Ngechuchuarü ngúexü̃gü ga yamugüxü̃arü puracüchiga 14:15 - Tupanaarü Ore

¹⁵ —Pa Yatügüx, ¿tü̱xcüü̃ toxca̱x penaxü i ngẽma? Toma rü pexrüxü̃ duü̃xü̃gümare tixĩgü. Rü nua taxĩ nax pemaxã nüxü̃ tayarüxuxü̃ca̱x nax nüxü̃ perüxoexü̃ca̱x i ngẽma pecüma i taxuwama mexü̃ rü nüxü̃́ peyaxõgüxü̃ca̱x ya Tupana ya Maxü̃cü ga naxücü i daxũguxü̃ i naane, rü ñoma i naane, rü ngẽma már rü guxü̃ma i nawa ngẽxmaxü̃.

Ngechuchuarü ngúexü̃gü ga yamugüxü̃arü puracüchiga 14:15 Referans Kwoze

Popera ga Chantiágu ümatüxü̃ 5:17

Tupanaarü orearü uruxü̃ ga Ería nixĩ ga wüxi ga yatü ga taxrüxü̃ ixĩcü. Natürü yexguma nüma aixcüma yaxõõcüma nayumüxẽgu nax tama napuxü̃ca̱x, rü tomaepü̱x ga taunecüarü ngãxü̃gu rü tama napu ga yema naanewa.

1 Corintios 8:4

Rü ngẽma nax nangṍxü̃ i ngẽma namachi i tupananetachicüna̱xãgüca̱x daixü̃, rü meama nüxü̃ tacua̱x nax taxuwama namexü̃ i ngẽma tupananetachicüna̱xãgü, erü tama aixcüma Tupanaxü̃chi nixĩgü. Erü wüxixicatama nixĩ ya Tupana ixĩcü, rü nataxuma i to.

Ngechuchuarü ngúexü̃gü ga yamugüxü̃arü puracüchiga 10:26

Natürü ga Pedru rü inanachixẽxẽ rü ñanagürü: —¡Inachi! Rü choma rü ta cuxrüxü̃ duü̃xü̃mare chixĩ rü tama Tupana chixĩ —ñanagürü.

1 Chamué 12:21

¡Rü taxṹ i nawe perüxĩxü̃ i ngẽma tupananetagü i tama pexü̃ rüngü̃xẽẽxü̃ rü tama pexü̃ maxẽxẽxẽxü̃! Erü ucaxü̃mare nixĩ i ngẽma tupananetagü.

Yema Cuáü̃ nüxü̃ dauxü̃ i yixcüra tá ngupetüxü̃chiga 14:7

Rü tagaãcü ñanagürü: “¡Nüxü̃ pemuü̃e ya Tupana rü nüxü̃ picua̱xüü̃gü! Erü marü nawa nangu nax guxü̃ma i duü̃xü̃güna naca̱xaxü̃. ¡Rü nüxü̃ picua̱xüü̃gü ya yimá naxücü i daxũguxü̃ i naane, rü ñoma i naane, rü ngẽma már, rü guxü̃ma i natüxacügü!” ñanagürü.

Yeremía 14:22

Pa Cori ya Tupana, nataxuma i tupananetachicüna̱xã i cuxrüxü̃ nüxü̃ cuáxü̃ nax napuxẽẽãxü̃. Rü taxucürüwa i dauxü̃guxü̃ i naane nüechamatama nanapuxẽxẽ. Rü cuma nixĩ i ícunanguxẽẽxü̃ ya pucü, rü cuma nixĩ i cunaxüxü̃ i guxü̃ma i ta̱xacü i ngẽxmaxü̃. Rü cuma nixĩ i aixcüma torü Tupana quixĩxü̃. Rü ngẽmaca̱x nixĩ i cuxü̃tawa ítayanguxẽẽxü̃ i curü ngü̃xẽxẽ —ñanagürü ga Yeremía.

