Ngechuchuarü ngúexü̃gü ga yamugüxü̃arü puracüchiga 14:5 - Tupanaarü Ore

⁵ Rü yexguma ga yema Yudíugü rü yema tama Yudíugü ixĩgüxü̃, rü guma ĩanearü ãẽ̱xgacügümaxã wüxigu nagu narüxĩnüe nax Pauruxü̃ rü Bernabéxü̃ yayauxgüxü̃ nax nutamaxã ínamuxũchigüãxü̃ca̱x.

Ngechuchuarü ngúexü̃gü ga yamugüxü̃arü puracüchiga 14:5 Referans Kwoze

Ngechuchuarü ngúexü̃gü ga yamugüxü̃arü puracüchiga 14:19

Natürü yexgumayane rü ínangugü ga ñuxre ga Yudíugü ga Antioquíawa rü Icóniowa ne ĩxü̃. Rü chixexü̃maxã nayaxucu̱xẽgü ga yema muxü̃ma ga duü̃xü̃gü nax tama Pauruga rü Bernabéga naxĩnüexü̃ca̱x, rü namaxã nanuexü̃ca̱x. Rü yemaca̱x ga yema duü̃xü̃gü rü nutamaxã Pauruxü̃ ínamuxũchigü, rü ĩanearü ĩxpemawa nanatúchigügü, yerü nüma nüxü̃ nacua̱xgügu rü marü nayu.

Norü taxre ga popera ga Timutéuca̱x naxümatüxü̃ ga Pauru 3:11

Rü cuma nüxü̃ cucua̱x ga ñuxãcü chowe ningẽxü̃tanü ga duü̃xü̃gü rü ñuxãcü ngúxü̃ chinge ga yexguma Antioquíawa rü Icóniowa rü Lístrawa chayexmagu. Natürü yáxna namaxã chaxĩnü ga guxü̃ma ga yema ngúxü̃ ga chingexü̃. Rü tórü Cori ya Tupana rü choxü̃ ínapoxü̃ na̱xcha̱xwa i guxü̃ma i ngẽma ngúxü̃.

Ngechuchuarü ngúexü̃gü ga yamugüxü̃arü puracüchiga 17:5

Rü yemaca̱x ga yema Yudíugü ga tama yaxõgüxü̃, rü nixãũxãchigü. Rü nanaxĩtaque̱xexẽxẽ ga ñuxre ga yatügü ga chixexü̃gu maxẽxü̃ ga oexü̃ ga ĩanearü namagüwa yexmagüxü̃. Rü yema Yudíugü rü yema oexü̃xü̃ naxucu̱xẽgü nax yema ĩanecüã̱x ga duü̃xü̃güxü̃ nanuexẽẽxü̃ca̱x. Rü Yachóü̃patawa nabuxmü ga yema duü̃xü̃gü nax Pauruca̱x rü Chíraca̱x nadaugüxü̃ca̱x, yerü yema muxü̃ma ga duü̃xü̃güpe̱xewa nanagagüchaü̃.

Ore i mexü̃ ga Luca ümatüxü̃ 6:28

¡Rü naxca̱x ípeca i Tupanaarü ngü̃xẽxẽ naxca̱x i ngẽma pemaxã guxchigagüxü̃! ¡Rü naxca̱x peyumüxẽgü i ngẽma chixri pechiga idexagüxü̃!

Ore i mexü̃ ga Matéu ümatüxü̃ 5:44

Natürü i choma rü pemaxã nüxü̃ chixu rü: ¡Nüxü̃ pengechaü̃ i perü uanügü! ¡Rü naxca̱x peyumüxẽ i ngẽma duü̃xü̃gü i chixexü̃maxã pewe ingẽxü̃tanüxü̃!

Wiyaegü 83:5

Pa Tupanax, cuxca̱x nügümaxã nangutaque̱xegü rü wüxigu nügümaxã inaxügagü nax curü duü̃xü̃güxü̃ nada̱i̱xü̃ca̱x.

Ngechuchuarü ngúexü̃gü ga yamugüxü̃arü puracüchiga 13:45

Natürü yexguma yema Yudíugü nüxü̃ daugügu ga yema muxũchixü̃ ga duü̃xü̃gü ga Pauruca̱x ngutaque̱xegüxü̃ rü poraãcü nixãũxãchie. Rü inanaxügüe nax Pauruxü̃ nachoxü̃gagüxü̃ rü namaxã naguxchigagüxü̃.

