Ngechuchuarü ngúexü̃gü ga yamugüxü̃arü puracüchiga 21:24 - Tupanaarü Ore

²⁴ ¡Ngéma Tupanapata ya taxü̃newa nagagü, rü wüxigu namaxã yanguxẽxẽ i ngẽma tacüma ga Moiché tüxna ãxü̃, rü Tupanape̱xewa pegü peyamexẽxẽgü! ¡Rü nüxü̃́ naxütanü i ñuxregu nüxü̃́ naxãtanü nax yadüpü̱xüerugüxü̃ca̱x i ngẽma yatügü nax ngẽmaãcü yanguxẽẽgüãxü̃ca̱x i norü unetagü! Rü ngẽmawa rü guxü̃ma i ngẽma Yudíugü rü tá nüxü̃ nacua̱xgü nax aixcüma cuma rü ta naga cuxĩnüxü̃xü̃ i ngẽma mugü ga Moiché ümatüxü̃ rü tama aixcüma nax yixĩxü̃ ga yema ore ga cuchiga nüxü̃ yaxugüexü̃.

Ngechuchuarü ngúexü̃gü ga yamugüxü̃arü puracüchiga 21:24 Referans Kwoze

Ngechuchuarü ngúexü̃gü ga yamugüxü̃arü puracüchiga 21:26

Rü yexguma ga Pauru rü yéma Tupanapata ga taxü̃newa nanagagü ga yema ãgümücü ga yatügü. Rü moxü̃ãcü rü Tupanape̱xewa nügü namexẽxẽ ga Pauru wüxigu namaxã ga yema yatügü. Rü ñu̱xũchi gumá Tupanapatagu namaxã naxücu nax chacherdótemaxã nüxü̃ yaxuxü̃ca̱x nax 7 ga ngunexü̃gu tá yixĩxü̃ nax yanguxẽẽgüãxü̃ ga yema norü uneta ga Tupanamaxã nüxü̃ yaxugüxü̃, rü yemawena rü tá inaxãgüãxü̃ ga norü ãmaregü ga Tupanaxü̃ namaxã yacua̱xüü̃güxü̃ ga wüxichigü.

Ngechuchuarü ngúexü̃gü ga yamugüxü̃arü puracüchiga 24:18

Rü nawena nax chaugü chamexẽẽxü̃ ga Tupanape̱xewa, rü choma rü Tupanapata ya taxü̃newa Tupanana chanaxã ga chorü ãmaregü. Rü tama muxü̃ ga duü̃xü̃gümaxã chayexma, rü tama chananuexẽxẽ ga duü̃xü̃gü. Rü yexguma nixĩ nax ñuxre ga Yudíugü ga Áchiaanecüã̱x choxü̃ daugüxü̃ ga Tupanapata ya taxü̃newa. Rü ngẽmagü chi nixĩ i ñu̱xma nua ĩxü̃ nax choxü̃ ínaxuaxü̃güxü̃ca̱x ega ta̱xacürü chixexü̃ chowa nadaugügu.

Ngechuchuarü ngúexü̃gü ga yamugüxü̃arü puracüchiga 18:18

Rü yemawena rü muxü̃ma ga ngunexü̃ yéma Coríntiuwa nayexma ga Pauru. Rü yixcaama nüxü̃ narümoxẽ ga yema yaxõgüxü̃ rü nüxna inaxũãchi. Rü ĩane ga Chencréawa naxũ namaxã ga Prichíra rü Aquíra. Rü Chencréawa naxü̃pa nax yachoü̃xü̃, rü nügü nidüpü̱xüeru ga Pauru yerü marü nayanguxẽxẽ ga wüxi ga uneta ga Tupanamaxã nüxü̃ yaxuxü̃. Rü ñu̱xũchi Chencréaarü türewa wüxi ga wapurugu nichoü̃ nax Chíriaanewa naxĩxü̃ca̱x.

1 Corintios 9:20

Rü yexguma chautanüxü̃ ga Yudíugütanüwa chayexmagu, rü namaxã chaugü chawüxiguxẽxẽ nax yemaacü nüxü̃ charüngü̃xẽẽxü̃ca̱x nax Cristuaxü̃́ yaxõgüãxü̃ca̱x. Rü woo tama yema Moiché ümatüxü̃ ga mugütüü̃wa changexmagu, natürü chayanguxẽẽãma i ngẽma mugü nax ngẽmaãcü Cristuxü̃tawa chanagagüxü̃ i ngẽma duü̃xü̃gü i ñu̱xma rü ta nagu ĩxü̃ i ngẽma mugü ga Moiché ümatüxü̃.

Ínachoxü̃xü̃chiga 19:14

Rü nüma ga Moiché rü ínarüxĩ nawa ga guma ma̱xpǘne nax duü̃xü̃güxü̃ yaxucu̱xẽgüxü̃ca̱x nax ñuxãcü Tupanaxü̃ yacua̱xüü̃güxü̃ca̱x. Rü nüma ga duü̃xü̃gü rü nügü niyauxchirugü.

