Ngechuchuarü ngúexü̃gü ga yamugüxü̃arü puracüchiga 21:3 - Tupanaarü Ore

³ Rü yixcaamaxü̃ra nüxü̃ tadaugü ga Chípere. Rü torü to̱xwecüwawaama naxǘ, rü nüxü̃ tachopetü. Rü itiñaxwetaxü̃ ñu̱xmata Chíriaanewa tangugü. Rü Tíruwa ítachoü̃ yerü yéma nixĩ ga ínanuü̃ãcuxü̃ ga gumá wapuru.

Ngechuchuarü ngúexü̃gü ga yamugüxü̃arü puracüchiga 21:3 Referans Kwoze

Ngechuchuarü ngúexü̃gü ga yamugüxü̃arü puracüchiga 27:4

Rü yéma itaxĩãchi. Rü Chíperearü capaxũarü tocüwaguama taxĩ, na̱xcha̱xwa ga buanecü, yerü towaama nabu.

Ngechuchuarü ngúexü̃gü ga yamugüxü̃arü puracüchiga 21:16

Rü towe narüxĩ ga ñuxre ga yaxõgüxü̃ ga Checharéacüã̱xgü, rü Machóü̃patawa toxü̃ nagagü. Rü nüma nixĩ ga wüxi ga Chíperecüã̱x ga ü̃pamama woetama yaxõxü̃. Rü naxü̃tagu tapegüxü̃.

Ngechuchuarü ngúexü̃gü ga yamugüxü̃arü puracüchiga 12:20

Rü Eróde rü namaxã nanu ga Tírucüã̱xgü rü Chidóü̃cüã̱xgü. Natürü ga yema Tírucüã̱xgü rü Chidóü̃cüã̱xgü rü naxca̱x nadaugü nax ñuxãcü Eródexü̃ nangüxmüxẽẽgüxü̃, yerü Eródechiü̃anewa nixĩ ga nayauxgüãxü̃ ga nabü. Rü yemaca̱x ga yema Tírucüã̱xgü rü Chidóü̃cüã̱xgü rü wüxi ga Eródearü ngü̃xẽẽruxü̃ ga Bátumaxã naxãmücügü nax nüxü̃ nangü̃xẽẽxü̃ca̱x nax Eródemaxã yadexagüxü̃ca̱x.

Ngechuchuarü ngúexü̃gü ga yamugüxü̃arü puracüchiga 4:36

Rü nayexma ga wüxi ga yatü ga Lebítanüxü̃ ga Chíperecüã̱x ga Yúchegu ãégacü. Rü yema ngúexü̃gü ga Ngechuchu imugüxü̃ nax Tupanaarü puracü naxügüxü̃ca̱x rü Bernabémaxã nanaxugü. Rü ngẽma naéga, rü: “Taãẽxẽẽruxü̃”, ñaxü̃chiga nixĩ.

Ore i mexü̃ ga Matéu ümatüxü̃ 4:24

Rü duü̃xü̃gü rü Ngechuchuchigaxü̃ nixugügü ga guxü̃ma ga Chíriaanewa. Rü naxü̃tawa nanagagü ga naguxü̃raü̃xü̃ ga da̱xaweanemaxã idaaweexü̃. Rü nayexma ga duü̃xü̃gü ga ngúanemaxã idaaweexü̃, rü duü̃xü̃gü ga poraãcü naxü̃newa nangúexü̃, rü duü̃xü̃gü ga ngo̱xo nawa yexmaxü̃, rü duü̃xü̃gü ga óxwaa̱xgüxü̃, rü duü̃xü̃gü ga nawãĩxãchigüxü̃. Rü Ngechuchu nanameexẽxẽ ga guxü̃ma ga yema.

Ngechuchuarü ngúexü̃gü ga yamugüxü̃arü puracüchiga 18:18

Rü yemawena rü muxü̃ma ga ngunexü̃ yéma Coríntiuwa nayexma ga Pauru. Rü yixcaama nüxü̃ narümoxẽ ga yema yaxõgüxü̃ rü nüxna inaxũãchi. Rü ĩane ga Chencréawa naxũ namaxã ga Prichíra rü Aquíra. Rü Chencréawa naxü̃pa nax yachoü̃xü̃, rü nügü nidüpü̱xüeru ga Pauru yerü marü nayanguxẽxẽ ga wüxi ga uneta ga Tupanamaxã nüxü̃ yaxuxü̃. Rü ñu̱xũchi Chencréaarü türewa wüxi ga wapurugu nichoü̃ nax Chíriaanewa naxĩxü̃ca̱x.