Ngechuchuarü ngúexü̃gü ga yamugüxü̃arü puracüchiga 13:50

Natürü yema Yudíugü ga tama Ngechuchuaxü̃́ yaxõgüchaü̃xü̃, rü chixexü̃maxã nayaxuxcu̱xẽgü ga yema ngexü̃gü ga tachigagüxü̃ ga Yudíugücümagu ĩxü̃ rü ñu̱xũchi nayaxuxcu̱xẽgü ga guma ĩanearü ãẽ̱xgacügü nax Pauruxü̃ rü Bernabéxü̃ ínawoxü̃xü̃ca̱x ga yema naanewa.

Ngechuchuarü ngúexü̃gü ga yamugüxü̃arü puracüchiga 14:2

Natürü yema Yudíugü ga tama Ngechuchuaxü̃́ yaxõgüxü̃, rü chixexü̃maxã nayaxucu̱xẽgü ga yema tama Yudíugü ixĩgüxü̃ nax yema yaxõgüxü̃chi naxaiexü̃ca̱x.

Ngechuchuarü ngúexü̃gü ga yamugüxü̃arü puracüchiga 14:4

Natürü ga gumá ĩanecüã̱x ga duü̃xü̃gü rü nitoye. Rü nümaxü̃ rü yema Yudíugüwaama naxügü rü togü rü Pauru rü Bernabéwaama naxügü.

2 Corintios 11:26

Rü mue̱xpü̱xcüna tóxnamana chaxũ, rü natügü ga ãũcümaxü̃wa chayexma, rü ãũcümaxü̃ ga ngĩ́ta̱xagüxü̃ íyexmagüxü̃wa chayexma. Rü woo Yudíugütanüwa, rü woo yema tama Yudíugü ixĩgüxü̃tanüwa, rü woo ĩanegüwa, rü woo namagüwa, rü woo márwa rü ãũcümaxü̃wa chayexma. Rü woo yema yaxõgünetaxü̃tanüwa rü ãũcümaxü̃wa chayexma.

1 Tesalonicenses 2:2

Rü pema marü nüxü̃ pecua̱x rü naxü̃pa ga pexü̃tawa nax tangugüxü̃ rü chixri tomaxã nachopetü ga Pirípucüã̱xgü rü tomaxã naguxchigagü. Natürü Tupana toxü̃ narüngü̃xẽxẽ nax pemaxã nüxü̃ tixuxü̃ca̱x ga norü ore i tüxü̃ maxẽxẽẽxü̃. Rü yemaca̱x tama tamuü̃eãcüma pemaxã nüxü̃ tixu ga yema ore woo ga torü uanügü rü poraãcü toxü̃́ nax naguxchaxẽẽgüãxü̃.

1 Tesalonicenses 2:14

Pa Chauenexẽgüx, nüxü̃ tacua̱x nax aixcüma ngúxü̃ pingegüxü̃, yerü petanüxü̃tama rü chixri pemaxã nachopetü. Natürü yemaacütama nüxü̃ nangupetü ga Tupanaarü duü̃xü̃gü ga Ngechuchu ya Cristuaxü̃́ yaxõgüxü̃ ga Yudéaanewa yexmagüxü̃. Yerü natanüxü̃tama ga Yudíugü rü chixri namaxã nachopetü.

1 Tesalonicenses 2:16

Rü ngẽxguma ngẽma duü̃xü̃gü i tama Yudíugü ixĩgüxü̃maxã nüxü̃ tixuxchaü̃gu i Tupanaarü ore nax nümagü rü ta nüxü̃́ nangẽxmagüxü̃ca̱x i maxü̃, rü ngẽma Yudíugü rü toxna nanachu̱xu. Rü ngẽmaãcü i ngẽma Yudíugü rü poraãcüxüchima chixexü̃ naxügü. Rü ngẽmaca̱x i ñu̱xma rü düxwa marü nüxna nangu i ngẽma Tupanaarü poxcu i ãũcümaxü̃chixü̃.