2 Corintios 4:8 - Tupanaarü Ore

⁸ Rü guxü̃wama toxü̃́ nangẽxma i guxchaxü̃gü, natürü taguma nüxü̃ tarüchau i ñaa puracü. Rü woo poraãcü taxoegaãẽgügu, natürü taguma ítanange̱x i ñaa puracü.

2 Corintios 4:8 Referans Kwoze

2 Corintios 12:10

Rü ngẽma nax Cristuxü̃ nax changechaü̃xü̃gagu nixĩ i yáxna namaxã chaxĩnüxü̃ ega woo chaturagu rü woo ta̱xacü chomaxã yaxugüegu i duü̃xü̃gü. Rü woo choxü̃́ nataxuxgu i chorü ngẽmaxü̃gü, rü woo duü̃xü̃gü rü chowe yangexü̃tanügu, rü woo guxchaxü̃gü choxü̃́ ngẽxmagu rü Cristuca̱x rü yáxna namaxã chaxĩnü i guxü̃ma i ngẽma. Erü ngẽxguma chaturagu, rü ngẽxguma nixĩ i yexeraãcü Cristu choxü̃ poraxẽẽxü̃.

2 Corintios 7:5

Rü yexguma Machedóniaanewa tangugügucürüwa rü taguma itarüngügü. Yerü guxü̃wama ga ngexta ítaxĩxü̃wa rü nüxü̃ itayangau ga guxchaxü̃gü. Rü duü̃xü̃gü rü poraãcü toxü̃́ nanaguxchaxẽxẽ rü yemaca̱x poraãcü taxoegaãẽgü.

Wiyaegü 37:33

Natürü nüma ya Cori ya Tupana rü tá ínanapoxü̃ ya yimá yatü ya mecü nax tama ngẽma chixexü̃ i duü̃xü̃güme̱xẽgu nanguxü̃ca̱x. Rü tá nüxna nadau nax tama yanaguãchixẽẽgüaxü̃ca̱x i ta̱xacü rü chixexü̃.

Ore i mexü̃ ga Cuáü̃ ümatüxü̃ 14:18

Rü taxũtáma núma pexü̃ chawogümare i chomax, erü wena táxarü pexca̱x chataegu, nax petanüwa changexmaxü̃ca̱x.

1 Corintios 10:13

Rü taguma pexca̱x ínangu i ta̱xacürü ngúchaü̃ i chixexü̃ i taxucürüwama duü̃xü̃ yáxna namaxã ĩnüxü̃. Rü name nixĩ i Tupanaaxü̃́ peyaxõ erü nüma rü taxũtáma nawa pexü̃ nawogü i ngúchaü̃gü i taxucürüwama yáxna namaxã pexĩnüexü̃. Natürü ngẽxguma tá ngúchaü̃gü i chixexü̃ pexca̱x ínguxgu, rü nüma rü tá pexü̃ ínapoxü̃ nax tama nagu peyixü̃ca̱x.

2 Corintios 6:4

Rü guxü̃guma duü̃xü̃güxü̃ nüxü̃ tadauxẽxẽ nax aixcüma Tupanaarü duü̃xü̃gü tixĩgüxü̃. Rü ngẽmaca̱x yáxna namaxã taxĩnüe i ngẽxguma woo ngúxü̃ tingegügu, rüe̱xna ta̱xacü toxü̃́ taxu̱xgu, rüe̱xna ta̱xacürü guxchaxü̃ toxü̃́ ngẽxmagu, rüe̱xna toxü̃ yacua̱i̱xgügu, rüe̱xna toxü̃ napoxcuegu, rü ẽ̱xna tomaxã nanuegu nax toxü̃ nada̱i̱xü̃ca̱x. Rü poraãcü tapuracüe, rü ñuxguacü rü tama tapee, rü ñuxguacü rü taiya toxü̃́ nangu̱x. Natürü yáxna namaxã taxĩnüe i guxü̃ma i ngẽma.

