Ngechuchuarü ngúexü̃gü ga yamugüxü̃arü puracüchiga 24:5 - Tupanaarü Ore

⁵ Rü marü nüxü̃ tadau nax ñaa yatü rü wüxi i da̱xaweanerüxü̃ nax yixĩxü̃. Erü guxü̃ i naanewa norü ngu̱xẽẽtaemaxã nügü nayatoyexẽxẽ i Yudíugü. Rü nüma rü naeru nixĩ i ngẽma duü̃xü̃gü i nüxü̃́ yaxõgüxü̃ i Ngechuchu i Nacharétucüã̱x.

Ngechuchuarü ngúexü̃gü ga yamugüxü̃arü puracüchiga 24:5 Referans Kwoze

Ngechuchuarü ngúexü̃gü ga yamugüxü̃arü puracüchiga 28:22

Rü cuxü̃tawa nüxü̃ taxĩnüechaü̃ rü ¿ñuxũ ñacuxü̃ i cumax? Erü nüxü̃ tacua̱xgü rü guxü̃wama i Yudíugü rü chixri nachiga nidexagü i ngẽma ore i ngexwaca̱xü̃xü̃ i Ngechuchuchiga —ñanagürügü.

Ngechuchuarü ngúexü̃gü ga yamugüxü̃arü puracüchiga 24:14

Natürü ngẽma ñu̱xma cumaxã nüxü̃ chixuxü̃ nixĩ nax chorü o̱xigüarü Tupanaaxü̃́ chapuracüxü̃ yema Ngechuchu ya Cristu toxü̃ muxü̃ãcü. Rü ngẽma nixĩ i nüma i Yudíugü nüxü̃ ixugügu nax tomare i ore yixĩxü̃. Rü choma rü nüxü̃́ chayaxõ i guxü̃ma i ngẽma mugü ga Moiché ümatüxü̃ rü guxü̃ma i Tupanaarü ore ga nũxcümaü̃güxü̃ ga norü orearü uruü̃gü ümatügüxü̃.

Ngechuchuarü ngúexü̃gü ga yamugüxü̃arü puracüchiga 26:5

Rü ngẽxguma ngẽma Yudíugü chauchiga idexagüchaü̃gu, rü nüma nüxü̃ nacua̱xgü nax choma rü woetama Parichéu chixĩxü̃. Rü toma i Parichéugü tixĩ i guxü̃ma i totanüxü̃ i Yudíugüarü yexera nax poraãcü nagu taxĩxü̃ i ngẽma ore i tixõgüxü̃.

Ngechuchuarü ngúexü̃gü ga yamugüxü̃arü puracüchiga 15:5

Natürü ñuxre ga Parichéugü ga Ngechuchuaxü̃́ yaxõgüxü̃, rü inachigü, rü ñanagürügü: —Name nixĩ nax nügü ínawiü̃cha̱xmüü̃pe̱xechiraü̃güxü̃ i ngẽma tama Yudíugü ixĩgüxü̃ i ngexwaca yaxõgüxü̃, ngẽma Moichéarü mugü nüxü̃ ixuxü̃rüxü̃ —ñanagürügü.

1 Corintios 4:13

Rü chixri tochiga nidexagü, natürü i toma rü mea nachiga tidexagü. Rü ñoma guxchirexü̃ nadaugüxü̃rüxü̃ tomaxã nixĩgü, rü ñoma duü̃xü̃gü i taxuwama mexü̃ãcü toxü̃ nixĩgüxẽxẽ. Rü ñu̱xma rü ta ngẽmaãcütama tomaxã nixĩgü.

Ngechuchuarü ngúexü̃gü ga yamugüxü̃arü puracüchiga 21:28

Rü tagaãcü aita naxüe ñaxü̃maxã: —Pa Tomücügü Pa Iraétanüxü̃güx, ¡Paxa toxü̃ perüngü̃xẽxẽx! Ñaa nixĩ i ngẽma yatü i guxü̃wama yangúexẽẽchigüxü̃ i duü̃xü̃gü nax taxchi naxaiexü̃ca̱x i yixema i Iraétanüxü̃, rü naxchi nax naxaiexü̃ca̱x i ngẽma mugü ga Moiché ümatüxü̃ rü naxchi naxaiexü̃ca̱x ya daa Tupanapata ya taxü̃ne. Rü naétü i ñu̱xmax rü nuxã daa Tupanapata ya taxü̃negu nanamucu i ñuxre i duü̃xü̃gü i tama tacümagu ĩxü̃, rü ngẽmaãcü nanaxüxaxẽxẽ i ñaa nachica i üünexü̃ —ñanagürügü.

