.

Wenaxarü naxümatü ga Tupanaarü mugü 28:42

Rü guxü̃ma i ngẽma perü naanewa ngẽxmagüxü̃ i naigü rü ñu̱xũchi penetüarü ogü rü munügü tá nayawa.

Ichaía 50:11

Natürü i pema rü toguama perüxĩnüe rü perütama omügü penanaixẽxẽ nax nagu pexĩxü̃ca̱x. Rü ngẽmaãcü Tupanaxü̃ pexo. Rü ngẽmaca̱x i nüma ya Tupana ya Guxãétüwa Ngẽxmacü rü tá pexü̃ napoxcue rü ngúxü̃ pexü̃ ningexẽxẽ —ñachagürü.

Abacú 3:17

Rü woo i ngẽma igunecü rü yangechacugu, rü woo i ngẽma úba rü ngẽma oribu rü nangearü õõ̱xgu, rü woo ngẽma naanegüwa rü nataxuxguma i ori̱x i buxgüxü̃, rü woo nayuegu i ngẽma carnérugü i nachitaxü̃wa, rü woo marü nataxuxguma i wocagü i naxpüü̃wa, natürü i choma rü taãẽãcüma ta nüxü̃ chicua̱xüxü̃ ya Cori ya Tupana ya chorü maxẽẽruxü̃.

Ichaía 9:12

Rü éstewaama ne naxĩ i Chíriaanecüã̱xgü, rü oéstewaama ne naxĩ i Firitéutanüxü̃. Rü ñoma ta̱xacü i noxtacüma íga̱xaxü̃rüxü̃ tá Iraéanecüã̱xgüxü̃ nadai. Rü woo ngẽmaãcü napoxcueãxü̃ ya Cori ya Tupana, natürü tama Iraéanecüã̱xgümaxã inarüngü̃xmü. Rü yexeraãcü nayaxãxũnechigüama.

Ochéa 11:5

Natürü i nümagü rü tama cha̱u̱xca̱x nawoeguchaü̃. Rü ngẽmaca̱x woo taxũtáma Equítuaneca̱x nawoegu natürü Achíriaaneme̱xẽwa tá nangẽxmagü, erü tama cha̱u̱xca̱x nawoeguchaü̃.

Maraquía 3:11

Rü penetü rü tá mea nixo erü choma tá nüxna chadau nax taxuxü̃táma i naweane rü da̱xaweane nachixexẽẽxü̃ i ngẽma penetügüarü o rü perü úbanecügu.