Ngechuchuarü ngúexü̃gü ga yamugüxü̃arü puracüchiga 22:3 - Tupanaarü Ore

³ —Choma rü Yudíu chixĩ, rü Chiríchiaanearü ĩane ga Társugu chabu. Natürü daa ĩane ya Yerucharéü̃wa chaya, rü Gamarié nixĩ ga chorü ngu̱xẽẽruxü̃. Rü meama nawa changu̱x ga guxü̃ma ga mugü ga nũxcümaü̃güxü̃ ga tórü o̱xigü nagu ĩxü̃. Rü guxü̃guma naxca̱x chadau nax guxü̃ma i chorü ngúchaü̃maxã Tupanaaxü̃́ chapuracüxü̃, ngẽxgumarüxü̃ i guxãma i pemax i ñu̱xmax.

Ngechuchuarü ngúexü̃gü ga yamugüxü̃arü puracüchiga 22:3 Referans Kwoze

Ngechuchuarü ngúexü̃gü ga yamugüxü̃arü puracüchiga 26:5

Rü ngẽxguma ngẽma Yudíugü chauchiga idexagüchaü̃gu, rü nüma nüxü̃ nacua̱xgü nax choma rü woetama Parichéu chixĩxü̃. Rü toma i Parichéugü tixĩ i guxü̃ma i totanüxü̃ i Yudíugüarü yexera nax poraãcü nagu taxĩxü̃ i ngẽma ore i tixõgüxü̃.

Ngechuchuarü ngúexü̃gü ga yamugüxü̃arü puracüchiga 9:11

Rü nüma ga Cori nanangãxü̃, rü ñanagürü: —¡Dücax, ngẽma nama i Mea i Wéxü̃gu ãégaxü̃wa naxũ! ¡Rü ngéma Yúdapatawa naxca̱x ínaca i wüxi i yatü i Társucüã̱x i Chaurugu ãégaxü̃! Rü nüma rü ngéma ínayumüxẽ rü nango̱xetü rü nüxü̃ nadau i wüxi i yatü i Ananíagu ãégaxü̃ i ngẽxma ücuxü̃ rü naxetügu ümexü̃ nax wena yadauuchixü̃ca̱x —ñanagürü ga Cori ya Tupana.

Ngechuchuarü ngúexü̃gü ga yamugüxü̃arü puracüchiga 5:34

Natürü yema ãẽ̱xgacügütanüwa nayexma ga wüxi ga Parichéu ga Gamarié ga naéga. Rü nüma rü meama nanangúexẽxẽ ga Tupanaarü mugü. Rü guxü̃ma ga duü̃xü̃gü rü nüxü̃ nangechaü̃gü. Rü nüma ga Gamarié inachi rü nanamu nax paxaãchi ínamuxü̃ãxü̃ca̱x ga yema ngúexü̃gü ga Ngechuchu imugüxü̃.

Ngechuchuarü ngúexü̃gü ga yamugüxü̃arü puracüchiga 21:39

Rü yexguma ga Pauru rü nanangãxü̃, rü ñanagürü: —Choma rü Yudíu chixĩ, rü Társucüã̱x chixĩ. Rü Chiríchiaanewa rü yima ĩane rü tachigane nixĩ. Rü ngẽxguma curü me yixĩxgu, rü cuxna chaca nax duü̃xü̃gümaxã chidexaxü̃ca̱x —ñanagürü.

Ngechuchuarü ngúexü̃gü ga yamugüxü̃arü puracüchiga 21:20

Rü yexguma Pauruarü orexü̃ naxĩnüegu ga yema yaxõgüxü̃arü ãẽ̱xgacügü, rü Tupanaxü̃ nicua̱xüü̃gü. Rü ñanagürügü Pauruxü̃: —Dücax, Pa Toenexẽx, cuma nüxü̃ cucua̱x rü nangẽxma i muxũchixü̃ i Yudíugü i yaxõgüxü̃. Rü guxü̃ma i nümagü rü nanaxwa̱xegü nax nagu naxĩxü̃ i ngẽma mugü ga Moiché ümatüxü̃.

2 Corintios 11:22

Nümagü rü nügü yaxugügu rü Yudíugü nixĩgü. Natürü choma rü ta Yudíu chixĩ. Rü nümagü nügü yaxugügu rü Iraétanüxü̃ nixĩgü. Natürü choma rü ta rü Iraétanüxü̃ chixĩ. Rü nümagü rü nügü yaxugügu rü Abraáü̃tanüxü̃ nixĩgü. Natürü choma rü ta Abraáü̃tanüxü̃ chixĩ.