Ucu̱xẽgüchiga 14:26

Ngẽxguma Cori ya Tupanaga ixĩnüegu rü tüxü̃ ínapoxü̃, rü ngẽxgumarüxü̃ ta ínanapoxü̃ i taxacügü.

1 Chamué 28:15

Rü yexguma ga Chamué rü ñanagürü: —¿Ta̱xacüca̱x i choxü̃ cuchixewexü̃ rü nua choxü̃ cuxũxẽxẽxü̃? —ñanagürü. Rü nüma ga Chaú nanangãxü̃ rü ñanagürü: —Poraãcü chaxoegaãxẽ, erü nüma i Firitéugü rü toxca̱x ínayaxüãchi, natürü nüma ya Tupana rü marü choxna nixũgachi rü tama choxü̃ nacuáxchaü̃, rü tama choxü̃ nangãxü̃ga i orearü uruü̃güwa rüe̱xna chaunegüwa. Rü ngẽmaca̱x nixĩ i cuxca̱x changemaxü̃ nax chomaxã nüxü̃ quixuxü̃ca̱x nax ta̱xacü tá chaxüxü̃ —ñanagürü.

1 Chamué 30:6

Rü nüma ga Dabí rü naxoegaãẽ yerü ga yema norü duü̃xü̃gü rü nagu narüxĩnüe nax Dabíxü̃ nutamaxã ínamuxũchigüxü̃ yerü poraãcüma naxacügüca̱x nanue. Natürü nüma ga Dabí rü Cori ya Tupanana narüyoe rü nayaxõ nax Tupana tá nüxü̃ rüngü̃xẽẽxü̃.

Ucu̱xẽgüchiga 18:10

Naéga ya Cori ya Tupana, rü wüxi i poxü̃ruxü̃ i poraxü̃ nixĩ. Rü ngẽmaca̱x ngẽma mexü̃gu maxü̃xü̃ i duü̃xü̃, rü naxca̱x nixũ nax naxü̃tagu nügü yanacúxü̃ca̱x.

Wiyaegü 129:2

Rü aixcüma muxü̃ma ga ngúxü̃wa chaxüpetü noxritama changextü̱xügu, natürü taxuxü̃ma choxü̃ narüporamae i chorü uanügü.

Ichaía 40:31

Natürü yíxema aixcüma Cori ya Tupanaaxü̃́ yaxṍxe rü guxü̃gutáma tüxü̃́ ningexwaca̱xü̃chigü i tümaarü pora. Rü ñoma ĩyügürüxü̃ rü tá taporaama. Rü woo ngẽxguma poraãcü itañaãchigu rü taxũtáma nagu̱x i tümaarü pora. Rü woo ngẽxguma yáxü̃wa taxũxgu, rü taxũtáma tipa.

Abacú 3:17

Rü woo i ngẽma igunecü rü yangechacugu, rü woo i ngẽma úba rü ngẽma oribu rü nangearü õõ̱xgu, rü woo ngẽma naanegüwa rü nataxuxguma i ori̱x i buxgüxü̃, rü woo nayuegu i ngẽma carnérugü i nachitaxü̃wa, rü woo marü nataxuxguma i wocagü i naxpüü̃wa, natürü i choma rü taãẽãcüma ta nüxü̃ chicua̱xüxü̃ ya Cori ya Tupana ya chorü maxẽẽruxü̃.

2 Corintios 6:12

Rü toma rü tama pexü̃ taxoe, natürü pemawaxi nixĩ i tama toxü̃ pengechaxü̃güxü̃.

Gálatas 4:20

Rü chierü petanüwa changexmagu i ñu̱xma nax mea pemaxã chidexaxü̃ca̱x. Erü ñu̱xma nax pexna chayáxü̃guxü̃ rü tama nüxü̃ chacua̱x nax ñuxãcü tá pexü̃ charüngü̃xẽxẽxü̃.