2 Corintios 10:4 - Tupanaarü Ore

^4-5 Erü ngẽma toxne i namaxã ítanapoxü̃xü̃ i Tupanaarü ore rü tama ñoma i naanecüã̱x namaxã ãxnexü̃ nixĩ. Erü toma rü toxü̃́ nangẽxma i Tupanaarü pora nax ngẽmamaxã itayanaxoxẽẽxü̃ca̱x i Chatanáarü pora rü itayanaxoxẽẽxü̃ca̱x i guxü̃ma i ngẽma ore i duü̃xü̃güaxü̃́ naguxchaxẽẽxü̃ nax tama Tupanaaxü̃́ yaxõgüãxü̃ca̱x. Rü guxü̃ma i ta̱xacü i nagu naxĩnüexü̃ i ngẽma duü̃xü̃gü i chixexü̃, rü Cristuna tanaxuaxü̃ nax nüma namaxã inacuáxü̃ca̱x.

2 Corintios 10:4 Referans Kwoze

2 Corintios 6:7

Rü duü̃xü̃güxü̃ nüxü̃ tadauxẽxẽ nax aixcüma mea namaxã nüxü̃ tixu i ngẽma ore i aixcüma ixĩxü̃, rü itanawe̱x i Tupanaarü pora i towa ngẽxmaxü̃. Rü ngẽma toxne ixĩxü̃, rü ngẽma nixĩ i torü maxü̃ i aixcüma mexü̃. Rü ngẽmamaxã nixĩ i togü ítapoxü̃xü̃ i torü uanügüpe̱xewa.

Yeremía 1:10

—Ñu̱xma i choma rü cuxna chanaxã i pora nax cuyaxucu̱xẽgüxü̃ca̱x i ngẽma ãẽ̱xgacügü rü duü̃xü̃gü i guxü̃ i nachixü̃anecüã̱xgü. Rü ngẽxguma tama naga naxĩnüegu i ngẽma chorü ore i namaxã nüxü̃ quixuxü̃, rü choma rü choxü̃́ nangẽxma i pora nax chanamuxü̃ca̱x i norü uanügü nax nagu napogüexü̃ca̱x i norü ĩanegü rü ínawoxü̃ãxü̃ca̱x i norü duü̃xü̃gü rü ngẽmaãcü iyanaxoxü̃ca̱x i ngẽma nachixü̃anegü. Natürü ngẽma naga ĩnüexü̃ i chorü ore i namaxã nüxü̃ quixuxü̃ rü ngẽxgumarüxü̃ ta choxü̃́ nangẽxma i pora nax wena ichanachixẽẽxü̃ rü chanatachigaxẽẽxü̃ —ñanagürü ga Tupana.

1 Corintios 2:5

Rü yemaacü Tupanaarü poramaxã pemaxã nüxü̃ chixu ga yema ore nax Tupanagagu yixĩxü̃ nax nüxü̃́ peyaxõgüxü̃, rü tama ñoma i naanecüã̱x i duü̃xü̃güarü cuágagu nax yixĩxü̃.

Nüxíraxü̃xü̃ ga popera ga Timutéuca̱x naxümatüxü̃ ga Pauru 1:18

Pa Chaune, Pa Timutéux, ñaa nixĩ i chorü ore i cumaxã nüxü̃ chixuxü̃. Rü ü̃pa ga yexguma Tupana yadexaxẽẽgu ga ñuxre ga taenexẽgü, rü nüxü̃ nixugügü nax cuma rü tá mexü̃ i Tupanaarü orearü uruxü̃ quixĩxü̃. Rü ñu̱xma chanaxwa̱xe i yemagü nüxü̃ ixuxü̃rüxü̃ mexü̃ i curü õmaxã rü mexü̃ i curü ĩnümaxã cuyanguxẽxẽ i ngẽma puracü i mexü̃ ya Tupana nawa cuxü̃ muxü̃. Ñuxre i yaxõgüxü̃ rü nüxü̃ narüxoe ga yema mexü̃ ga noxri nagu naxĩnüexü̃ rü ngẽmagagu i ñu̱xma düxwa nüxü̃ narüxoe nax Cristuaxü̃́ yaxõgüãxü̃.

Romanos 13:12

Rü woo nangẽxmagu i taxü̃ i chixexü̃ i ñoma ẽanexü̃rüxü̃ ixĩxü̃, natürü paxa tá ínangu ya Cristu nax nügüxü̃tawa tüxü̃ nagagüxü̃ca̱x. Rü ngẽmaca̱x name nixĩ i nüxü̃ tarüxoe i guxü̃ma i ngẽma chixexü̃ ixĩxü̃ rü nagu taxĩ i Tupanaarü ore i ñoma omürüxü̃ ixĩxü̃.

1 Tesalonicenses 5:8

Rü yixema nax ngóonexü̃wa ingẽxmagüxü̃, rü tanaxwa̱xe i guxü̃guma taxũãẽgü. Rü tanaxwa̱xe i tórü õmaxã rü tórü ngechaü̃maxã rü tórü maxü̃ i taguma gúxü̃ i ínanguxẽẽxü̃maxã yigü ítapoxü̃gü ñoma wüxi i churara rü norü poxü̃remüruxü̃maxã rü napate̱xemaxã nügü ípoxü̃xü̃rüxü̃.