Ore i mexü̃ ga Luca ümatüxü̃ 10:39

Rü Martaaxü̃́ iyexma ga wüxi ga ngĩeya̱x ga Maríagu ãégacü. Rü ngĩma rü Ngechuchucutüxü̃tawa irüto nax inaxĩnüxü̃ca̱x ga Ngechuchuarü ore.

Norü taxre ga popera ga ãẽ̱xgacügüchiga 4:38

Rü yemawena ga Erichéu rü Guirigáca̱x nataegu. Rü yexgumaü̃cüxü rü yema naanewa rü taiya nangu̱x. Rü wüxi ga ngunexü̃gu ga yexguma Erichéuxü̃ ínatomaeguãchigügu ga Tupanaarü orearü uruü̃gü, rü nüma ga Erichéu rü norü ngü̃xẽẽruü̃xü̃ ñanagürü: —¡Üxüétügu naxünagü ya yima buetare ya tacü rü ñu̱xũchi Tupanaarü orearü uruü̃güaxü̃́ naxü i wüxi i õna i dexechitanüxü̃! —ñanagürü.

Wenaxarü naxümatü ga Tupanaarü mugü 33:3

Rü nüma ya Cori ya Tupana rü norü duü̃xü̃güxü̃ nangechaxü̃, rü nüxna nadau i ngẽma naga ĩnüexü̃. Rü nümagü rü nape̱xegu nacaxã́pü̱xügü rü ínanangu̱xuxẽẽgü i norü ucu̱xẽgü.

Romanos 11:1

Ñu̱xma pexna chaca rü, ¿ẽ̱xna pexca̱x rü Tupana rü marü nüxü̃ naxo i norü duü̃xü̃gü i Iraétanüxü̃gü? Tama nixĩ i nüxü̃ naxoxü̃. Erü choma i Pauru rü Yudíu chixĩ. Rü Abraáü̃tanüxü̃ chixĩ, rü Abraáü̃taxa ya Bẽyamíü̃tanüxü̃ chixĩ.

Ngechuchuarü ngúexü̃gü ga yamugüxü̃arü puracüchiga 23:6

Rü yexguma Pauru nüxü̃ cua̱xgu nax Chaduchéugü yixĩxü̃ ga nümaxü̃ ga ãẽ̱xgacügü rü togü rü Parichéugü nax yixĩxü̃, rü yema ãẽ̱xgacügüpe̱xewa tagaãcüma ñanagürü: —Pa Chautanüxü̃x, choma rü Parichéu chixĩ, rü Parichéu nane chixĩ. Rü choma rü chayaxõ nax wena tá namaxẽxü̃ i yuexü̃, rü ngẽmagagu choxü̃ ípexuãü̃gü i ñu̱xmax —ñanagürü.

Ngechuchuarü ngúexü̃gü ga yamugüxü̃arü puracüchiga 6:9

Rü wüxi ga ngutaque̱xepataxü̃ ga Ínguxü̃xü̃arü Ngutaque̱xepataü̃gu ãéganearü duü̃xü̃gü, rü wüxigu namaxã ga ñuxre ga duü̃xü̃gü ga Chiréneanewa, rü Areyandríaanewa, rü Chiríchiaanewa, rü Áchiaarü naanewa ne ĩxü̃ rü inanaxügüe nax Estébaü̃maxã iyaporagatanücüüxü̃.

2 Chamué 21:2

Dabí rü Gabaóü̃cüã̱xgüca̱x nangema rü ñu̱xũchi namaxã nidexa. (Yema Gabaóü̃cüã̱xgü rü tama Iraétanüxü̃ nixĩgü. Rü wüxi ga natücumü ga Amoréugüna íyaxügüxü̃ nixĩgü. Rü yema Gabaóü̃cüã̱xgümaxã nixĩ ga Iraétanüxü̃ ga nügümaxã inaxügagüxü̃ nax nügüga tá naxĩnüexü̃. Rü yemagüxü̃ nixĩ ga Chaú ga nadaixichichaü̃xü̃ yerü tama nanaxwa̱xe nax totücumü ga duü̃xü̃gü natanüwa yexmaxü̃ ga Iraéanecüã̱xgü rü Yudáanecüã̱xgü.)

Gálatas 1:21

Rü yemawena, rü Chíriaanewa rü Chiríchiaanewa chaxũ.

