Ngechuchuarü ngúexü̃gü ga yamugüxü̃arü puracüchiga 19:19 - Tupanaarü Ore

¹⁹ Rü muxü̃ma ga yema iyuüechiréxü̃, rü yéma nanana ga norü yuüpane ga nawa nangúexü̃, rü guxãpe̱xewa ínanagu. Rü yexguma nangugügüãgu ga natanü ga yema yuüpanegü, rü 50,000 tachinü ga diẽru ga tatanüxü̃wa nangu ga natanü.

Ngechuchuarü ngúexü̃gü ga yamugüxü̃arü puracüchiga 19:19 Referans Kwoze

Ngechuchuarü ngúexü̃gü ga yamugüxü̃arü puracüchiga 13:8

Natürü yema yuüxü̃, ga Griégugawa Erimínugu ãégaxü̃, rü tama nanaxwa̱xe nax Tupanaarü orexü̃ yaxugüxü̃ ga Chauru rü Bernabé. Yerü tama nanaxwa̱xe nax yaxõõxü̃ ga gumá ãẽ̱xgacü.

Ínachoxü̃xü̃chiga 32:20

Rü ñu̱xũchi nüma ga Moiché rü nanayaxu ga yema wocaxacüchicüna̱xã rü üxüxétüwa nayata̱xcuchi. Rü yemawena ga marü yaga̱u̱xgu rü nanawaxi rü ñu̱xmata naxãte̱xemare. Rü yema nate̱xe rü dexáwa nanagüe rü ñu̱xũchi yema Iraétanüxü̃xü̃ namu nax yema dexáwa naxaxegüxü̃ca̱x.

Naanearü ügüchiga 35:4

Rü yexguma ga yema duü̃xü̃gü, rü Acóbuxü̃tawa nanana ga guxü̃ma ga norü tupanachicüna̱xãgü rü yema naxmachinügü ga namaxã yaxãxmachinüxü̃ ga togü ga tupanagüarü cua̱xruü̃gü ixĩgüxü̃. Rü ĩane ga Chiquéü̃arü ngaicamana rüxüxü̃ne ga castañatüü̃gu Acóbu inanata̱xgü ga yema tupanachicüna̱xãgü rü yema naxmachinügü.

Ngechuchuarü ngúexü̃gü ga yamugüxü̃arü puracüchiga 13:6

Rü guxü̃gu nixĩãgütanü ga yema capaxũwa ñu̱xmata ĩane ga Pápuwa nangugü. Rü yéma namaxã inayarüxĩ ga wüxi ga Yudíu ga yuüxü̃ ga Bar-ngechúchugu ãégaxü̃. Rü nüma rü wüxi ga orearü uruü̃neta nixĩ.

Danié 2:2

Rü yemaca̱x naxca̱x nangema ga norü ucu̱xẽruü̃gü ga iyuüxü̃ rü yema ẽxü̃guxü̃xü̃ cua̱xgüxü̃ rü nape̱xexü̃ cua̱xgüxü̃ rü yema cua̱x nüxü̃́ yexmagüxü̃. Rü nüma ga yema iyuüxü̃ rü ãẽ̱xgacüxü̃tawa naxĩ. Rü nüma ga ãẽ̱xgacü rü yemagüna naca nax nüxü̃ yaxugüexü̃ca̱x nax ta̱xacüchiga yixĩxü̃ ga yema nagu naxãnegüxü̃.

Ichaía 30:22

Rü ñoma wüxi i ãũãchixü̃rüxü̃ tá nüxü̃ cuxo i ngẽma curü naxchicüna̱xãgü i diẽrumünaxca̱x rü ngẽma curü tupananetachicüna̱xãgü i úirumaxã ichagüétüxü̃. Rü ñoma ta̱xacü i ãũãchixü̃rüxü̃ tá nüxü̃ cuxo rü cuxca̱x rü guxchirerüxü̃ tá nixĩ.

Popera ga Yudíugü ga yaxõgüxü̃ca̱x ümatüxü̃ 10:34

Rü pema rü pexü̃́ nangechaü̃tümüü̃gü ga yema petanüxü̃ ga yaxõgüxü̃ ga poxcupataü̃wa yexmagüxü̃. Rü taãẽãcüma yáxna namaxã pexĩnüe ga yema tama yaxõgüxü̃ ga pexna napuxü̃xü̃ ga perü yemaxü̃gü. Rü tama naxca̱x pexoegaãxẽ, yerü meama nüxü̃ pecua̱x rü daxũguxü̃ i naanewa pexü̃́ nangẽxma i ngẽmaarü yexera ixĩxü̃ i tagutáma gúxü̃.

