Ngechuchuarü ngúexü̃gü ga yamugüxü̃arü puracüchiga 27:1 - Tupanaarü Ore

¹ Rü yema ãẽ̱xgacügü rü düxwa nagu narüxĩnüe nax Itáriaanewa toxü̃ namugüxü̃. Rü norü churaragüarü capitáü̃na nanamu ga Pauru namaxã ga ñuxre ga togü ga poxcuexü̃. Rü gumá capitáü̃ rü Yúriu nixĩ ga naéga, rü norü churaragütücumü rü “Ãẽ̱xgacü ya Chécharuarü Dauruü̃gü”, nixĩ ga naéga.

Ngechuchuarü ngúexü̃gü ga yamugüxü̃arü puracüchiga 27:1 Referans Kwoze

Ngechuchuarü ngúexü̃gü ga yamugüxü̃arü puracüchiga 25:25

Natürü i choma rü taxuxü̃ma i ta̱xacü i chixexü̃ i naxüxü̃ nawa chadau nax naxca̱x yamáxü̃. Natürü nüma ga Pauru rü naxca̱x ínaca nax Rómaarü ãẽ̱xgacü ya Chécharu nüxna ca̱xaxü̃, rü ngẽmaca̱x nagu charüxĩnü nax ngéma chanamuxü̃.

Ngechuchuarü ngúexü̃gü ga yamugüxü̃arü puracüchiga 25:12

Rü yexguma ga Féstu rü norü ucu̱xẽruü̃gümaxã nidexa, rü ñu̱xũchi ñanagürü Pauruxü̃: —Marü naxca̱x ícuca nax Rómaarü ãẽ̱xgacü ya Chécharu cuxna caxü̃ca̱x. Ẽcü, ñu̱xma rü naxü̃tawa tá cuxü̃ chamu —ñanagürü.

Ngechuchuarü ngúexü̃gü ga yamugüxü̃arü puracüchiga 10:1

Ĩane ga Checharéawa nayexma ga wüxi ga yatü ga Cornériugu ãégacü. Rü nüma rü norü capitáü̃ nixĩ ga 100 ga churaragü ga Itáriaanetücumügu ãégaxü̃.

Ngechuchuarü ngúexü̃gü ga yamugüxü̃arü puracüchiga 27:11

Natürü yema churaragüarü capitáü̃ rü yexeraãcü gumá wapuruarü yoragaama naxĩnü, rü marinerugüarü capitáü̃gaama naxĩnü, rü tama aixcüma Pauruga naxĩnü.

Ngechuchuarü ngúexü̃gü ga yamugüxü̃arü puracüchiga 18:2

Rü yéma namaxã inayarüxũ ga wüxi ga Yudíu ga Aquíragu ãégaxü̃. Nüma rü Póntoanecüã̱x nixĩ, rü yexwacax Itáriaanewa ne naxũ ngĩmaxã ga naxma̱x ga Prichíra. Rü yéma Coríntiuwa nayexma, yerü Rómaarü ãẽ̱xgacü ga Cláudiu nanamu nax Rómawa ínachoxü̃xü̃ca̱x ga guxü̃ma ga Yudíugü. Rü Pauru rü Aquíraxü̃tagu nanaxũane.

Popera ga Yudíugü ga yaxõgüxü̃ca̱x ümatüxü̃ 13:24

¡Rü nüxü̃ perümoxẽgü i guxü̃ma i ngẽma perü dauruü̃gü i pemaxã icuáxü̃! ¡Rü ngẽxgumarüxü̃ ta nüxü̃ perümoxẽgü i guxü̃ma i togü i taenexẽgü i yaxõgüxü̃! Rü ngẽma taenexẽgü i nua Itáriaanewa ngẽxmagüxü̃ rü ta pexü̃ narümoxẽgü.

Ngechuchuarü ngúexü̃gü ga yamugüxü̃arü puracüchiga 28:16

Rü yexguma Rómawa tangugügu rü wüxi ga ĩpatawa nananguxẽẽgü ga Pauru nüxica namaxã ga wüxi ga churara ga nüxna dauxü̃.

Ngechuchuarü ngúexü̃gü ga yamugüxü̃arü puracüchiga 27:43

Natürü yema norü capitáü̃ ga churaragü, rü Pauruxü̃ namaxẽẽchaü̃, rü yemaca̱x tama nanaxwa̱xe nax nadaiaxü̃ ga yema poxcuexü̃. Natürü nanamu nax yema ixãnüxü̃ rü nüxíra ínayuxgüxü̃ nax naxãnacüwa nawẽxgüxü̃ca̱x, rü yema togü rü mürapewagügu rüe̱xna yema wapurutüchigügu mea nax ínachoü̃xü̃ca̱x. Rü yemaacü guxãma meama naxãnacüwa tangugü.

