2 Corintios 3:1 - Tupanaarü Ore

¹ Rü ñu̱xma nax pemaxã nüxü̃ tixuxü̃ nax aixcüma Tupana yixĩxü̃ ga toxü̃ mucü, rü bexmana tá nagu perüxĩnüe nax wenaxarü togüétüwa tidexagüxü̃. ¿Ẽ̱xna penaxwa̱xe nax wüxi i popera i cua̱xruxü̃ pexü̃ tawéxü̃ nax nawa nüxü̃ pecuáxü̃ca̱x nax aixcüma Tupanaarü orearü uruü̃gü tixĩgüxü̃? ¿Rü ẽ̱xna penaxwa̱xe nax pexü̃tawa naxca̱x ítaca̱xaxü̃ i poperagü nax ngẽmawa duü̃xü̃gü toxü̃ cuáxü̃ca̱x, naxrüxü̃ i ngẽma togü?

2 Corintios 3:1 Referans Kwoze

2 Corintios 12:11

Bexmana ñoma wüxi i ãũãẽxü̃rüxü̃ chidexa, natürü pegagutama nixĩ i düxwa ngẽmaãcü chaugüétüwa chidexaxü̃. Natürü pema chi nixĩ ga chauétüwa pidexagüxü̃ rü tama i chomax. Rü woo taxuwama chame i chomax, natürü taxuwama choxü̃ narüyexeragü i ngẽma orearü uruü̃güneta i nawe perüxĩxü̃.

2 Corintios 10:12

Toma rü tama tanaxwa̱xe i togü namaxã tawüxiguxẽxẽ rü ẽ̱xna nagu togü tangugü i ngẽma duü̃xü̃gü i nügütama icua̱xüü̃güxü̃. Nümagü rü nügütama nawomüxẽẽgü, erü nügügutama nügü nangugü rü nügümaxã nügü nawüxiguxẽxẽ.

2 Corintios 5:12

Rü tama tanaxwa̱xe i wenaxarü pepe̱xewa togüétüwa tidexagü, natürü pexü̃ tarüngü̃xẽẽchaü̃ nax pexü̃́ nangẽxmaxü̃ca̱x nax ta̱xacüca̱x tomaxã petaãẽgüxü̃ rü ngẽmaãcü penangãxü̃xü̃ i ngẽma duü̃xü̃gü i pepe̱xewa nügü írümegünetaxü̃ natürü norü maxü̃wa rü tama ixaixcümagüxü̃.

Ngechuchuarü ngúexü̃gü ga yamugüxü̃arü puracüchiga 18:27

Rü yexguma Acáyaanewa naxũxchaü̃gu ga Apóru, rü yema yaxõgüxü̃ ga Epéchiucüã̱x nüxü̃ narüngü̃xẽẽgü. Rü popera yéma namugü naxca̱x ga yema yaxõgüxü̃ ga Acáyaanecüã̱x nax mea Apóruxü̃ nayauxgüxü̃ca̱x. Rü yexguma Acáyaanewa nanguxgu ga Apóru rü poraãcü nüxü̃ narüngü̃xẽxẽ ga yema duü̃xü̃gü ga Tupanaarü ngechaü̃gagu Ngechuchuaxü̃́ yaxõgüxü̃.

1 Corintios 16:3

Rü ngẽxguma petanüwa changuxgu, rü tá chanaxümatü i ñuxre i poperagü naxca̱x i taenexẽgü i Yerucharéü̃wa ngẽxmagüxü̃. Rü ñu̱xũchi ngẽma poperamaxã tá Yerucharéü̃wa chanamugü i ngẽma duü̃xü̃gü i pema nüxü̃ pexunetaxü̃ nax ngéma ngĩxü̃ nangegüxü̃ca̱x i ngẽma diẽru i taenexẽgüca̱x ngĩxü̃ penutaque̱xecü.

2 Corintios 12:19

Bexmana nagu perüxĩnüegu nax ngẽmaãcü tidexagüxü̃ erü togüétüwatama tachogüchaü̃. Natürü tama ngẽmagu tarüxĩnüe. Rü Tupanape̱xewa Cristuégagu pemaxã nüxü̃ tixu i norü ore nax yexeraãcü Tupanaaxü̃́ peyaxõgüxü̃ca̱x rü yexeraãcü mea nax pemaxẽxü̃ca̱x, Pa Toenexẽgü ya Pexü̃ Tangechaü̃güxex.

2 Corintios 10:8

Rü woo írarüwa chanangupetüxẽxẽ nax chaugü chicua̱xüxü̃xü̃ namaxã i ngẽma nax Tupana toxü̃ muxü̃, natürü taxuca̱xma naxca̱x chaxãne. Erü aixcüma nüma ya Cori nixĩ ya toxü̃ mucü nax pexü̃ tarüngü̃xẽẽgüxü̃ca̱x nax yexeraãcü mea peyaxõgüxü̃ca̱x. Rü tama ta̱xacürü chixexü̃gu nax pexü̃ tayixẽẽxü̃ca̱x nixĩ i toxü̃ namuxü̃.

2 Corintios 2:17

Rü toma rü tama Tupanaarü oregu diẽru ngĩxü̃ tayaxu ngẽma muxü̃ma i togü naxügüxü̃rüxü̃. Natürü Tupanape̱xewa rü aixcüma mea nüxü̃ tixu i ngẽma norü ore, erü nüma toxü̃ nimugü rü Cristuarü tixĩgü.

1 Corintios 10:33

Rü choma rü guxü̃wama guxü̃xü̃ma chataãẽxẽẽchaü̃. Rü ngẽmaca̱x tama chanaxü i ngẽma chomatama namaxã chataãẽxü̃, natürü chanaxü i ngẽma togü namaxã taãẽxü̃ nax ngẽmaãcü nümagü rü ta nüxü̃́ nangúchaü̃ nax yaxõgüãxü̃ rü nayauxgüãxü̃ i maxü̃ i taguma gúxü̃.

1 Corintios 4:15

Rü woo nangẽxmagu i 10,000 i perü ngu̱xẽẽruü̃gü i Cristuchiga pexü̃ ngúexẽẽxü̃, natürü chaxicatama nixĩ i penatü chixĩxü̃ i Tupanaarü orewa. Yerü chaxíra nixĩ ga pemaxã nüxü̃ chixuxü̃ ga Tupanaarü ore i mexü̃, rü chauxü̃tawa nixĩ ga penayaxuxü̃ ga Ngechuchu ya Cristu.

1 Corintios 3:10

Rü choma nixĩ ga Tupana choxü̃ muxü̃ nax chaxíra pemaxã nüxü̃ chixuxü̃ca̱x ga Cristuchiga. Rü togü nixĩ ga chowena yexeraãcü pexü̃ ngúexẽẽxü̃. Natürü guxãma ya texé ya naxǘxe i ñaa puracü rü name nixĩ i taxuãxẽ nax mea tanaxüxü̃ca̱x.

Romanos 16:1

Rü ñu̱xma rü pemaxã nüxü̃ chixu rü petanüwa ixũxchaü̃ i taeya̱x i Fébe. Rü ngĩma rü Chencréaarü ĩanewa diaconícha iyixĩ rü nüxü̃ irüngüxẽxẽ i ngẽma yaxõgüxü̃ i ngéma ngẽxmagüxü̃.

2 Corintios 10:18

Rü tama yíxema tügütama icua̱xüxü̃xe tixĩ ya Tupanape̱xewa mexe, natürü yíxema tórü Cori tüxü̃ icua̱xüxü̃xe tixĩ ya aixcüma Tupanape̱xewa mexe.