Ngechuchuarü ngúexü̃gü ga yamugüxü̃arü puracüchiga 7:35 - Tupanaarü Ore

³⁵ Rü woo ga noxri ga nümagü ga natanüxü̃ rü gumá Moichéxü̃ naxoe ga yexguma ñagügu: “¿Rü texé cuxü̃ tamu nax toeru quixĩxü̃ca̱x rü tomaxã icucuáxü̃ca̱x?” ñagügu. Natürü ga Tupana rü yéma nanamuama nax yema duü̃xü̃güxü̃ ínanguxü̃xẽxẽxü̃ca̱x rü norü ãẽ̱xgacü nax yixĩxü̃ca̱x. Rü yemaacü Moichéxü̃ namu ga Tupana ga yexguma naxü̃tawa namuãgu ga yema norü orearü ngeruxü̃ ga yema naixeta ga iya̱u̱xraxü̃wa naxca̱x nango̱xgu.

Ngechuchuarü ngúexü̃gü ga yamugüxü̃arü puracüchiga 7:35 Referans Kwoze

Ore i mexü̃ ga Luca ümatüxü̃ 19:14

Natürü yema ĩanecüã̱x ga duü̃xü̃gü rü naxchi naxaie ga gumá yatü. Rü yemaca̱x nawenaãma nayamugü ga ñuxre ga orearü ngeruü̃gü nax nachixü̃anearü ãẽ̱xgacümaxã nüxü̃ yanaxugüxü̃ca̱x nax tama nanaxwa̱xegüxü̃ nax norü ãẽ̱xgacüxü̃ nax yixĩxü̃ca̱x ga gumá yatü.

Wiyaegü 75:7

Natürü nüma ya Tupana nixĩ ya aixcüma ãẽ̱xgacü ixĩcü rü nüma nixĩ i nangugüãxü̃ i wüxíechigüarü maxü̃. Rü tümaxe rü tüxü̃ naxãneexẽxẽ rü toguxe rü tüxü̃ nicua̱xüxü̃.

Iraétanüxü̃arü muxchiga 20:16

Rü yemaca̱x ga toma rü Cori ya Tupanana ngü̃xẽẽca̱x tacagü. Rü nüma ga Cori rü nüxü̃ naxĩnü nax naxca̱x aita taxüexü̃. Rü norü duü̃xü̃ i dauxü̃cüã̱x totanüwa namu rü yema nixĩ ga Equítuanewa toxü̃ ígaxü̃xü̃. Rü ñu̱xma rü nua daa ĩane ya Cadéwa nixĩ i tangexmagüxü̃ i curü naanearü üyeanewa.

Ínachoxü̃xü̃chiga 14:19

Rü yexgumatama ga yema Tupanaarü duü̃xü̃ ga daxũcüã̱x rü yema caixanexü̃ ga noxri Iraétanüxü̃pe̱xegu ĩchiréxü̃ rü wixweama naxĩ.

Yema Cuáü̃ nüxü̃ dauxü̃ i yixcüra tá ngupetüxü̃chiga 15:3

Rü nagu tawiyaegü ga Moiché ga Tupanaarü duü̃arü wiyae. Rü yexgumarüxü̃ ta nagu tawiyaegü ga gumá Carnéruxacüarü wiyae ga ñaxü̃: “Pa Torü Cori ya Tupana ya Guxü̃étüwa Ngẽxmacüx, nataxüchi rü namexẽchi i guxü̃ma i ngẽma cuxüxü̃. Rü curü ĩnü rü aixcüma nawe̱xgu rü taguma quidora, Pa Guxü̃ i Nachixü̃anegümaxã Icuácü.

Popera ga Yudíugü ga yaxõgüxü̃ca̱x ümatüxü̃ 2:2

Rü yexguma tauta Nane ya Cristuxü̃ núma namuxgu ga Tupana, rü norü orearü ngeruü̃gü ga daxũcüã̱xgüwa duü̃xü̃gümaxã nüxü̃ nixu ga norü mugü nax naga naxĩnüexü̃ca̱x. Rü yema mugü rü aixcüma napora yerü guxü̃ma ga yema tama naga ĩnüexü̃, rü yema mugü nüxü̃ ixuxü̃ãcüma Tupana nanapoxcue.

Colosenses 1:15

Taguma texé Tupanaxü̃ tadau, natürü nüma rü núma nanamu ga Nane nax duü̃xü̃gü nüxü̃ daugüxü̃ca̱x rü nüxü̃ nacua̱xgüxü̃ca̱x nax ñuxãcü yixĩxü̃ i nüma ya Tupana. Rü naxü̃pa ga guxü̃ma ga yema nango̱xẽẽxü̃, rü nüxíra marü nayexma ga Tupana Nane.