Naanearü ügüchiga 1:1

Yema Tupana namaxã inaxügüxü̃ nixĩ nax naxüaxü̃ ga guxü̃ma i daxũwa ngẽxmaxü̃ rü ñoma i naane. Natürü ñaa naane ga noxri rü taxũta mea nango̱x yerü dexátüü̃wa nayexma rü naxẽanemare. Rü nüma ga Tupanaãxẽ rü naétügu ínachü̱xüxüxü̃.

1 Tesalonicenses 1:9

Yerü nümagütama ga yema duü̃xü̃gü rü marü nüxü̃ nixugügü nax mea toxü̃ peyauxgüxü̃ ga yexguma petanüwa taxĩxgu. Rü nüxü̃ nixugügü nax nüxü̃ perüxoexü̃ ga perü tupananetachicüna̱xãgü nax Tupanaxü̃chi ya maxü̃cü rü ixaixcümacüwe perüxĩxü̃ca̱x nax nüxü̃́ pepuracüexü̃ca̱x.

Efesios 4:17

Rü ñu̱xma rü Cristuégagu pexü̃ chaxucu̱xẽ nax tama nagu pexĩxamaxü̃ca̱x i ngẽma nacümagü i ngẽma duü̃xü̃gü i tama Tupanaxü̃ cua̱xgüxü̃ i naechitamare maxẽxü̃.

Yoná 2:8

Rü ngẽma duü̃xü̃gü i naxchicüna̱xãgüxü̃ icua̱xüü̃güxü̃, rü tama cumaxã nixaixcümagü. Natürü i chomax rü tá moxẽ cuxna chaxã rü tá cuxca̱x chayagu i ãmaregü. Rü tá chayanguxẽxẽ ga yema cumaxã ichaxunetaxü̃. Rü cuxicatama nixĩ, Pa Corix, Pa Tupanax, i nüxü̃ cucuáxü̃ nax choxü̃ cumaxẽẽxü̃ —ñanagürü.

Wenaxarü naxümatü ga Tupanaarü mugü 32:21

Rü choxü̃ penuexẽxẽ namaxã i ngẽma perü tupananeta i tama aixcüma Tupana ixĩxü̃. Rü choxü̃ penuexẽxẽ namaxã i ngẽma naxchicüna̱xãgü i taxuwama mexü̃. Rü ngẽmaca̱x i ñu̱xma i choma rü tá pexü̃ chanuexẽxẽ namaxã i duü̃xü̃gü i tama choxü̃́ yaxõgüxü̃. Rü tá pexü̃ chanuexẽxẽ namaxã i wüxi i duü̃xü̃gütücumü i tama ixĩnüechaü̃xü̃.

Ngechuchuarü ngúexü̃gü ga yamugüxü̃arü puracüchiga 4:24

Rü yexguma Pedruxü̃ rü Cuáü̃xü̃ naxĩnüegu ga namücügü, rü guxü̃ma wüxigu nayumüxẽgü rü Tupanamaxã nidexagü rü ñanagürügü: —Pa Corix, cuma cunaxü ga daxũguxü̃ ga naane rü ñoma ga naane, rü már, rü guxü̃ma i ta̱xacü i nawa ngẽxmaxü̃.

Ore i mexü̃ ga Matéu ümatüxü̃ 16:16

Rü Chimóü̃ ga Pedru nanangãxü̃, rü ñanagürü nüxü̃: —Cuma nixĩ i Cristu ya Tupana ya Maxü̃cü Nane quixĩxü̃ —ñanagürü.

Yeremía 32:17

—Cumax, Pa Corix, nixĩ ga curü pora ga taxü̃maxã cunango̱xẽẽxü̃ ga dauxü̃guxü̃ ga naane rü ñoma ga naane. Rü nataxuma i ta̱xacü i cuxü̃́ guxchaxü̃ nax cunaxüxü̃.