2 Corintios 4:7

Rü ñu̱xma nax Ngechuchu ya Cristuxü̃ icuáxü̃, rü ngẽma cua̱x rü taxü̃ne i mairaxü̃naxca̱xwa nangẽxma, nax nangóxü̃ca̱x nax Tupanawa ne naxũxü̃ i ngẽma pora i tüxü̃́ ngẽxmaxü̃ rü tama i tawa.

Romanos 6:13

Rü tama name i pecaduna penaxãgü i pexene nax ngẽmamaxã chixexü̃ pexügüxü̃ca̱x. Rü name nixĩ i Tupanana pegü pexãgü, erü ñoma duü̃xü̃gü i yuexü̃ rü wena maxẽxü̃rüxü̃ pixĩgü. Rü ngẽmaca̱x name nixĩ i Tupanana penaxãgü i pexene nax ngẽmamaxã nape̱xewa mexü̃ pexügüxü̃ca̱x.

2 Corintios 3:5

Rü tama tóxrütama cua̱xmaxã nixĩ i tanaxüxü̃ i ngẽma puracü. Natürü guxü̃ma i ngẽma taxüxü̃ rü Tupanaarü ngü̃xẽẽmaxã nixĩ i tanaxüxü̃.

Wiyaegü 110:2

Rü nüma ya Tupana rü Chióü̃wa cuxü̃ naxuneta nax ãẽ̱xgacü quixĩxü̃ca̱x rü namaxã icucuáxü̃ca̱x i ngẽma curü uanügü.

Popera ga Yudíugü ga yaxõgüxü̃ca̱x ümatüxü̃ 11:30

Rü yema Iraétanüxü̃ rü Tupanaaxü̃́ nayaxõgü rü yemaca̱x 7 ga ngunexü̃ nüxü̃ ínichoeguãchitanücüü ga guma ĩane ga Yericú. Rü yexguma norü 7 ga ngunexü̃wa nanguxgu rü gumá ĩanetapü̱xgü rü nüechama niwa̱xgü.

Norü taxre ga popera ga Timutéuca̱x naxümatüxü̃ ga Pauru 2:3

Rü cuma nax Ngechuchu ya Cristuarü churara i mexü̃ quixĩxü̃, rü name nax ícumemarexü̃ nax Ngechuchu ya Cristuarü oregagu ngúxü̃ quingexü̃.

Ngechuchuarü ngúexü̃gü ga yamugüxü̃arü puracüchiga 7:22

Rü yemaacü Moichéxü̃ nangu̱xẽẽgü ga guxü̃ma ga Equítuanecüã̱xarü cua̱x. Rü nüma ga Moiché rü norü dexawa rü yema naxüxü̃wa rü wüxi ga yatü ga poracü nixĩ.

Ichaía 30:25

Rü ngẽxguma ínanguxgu i ngẽma ngunexü̃ i nagu Cori ya Tupana tá tümaarü uanüxü̃ daixü̃ rü yima ĩanearü poxeguxü̃ tá niwa̱xgü. Rü guxü̃nema ya itaxü̃ne ya ma̱xpǘnegüwa rü ngüchitaeruxü̃wa tá inarüyaegü i natügü rü dexá i poraü̃chiüxü̃.

Yochué 6:20

Rü yexguma ga nüma ga yema duü̃xü̃gü rü aita naxüe rü ga carnéruchatacu̱xregü rü naxãgatanüãchi. Rü yexguma guma carnéruchatacu̱xregügaxü̃ naxĩnüegu ga nüma ga Iraétanüxü̃ rü inanaxügüe nax poraãcü aita naxüexü̃. Rü yexguma ga guma ĩanearü poxeguxü̃ rü niwa̱xtapü̱x. Rü yexguma ga nüma ga Iraétanüxü̃ rü yexma nachocu rü namaxã inacua̱xgü.

2 Corintios 13:10

Rü naxü̃pa nax pexü̃ íchayadauxü̃ nixĩ i pexca̱x chanaxümatüxü̃ i ñaa popera, nax ngẽxguma ngéma changuxgu rü nataxuxü̃ca̱x i ta̱xacüca̱x pemaxã nax chaporagaxü̃. Erü tórü Cori choxü̃ namu nax pexü̃ charüngü̃xẽxẽxü̃ca̱x nax yexeraãcü mea peyaxõgüxü̃ca̱x. Rü tama chixexü̃gu pexü̃ yayixẽẽxü̃ca̱x nixĩ i choxü̃ namuxü̃.

1 Corintios 9:7

¿Ta̱xacü rü duü̃xü̃ i churarawa ũxü̃ i nügüxü̃tama naxütanüxü̃ i norü õna? ¿Rü ta̱xacürü duü̃xü̃ i úba itoxü̃ i tama namúxü̃ i norü o? ¿Rü ta̱xacürü duü̃xü̃ i carnérugüna dauxü̃ i tama nagünenixü̃ ne ixaxüxü̃?”

2 Corintios 10:8

Rü woo írarüwa chanangupetüxẽxẽ nax chaugü chicua̱xüxü̃xü̃ namaxã i ngẽma nax Tupana toxü̃ muxü̃, natürü taxuca̱xma naxca̱x chaxãne. Erü aixcüma nüma ya Cori nixĩ ya toxü̃ mucü nax pexü̃ tarüngü̃xẽẽgüxü̃ca̱x nax yexeraãcü mea peyaxõgüxü̃ca̱x. Rü tama ta̱xacürü chixexü̃gu nax pexü̃ tayixẽẽxü̃ca̱x nixĩ i toxü̃ namuxü̃.