Ngechuchuarü ngúexü̃gü ga yamugüxü̃arü puracüchiga 24:26 - Tupanaarü Ore

²⁶ Rü yema ñanagürü ga Férix, yerü ínananguxẽxẽ nax Pauru chi diẽru nüxna ixãxü̃ nax yangéãxü̃ca̱x. Rü yemaca̱x muẽ̱xpü̱xcüna naxca̱x nangemaxü̃, nax namaxã yadexaxü̃ca̱x.

Ngechuchuarü ngúexü̃gü ga yamugüxü̃arü puracüchiga 24:26 Referans Kwoze

Ucu̱xẽgüchiga 17:23

Ngẽma ãẽ̱xgacü i chixexü̃ ega guxchaxü̃ namexẽẽgu, rü bexma diẽru ngĩxü̃ nayaxu nax ngẽmaãcü íyatóxẽẽãxü̃ca̱x i ngẽma mugü i mechiréxü̃.

Norü taxre ga popera ga Pedru ümatüxü̃ 2:3

Rü ngẽma ngu̱xẽẽruü̃netagü rü diẽruguxicatama narüxĩnüe, rü ngẽmaca̱x i ngẽma norü ngu̱xẽẽtae i doramare ixĩxü̃, rü tá pemaxã nanaxãtanü nax ngẽmaãcü petanüwa ngĩxü̃ nayauxgüxü̃ca̱x i perü diẽru. Natürü tá napoxcue i ngẽma duü̃xü̃gü, rü taxũtáma nibuxmü. Erü Tupana rü woetama nũxcümama poxcu namaxã naxuegu.

1 Corintios 6:9

¿Tama ẽ̱xna nüxü̃ pecua̱x nax ngẽma duü̃xü̃gü i chixexü̃ ügüxü̃ rü nataxuxü̃táma i nachica i Tupana ãẽ̱xgacü íyixĩxü̃wa? ¡Rü tama name i pegütama pewomüxẽxẽgü! Erü Tupana ãẽ̱xgacü íyixĩxü̃wa rü nataxutama i nachica i ngẽma duü̃xü̃gü i nai i ngexü̃maxã ipexü̃, rü ngẽma duü̃xü̃gü i tupananetachicüna̱xãxü̃ icua̱xüü̃güxü̃, rü ngẽma duü̃xü̃gü i naxma̱xẽchita rüe̱xna nateechita ngeãẽxü̃, rü ngẽma yatügü i naxrüxü̃ yatüxü̃maxã ngeãẽxü̃, rü ngẽma ngexü̃gü i naxrüxü̃ ngexü̃gümaxã ngeãẽxü̃, rü ngẽma ngĩ́ta̱xagüxü̃, rü ngẽma aüwa̱xegüxü̃, rü ngẽma ngãxẽwa̱xegüxü̃, rü ngẽma oregüta̱a̱xgüxü̃, rü ngẽma womüxẽẽwa̱xegüxü̃. Rü guxü̃ma i ngẽmagü rü nataxutama i nachica i Tupana ãẽ̱xgacü íyixĩxü̃wa.

Ngechuchuarü ngúexü̃gü ga yamugüxü̃arü puracüchiga 24:17

Rü nawena nax ñuxre ga taunecü togü ga nachixü̃anegu chixũgüxü̃, rü wenaxarü chauchixü̃aneca̱x chataegu nax nua chanangexü̃ca̱x ga diẽru nax namaxã nüxü̃ charüngü̃xẽẽxü̃ i chautanüxü̃ i Yudíugü i nüxü̃́ nataxuxü̃, rü Tupanana chanaxãxü̃ca̱x i chorü ãmaregü.

Miquéa 7:3

Rü nümagü rü nüxü̃ nicua̱xüchi nax naxügüãxü̃ i guxchaxü̃gü. Rü ngẽma ãẽ̱xgacügü rü naxca̱x ínacagü nax nüxü̃́ naxütanügüãxü̃. Rü ãẽ̱xgacügü i guxchaxü̃arü mexẽẽruü̃gü rü ngẽma nüxü̃́ naxütanüxü̃étüwaama naxü. Rü ngẽma diẽruã̱xü̃chixü̃ rü nanaxügü i ngẽma nagu naxĩnüexü̃ rü ngẽmaãcü nanachixexẽxẽ ya ĩane.