Ngechuchuarü ngúexü̃gü ga yamugüxü̃arü puracüchiga 27:6

Rü yema capitáü̃ yexma nüxü̃ nayangau ga wüxi ga wapuru ga Areyandríawa ne ũxü̃ne ga Itáriaanewa ũxü̃ne. Rü gumágu toxü̃ nichoü̃xẽxẽ, rü tomaxã inaxũãchi.

Ngechuchuarü ngúexü̃gü ga yamugüxü̃arü puracüchiga 24:23

Rü yexguma ga Férix rü norü capitáü̃xü̃ namu nax Pauruna nadauxü̃ca̱x. Natürü nüxü̃́ nanatauxchaxẽxẽ nax naxü̃tagu naxĩaneãxü̃ ga namücügü, rü nüxü̃ nax nangü̃xẽẽgüxü̃.

Ngechuchuarü ngúexü̃gü ga yamugüxü̃arü puracüchiga 23:17

Rü Pauru naxca̱x naca ga wüxi ga capitáü̃, rü ñanagürü nüxü̃: —¡Curü ãẽ̱xgacüxü̃tawa naga i ñaa ngextü̱xüxü̃, erü nüxü̃́ nangẽxma i ore i namaxã nüxü̃ yaxuxchaü̃xü̃! —ñanagürü.

Ngechuchuarü ngúexü̃gü ga yamugüxü̃arü puracüchiga 23:11

Rü moxü̃ãcüarü chütaxü̃gu Pauruca̱x nango̱x ga Cori ga Tupana, rü ñanagürü nüxü̃: —¡Cugü naporaxẽxẽ! Rü ngẽxgumarüxü̃ i núma Yerucharéü̃wa choxü̃ nax quixuchigaxü̃, rü ngẽxgumarüxü̃ tá ta nixĩ i Rómawa nax choxü̃ quixuchigaxü̃ —ñanagürü ga Tupana.

Ngechuchuarü ngúexü̃gü ga yamugüxü̃arü puracüchiga 22:26

Rü yexguma yemaxü̃ naxĩnügu ga capitáü̃, rü gumá churaragüarü ãẽ̱xgacüxü̃tawa naxũ, rü namaxã nüxü̃ nixu, rü ñanagürü: —¿Ta̱xacü tá cuxü? Erü ñaa yatü rü Rómacüã̱x nixĩ —ñanagürü.

Ngechuchuarü ngúexü̃gü ga yamugüxü̃arü puracüchiga 21:32

Rü yexgumatama ga gumá churaragüarü ãẽ̱xgacü rü nanangutaque̱xexẽxẽ ga yema norü capitáü̃gü namaxã ga norü churaragü, rü paxa yema duü̃xü̃gü íyexmagüxü̃wa naxĩ. Rü yexguma gumá ãẽ̱xgacüxü̃ rü yema churaragüxü̃ nadaugügu ga duü̃xü̃gü, rü ínayachaxãchigü nax Pauruxü̃ yama̱xgüxü̃.

Ngechuchuarü ngúexü̃gü ga yamugüxü̃arü puracüchiga 19:21

Rü yemawena ga Pauru, rü nagu narüxĩnü ga Machedóniaanewa rü Acáyaanewaxíra nax naxũxü̃, rü ñu̱xũchi Yerucharéü̃wa nax naxũxü̃. Rü ñanagürü: —Yerucharéü̃wa tá chaxũ, rü yixcaama rü Rómawa rü tá ta chaxũ —ñanagürü.

Ngechuchuarü ngúexü̃gü ga yamugüxü̃arü puracüchiga 16:10

Rü yexguma yemaxü̃ nada̱u̱xgu ga Pauru, rü yexgumatama togü tamexẽẽgü nax Machedóniawa taxĩxü̃ca̱x. Yerü nüxü̃ tacua̱xgü rü aixcüma nixĩ ga Tupana toxca̱x ca̱xaxü̃ nax yema duü̃xü̃gümaxã nüxü̃ tixuxü̃ca̱x ga ore i mexü̃.