Wiyaegü 31:6

Rü tama namaxã chataãxẽ i ngẽma duü̃xü̃gü i naxchicüna̱xãgü i taxuwama mexü̃xü̃ icua̱xüü̃güxü̃. Rü choma rü cuxü̃́icatama nixĩ i chayaxõxü̃, Pa Corix, Pa Tupanax.

Ínachoxü̃xü̃chiga 20:11

Yerü choma i Cori ya Tupana rü 6 ga ngunexü̃gu nixĩ ga chanaxüxü̃ ga daxũguxü̃ ga naane, rü ñoma ga naane rü taxü̃ ga már rü guxü̃ma i ta̱xacü i nawa ngẽxmagüxü̃. Rü ñu̱xũchi icharüngü̃ ga norü 7 ga ngunexü̃gu. Rü yemaca̱x mexü̃ namaxã chaxuegu ga yema ngunexü̃ rü nüxü̃ chixu nax ngẽma ngunexü̃ i üünexü̃gu choxü̃ quicua̱xüxü̃xü̃ca̱x.

Popera ga Yudíugü ga yaxõgüxü̃ca̱x ümatüxü̃ 3:12

Rü ñu̱xma Pa Chauenexẽgüx, rü name nixĩ i pegüna pedaugü nax tama ngürüãchi pechixearü maxü̃ã́xü̃ca̱x, rü ngẽmagagu nax nüxü̃ perüxoexü̃ nax Tupana ya Maxü̃cüaxü̃́ peyaxõgüxü̃.

Ngechuchuarü ngúexü̃gü ga yamugüxü̃arü puracüchiga 14:21

Rü guma ĩanewa nüxü̃ nixugüe ga ore i mexü̃, rü muxü̃ma ga duü̃xü̃gü nayaxõgü. Rü yemawena rü wenaxarü naxca̱x nawoegu ga Lístra, rü Icónio, rü Antioquía.

Ore i mexü̃ ga Cuáü̃ ümatüxü̃ 7:18

Yíxema tügütama ixuchigaxe rü naxca̱x tadau nax duü̃xü̃gü tüxü̃ icua̱xüü̃güxü̃. Natürü yíxema naxca̱x dauxe nax nüxü̃ ticua̱xüxü̃ ya yimá tüxü̃ mucü, rü aixcüma nixĩ i tümaarü ore. Rü tama dora nixĩ i ngẽma nüxü̃ tixuxü̃.

Chacaría 12:1

Ñaa nixĩ i Cori ya Tupanaarü ore nachiga i Iraétanüxü̃. Rü nüma ya Cori ya Tupana nixĩ i nango̱xẽẽãxü̃ i daxũguxü̃ i naane rü naxüaxü̃ i ngẽma ñoma i naane nagu üxü̃ rü yatüna maxü̃ naxãxü̃, rü ñanagürü:

Yeremía 10:8

Rü guxü̃ma i ngẽma duü̃xü̃gü i ngẽma naxchicüna̱xãgüwe rüxĩxü̃ rü naechitamare namaxẽ, rü taxuxü̃ma i cua̱x nüxü̃́ nangẽxmagü. Rü ngẽma naxchicüna̱xãgü i naiwa naxügüxü̃ rü taxuxü̃ma nanangúexẽxẽ.

Yeremía 8:19

Rü ngẽma nax aixta naxüexü̃ i chorü duü̃xü̃gü rü guxü̃ i tachixü̃anegu nüxü̃ taxĩnü. Rü ñanagürügü: —Marü tama Chióü̃wa nangẽxma ya Cori ya Tupana. Rü marü nataxuma ya yima tachixü̃anearü ãẽ̱xgacü —ñanagürügü. Rü Cori ya Tupana nanangãxü̃ rü ñanagürü: —¿Tü̱xcüü̃ choxü̃ pinuxẽxẽ namaxã nax nüxü̃ picua̱xüü̃güxü̃ i ngẽma naxchicüna̱xãgü i tupananetagü i taxuwama mexü̃ i to i nachixü̃anearü ixĩxü̃? —ñanagürü.