Ngechuchuarü ngúexü̃gü ga yamugüxü̃arü puracüchiga 15:41

Rü Chíriaanewa rü Chiríchiaanewa nachopetü, rü yéma Tupanaarü oremaxã nanataãẽxẽẽgü ga yema yaxõgüxü̃.

Ngechuchuarü ngúexü̃gü ga yamugüxü̃arü puracüchiga 15:39

Rü poraãcü nügümaxã niporagatanücüü naxca̱x ga yema, rü düxwa nügüna nixĩgü. Rü Bernabé nayaga ga Márcu, rü Chíperearü capaxũwa naxũ.

Ngechuchuarü ngúexü̃gü ga yamugüxü̃arü puracüchiga 15:23

Rü namaxã yéma nanamugü ga popera ga ñaxü̃: “Pa Toenexẽgü i Tama Yudíugü Ixĩgüxe i Antioquíagu rü Chíriaanegu rü Chiríchiaanegu Ãchiü̃güxe, rü toma i peenexẽgü ya Ngechuchu toxü̃ imugüxe rü toma i yaxõgüxü̃arü ãẽ̱xgacügü ixĩgüxe, rü pexü̃ tarümoxẽgü.

Ngechuchuarü ngúexü̃gü ga yamugüxü̃arü puracüchiga 13:4

Rü Tupanaãxẽ ya Üünecü rü inanamuãchitanü ga Bernabé rü Chauru. Rü ĩane ga Cheleúchiawa naxĩ, rü gumáarü türewa inaxĩãchi, rü capaxũ ga Chíperewa naxĩ. Rü Cuáü̃ ga Márcu nawe narüxũ nax nüxü̃ nangü̃xẽẽxü̃ca̱x. Rü yexguma Chíperearü ĩane ga Charamínaarü türewa nangugügu, rü inanaxügüe ga nüxü̃ nax yaxugüxü̃ ga Tupanaarü ore ga Yudíugüarü ngutaque̱xepataü̃güwa.

Ngechuchuarü ngúexü̃gü ga yamugüxü̃arü puracüchiga 11:19

Rü yexguma Estébaü̃ yuxguwena, rü inanaxügüe nax yema yaxõgüxü̃we yangexü̃tanüxü̃. Rü yemaca̱x nügü nawoone. Rü Feníchiawa, rü Chíperewa rü Antioquíawa nabuxmü. Rü yéma nüxü̃ nixugüe ga ore ga mexü̃ ga Ngechuchuchiga. Natürü Yudíugümaxãxicatama nüxü̃ nixugüe ga yema ore rü tama ga togümaxã.

Ore i mexü̃ ga Luca ümatüxü̃ 10:13

Rü wüxi i ngechaü̃ nixĩ i pexca̱x, Pa Corachíü̃cüã̱x rü Bechaídacüã̱x i Duü̃xü̃güx. Yerü yexguma chi Tíruarü ĩanewa rü Chidóü̃arü ĩanewa chanaxüxgu ga yema mexü̃gü ga cua̱xruü̃gü ga Tupanaarü poramaxã petanüwa chaxüxü̃, rü woo nax poraãcü yachixexü̃ ga yema Tírucüã̱x rü Chidóü̃cüã̱x ga duü̃xü̃gü rü nũxcümama chitama nüxü̃ narüxoe ga nacüma ga chixexü̃, rü poraãcü chi nügümaxã nangechaü̃gü rü naxauxe, yerü chi nügü nicua̱xãchitanü nax yapecaduã̱xgüxü̃.

Ore i mexü̃ ga Luca ümatüxü̃ 2:2

Rü yexguma Quirínu ãẽ̱xgacü ixĩxgu ga Chíriaarü naanewa rü nanaxü ga yema nüxíraxü̃xü̃ ga duü̃xü̃güarü ugü.

Ore i mexü̃ ga Matéu ümatüxü̃ 11:21

Rü ñanagürü ga Ngechuchu: “Wüxi i ngechaü̃ nixĩ i pexca̱x, Pa Corachíü̃cüã̱x rü Pa Bechaídacüã̱x. Yerü yexguma chi Tíruarü ĩanewa rü Chidóü̃arü ĩanewa chanaxüxgu ga yema mexü̃gü ga cua̱xruü̃gü ga Tupanaarü poramaxã petanüwa chaxüxü̃, rü woo ga nax poraãcü yachixexü̃ ga yema duü̃xü̃gü, rü nũxcümama chitama nüxü̃ narüxoe ga yema nacüma ga chixexü̃, rü poraãcüxüchi chi nügümaxã nangechaü̃gü rü naxauxe, yerü chi nügü nicua̱xãchitanü nax yapecaduã̱xgüxü̃.

