Abdía 1:7 - Tupanaarü Ore

⁷ Rü guxü̃ma ga yema nachixü̃anegü ga cuxü̃ ípoxü̃güchiréxü̃, rü ñu̱xma rü curü naanewa cuxü̃ ínata̱xüchigü. Rü woo ngẽma cumücügüxüchi ixĩgüxü̃ rü cumaxã narüxuanügü. Rü ngẽma cumücügü i nagu cuyaxõxü̃ rü guxchaxü̃ cuxca̱x ínanguxẽxẽ. ¡Pa Edóü̃x, cuma rü tama cua̱x cuxü̃́ nangẽxma! —ñanagürü ga Tupana.

Abdía 1:7 Referans Kwoze

Wiyaegü 41:9

Rü woo ga yema rümemaexü̃ ga chomücü ga nüxü̃́ chayaxõxü̃ rü wüxiwa chomaxã chibüchiréxü̃, rü ñu̱xma rü chomaxã narüxuanü.

Yeremía 49:7

Ñaa nixĩ i Cori ya Tupana ya Guxãétüwa Ngẽxmacüarü ore nachiga i Edóü̃ane. Rü ñanagürü: —Yima ĩane ya Temáü̃wa rü marü nataxuma i duü̃xü̃gü i aixcüma nüxü̃ cua̱xüchixü̃. Rü ngẽma nüxü̃ cuáxüra rü tama nüxü̃ nacua̱x i ta̱xacü tá naxügüxü̃. Rü Temáü̃wa nataxuma i duü̃xü̃gü i aixcüma nüxü̃ cuáxü̃ nax naxucu̱xẽãxü̃ i duü̃xü̃gü.

Yeremía 30:14

Rü yema nachixü̃anegü ga nüxü̃́ peyaxõgüxü̃ nax pexü̃ ínapoxü̃xü̃ca̱x rü pexü̃ inarüngü̃mae. Erü choma nixĩ i pexü̃ chapoxcuexü̃ ñoma wüxi i perü uanürüxü̃. Rü poraãcü pexü̃ chapoxcue nagagu ga yema muxũchixü̃ ga perü chixexü̃gü rü yema pecadugü ga taxucürüwa texé ixugüxü̃.

Ore i mexü̃ ga Cuáü̃ ümatüxü̃ 13:18

Rü tama guxãma i pechiga nixĩ i chidexaxü̃. Erü choma rü tüxü̃ chacua̱x rü texégü tixĩ ya yíxema tüxü̃ chidexechixe. Natürü tá ningu i ngẽma Tupanaarü ore i ümatüxü̃ i ñaxü̃: “Yíxema chomaxã chibüxe rü chomaxã tarüxuanü”, ñaxü̃.

Ochéa 13:13

Pa Iraéanecüã̱xgüx, pema rü tama peãẽxü̃ pecua̱x. Rü ñoma wüxi i buxü̃ i íxrachaü̃xü̃ rü chixri ixüxü̃rüxü̃ pixĩgü nax tama chauga pexĩnüechaü̃xü̃.

Auxexü̃chiga 1:19

Rü norü ngü̃xẽẽca̱x ítaca ga yema nachixü̃anegü ga noxri tomaxã taãẽgüxü̃, natürü nümagü rü tama toxü̃ narüngü̃xẽẽgü rü torü uanügüxü̃ nügü nixĩgüxẽxẽ. Rü yema torü chacherdótegü rü torü ãẽ̱xgacügü rü nu ne nanaxĩmare nax norü õnaca̱x nadaugüxü̃ca̱x nax yemaacü namaxẽxü̃ca̱x. Natürü düxwa daa ĩanegu nayue.