Gálatas 1:14

Rü muxü̃ma ga chautanüxü̃ ga Yudíugü ga chorü nayaã̱xgüraü̃xü̃arü yexera nagu chixũ ga yema Yudíugücüma. Yerü norü yexera meama chayanguxẽxẽ ga nacümagü ga nũxcümaü̃güxü̃ ga chorü o̱xigü nagu ĩxü̃.

Ngechuchuarü ngúexü̃gü ga yamugüxü̃arü puracüchiga 23:34

Rü yexguma nüma ga ãẽ̱xgacü ga Férix nüxü̃ daumatügu ga yema popera, rü Pauruna naca ga nge̱xtácüã̱x nax yixĩxü̃. Rü yexguma nüxü̃ nacua̱xgu nax Chiríchiaanecüã̱x yixĩxü̃, rü ñanagürü nüxü̃:

Ngechuchuarü ngúexü̃gü ga yamugüxü̃arü puracüchiga 15:41

Rü Chíriaanewa rü Chiríchiaanewa nachopetü, rü yéma Tupanaarü oremaxã nanataãẽxẽẽgü ga yema yaxõgüxü̃.

Ngechuchuarü ngúexü̃gü ga yamugüxü̃arü puracüchiga 15:23

Rü namaxã yéma nanamugü ga popera ga ñaxü̃: “Pa Toenexẽgü i Tama Yudíugü Ixĩgüxe i Antioquíagu rü Chíriaanegu rü Chiríchiaanegu Ãchiü̃güxe, rü toma i peenexẽgü ya Ngechuchu toxü̃ imugüxe rü toma i yaxõgüxü̃arü ãẽ̱xgacügü ixĩgüxe, rü pexü̃ tarümoxẽgü.

Ngechuchuarü ngúexü̃gü ga yamugüxü̃arü puracüchiga 11:25

Rü yemawena ga Bernabé rü Társuwa naxũ nax Chauruca̱x yadauxü̃ca̱x.

Ngechuchuarü ngúexü̃gü ga yamugüxü̃arü puracüchiga 9:30

Rü yexguma nüxü̃ yacua̱xãchitanügu ga yema togü ga yaxõgüxü̃, rü Checharéawa Chauruxü̃ nagagü. Rü yexguma yéma nangugügu rü Társuwa nanamugü.

Ore i mexü̃ ga Luca ümatüxü̃ 8:35

Rü ga duü̃xü̃gü rü ínayadaugü ga yema ngupetüxü̃. Rü yexguma Ngechuchuxü̃tawa nangugügu, rü yéma nüxü̃ nadaugü ga gumá yatü ga ngo̱xoã̱xchirécü. Rü Ngechuchucutüxü̃tawa narüto, rü marü tama naxãũãẽ. Rü namuü̃e ga duü̃xü̃gü.

Ore i mexü̃ ga Luca ümatüxü̃ 2:46

Rü tomaepü̱x ga ngunexü̃guwena Ngechuchuxü̃ itayangaugü ga Tupanapata ga taxü̃negu. Rü yéma narüto natanüwa ga yema ngúexẽẽruü̃gü ga Tupanaarü mugüwa ngu̱xẽẽtaegüxü̃, rü inarüxĩnü ga norü ngu̱xẽẽtae, rü nüxna nicachigü.

Ngechuchuarü ngúexü̃gü ga yamugüxü̃arü puracüchiga 9:1

Rü yoxni ga Chauru rü daimaxã nayaxãxũnegü ga yema duü̃xü̃gü ga Cori ga Ngechuchuaxü̃́ yaxõgüxü̃. Rü yemaca̱x chacherdótegüaru ãẽ̱xgacüxü̃tawa naxũ nax nüxna naca̱xaxü̃ca̱x naxca̱x ga popera ga nüxna ãgaxü̃ nax Damácuwa yexmagüne ga Yudíugüarü ngutaque̱xepataü̃gu yaxǘcuchigüxü̃ca̱x rü yexma tüxü̃ ínayauxü̃xü̃ca̱x ga guxema yaxõgüxe ga yatüxe rü ngexegü nax Yerucharéü̃wa tüxü̃ nagagüxü̃ca̱x rü yexma tüxü̃ yapoxcuexü̃ca̱x.

Ngechuchuarü ngúexü̃gü ga yamugüxü̃arü puracüchiga 26:9

Rü noxri ga choma rü ta rü nagu charüxĩnü nax chayanaxoxẽẽxü̃ ga yema Ngechuchu ya Nacharétucüã̱xaxü̃́ yaxõgüxü̃.