Ichaía 7:2

Rü Acáxmaxã rü napatacüã̱xmaxã nüxü̃ nayarüxugüe ga ore ga ñaxü̃: —Ngẽma Chíriacüã̱xgü rü Efraíü̃tanüxü̃maxã nügü narüngüxẽẽgü nax taxca̱x íyaxü̃ãchixü̃ca̱x —ñaxü̃. Rü yemaxü̃ naxĩnügu rü nüma ga Yudáanearü ãẽ̱xgacü rü norü duü̃xü̃gü rü inanaxügüe nax muü̃maxã yadu̱xruxexü̃ ñoma naixnecüwa ngẽxmagüxü̃ i naigü i buanecüemamaxã íxiã̱xtanücüüxü̃rüxü̃.

Wiyaegü 87:4

Rü natanüwa i ngẽma duü̃xü̃gü i choxü̃ cua̱xgüxü̃ rü nangẽxma i duü̃xü̃gü i Equítuanegu buexü̃, rüe̱xna Babiróniaanegu buexü̃, rüe̱xna Firitéugüanegu buexü̃, rüe̱xna Tíruarü ĩanegu buexü̃ rüe̱xna Etiopíaanegu buexü̃. Rü wüxichigü i ngẽmagü rü poraãcü ngẽma ĩane i nagu nabuxü̃maxã nataãxẽ.

Wiyaegü 45:12

Pa Pacü i Tírucüã̱x, ngẽma duü̃xü̃gü i curü ĩanewa poraãcü diẽruã̱xü̃chigüxü̃ rü mexẽchixü̃ i ãmare tá cuxna naxãgü nax ngẽmamaxã cuxü̃ íyapuxẽẽgüxü̃ca̱x.

2 Chamué 8:6

Rü yemawena ga Dabí rü Damácugu nayaxüa ga norü churarapatagü. Rü yemaacü ga Chíriaanecüã̱xgü rü Dabíme̱xẽwa nayexmagü rü Dabíaxü̃́ nanaxütanügü ga yema diẽru ga Dabí nagu unetaxü̃. Rü yemaacü ga Cori ya Tupana rü Dabíxü̃ naporaxẽxẽ nax norü uanügüxü̃ naporamaexü̃ca̱x ga ngexta ínaxũxü̃wa.

Ãẽ̱xgacügü ga guxchaxü̃güarü mexẽxẽruü̃gü 10:6

Natürü nüma ga Iraétanüxü̃ rü wenaxarü Cori ya Tupanape̱xewa chixexü̃ naxügü rü guxü̃raü̃xü̃ ga Baáchicüna̱xãxü̃ rü Ataréchicüna̱xãxü̃ nicua̱xüü̃gü. Rü yexgumarüxü̃ tá nüxü̃ nicua̱xüü̃gü ga Chíriacüã̱xgüarü tupanachicüna̱xãgü, rü Chidóü̃cüã̱xgüarü tupanachicüna̱xãgü, rü Moátanüxü̃arü tupanachicüna̱xãgü rü Amóü̃tanüxü̃arü tupanachicüna̱xãgü, rü Firitéugüarü tupanachicüna̱xãgü. Rü Cori ya Tupanaxü̃ narüngümae rü nüxü̃ narüxoe nax naxca̱x nangutaque̱xegüxü̃.

Ngechuchuarü ngúexü̃gü ga yamugüxü̃arü puracüchiga 21:2

Rü yexma nüxü̃ tayangau ga wüxi ga wapuru ga Feníchiawa ũxü̃ne. Rü nagu tichoü̃, rü itaxĩãchi.

Ngechuchuarü ngúexü̃gü ga yamugüxü̃arü puracüchiga 21:7

Rü toma rü Tíruwa itaxĩãchi rü Toremáidawa tangugü. Rü yéma ítachoü̃, yerü yexma nayacua̱x ga wapurugu nax taxĩxü̃. Rü nüxü̃ tarümoxẽgü ga yema yaxõgüxü̃ ga yéma yexmagüxü̃, rü wüxi ga ngunexü̃ natanügu tarücho.