Ngechuchuarü ngúexü̃gü ga yamugüxü̃arü puracüchiga 7:51

Rü ñanagürü ga Estébaü̃: —Dücax Pa Ãẽ̱xgacügüx, pema rü guxü̃guma nüxü̃ pexoe i Tupanaarü ore, rü tama iperüxĩnüechaü̃. Rü peãẽwa rü tama peyaxõgüchaü̃. Rü pema rü guxü̃guma Tupanaãxẽ ya Üünecümaxã penueecha. Rü ngẽmaãcü i pema rü yema nũxcümaü̃güxü̃ ga perü o̱xigürüü̃tama pixĩgü.

Ngechuchuarü ngúexü̃gü ga yamugüxü̃arü puracüchiga 7:30

Rü 40 ga taunecüguwena rü yema chianexü̃ ga Chinaí ga ma̱xpǘnearü ngaicamana, rü wüxi ga naixeta ga yéma iya̱u̱xraxü̃wa Moichéca̱x nango̱x ga wüxi ga Tupanaarü orearü ngeruxü̃ ga daxũcüã̱x.

Ngechuchuarü ngúexü̃gü ga yamugüxü̃arü puracüchiga 5:31

Natürü Tupana rü nüxü̃ nicua̱xüxü̃, rü nügüarü tügünecüwawa nanatoxẽxẽ. Rü duü̃xü̃güarü Ãẽ̱xgacü rü Maxẽxẽxẽruxü̃ nayangucuchixẽxẽ nax Iraétanüxü̃xü̃ nangü̃xẽxẽxü̃ca̱x nax nüxü̃ naxoexü̃ca̱x i norü chixexü̃gü, rü Tupana nüxü̃́ nüxü̃ rüngü̃maxü̃ca̱x i norü pecadugü.

Ngechuchuarü ngúexü̃gü ga yamugüxü̃arü puracüchiga 3:22

Rü Moiché rü tórü o̱xigümaxã nüxü̃ nixu rü ñanagürü: “Perü Cori ya Tupana rü petanüwa tá nüxü̃ naxuneta i wüxi i norü orearü uruxü̃ i chauxrüxü̃ ixĩxü̃. Rü name nixĩ nax naga pexĩnüexü̃ i guxü̃ma i ngẽma pemaxã nüxü̃ yaxuxü̃.

Ngechuchuarü ngúexü̃gü ga yamugüxü̃arü puracüchiga 2:36

Rü ñanagürü ga Pedru: —Name nixĩ i guxãma i pema i Iraétanüxü̃ nax nüxü̃ pecua̱xgüxü̃ rü gumá Ngechuchu ga curuchawa peyapotacü, rü Tupana rü marü perü Cori ya Cristuxü̃ nayaxĩxẽxẽ —ñanagürü ga Pedru.

Ore i mexü̃ ga Cuáü̃ ümatüxü̃ 19:15

Natürü ga nümagü rü aita naxüe, rü ñanagürügü: —Tanaxwa̱xe nax nayuxü̃. Rü ¡curuchawa yapota! —ñanagürügü. Rü Pirátu nüxna naca rü ñanagürü nüxü̃: —¿Ñuxãcü i choma rü ichanamu nax curuchawa yapotagüãxü̃ca̱x ya perü ãẽ̱xgacü? —ñanagürü. Natürü ga chacherdótegüarü ãẽ̱xgacügü rü Pirátuxü̃ nangãxü̃gü, rü ñanagürügü: —Yimá ãẽ̱xgacü ya Chécharu ya Rómawa ngẽxmacü rü yimá nixĩ ya torü ãẽ̱xgacü, rü nataxuma i to —ñanagürügü.

Ore i mexü̃ ga Cuáü̃ ümatüxü̃ 18:40

Rü yexguma ga guxü̃ma ga yema duü̃xü̃gü, rü tagaãcü aita naxüe, rü ñanagürügü: —Tama tanaxwa̱xe nax cuyangéxü̃ i ngẽma yatü. Rü Barabá waxi nixĩ i tanaxwa̱xexü̃ nax cuyangéxü̃ —ñanagürügü. Rü yema Barabá rü wüxi ga máẽtaxü̃ nixĩ.

Ichaía 63:9

Rü nüma ya Tupana rü tama togüxü̃ núma namuxü̃ nax norü duü̃xü̃güxü̃ ínanguxü̃ẽẽxü̃ca̱x. Rü nümatama ya Tupana nixĩ ga ínanguxü̃xẽẽãxü̃ nawa ga norü ĩ̱xãchiãxẽ yerü poraãcü nüxü̃ nangechaxü̃ rü nüxü̃́ nangechaü̃tümüxü̃gü. Rü yemaca̱x guxü̃guma norü uanügüme̱xẽwa ínananguxü̃xẽxẽ.