Ngechuchuarü ngúexü̃gü ga yamugüxü̃arü puracüchiga 10:22

Rü nümagü nanangãxü̃gü, rü ñanagürügü: —Capitáü̃ ya Cornériuxü̃tawa ne taxĩ rü nüma nixĩ i nua toxü̃ namugüxü̃. Rü wüxi ya yatü ya mecü nixĩ, rü Tupanaxü̃ nangechaü̃. Rü guxü̃ma i Yudíugü nüxü̃ nangechaü̃ i nümax. Rü wüxi ga Tupanaarü orearü ngeruxü̃ ga daxũcüã̱x nanamu nax cuxca̱x toxü̃ yacaxẽẽxü̃ca̱x ga Cornériu rü napatawa cuxũxü̃ca̱x rü nüxü̃ nax naxĩnüxü̃ca̱x i curü ore —ñanagürügü.

Ore i mexü̃ ga Luca ümatüxü̃ 23:47

Rü yexguma yema churaragüarü ãẽ̱xgacü ga Rómacüã̱x nüxü̃ da̱u̱xgu ga yema ngupetüxü̃, rü Tupanaxü̃ nicua̱xüxü̃, rü ñanagürü: —Aixcüma ñaa yatü rü taxuxü̃ma i chixexü̃ naxü —ñanagürü.

Ore i mexü̃ ga Luca ümatüxü̃ 7:2

Rü yéma nayexma ga wüxi ga churaragüarü capitáü̃ ga Rómacüã̱x. Rü gumá capitáü̃ rü nüxü̃́ nayexma ga wüxi ga norü duü̃xü̃ ga poraãcü nüxü̃ nangechaü̃xü̃. Rü yema norü duü̃xü̃ rü nida̱xawe, rü naturaxüchi.

Ore i mexü̃ ga Matéu ümatüxü̃ 27:54

Rü yema churaragüarü ãẽ̱xgacü rü norü churaragü ga Ngechuchuna ídaugüxü̃, rü yexguma nüxü̃ nadaugügu nax naxĩã̱xãchianexü̃ rü guxü̃ma ga yema ngupetüxü̃ rü poraãcü namuü̃e, rü ñanagürügü: —Aixcüma nixĩ ya daa yatü ya Tupana Nane nax yixĩxü̃ —ñanagürügü.

Danié 4:35

Rü ngẽma duü̃xü̃gü i ñoma i naanewa maxẽxü̃ rü cupe̱xewa, Pa Tupanax, rü taxuxü̃ma nixĩgü. Rü cuma cunaxwa̱xexü̃ãcü namaxã icucua̱x i dauxü̃guxü̃ i naane rü ñoma i naane. Rü tataxuma ya texé ya curü poraxü̃ rüyexeraxe. Rü tataxuma ya texé ya tüxü̃́ nangẽxmaxe i pora nax cuxna taca̱xaxü̃ rü ‘¿tü̱xcüü̃ cunaxü i ngẽma cuxüxü̃?’ ñachagürü.

Auxexü̃chiga 3:27

Rü wüxichigü i duü̃xü̃ rü name nax norü ngextü̱xügutama Tupaname̱xẽwa nügü nangẽxmaxẽẽxü̃.

Ucu̱xẽgüchiga 19:21

Nüma ya yatü, rü nagu narüxĩnü i muxü̃ma i ngẽma naxüxchaü̃xü̃, natürü Cori ya Tupana naxwa̱xexü̃ãcü tá nixĩ i yanguxü̃.

Wiyaegü 76:10

Rü ngẽma norü nu i ngẽma cumaxã rüxuanügüxü̃ rü curü cua̱xüxü̃ruxü̃ tá nayanguxuchi. Rü woo ngẽxguma íxrarüwa nanuegu rü curü nga̱xcueruxü̃ nayanguxuchi i ngẽma.

Wiyaegü 33:11

Natürü ngẽma nüma ya Cori ya Tupana nagu rüxĩnüxü̃ rü guxü̃guma nangẽxmaecha rü taguma narüxo.

Naanearü ügüchiga 50:20

Pema nagu perüxĩnüegu rü chixexü̃ chomaxã pexüxü̃, natürü Tupana rü mexü̃xü̃ nananguxuchixẽxẽ ga yema chixexü̃ ga chomaxã pexüxü̃. Rü yemaca̱x ãẽ̱xgacüxü̃ choxü̃ ningucuchixẽxẽ i nua nax ngẽmaãcü namaxẽxü̃ca̱x i muxü̃ma i duü̃xü̃gü.

Ngechuchuarü ngúexü̃gü ga yamugüxü̃arü puracüchiga 28:1

Rü yexguma meama naxãnacüwa tangugügu ga guxãma, rü yexguma nüxü̃ tacua̱xgü nax Málta yixĩxü̃ ga naéga ga yema capaxũ.