Ngechuchuarü ngúexü̃gü ga yamugüxü̃arü puracüchiga 5:17

Rü yexguma ga gumá chacherdótegüarü ãẽ̱xgacü rü guxü̃ma ga yema natanüxü̃ ga Chaduchéugü rü poraãcü nixãũxãchigü.

Ore i mexü̃ ga Luca ümatüxü̃ 23:2

Rü yéma Pirátupe̱xewa inanaxügüe nax Ngechuchuxü̃ yaxugüexü̃. Rü ñanagürügü: —Ñaa yatü rü nüxü̃ itayangaugü nax nanuexẽẽãxü̃ i torü duü̃xü̃gü. Rü nüxü̃ nixu nax tama namexü̃ nax ãẽ̱xgacü ya Rómawa ngẽxmacüaxü̃́ tanaxütanüxü̃ i diẽru. Rü nügü nixu nax nüma yixĩxü̃ i torü ãẽ̱xgacü i Cristu —ñanagürügü.

Nüxíraxü̃xü̃ ga popera ga Pedru ümatüxü̃ 2:19

Erü Tupana rü tümamaxã nataãxẽ ega yáxna namaxã taxĩnüegu i ngẽma tümaarü cori i ngẽxguma natüca̱xma guxchaxü̃gü tümaca̱x ínanguxẽẽgügu rü ngúxü̃ tüxü̃ yangexẽẽgügu nagagu nax Tupanaaxü̃́ tayaxõgüxü̃.

1 Corintios 11:19

Choma rü nüxü̃ chacua̱x nax woetama aixcüma yixĩxü̃ nax pegü pitoyexü̃ nax ngẽmawa nüxü̃ icuáxü̃ca̱x nax texégü tixĩxü̃ ya yíxema aixcüma Cristuarü duü̃xü̃gü ixĩgüxe.

Ngechuchuarü ngúexü̃gü ga yamugüxü̃arü puracüchiga 22:22

Rü yexguma Pauru yema ñaxgu rü yexma nayacua̱xẽẽgü nax mea nüxü̃́ inaxĩnüexü̃ ga yema duü̃xü̃gü. Rü yexguma aita naxüeãcüma ñanagürügü: —¡Noxtacüma yama̱x! Rü name nixĩ nax nayuxü̃ rü ngẽxma nax yanaxoxü̃ —ñanagürügü.

Ngechuchuarü ngúexü̃gü ga yamugüxü̃arü puracüchiga 6:13

Rü naxca̱x nadaugü ta ga yatügü ga doraxü̃ ixugüemarexü̃, rü yema rü ñanagürügü: —Ñaa yatü rü taguma ínayachaxãchi nax chixexü̃maxã yadexaxü̃ nachigagu ya daa Tupanapata ya taxü̃ne rü nachigagu i Tupanaarü mugü.

Ore i mexü̃ ga Luca ümatüxü̃ 23:25

Rü Barabáxü̃ ninge̱x, yerü yema nixĩ ga nümagü naxca̱x ícagüxü̃. Rü yema Barabá nixĩ ga poxcuxü̃ naxca̱x nax duü̃xü̃güxü̃ ãẽ̱xgacümaxã nanuẽxẽẽxü̃ rü namáetaxü̃. Rü yexguma ga Pirátu rü nüxna Ngechuchuxü̃ namu nax namaxã naxügüã̱xü̃ca̱x ga yema nümagü nanaxwa̱xegüxü̃.

Ore i mexü̃ ga Luca ümatüxü̃ 23:19

Rü yema Barabá rü napoxcu yerü ü̃paacü Yerucharéü̃wa ãẽ̱xgacümaxã nananuexẽxẽ ga duü̃xü̃gü, rü ñu̱xũchi namáeta.

Ore i mexü̃ ga Luca ümatüxü̃ 23:5

Natürü nümagü rü yexeraãcü Ngechuchuxü̃ nixugüeama, rü ñanagürügü: —Nüma rü guxü̃ma i Yudéaanewa rü norü ngu̱xẽẽtaemaxã nananuexẽxẽ i duü̃xü̃gü. Rü Gariréaanewa inanaxügü ga yemaacü nax duü̃xü̃güxü̃ nangúexẽẽxü̃, rü ngẽmaãcü nanaxü ñu̱xmata núma Yudéaanewa nangu —ñanagürügü.

Ore i mexü̃ ga Matéu ümatüxü̃ 10:25

Rü ngẽma norü ngúexẽẽruü̃xü̃ üpetüxü̃rüxü̃ tátama nüxü̃ naxüpetü i ngẽma norü ngúexü̃. Rü ngẽma norü corixü̃ üpetüxü̃rüxü̃ tátama nüxü̃ naxüpetü i ngẽma norü duü̃xü̃. Rü ngẽxguma duü̃xü̃gü rü ngo̱xo i Beechebú choxü̃ wogügu, ¿rü ñuxãcü tá pexü̃ naxu i pemax?