Gálatas 2:12

Yerü noxri rü yema duü̃xü̃gü ga tama Yudíugü ixĩgüxü̃maxã nachibü ga Pedru. Natürü yexguma yéma nangugügu ga ñuxre ga Yudíugü ga yaxõgüxü̃ ga Chantiágu yéma mugüxü̃, rü Pedru rü marü tama yema duü̃xü̃gü ga tama Yudíugü ixĩgüxü̃maxã nachibüchaü̃. Rü Yudíugümaxãxicatama nachibü ga yexguma, yerü nüxü̃ namuü̃ ga yema Yudíugü ga yéma ngugüxü̃ ga nagu ĩxü̃ ga yema nacüma nax Tupanaca̱x ínawíecha̱xmüü̃pe̱xechiraü̃güxü̃.

Ore i mexü̃ ga Cuáü̃ ümatüxü̃ 11:55

Rü marü ningaica ga yema Yudíugüarü peta ga Üpetüchiga. Rü yemaca̱x muxü̃ma ga duü̃xü̃gü ga nai ga ĩanecüã̱x rü Yerucharéü̃wa naxĩ nax Tupanaca̱x nügü yamexẽẽgüxü̃ca̱x naxü̃pa ga yema peta.

Ore i mexü̃ ga Cuáü̃ ümatüxü̃ 3:25

Rü ñuxre ga Cuáü̃arü ngúexü̃gü rü wüxi ga Yudíumaxã niporagatanücüü nachiga ga ñuxãcü tá Tupanaca̱x nügü yamexẽẽgüxü̃ ga duü̃xü̃gü.

Yox 41:25

Rü ngẽxguma nügü nango̱xẽẽgu i ngẽma yewaxe rü namaxã naba̱i̱xãchie i ngẽma duü̃xü̃gü i poraexü̃ rü muü̃maxã nibuxmü.

Yox 1:5

Rü yexguma marü nawena ga yema nanegüarü peta ga naxügüüxü̃, rü nüma ga Yox rü nanegüca̱x nangemaxü̃. Rü pa̱xmamaxü̃chima ínarüdaüxü̃ rü wüxichigü ga nanegüégagu rü naxacügüégagu Tupanaca̱x nayama̱x rü nayagu ga wüxi ga naxü̃na nax yemaacü Tupana nüxü̃́ nüxü̃ rüngü̃maxü̃ca̱x ga yema nanegüarü rü naxacügüarü chixexü̃gü. Rü yemaacü nanaxüüxü̃ ga Yox yerü nagu narüxĩnü rü nanegü rü naxacügü rü ngürüãchi marü Tupanape̱xewa guxchaxü̃ naxügüe ga norü ĩnüwa ga yexguma peta naxügüxü̃gu.

Ãẽ̱xgacügü ga guxchaxü̃güarü mexẽxẽruü̃gü 13:5

Erü cuxü̃́ tá nangẽxma i wüxi i cune i tagutáma texé iyoeruxü̃, erü ngẽma õxchana i naxü̃pa nax nabuxü̃ rü woetátama Tupanaca̱x ínaxüxüchi. Erü yimá cune tá nixĩ i inaxügücü nax Iraétanüxü̃xü̃ ínanguxü̃xẽẽxü̃ naxme̱xwa i ngẽma Firitéugü —ñanagürü.

Iraétanüxü̃arü muxchiga 6:18

Rü ngẽmawena i nüma i Nacharéu rü Tupanapataca̱x ixücuxü̃wa tá nayayo i ngẽma nayae i Tupanaca̱x nayaxẽẽxü̃. Rü nüma i Nacharéu rü tá nanade i ngẽma nayae rü tá nayagu nawa ya yima üxü i ngẽma ãmare i carnéru i chorü ngüxmüxẽẽruü̃tüxü̃wa ngẽxmane.

Iraétanüxü̃arü muxchiga 6:13

Rü ngẽxguma yagu̱xgu i norü ngunexü̃gü i nagu chomaxã inaxunetaxü̃ i ngẽma Nacharéu rü nanaxwa̱xe nax chopataca̱x ixücuxü̃wa naxũxü̃.

Iraétanüxü̃arü muxchiga 6:9

Rü ngẽxguma ngürüãchi wüxi ya duü̃xẽ naxü̃tagu yuxgu i wüxi i Nacharéu rü ngẽmaca̱x natagügu i nayae i Tupanaca̱x ixĩxü̃, rü nanaxwa̱xe nax wüxi ya yüxüguwena nügü naba̱i̱xeruxẽẽxü̃ nax ngẽmaãcü Tupanape̱xewa namexü̃ca̱x.

Iraétanüxü̃arü muxchiga 6:5

Rü ngẽma ngunexü̃gügu rü taxũtáma niyoeru, ñu̱xmatáta yanguxẽẽã nax chomaxã inaxunetaxü̃. Rü nüma rü wüxi i duü̃xü̃ i cha̱u̱xca̱xicatama maxü̃xü̃ tá nixĩ.

Ínachoxü̃xü̃chiga 19:10

Rü nüma ga Cori ya Tupana rü ñanagürü Moichéxü̃: —¡Ẽcü, namaxã nüxü̃ yarüxu i ngẽma duü̃xü̃gü nax nügü yamexẽẽgüxü̃ca̱x i ñu̱xmax rü moxü̃ nax ngẽmaãcü choxü̃ yacua̱xüü̃güxü̃ca̱x! Rü name i nügü niyauxgüchirugü rü nügü namexẽẽgü naxca̱x i pa̱xmaacüarü ngunexü̃. Erü ngẽma ngunexü̃gu tá nixĩ i ícharüxĩxü̃ nagu ya yima ma̱xpǘne ya Chinaí nape̱xewa i guxü̃ma i ngẽma duü̃xü̃gü.