Miquéa 3:11

Rü daa ĩanearü guxchaxü̃arü mexẽẽruü̃gü rü ngẽma nüxü̃́ naxütanüxü̃ga nixĩ i naxĩnüexü̃. Rü ngẽma chacherdótegü rü ngẽxguma nüxü̃́ tanaxütanüguxicatama tüxü̃ nangúexẽxẽ. Rü ngẽma orearü uruü̃güneta rü ngẽxguma nüxü̃́ naxãtanüguxicatama tamaxã nüxü̃ nixu i ta̱xacü tá yixcüra naxüpetü. Rü nüxü̃ nixu nax Tupanaégagu yixĩxü̃ nax yadexagüxü̃, rü ñanagürügü: “Cori ya Tupana rü nataxü̃tagu rü taxuxü̃táma i chixexü̃ tüxü̃ nangupetü”, ñanagürügü.

Echequié 33:31

Rü ngẽmaãcü i chorü duü̃xü̃gü rü cuxca̱x naxĩ, rü cupe̱xewa nayarütogü guxü̃gurüxü̃ nax yanaxĩnüexü̃ca̱x i ngẽma ore i nüxü̃ quixuxü̃. Natürü woo nüxü̃ naxĩnüegu i ngẽma ore natürü tama aixcüma nagu namaxẽ. Rü naã̱xmaxã choxü̃ nicua̱xüü̃gü, natürü norü maxü̃wa rü yexeraãcü diẽruguama narüxĩnüe.

Echequié 22:27

Rü ñaa nachixü̃anearü ãẽ̱xgacügü rü ñoma dauxchitacüã̱x i airugü i naeü̃gü wagüexü̃rüxü̃ nixĩgü. Rü guxü̃guma ínamegümare nax tümaarü diẽruca̱x duü̃xẽ tüxü̃ yama̱xgüxü̃ nax ngẽmaãcü yadiẽruã́xü̃ca̱x.

Ichaía 56:11

Rü ñoma airugü i taiyaeechaxü̃ rü taguma ngãxpütüwegüxü̃rüxü̃ pixĩgü. Rü pema rü dauruü̃gü i tama nüxü̃ cua̱xgüégaxü̃ pixĩgü. Rü wüxichigü i pema rü perü ngúchaü̃ama pixü rü pexrütama ngẽmaxü̃guama perüxĩnüe.

Ichaía 33:15

Rü yíxema aixcüma mea maxü̃́xẽ, rü yíxema aixcümaxü̃ ixúxe, rü yíxema tama womüxẽẽãcü tügü muarü ngẽmaxü̃ã́xẽ, rü yíxema tama nayauxtanüxẽ i guxchaxü̃arü mexẽxẽ, rü yíxema tama naga ĩnüxe i ngẽma tümamaxã máetagüchaü̃xü̃, rü yíxema chixexü̃cha̱xwa ixũgachixe, rü yíxema tá tixĩ ya aixcüma maxü̃́xẽ rü tüxü̃́ nangẽxmaxẽ i tümaarü cu̱xchicaxü̃ i nutanaxca̱x, rü guxü̃gutáma taxãwemü rü tagutáma nataxu i tümaarü dexá.

Ichaía 1:23

Rü perü ãẽ̱xgacügü rü tama Tupanaga naxĩnüe rü namaxã naxãmücügü i duü̃xü̃gü i máxwa̱xegüxü̃. Rü diẽruca̱x rü ãmareca̱x ínacagü nax tama napoxcuexü̃ca̱x i ngẽma chixexü̃ ügüxü̃. Rü taxcutagü rü tama tüxü̃ narüngüxẽẽgü, rü tama tümagu narüxĩnüe ya yixema yutegüxe.

Ucu̱xẽgüchiga 29:4

Ngẽma nachixü̃anearü ãẽ̱xgacü i mea norü duü̃xü̃gümaxã icuáxü̃, rü norü duü̃xü̃gü rü naga naxĩnüe. Natürü ngẽma ãẽ̱xgacü i ngexicatama nagu rüxĩnüechaxü̃ nax duü̃xü̃güxü̃ naxütanüxẽẽãxü̃ca̱x i diẽru, rü chixexü̃wa nanaxũxẽxẽ i nachixü̃ane.

Ucu̱xẽgüchiga 19:6

Muxü̃ma i duü̃xü̃gü rü ngẽma diẽruã̱xgüxü̃maxã naxãmücügüchaü̃. Rü guxü̃ma i duü̃xü̃gü nanaxwa̱xe nax namaxã naxãmücüxü̃ i ngẽma ãmare nüxna ãxü̃.