Yeremía 38:22

Rü guxü̃táma i ngẽma ngexü̃gü i cupatawa ngẽxmagüxü̃, Pa Yudáanearü Ãẽ̱xgacüx, rü tá nayagagü rü Babiróniaanecüã̱xarü churaragüarü ãẽ̱xgacügüna tá nanamugü. Rü nümagü i ngẽma ngexü̃gü rü norü ngechaü̃maxã tá cumaxã nanue rü ñanagürügü tá cuxü̃: “Dücax, Pa Ãẽ̱xgacüx, rü ngẽma curü ngü̃xẽẽruü̃gü i namaxã cuxãmücügüxü̃ rü cuxca̱x rü mexü̃ i cumücügü nixĩgü, natürü marü poraãcü cuxü̃ nawomüxẽẽgü rü ngẽmaãcü cuxü̃ narüyexeragü rü chixexü̃gu cuxü̃ nangu̱xẽẽgü rü tama aixcüma cuxü̃ ínapoxü̃gü” ñanagürügü tá cuxü̃ i ngẽma ngexü̃gü —ñanagürü.

Yeremía 20:10

Rü nüxü̃ chaxĩnü nax duü̃xü̃gü rü cugüãcüma chauchiga yadexagüxü̃. Rü guxü̃wama choxü̃ naxãxũnegüxü̃ i duü̃xü̃gü rü ngẽmaca̱x chamuü̃. Rü nügümaxã ñanagürügü: “Ngĩxã ítanaxuaxü̃gü”, ñanagürügü. Rü woo i ngẽma chomücügü rü ínanangu̱xẽẽgü nax ngürüãchi ta̱xacürü chixexü̃ chaxüxü̃. Rü ñanagürügü: “Rü nügü tátama nixĩ i chixexü̃gu nanguxẽẽxü̃, rü ngẽxguma i yixema rü tá tayayauxgü rü yixema inaxwa̱xexü̃ tá namaxã taxü”, ñanagürügü.

Yeremía 4:30

Rü pemax, Pa Yerucharéü̃cüã̱xgü i Ngechaü̃wa Ngẽxmaxe ¿ta̱xacüca̱x mexü̃ i naxchirugu picu̱xgü? ¿ta̱xacüca̱x úirunaxca̱x i nachagümaxã pegü penga̱xãẽgü? ¿rü ta̱xacüca̱x waxü̃maxã pegü pechachipa̱xetügü? Rü taxuwama name nax pegü penga̱xãẽgüxü̃, erü ngẽma nachixü̃anegü i Equítuane rü Achíriaane i naxü̃tawa ngü̃xẽẽca̱x ípecagüxü̃ rü marü pexü̃ nawomüxẽxẽ. Rü ngẽma naxca̱x nadaugüxü̃ nixĩ nax pexü̃ nada̱i̱xü̃.

Ichaía 27:11

Rü ngẽma naixchacüxügü rü ngẽxguma yapagügu rü ngẽma ngexü̃gü rü norü üxüxü̃ nanade nax ngẽmamaxã naxãxü̃xü̃güxü̃ca̱x. Rü ngẽma duü̃xü̃gü rü nataxuma i norü cua̱x rü ngẽmaca̱x ya Tupana ya norü ngo̱xẽẽruxü̃ rü taxũtáma yáxna namaxã naxĩnü rü bai tá i namaxã yaxãũxãchixü̃.

Wiyaegü 41:10

Natürü cumax, Pa Corix ¡rü cuxü̃́ changechaü̃tümüxü̃! ¡Rü choxü̃ írüdaxẽxẽ nax ngẽmaãcü chanapoxcuexü̃ca̱x i ngẽma chomaxã rüxuanügüxü̃!

Ochéa 7:11

Rü ngẽma Iraéanecüã̱xgü i Efraíü̃tanüxü̃ rü ñoma muxtucu i nu ne nañaxü̃ rü ngearü cuááxü̃rüxü̃ nixĩgü. Rü ngẽmaca̱x Equítuanecüã̱xgüna ngü̃xẽẽca̱x nacagü, rü ñu̱xũchi Achíriaanecüã̱xgüna ngü̃xẽẽca̱x nacagü.