Abdía 1:18 - Tupanaarü Ore

¹⁸ Rü ngẽma Acóbutaagü rü Yúchetaagü rü ñoma üxü rü üxüemarüxü̃ tá nixĩgü. Rü ngẽma Echaútaagü rü ñoma maxẽ ya pacürüxü̃ tá nixĩgü, rü tá ínanagu. Rü taxũtáma i Echaútaxa namaxü̃. Rü choma ya Cori ya Tupana rü marü ngẽmaãcü namaxã chanaxuegu —ñanagürü.

Abdía 1:18 Referans Kwoze

Chacaría 12:6

Rü ngẽma ngunexü̃gu rü Yudátanüxü̃arü ãẽ̱xgacügü rü ñoma wüxi i üxü i ya̱u̱xraxü̃rüxü̃ tá nixĩgü. Rü ñoma üxü i triguchapa̱xawa iyaa̱u̱xraxü̃rüxü̃ tá nixĩgü. Rü tá nanadai i guxü̃ma i ngẽma nachixü̃anegü i norü tügünecüwawa nüxna ngaixcamagüxü̃ rü ngẽma to̱xwecüwawa ngaixcamagüxü̃. Natürü ngẽma Yerucharéü̃cüã̱xgü rü wena tá norü ĩaneca̱x nawoegu rü nawa tá namaxẽ.

Ichaía 10:17

Rü nüma ya Cori ya Tupana ya üünecü ya Iraétanüxü̃arü omü ixĩcü, rü üxüemaü̃ tá nügü nixĩxẽxẽ. Rü wüxi i ngunexü̃gu rü tá ínanagu i ngẽma Achíriaanearü churaragü ñoma tuxunecü rü maxẽnecü iguxü̃rüxü̃.

Miquéa 5:8

Rü ngẽxguma i ngẽma Iraéanecüã̱xgü i íyaxügüxü̃ i ñu̱xma togü i nachixü̃anegütanüwa ngẽxmagüxü̃, rü tá ngẽma togü i nachixü̃anegüxü̃ narüporamae ñoma leóü̃ rü togü i naeü̃güxü̃ rüporamaexü̃rüxü̃. Rü ñoma leóü̃acü i carnérutanüwa ngẽxmaxü̃ rü carnérugüxü̃ íyauxü̃xü̃ rü taxúema tüxü̃ iñaxẽẽxü̃rüxü̃ tá nixĩgü i ngẽma Iraétanüxü̃.

Echequié 37:19

Rü ngẽxguma i cuma ¡rü ñaãcü namaxã nüxü̃ ixu! “Cori ya Tupana rü ñanagürü: ‘Choma rü tá cho̱xme̱xmaxã chanayaxu ya yima naixmena̱xã ya nagu naxümatüne Efraíü̃ i Namaxã Icuáxü̃ i Yúchetanüxü̃ rü Guxü̃ma i Iraétanüxü̃ i Efraíü̃waama Ügüxü̃, rü tá wüxigu chananu namaxã ya yima naixmena̱xã ya nagu naxümatüne Yudátanüxü̃ rü Ngẽma Iraétanüxü̃ i Yudáwaama Ügüxü̃. Rü ngẽmaãcü wüxitama ya naixmena̱xã tá nixĩ i cho̱xme̱xwa ngẽxmane.

Ichaía 5:24

Rü ngẽmaca̱x i pema rü ñoma maxẽ i paxü̃ i üxüemawa ixaxü̃rüxü̃ tá iperüxo. Rü ñoma nai i yixchúma̱xaxü̃rüxü̃ rü ñoma nachacu i waixü̃müchicute̱xe yanguxuchixü̃rüxü̃ tá pixĩgü. Erü nüxü̃ pexo i norü ngu̱xẽẽtaegü rü norü mugü ya Cori ya Iraéarü Tupana ya Üünecü ya Guxãétüwa Ngẽxmacü.