Ichaía 46:7

Rü nügüãtügu nayangegü i ngẽma naxchicüna̱xã rü wüxi i nachicagu nayaxǘgü, rü ngéma nangẽxmaecha rü taguma nixũgachi. Rü woo aita naxca̱x naxüegu rü ngü̃xẽẽca̱x nüxna nacagügu i ngẽma naxchicüna̱xã i namaxã natupanaã̱xgüxü̃, natürü tama nanangãxü̃ rü tama ínananguxü̃xẽxẽ nawa i norü guxchaxü̃gü.

Ichaía 45:20

Rü nüma ya Tupana rü ñanagürü ta: —Guxü̃ma i pema i togü i nachixü̃anewa íyaxügüxe rü name nixĩ nax pexĩtaque̱xexü̃ rü nua pexĩxü̃. Rü pema i naxchicüna̱xãgü i nainaxca̱x pingegüxü̃ rü nüxü̃ picua̱xüü̃güxü̃ rü tama peãẽxü̃ pecua̱x, erü ngẽma naxchicüna̱xãgü rü taxũtáma pexü̃ ínapoxü̃.

Ichaía 45:18

Rü choma ya Tupana ya naxücü i daxũguxü̃ i naane rü ñoma i naane rü guxü̃ma i nawa ngẽxmagüxü̃ nax tama nangeãcuxü̃ca̱x, rü ñachagürü: —Choma nixĩ ya Tupana chixĩxü̃ rü nataxuma i to.

Wiyaegü 124:8

Rü yimá Tupana ya daxũguxü̃ i naanearü üruxü̃ rü ñoma i naanearü üruxü̃, rü yimá nixĩ ya tüxü̃ rüngü̃xẽẽcü.

Wiyaegü 33:6

Rü nüma ga Cori ya Tupana rü norü dexamaxã nanaxü ga daxũguxü̃ i naane rü norü cue ñaxü̃maxã nanaxü ga guxü̃ma i ẽxtagü i ngéma ngẽxmagüxü̃.

Wenaxarü naxümatü ga Tupanaarü mugü 5:26

¿Rü ta̱xacürü yatü rü tama nayu ega nüxü̃ naxĩnügu i naga ya Tupana ya Maxü̃cü i ngẽxguma üxüemaarü ngãxü̃wa yadexaxgu ngẽma toma nüxü̃ taxĩnüexü̃rüxü̃?

Yema Cuáü̃ nüxü̃ dauxü̃ i yixcüra tá ngupetüxü̃chiga 22:9

Natürü ga nüma rü ñanagürü choxü̃: “¡Taxṹ i ngẽma cuxüxü̃! Erü choma rü ta Tupanaarü duü̃xü̃ chixĩ, ngẽxgumarüxü̃ i cuma rü cuenexẽgü i Tupanaarü orexü̃ ixugüxü̃ rü guxü̃ma i ngẽma duü̃xü̃gü i naga ĩnüexü̃ i ngẽma ore i ñaa poperagu ümatüxü̃. Rü name nixĩ i Tupanaxü̃ quicua̱xüxü̃”, ñanagürü.

Yema Cuáü̃ nüxü̃ dauxü̃ i yixcüra tá ngupetüxü̃chiga 19:19

Rü ñu̱xũchi nüxü̃ chadau ga yema nüxíraxü̃xü̃ ga ngo̱xo rü guxü̃ma ga nachixü̃anegüarü ãẽ̱xgacügü ga norü churaragümaxã yéma ngutaque̱xegüxü̃ nax nügü nada̱i̱xü̃ca̱x namaxã ya yimá cowaruétügu ixũcü rü norü churaragü.