Ucu̱xẽgüchiga 17:8

Yíxema ãẽ̱xgacüaxü̃́ naxütanüxẽ nax tümaxétüwaama naxüxü̃ca̱x, rü nagu tarüxĩnü nax ngẽmaãcü tüxü̃́ nangẽxmaxü̃ i pora nax tanayaxuxü̃ca̱x i guxü̃ma i ngẽma tanaxwa̱xexü̃.

Yox 15:34

Rü ngẽma chixexü̃ i duü̃xü̃gü rü tá inayarüxogü. Rü yima napatagü ya womüxẽẽgu nüxü̃́ ngẽxmane rü tá nixae.

Norü taxre ga to ga popera ga ãẽ̱xgacügüchiga ümatüxü̃ 19:7

Rü ngẽmaca̱x penaxwa̱xe nax aixcüma Cori ya Tupanaga pexĩnüexü̃. ¡Rü pexuãxẽgü i ngẽxguma guxchaxü̃gü pemexẽxẽgu! Erü nüma ya Cori ya Tupana rü tama yáxna pexuãẽgü namaxã naxĩnü i ta̱xacürü chixexü̃. Rü tama nanaxwa̱xe nax texé tümaétüwa üxü̃ ya yíxema chixexü̃ üxe, rü tama norü me nixĩ nax texé naxütanüxü̃ i guxchaxü̃arü mexẽxẽ —ñanagürü.

1 Chamué 12:3

Rü ñu̱xma rü daxe chixĩ. Ega ngẽxguma chi texéarü wocaca̱x rüe̱xna búruca̱x changĩ̱xgux, rüe̱xna texé chi chaxaixgu, rü chixri tümamaxã ichacua̱xgu rüe̱xna chanayauxtanügu ga ta̱xacürü guxchaxü̃ chamexẽẽ̱xgu, rü marü name i Cori ya Tupanape̱xewa rü nape̱xewa ya yimá ãẽ̱xgacü ya Tupana nüxü̃ unetacü, rü choxü̃ ípexuaxü̃. Rü choma rü tá chanaxütanü i ngẽma pexü̃́ changetanüxü̃ —ñanagürü.

1 Chamué 8:3

Natürü tama nanatürüxü̃ nixĩgü, yerü norü yemaxü̃güguama narüxĩnüe. Rü yexguma ta̱xacürü guxchaxü̃ namexẽẽgügu rü nanayauxtanügü, rü tama nawüxigu i norü ngü̃xẽxẽ i guxãmaxã.

Wenaxarü naxümatü ga Tupanaarü mugü 16:19

Rü pemax, Pa Ãẽ̱xgacügü i Guxchaxü̃güarü Mexẽẽruü̃güx, ¡rü taxṹ i peyatoxẽxẽxü̃ i ngẽma guxchaxü̃arü mexẽxẽ! Rü ngẽxguma penamexẽẽgu i ngẽma duü̃xü̃güarü guxchaxü̃gü rü name nax guxãxü̃ma mea penamexẽẽxü̃ i tümarü guxchaxü̃gü. ¡Rü taxũtáma penayaxu ega texé pexü̃́ naxütanüchaü̃gu nax nawaama pexüxü̃ca̱x! Erü ngẽma diẽru rü ñoma yangexetüxü̃rüxü̃ nayaxĩgüxẽxẽ i ngẽma nüxü̃ cua̱xüchixü̃ rü ínayatoxẽxẽ i ngẽma aixcümaxü̃ ixugüxü̃arü dexa.

Ínachoxü̃xü̃chiga 23:8

Rü cuma nax ãẽ̱xgacü quixĩxü̃, rü tama name i wüxiaxü̃́ cunayauxtanü, nax naétüwaama cuxüxü̃ca̱x ega ta̱xacürü guxchaxü̃ cuxü̃tawa yamexẽẽgügu. Erü ngẽma ãẽ̱xgacü i nayauxtanüxü̃, rü inayacu̱x i ngẽma aixcüma ixĩxü̃, nax tama nüxü̃ nacuáxü̃ca̱x i duü̃xü̃gü, rü ngẽmaãcü ya yíxema duü̃xẽ ya taxuxü̃ma i chixexü̃ üchiréxe, rü nitümaguãchi i ngẽma chixexü̃.

Ore i mexü̃ ga Matéu ümatüxü̃ 17:3

Rü ñu̱xũchi yéma naxca̱x nangõ̱xgü ga Moiché rü Ería. Rü Ngechuchumaxã yéma nidexagü.