1 Corintios 3:12

Rü ñu̱xma nax Ngechuchu ya Cristu yixĩxü̃ ga inaxügücü i ngẽma puracü rü wüxichigü i yixema rü tanaxwa̱xe i taxuãxẽ nax mea yanguxẽẽxü̃ i ngẽma puracü i Cristu tüxna ãxü̃. Erü yíxema aixcüma mea naxǘxe i ngẽma puracü, rü ñoma wüxi i ĩpataarü üruxü̃ i úirumü rü diẽrumü rü nuta ya mexẽchicümaxã üpataxü̃rüxü̃ tixĩ. Natürü yíxema tama aixcüma mea naxǘxe i ngẽma puracü rü ñoma ĩpataarü üruxü̃ i chixexü̃ i nai rü naixatü rü dexnemena̱xãmaxã üpataxü̃rüxü̃ tixĩ.

Naúü̃ 1:10

Rü pema i bínumaxã ngaxexe rü ñoma tuxu i wüxigu inutaque̱xexü̃rüxü̃ pixĩgü, rü ñoma maxẽ i pagüxü̃rüxü̃ tá pixae.

Abdía 1:16

Rü ñanagürü ta: —Pema, Pa Iraétanüxü̃x, rü chorü ma̱xpǘne ga chopata nawa yexmanewa rü poraãcü ngúxü̃ pingegü. Rü ngẽxgumarüxü̃ tá ta i ngẽma to i nachixü̃anegü rü ngúxü̃ ningegü rü ngẽmaãcü tá inayarüxogü. Rü ñoma taguma ñoma i naanewa nax nangóexü̃rüxü̃ tá nixĩgü.

Amúx 6:6

Rü taxü̃ i pexpáxü̃wa peyaxaxgü ya bínu. Rü pumara i yixichixü̃maxã pegü peyixemagü. Natürü tama nagu perüxĩnüe i ngẽma pechixü̃ane nax chixexü̃gu nanguxü̃.

Amúx 5:15

¡Rü naxchi pexaie i ngẽma chixexü̃! ¡Rü nüxü̃ pengechaxü̃ i ngẽma mexü̃! ¡Rü aixcüma mea penamexẽxẽ i tümaarü guxchaxü̃ i ngẽxguma texé pepe̱xewa tayamexẽxẽchaü̃gu! Rü bexmana ngẽmaãcü tá nixĩ ya Cori ya Tupana ya Guxãétüwa Ngẽxmacü rü tümamaxã yaxãũxãchixü̃ ya yíxema Iraétanüxü̃ ya íyaxügüxe.

Joel 2:5

Rü ngẽma naga i ngẽxguma máxpü̱xanexü̃wa ínaxüãchigu rü ñoma carugü i daiwexü̃ ãgatanügurüxü̃ nixĩ i naga. Rü ñoma naixatügü i ngẽxguma üxüemawa yawocuxgu rü ipechaxü̃rüxü̃ nixĩ ga naga. Rü ñoma wüxitücumü i churaragü i poraexü̃ i wüxigu ichimaxü̃rüxü̃ nixĩgü.

Echequié 37:16

—Pa Yatüx, ¡wüxi ya naixmena̱xã nayaxu, rü yimámena̱xãgu naxümatü Yudátanüxü̃ rü ngẽma Iraétanüxü̃ i Yudáwaama ügüxü̃! ¡Rü ngẽmawena rü nai ya naixmena̱xã nayaxu rü yimámena̱xãgu naxümatü: Efraíü̃ i Namaxã Icuáxü̃ i Yúchetanüxü̃ rü Guxü̃ma i Ngẽma Iraétanüxü̃ i Efraíü̃waama Ügüxü̃!

Ichaía 47:14

Natürü ngẽma ẽxü̃guxü̃xü̃ cua̱xgüxü̃ rü ñoma maxẽ ya ipagücü rü ixaecürüxü̃ tá nixĩgü, rü taxũtáma ngẽma üxüemawa nügü ínapoxü̃gü. Erü ngẽma üxüema rü taxũtáma ngẽma íxramarexü̃ i üxüema i yigü nawa inaixü̃xü̃rüxü̃ tá nixĩ.