Yema Cuáü̃ nüxü̃ dauxü̃ i yixcüra tá ngupetüxü̃chiga 19:10

Rü choma rü yema orearü ngeruü̃pe̱xegu chacaxã́pü̱xü nax nüxü̃ chicua̱xüü̃xü̃ca̱x. Natürü ga nüma rü ñanagürü choxü̃: “¡Taxṹ i ngẽma cuxüxü̃! Erü choma rü ta Tupanaarü duü̃xü̃ chixĩ, ngẽxgumarüxü̃ i cuma rü cuenexẽgü i mea Ngechuchuarü ore ixõgüxü̃rüxü̃ chixĩ. Rü ngẽma Ngechuchuarü ore rü yematama ore nixĩ ga Tupanaarü orearü uruü̃gü nüxü̃ ixugüexü̃ ga yexguma Tupanaãxẽ ya Üünecü nawa idexaxgu. Rü name nixĩ i Tupanaxü̃ quicua̱xüxü̃”, ñanagürü.

Ngechuchuarü ngúexü̃gü ga yamugüxü̃arü puracüchiga 27:25

Rü ngẽmaca̱x, Pa Chomücügüx, ¡rü petaãẽgü! erü choma rü aixcüma Tupanaaxü̃́ chayaxõ, rü aixcüma tá nixĩ i ngẽmaãcü tá nangupetüxü̃ ngẽxgumarüxü̃ i ngẽma daxũcüã̱x chomaxã nüxü̃ ixuxü̃.

Ngechuchuarü ngúexü̃gü ga yamugüxü̃arü puracüchiga 27:21

Rü yexguma marü muxü̃ma ga ngunexü̃ tingegügu ga tama nax tachibüexü̃, rü yexguma guxü̃ma ga yema duü̃xü̃gütanüwa inachi ga Pauru, rü ñanagürü: —Narümemae chi nixĩ, Pa Chomücügüx, nax chauga pexĩnüexü̃, rü taxũchima nax ixĩãchixü̃ ga Crétawa, rü taxũchima ñu̱xmarüxü̃ tüxü̃ naxüpetü i ñaa ãũcümaxü̃ rü taxuxü̃chima i chixexü̃ tüxü̃ nangupetü.

Ngechuchuarü ngúexü̃gü ga yamugüxü̃arü puracüchiga 27:10

—Pa Chomücügüx, nüxü̃ chacua̱x i ngẽxguma chi ixĩãmagu, rü tá naxãũcüma. Rü daa wapuru rü tá inayarütaxu namaxã i guxü̃ma i naãcu. Rü ngürüãchi i yixema rü tá ta tayue —ñanagürü.

Ngechuchuarü ngúexü̃gü ga yamugüxü̃arü puracüchiga 16:30

Rü yexguma ĩã̱xtüwa Pauruxü̃ rü Chíraxü̃ nagagü, rü ñanagürü nüxü̃: —Pa Corigüx, ¿Ta̱xacü tá chaxüxü̃ i choma nax choxü̃́ nangẽxmaxü̃ca̱x i maxü̃ i taguma gúxü̃? —ñanagürü.

Ngechuchuarü ngúexü̃gü ga yamugüxü̃arü puracüchiga 13:32

Rü ngẽmaãcü i toma rü núma tangugü nax pemaxã nüxü̃ tixuxü̃ca̱x i ngẽma ore i aixcüma mexü̃. Rü dücax, rü yema uneta ga nũxcümaü̃güxü̃ ga tórü o̱xigümaxã nüxü̃ yaxuxü̃ ga Tupana, rü taxca̱x nayanguxẽxẽ ga yexguma Ngechuchuxü̃ wena namaxẽẽgu. Rü wiyaegüpanewa i norü taxre i capíturuwa rü ngẽmachiga nüxü̃ nixu i ngẽxguma: “Cuma nixĩ i Chaune, rü choma nixĩ i Cunatü chixĩxü̃”, ñaxgu.