Ore i mexü̃ ga Luca ümatüxü̃ 14:33

Rü ngẽxgumarüxü̃ tá ta nixĩ i pemax, erü ngẽxguma ngexerüxüxe i petanüwa tama ngéma tanawogügu i guxü̃ma i tüxü̃́ ngẽxmaxü̃ nax chowe tarüxũxü̃ca̱x, rü taxucürüwama aixcüma chorü ngúexü̃ tixĩ.

Ichaía 8:19

Rü bexmana ngürüãchi i duü̃xü̃gü rü tá pexü̃ ñanagürügü: —¡Ngĩxã nüxna taca i ngẽma yuüxü̃ rü ngẽma nüxü̃ cuáxü̃ nax ígaãcüma yuetaãẽmaxã yadexagüxü̃! ¿Rü tama ẽ̱xna inamexü̃ nax wüxi ya ĩanecüã̱x i duü̃xü̃gü naxca̱x nadauxü̃ i norü tupanagüarü ucu̱xẽgü rü yuetagüarü ucu̱xẽgü nachiga i ngẽma maxẽxü̃?

Norü taxre ga to ga popera ga ãẽ̱xgacügüchiga ümatüxü̃ 33:6

Rü nüma ga Manaché rü nanegüxü̃tama nigu nawa ga yema ãmarearü guruxü̃ ga doxonexü̃ ga Ben-inóü̃wa yexmaxü̃. Rü chixexü̃ ga naãẽgüca̱x nangema nax namaxã yadexaxü̃ca̱x, rü ngẽma ẽxü̃guxü̃ i chixexü̃wa nangu̱x, rü duü̃xü̃güxü̃ namu nax naxca̱x nangúexü̃ nax yuetaãẽgüca̱x nangemagüxü̃, rü nagu nixũ nax duẽxẽgüxü̃ nachixexẽẽgüxü̃. Rü yema taxü̃ ga chixexü̃gü ga Tupanape̱xewa naxüxü̃maxã poraãcü Tupanaxü̃ nanuxẽxẽ.

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 10:13

Rü yemaacü nixĩ ga nayuxü̃ ga Chaú nagagu ga yema chixexü̃ ga naxüxü̃. Yerü nüma ga Chaú rü tama Tupanaga naxĩnü rü ñu̱xũchi yuüxü̃ ga ẽxü̃guxü̃xü̃ cuáxü̃na nayaca. Rü tama nüxna naca ga Tupana. Rü yemagagu nixĩ ga nüma ga Tupana ga nayuxẽẽãxü̃ ga Chaú rü Ichaxí nane ga Dabíxü̃ naxunetaxü̃ nax nüma Iraéanecüã̱xgüarü ãẽ̱xgacü yixĩxü̃ca̱x.

Ínachoxü̃xü̃chiga 7:22

Natürü ga yema Faraóü̃arü duü̃xü̃gü ga iyuüxü̃, rü yexgumarüü̃tama norü yuümaxã nanaxügü. Rü yemaacü yema Cori ya Tupana nüxü̃ ixuxü̃rüxü̃ rü nüma ga Faraóü̃ rü nanuama rü nügü ínanataiãchiarü maxü̃ã̱xẽxẽ rü tama inaxĩnüchaü̃ ga yema Moiché rü Aróü̃ namaxã nüxü̃ ixuxü̃.

Ínachoxü̃xü̃chiga 7:11

Rü nüma ga Faraóü̃, rü norü duü̃xü̃gü ga nüxü̃ icua̱xüchixü̃ca̱x rü norü yuüxü̃güca̱x nangema. Rü nümagü ga yema norü duü̃xü̃gü rü norü yuüxü̃gümaxã nanaxügüama ta ga yema Aróü̃ üxü̃.

Ore i mexü̃ ga Luca ümatüxü̃ 15:8

Rü ngẽxguma chi wüxi i ngecüaxü̃́ nangẽxmagu i 10 tachinü i diẽru i tatanüxü̃, rü wüxi ngĩxü̃́ iyarütaxu̱xgu, ¿rü taux ẽ̱xna i omüwa nangĩxichiãxü̃ rü nabixichiãxü̃ ya ngĩpata, rü meama ngĩxca̱x nadauxü̃ ñu̱xmata ngĩxü̃ iyangau?

Ngechuchuarü ngúexü̃gü ga yamugüxü̃arü puracüchiga 19:18

Rü muxü̃ma ga yema yaxõgüxü̃ rü yéma ningugüetanü, rü guxü̃ ga duü̃xü̃güpe̱xewa nüxü̃ nixugüe ga guxü̃ma ga norü chixexü̃ ga ü̃pa naxügüxü̃.

Lebítanüxü̃arü puracüchiga 13:52

Rü ngẽmaca̱x i ngexü̃rüüxü̃ i ngẽmaxü̃ i chúxü̃ rü name nixĩ i wüxicana yaguxü̃, erü chaxüne i ãũcümaxü̃ nawa nangẽxma.