Wiyaegü 77:20

Rü cunamu ga Moiché rü Aróü̃ nax yagagüãxü̃ca̱x ga curü duü̃xü̃gü ñoma carnérugü igagüxü̃rüxü̃.

1 Chamué 12:8

Rü yexguma Acóbu rü ñu̱xũchi natanüxü̃ Equítuanewa ngugügu, rü mucü ga taunecü yéma nayexmagügu ga guxema pexrü o̱xigü, rü nüma ga Equítuanecüã̱xgü rü chixri tümamaxã inacua̱x. Rü yemaca̱x Cori ya Tupanana nacagüe. Rü nüma ga Cori ya Tupana rü Moichéxü̃ rü ñu̱xũchi Aróü̃xü̃ yéma namugü nax Equítuanewa ínanguxü̃xẽẽãxü̃ca̱x ga yema pexrü o̱xigü. Rü ñaa nachicawa nanangugüxẽxẽ.

1 Chamué 10:27

Natürü nayexmagü ta ga duü̃xü̃gü ga Chaúmaxã chixexü̃gu rüxĩnüexü̃ rü ñagüxü̃: —¿Ñuxãcü tá i ñaa yatü i tamaxã inacuáxü̃? —ñagüxü̃. Rü yemaacü nüxü̃ naxõõ̱xgü rü tama namaxã nataãẽgü. Natürü nüma ga Chaú rü tama yemagu narüxĩnü.

Ínachoxü̃xü̃chiga 33:2

Rü choma rü tá cupe̱xegu chayaxũxẽxẽ i chorü orearü ngeruxü̃ i dauxü̃cüã̱x nax cumaxã inacuáxü̃ca̱x. Rü ngẽma naanewa tá íchanawoxü̃ i ngẽma Canaáü̃tanüxü̃, rü Amoréutanüxü̃, rü Itítanüxü̃, rü Ferechéutanüxü̃, rü Ebéutanüxü̃, rü Yebuchéutanüxü̃.

Ínachoxü̃xü̃chiga 32:34

Rü ñu̱xma rü namaxã inaxũãchi i Iraétanüxü̃ nax ngẽma naane i cumaxã nüxü̃ chixuxü̃wa nax cunagagüxü̃. Rü chorü orearü ngeruxü̃ i dauxü̃cüã̱x tá cuxü̃ ínixümücü. Rü ngẽxguma nawa nanguxgu i ngẽma ngunexü̃ nax chapoxcuexü̃ i ngẽma Iraétanüxü̃, rü tá chanapoxcue nagagu i ngẽma chixexü̃ i naxügüxü̃ —ñanagürü ga Tupana.

Ínachoxü̃xü̃chiga 14:24

Natürü yexguma marü ngunetüxü̃wa nanguxgu, rü nüma ga Cori ya Tupana rü yema caixanexü̃ ga üxüemarüxü̃ ixĩxü̃wa Equítuanecüã̱xgüarü churaragüxü̃ nadawenü. Rü nanaxĩ̱xãchiãẽgüxẽxẽ. Rü yemaca̱x nügümaxãtama nanue.

Ínachoxü̃xü̃chiga 2:14

Rü nüma ga yema Iraétanüxü̃ rü nanangãxü̃ rü ñanagürü: —¿Texé cuxü̃ tamu nax cuma rü torü ãẽ̱xgacü i guxchaxü̃arü mexẽẽruxü̃ quixĩxü̃ca̱x? ¿Ẽ̱xna cuma nagu curüxĩnügu rü choxü̃ rü tá ta quimáxü̃ ga yema Equítuanecüã̱x ga ĩnex quimáxü̃rüxü̃? —ñanagürü. Rü yexguma yemaxü̃ naxĩnügu ga Moiché, rü namuü̃, yerü marü nüxü̃ nacua̱xgüama ga duü̃xü̃gü ga nax yema Equítuanecüã̱xü̃ yamáxü̃.

Ore i mexü̃ ga Márcu ümatüxü̃ 12:26

Pema choxna peca i yuexü̃arü dagüchiga. ¿Natürü tama ẽ̱xna nawa pengúe i Tupanaarü ore ga Moiché ümatüxü̃ ga boetaxü̃ ga nai ga iya̱u̱xratanüxü̃ íyaxuxü̃wa? Erü yema orewa rü Moichéxü̃ ñanagürü ga Tupana: “Choma nixĩ i Abraáü̃arü Tupana, rü Ichaáarü Tupana, rü Acóbuarü Tupana”, ñanagürü.