Ngechuchuarü ngúexü̃gü ga yamugüxü̃arü puracüchiga 7:26

Rü moxü̃ãcü ga Moiché rü nüxü̃ nadau ga to ga taxre ga Iraétanüxü̃ ga nügü yexma daixü̃, rü nüxna nachogüchaü̃. Rü ñanagürü nüxü̃: “Pema rü pegütanüxü̃ pixĩgü. ¿Rü tü̱xcüü̃ pegü pedai i pemax?” ñanagürü.

Ore i mexü̃ ga Cuáü̃ ümatüxü̃ 5:26

Nüma ya Nanatü rü nüxü̃́ nangẽxma i pora nax namaxẽxẽẽãxü̃ca̱x i duü̃xü̃gü. Rü ngẽma pora rü Nanena nanaxã nax nüma rü ta duü̃xü̃güxü̃ namaxẽxẽxẽxü̃ca̱x.

Amúx 2:4

Rü ñanagürü ta ya Cori ya Tupana: —Ngẽma Yudáanecüã̱xgü rü poraãcü chixexü̃ naxügü rü ngẽmaca̱x taxũtáma íchayachaxãchi nax chanapoxcuexü̃. Yerü nüma rü tama nanayaugü ga yema chorü ucu̱xẽgü, rü ñu̱xũchi tama naga naxĩnüe ga yema chorü mugü. Rü nüxü̃ nicua̱xüü̃gü ga yematama naxchicüna̱xãgü ga norü o̱xigü nüxü̃ icua̱xüü̃güxü̃.

Danié 6:26

Rü pemaxã nüxü̃ chixu rü pexü̃ chamu rü guxü̃ma i ñaa naane i chomax namaxã ichacuáxü̃wa rü chanaxwa̱xe i nüxü̃ pengechaü̃ rü nüxü̃ picua̱xüü̃gü ya yimá Daniéarü Tupana. Erü yimá Tupana rü maxü̃cü nixĩ, rü guxü̃guma nangẽxmaecha. Rü ngẽma nüma nax ãẽ̱xgacü yixĩxü̃ rü taguma inarüxo, rü ngẽma norü pora rü taguma inayagu̱x.

Norü taxre ga popera ga ãẽ̱xgacügüchiga 19:16

¡Choxü̃ nadawenü, Pa Corix, rü choxü̃́ irüxĩnü! ¡Rü nüxü̃ naxĩnü i ngẽma ore i ngẽma ãẽ̱xgacü i Chenáqueri nua chauxü̃tawa muxü̃! Rü guxü̃ma i ngẽma norü oregüwa rü cumaxã naguxchiga, Pa Tupana Nax Cumaxü̃xü̃x.

Norü taxre ga popera ga ãẽ̱xgacügüchiga 19:4

Chierüx nüma ya Cori ya curü Tupana rü marü nüxü̃ naxĩnügu i ngẽma ore i nüxü̃ yaxuxü̃ i ngẽma Achíriaanearü churaragüeru nax namaxã naguxchigaxü̃. Rü chierüna napoxcuãgu ya curü Cori ya Tupana naxca̱x i ngẽma ore i nümatama nüxü̃ naxĩnüxü̃. Rü ngẽmaca̱x chanaxwa̱xe i toxca̱x cuyumüxẽ nax ítayaxǘgüxü̃ —ñanagürü ga ãẽ̱xgacü.

Nüxíraxü̃xü̃ ga popera ga ãẽ̱xgacügüchiga 16:26

Yerü yematama ga chixexü̃gü ga Nabáx nane ga Yeruboáü̃ üxü̃tama naxü, rü yemamaxã Iraétanüxü̃xü̃ chixexü̃gu nayixẽxẽ. Yerü tupananetachicüna̱xãgüxü̃ nicua̱xüü̃gü rü yemaacü Cori ya Iraéanearü Tupanaxü̃ nanuxẽẽgü.