Ore i mexü̃ ga Matéu ümatüxü̃ 2:23

Rü yexguma Gariréaanewa nanguxgu, rü ĩane ga Nacharétuwa naxũ. Rü yexma naxãchiü̃ nax yanguxü̃ca̱x ga yema ore ga nũxcümaü̃güxü̃ ga Tupanaarü orearü uruü̃gü nüxü̃ ixugüxü̃ ga ñaxü̃: “Ngechuchu ya Cristu rü Nacharétucüã̱xmaxã tá nanaxugü”, ñaxü̃.

Amúx 7:10

Rü Amachía nixĩ ga chacherdóte ga Betéwa. Rü yexguma nüxü̃ nacua̱xgu ga yema Amú nüxü̃ ixuxü̃, rü paxãma wüxi ga norü orearü ngeruü̃xü̃ Iraéanearü ãẽ̱xgacü ga Yeruboáü̃xü̃tawa namu nax namaxã nüxü̃ yanaxuxü̃ca̱x ga ore ga ñaxü̃: —Amú rü Iraécüã̱xgü i duü̃xü̃gütanügu nixũgüchigü rü cumaxã nananuexẽxẽ, Pa Ãẽ̱xgacüx. Rü curü duü̃xü̃gü rü marü tama yáxna namaxã naxĩnüe nax ngẽmaãcü yadexaxü̃.

Yeremía 38:4

Rü yexguma yemaxü̃ naxĩnüegu ga yema ãẽ̱xgacüarü ngü̃xẽẽruü̃gü, rü ñanagürügü ãẽ̱xgacüxü̃: —Pa Ãẽ̱xgacüx, name nixĩ i tayama̱x i ñaa yatü erü ngẽma dexa i nüxü̃ yaxuxü̃maxã nananuexẽxẽ i tórü churaragü i nua tórü ĩanewa yaxǘgüxü̃ rü nananuexẽxẽ i guxü̃ma i duü̃xü̃gü. Rü ñaa yatü rü tama daa ĩanearü mexü̃ca̱x nadau, natürü norü chixexü̃ca̱x nixĩ i nadauxü̃ —ñanagürügü.

Ester 3:8

Rü nüma ga Amáü̃ rü ãẽ̱xgacü ga Achuéruxü̃tawa naxũ nax namaxã nüxü̃ yanaxuxü̃ca̱x nachiga ga yema. Rü ñanagürü: —Pa Ãẽ̱xgacüx, rü natanüwa i guxü̃ma i ngẽma togü i nachixü̃anecüã̱xgü rü nangẽxma i wüxitücumü i tama togümaxã wüxiguchaü̃xü̃. Erü ngẽma nacümagü rü nanatoraxü̃ rü tama naga naxĩnüe i ngẽma curü mugü, Pa Ãẽ̱xgacüx. Rü ngẽmaca̱x, Pa Ãẽ̱xgacüx, rü tama name nax ñaa naane i namaxã icucuáxü̃wa namaxẽxü̃.

Yeremía 37:13

Natürü yexguma Yerucharéü̃arü ĩã̱x ga Bẽyamíü̃gu ãégaxü̃wa nanguxgu, rü yéma nadauxü̃tae ga Iría ga Cheremía nane ga Ananíataxa. Rü nüma ga Iría rü yéma Yeremíaxü̃ nayachaxãchixẽxẽ, rü ñanagürü nüxü̃: —Cuma rü quiña nax natanüwa cuxüxü̃ca̱x i ngẽma torü uanügü i Babiróniaanecüã̱x —ñanagürü nüxü̃.

Ngechuchuarü ngúexü̃gü ga yamugüxü̃arü puracüchiga 24:4

Natürü tama yexeraãcü cuxü̃ nua chanuxcüxẽẽxchaü̃. Rü ngẽmaca̱x cuxna chaca nax paxaãchi toxü̃́ icurüxĩnüxü̃.

Ngechuchuarü ngúexü̃gü ga yamugüxü̃arü puracüchiga 25:7

Rü yexguma yexma yaxücuxgu ga Pauru, rü yema Yudíugü ga Yerucharéü̃wa ne ĩxü̃, rü naxca̱x naxĩ. Rü muxü̃ma ga chixexü̃gümaxã ínanaxuaxü̃gü. Natürü yema chixexü̃gü ga namaxã Pauruxü̃ ínaxuaxü̃güxü̃ rü taxuxü̃ma ga yemamaxã inanawe̱xgü nax aixcüma yixĩxü̃.