Ichaía 31:9

Rü ngẽma norü ãẽ̱xgacü rü muü̃maxã tá niña, rü ngẽma norü churaragüerugü rü norü wonerana tá ngéma nibuxmü. Rü ngẽma nixĩ i nüxü̃ yaxuxü̃ ya Cori ya Tupana nax Yerucharéü̃wa nüxü̃́ nangẽxmaxü̃ ya wüxi ya taxü̃ne ya üxü nax namaxã napoxcuãxü̃ca̱x i norü uanügü.

2 Chamué 19:20

Choma nüxü̃ chacua̱x rü poraãcüma nachixe ga yema chaxüxü̃. Rü ngẽmaca̱x i choma rü guxü̃ma i Yúchetanüxü̃tanüwa chaxíra ichaxũãchi nax cuxü̃ íchayadauxü̃ca̱x, Pa Ãẽ̱xgacüx —ñanagürü.

Ichaía 9:18

Rü ngẽma chixexü̃ rü nanachixexẽxẽ i duü̃xü̃gü ñoma üxüema i paxa tuxunecügu rü maxẽnecügu nangexẽẽxü̃rüxü̃. Rü ñu̱xũchi naixnecüwa nangexẽẽxü̃rüxü̃ rü naema rü ñoma buanecü ya íxãũxẽmacü ya ngurinarüxü̃ nixĩ i ngẽma chixexü̃.

Ichaía 9:19

Rü yimá Cori ya Tupana ya Guxãétüwa Ngẽxmacüarü nugagu nixĩ i yaxãxü̃ i Iraétanüxü̃arü naane, rü ngẽma üxüema nixĩ i yaguxü̃ ya ĩane. Rü duü̃xü̃gü rü taxũtáma nügüenexẽmaxã nügü nangechaü̃gü. Rü taiyamaxã tá nanaxĩ̱xãchiãẽgü. Rü yíxema norü tügünecüwagu ãchixü̃xẽ rü tá tümawemüca̱x nangĩ̱x rü noxtacüma nayaga, natürü tá nataiyaama. Rü ngẽma to rü tá yíxema norü to̱xwecüwagu ãchiü̃xẽ rü tá tüxna nanapu i tümaarü õna, natürü taxũtáma nüxü̃́ ningu. Rü duü̃xü̃gü rü düxwa tá naxacügümaxã nixãwemü.

Yeremía 11:23

Nümagü rü tá bai i wüxi ínayaxü. Erü tá ínangu i ngunexü̃ i nagu chapoxcuexü̃ i ngẽma Anatóarü duü̃xü̃güx. Rü naxca̱x tá íchananguxẽxẽ i wüxi i taxü̃ i guxchaxü̃ i ãũcümaxü̃ —ñanagürü.

Amúx 1:8

Rü tá chayama̱x ya ĩane ya Adúxarü ãẽ̱xgacü, rü ngẽxgumarüxü̃ tá ta chayama̱x ya ĩane ya Acharóü̃arü ãẽ̱xgacü. Rü guxü̃ i chorü poramaxã tá ichayanaxoxẽxẽ ya yima Ecróü̃. Rü taxuxü̃táma i Firitéu íchayaxüxẽxẽ nax chanadaixü̃ —ñanagürü ya Cori ya Tupana.

Maraquía 4:1

Rü nüma ya Cori ya Tupana ya Guxãétüwa Ngẽxmacü rü ñanagürü: —Rü ningaica i ngẽma ngunexü̃ i ãũcümaxü̃ i nagu tá chanapoxcuexü̃ i ngẽma chixexü̃ ügüxü̃ ñoma üxüemawa yaxaexü̃rüxü̃. Rü guxü̃ma i ngẽma duü̃xü̃gü i nügü írütagüxü̃ rü chixexü̃ ügüxü̃ rü ñoma maxẽ i pacü i üxüxétüwa yata̱xcuchichapa̱xacürüxü̃ tá nixĩgü. Rü ngẽma ngunexü̃gu rü guxü̃táma nixae rü taxuxü̃táma ínayaxügü.

Ínachoxü̃xü̃chiga 5:12

Rü nüma ga yema Iraétanüxü̃, rü guxü̃ma ga Equítuanegu nügü ninu nax ĩchicügu maxẽne nadaugüxü̃ca̱x norü ladriyueü̃.