Nüxíraxü̃xü̃ ga popera ga ãẽ̱xgacügüchiga 16:13

Rü yemaacü Tupana nanapoxcu nagagu ga guxü̃ma ga yema chixexü̃ ga Baachá rü nane ga Erá üxü̃ ga yexguma Iraéanecüã̱xgüxü̃ chixexü̃gu nayixẽẽgu rü Cori ya Iraéarü Tupanaxü̃ nanuxẽẽgügu namaxã nax tupananetachicüna̱xãxü̃ yacua̱xüü̃güxü̃.

1 Chamué 17:36

Rü choma i curü duü̃xü̃, Pa Ãẽ̱xgacüx, rü woo leóü̃ yixĩxgu rüe̱xna osu i düraxü̃ yixĩxgu rü chayama̱x. Rü ñaa Firitéu i tama Tupanaxü̃ cuáxü̃ rü ngẽmaãcü tá namaxã chanaxü, erü Tupana ya Maxü̃cüarü churaragüxü̃ naxãũxũne.

1 Chamué 17:26

Rü yexguma ga Dabí rü yema naxü̃tawa yexmagüxü̃na naca rü ñanagürü: —¿Ta̱xacümaxã tá nüxü̃́ naxãtanü ya yimá yatü ya ñaa Firitéuxü̃ imácü rü naxoxẽẽcü nax ngẽma Iraéanecüã̱xgümaxã ta̱xacü nax yaxugüxü̃? ¿Erü ta̱xacü nixĩ i ñaa Firitéu i tama Tupanaxü̃ cuáxü̃ rü ngẽmaca̱x Tupana ya Maxü̃cüarü churaragüxü̃ naxãũxũnexü̃? —ñanagürü.

Yochué 3:10

Rü ngẽmawa tá nixĩ i nüxü̃ picuáxü̃ ya Tupana ya Maxü̃cü rü petanüwa nax nangẽxmaxü̃. Rü nüma ya Cori rü tá ínanawoxü̃ i Canaáü̃tanüxü̃, rü Itítanüxü̃, rü Ebéutanüxü̃, rü Ferechéutanüxü̃, rü Guerguechéutanüxü̃, rü Amoréutanüxü̃ rü Yebuchéutanüxü̃ nawa i ngẽma naane nax pema nawa pingugüxü̃ca̱x.

Naanearü ügüchiga 41:16

Rü yexguma ga Yúche rü nanangãxü̃ rü ñanagürü: —Pa Chorü Ãẽ̱xgacüx, ngẽma rü tama chowa nangẽxma, natürü Tupana tá nixĩ ya cuxca̱x nango̱xẽẽcü —ñanagürü.

Wiyaegü 115:15

Rü nüma ya Cori ya Tupana i daxũguxü̃ i naane rü ñoma i naanearü üruxü̃ rü aixcüma tá pexna nanaxã i norü ngü̃xẽxẽ.

Yeremía 51:15

Nüma ya Cori ya Tupana rü norü poramaxã nanaxü ga ñoma ga naane. Rü norü cua̱xmaxã wüxiwa nanangexmaxẽxẽ. Rü yexgumarüxü̃ ta norü cua̱xmaxã nayangeechi ga daxũguxü̃ ga naane.

Yema Cuáü̃ nüxü̃ dauxü̃ i yixcüra tá ngupetüxü̃chiga 4:11

Rü ñanagürügü: “Pa Torü Cori, Pa Torü Tupanax, cuxü̃ nixĩ i namexü̃ nax ticua̱xüü̃güxü̃ rü cuxü̃ tataxẽẽgüxü̃, yerü cuma nixĩ ga cunaxüxü̃ ga guxü̃ma, rü curü ngúchaü̃gagu nixĩ i ñu̱xma nangẽxmagüxü̃ i ngẽma cuxüxü̃”, ñanagürügü.