Ngechuchuarü ngúexü̃gü ga yamugüxü̃arü puracüchiga 10:39 - Tupanaarü Ore

³⁹ Rü toma nixĩ ga nüxü̃ tadaugüxü̃ rü nüxü̃ tixuchigaxü̃ i guxü̃ma ga yema naxüxü̃ ga Ngechuchu ga Yudéaanewa rü Yerucharéü̃arü ĩanewa. Rü yemawena rü curuchawa nayapotagü rü nayama̱xgü.

Ngechuchuarü ngúexü̃gü ga yamugüxü̃arü puracüchiga 10:39 Referans Kwoze

Ore i mexü̃ ga Luca ümatüxü̃ 24:48

Rü ñu̱xma rü pema tá nixĩ i duü̃xü̃gümaxã nüxü̃ pixugüxü̃ ga yema chauxü̃tawa nüxü̃ pedaugüxü̃ rü nüxü̃ pexĩnüexü̃.

Ngechuchuarü ngúexü̃gü ga yamugüxü̃arü puracüchiga 10:41

Natürü tama guxü̃ ga duü̃xü̃güca̱x nango̱x. Rü toxca̱xicatama nango̱x ga toma ga ü̃pamama Tupana toxü̃ dexe nax nüxü̃ tixuxü̃ca̱x i Ngechuchuchiga. Rü yexguma marü yuwa ínadaxguwena rü namaxã tachibüe rü namaxã taxaxegü.

Ngechuchuarü ngúexü̃gü ga yamugüxü̃arü puracüchiga 1:8

Natürü ngẽxguma pexna nanguxgu i Tupanaãxẽ ya Üünecü, rü tá pexü̃ naporaexẽxẽ. Rü tá ípechoxü̃ nax nüxü̃ peyarüxugüexü̃ca̱x i chauchiga i Yerucharéü̃wa, rü guxü̃ma i Yudéaanewa, rü Chamáriaanewa, rü ñu̱xmatáta guxü̃ i naanewa nangu —ñanagürü.

Nüxíraxü̃xü̃ ga popera ga Pedru ümatüxü̃ 2:24

Rü nümatama ga Cristu rü nügüxü̃negu nayange ga tórü pecadugü ga yexguma curuchagu nayu̱xgu. Rü yemaacü nanaxü nax nüxü̃ rüxoexü̃ca̱x i tórü chixexü̃ rü naxca̱xicatama imaxẽxü̃ca̱x. Nüma rü pexca̱x nanapi̱x nax yemaacü pexü̃ nameexẽẽxü̃ca̱x.

Ngechuchuarü ngúexü̃gü ga yamugüxü̃arü puracüchiga 2:32

Rü ñu̱xma ya Tupana rü marü wena nanamaxẽxẽ ga gumá Ngechuchu, rü guxãma ga toma rü nüxü̃ tadaugü nax wena namaxü̃xü̃, rü ngẽmaca̱x pemaxã nüxü̃ tixuchiga.

Gálatas 3:13

Natürü ga Cristu rü nawa tüxü̃ ínanguxü̃xẽxẽ ga yema mugü ga chixexü̃gu tüxü̃ yixẽẽxü̃. Rü nüma ga Cristu rü chixexü̃wa nügü nayexmaxẽxẽ ga yexguma curuchagu nayu̱xgu. Erü Tupanaarü ore i ümatüxü̃wa, rü ñanagürü: “Rü guxãma ya yíxema wüxi i naiwa tüxü̃ natuxẽẽgüãcüma yuxe, rü chixexü̃wa tangexma”, ñanagürü.

Ngechuchuarü ngúexü̃gü ga yamugüxü̃arü puracüchiga 13:31

Rü nüma ga Ngechuchu rü muxü̃ma ga ngunexü̃ naxca̱x nango̱x ga yema duü̃xü̃gü ga nawe rüxĩxü̃ ga yexguma Gariréaanewa ne naxũxgu rü Yerucharéü̃wa naxũxgu. Rü ngẽma duü̃xü̃gü nixĩ i ñu̱xma i guxü̃ i duü̃xü̃gümaxã nüxü̃ ixugüxü̃ i nachiga.

Ngechuchuarü ngúexü̃gü ga yamugüxü̃arü puracüchiga 7:52

Rü perü o̱xigü rü chixri namaxã inacua̱xgü ga guxü̃ma ga Tupanaarü orearü uruü̃gü. Rü nanadai ga yema orearü uruü̃gü ga nüxü̃ ixuchigagüxü̃ nax núma tá naxũxü̃ ga gumá mecü ya Ngechuchu. Rü yexguma ínanguxgu ga gumá Ngechuchu rü pema rü Pirátupe̱xewa ípenaxuaxü̃ rü peyama̱x.

Ngechuchuarü ngúexü̃gü ga yamugüxü̃arü puracüchiga 4:10

Rü ñu̱xma tá pemaxã nüxü̃ tixu nax nüxü̃ pecuáxü̃ca̱x i guxãma i pemax, rü nüxü̃ nacua̱xgüxü̃ca̱x i guxü̃ma i tatanüxü̃ i Iraétanüxü̃. Rü ñaa yatü i ñu̱xma pepe̱xewa ngẽxmaxü̃ rü Ngechuchu ya Cristu ya Nacharétucüã̱x nixĩ ga namexẽẽcü. Rü gumá nixĩ ga pema curuchawa peyapotacü rü peyuxẽẽcü. Natürü ga Tupana rü wena nanamaxẽxẽ.

Ore i mexü̃ ga Cuáü̃ ümatüxü̃ 15:27

Rü pema rü tá ta chauchigaxü̃ pixugüe, yerü noxri ichanaxügügu ga duü̃xü̃gümaxã nüxü̃ nax chixuxü̃ ga chorü ore, rü woetama marü chauxü̃tawa peyexmagü —ñanagürü ga Ngechuchu.