2 Chamué 8:2 - Tupanaarü Ore

² Rü yexgumarüxü̃ ta rü Moátanüxü̃xü̃ narüporamae. Rü ñaxtüanegu nayacamaxẽxẽ rü wüxi ga napana̱xãmaxã nanangugü. Rü yema duü̃xü̃gü ga taxrearü ngugüwa yexmagüxü̃ rü nanadai. Rü yema norü tomaepü̱xarü ngugüwa yexmagüxü̃ rü tama nanadai. Rü yemaacü ga yema Moátanüxü̃ rü Dabíme̱xẽwa nayexmagü rü nüxü̃́ nanaxütanügü ga yema diẽru ga Dabí nagu unetaxü̃.

2 Chamué 8:2 Referans Kwoze

Iraétanüxü̃arü muxchiga 24:17

Rü nüxü̃ chadau i ta̱xacü i yixcüra tá ngupetüxü̃, natürü taxũtáma paxa ínangu. Rü Iraétanüxü̃tanüwa tá nango̱x i wüxi i ãẽ̱xgacü i ñoma woramacuri ngóxü̃rüxü̃. Rü ngẽma ãẽ̱xgacü rü Moátanüxü̃xü̃ tá nadai rü tá inayanaxoxẽxẽ i guxü̃ma i Chéxtanüxü̃.

Wiyaegü 60:8

Rü ngẽma Moáane rü chorü yauxme̱xü̃páü̃ nixĩ. Rü Edóü̃aneétügu tá chanaña i chorü chapatu. Rü ngẽma naanegümaxã tá ichacua̱x. Rü ngẽma Firitéugüarü naane, rü tagaãcü tá nüxü̃ chixu nax nüxü̃ charüporamaexü̃ —ñanagürü ya Tupana.

2 Chamué 8:6

Rü yemawena ga Dabí rü Damácugu nayaxüa ga norü churarapatagü. Rü yemaacü ga Chíriaanecüã̱xgü rü Dabíme̱xẽwa nayexmagü rü Dabíaxü̃́ nanaxütanügü ga yema diẽru ga Dabí nagu unetaxü̃. Rü yemaacü ga Cori ya Tupana rü Dabíxü̃ naporaxẽxẽ nax norü uanügüxü̃ naporamaexü̃ca̱x ga ngexta ínaxũxü̃wa.

1 Chamué 10:27

Natürü nayexmagü ta ga duü̃xü̃gü ga Chaúmaxã chixexü̃gu rüxĩnüexü̃ rü ñagüxü̃: —¿Ñuxãcü tá i ñaa yatü i tamaxã inacuáxü̃? —ñagüxü̃. Rü yemaacü nüxü̃ naxõõ̱xgü rü tama namaxã nataãẽgü. Natürü nüma ga Chaú rü tama yemagu narüxĩnü.

Wiyaegü 108:9

Rü ngẽma Moáane rü Edóü̃ane rü chautüü̃wa nangẽxmagü. Rü ngẽma Firitéutanüxü̃ rü choma rü tá nüxü̃ charüporamae —ñanagürü ya Tupana.

Norü taxre ga to ga popera ga ãẽ̱xgacügüchiga ümatüxü̃ 26:8

Rü yema Amóü̃tanüxü̃ rü Uchíaaxü̃́ nanaxütanügü ga yema diẽru ga Uchía ngĩgu unetacü. Rü nüma ga Uchía rü natachiga yerü naporaxüchi. Rü yemaca̱x guxü̃wama nangu ga nachiga ñu̱xmata Equítuanearü üyeanewa nangu.

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 18:2

Rü yexgumarüxü̃ ta Moácüã̱xgüxü̃ narüporamae. Rü nüma ga Moátanüxü̃ rü Dabíme̱xẽwa nayexmagü, rü Dabíaxü̃́ nanaxütanügü ga yema diẽru ga Dabí nagu unetaxü̃.

Norü taxre ga popera ga ãẽ̱xgacügüchiga 17:3

Rü nüma ga Achíriaanearü ãẽ̱xgacü ga Chamanachá, rü norü churaragümaxã Iraéanecüã̱xarü ãẽ̱xgacü ga Ochéaca̱x ínayagoõchi rü nüxü̃ narüporamae. Rü nüma ga Chamanachá rü nügüme̱xwa nanayexmaxẽxẽ ga Ochéa rü naxü̃tawa tacü ga diẽruca̱x ínacaüüxü̃ ga guxcüma ga taunecügügu.

Norü taxre ga popera ga ãẽ̱xgacügüchiga 1:1

Nawena ga nax nayuxü̃ ga ãẽ̱xgacü ga Acáx rü nüma ga Moátanüxü̃ rü Iraéanecüã̱xgümaxã nanue rü tama nanaxütanügüchaü̃ ga yema diẽru ga Iraéanearü ãẽ̱xgacü nagu unetaxü̃.

1 Chamué 14:47

Rü yemaacü ga Chaú rü nügü nango̱xẽxẽ nax nüma rü aixcüma Iraéanecüã̱xgüarü ãẽ̱xgacü yixĩxü̃. Rü nüma rü guxü̃wama ga norü naanewa rü nanadai ga norü uanügü ga Moátanüxü̃, rü Amóü̃tanüxü̃, rü Edóü̃tanüxü̃, rü Chobáarü ãẽ̱xgacügü rü Firitéugü. Rü yema íyadaixetanüãxü̃wa rü nüma nixĩ ga guxü̃xü̃ma naporamaexü̃.

Wiyaegü 83:6

Rü ngẽmaãcü toxca̱x ínayaxüãchichaü̃ i ngẽma Edóü̃anecüã̱xgü, rü Ismaétanüxü̃ ga Agátaagü, rü Moátanüxü̃, rü Guebátanüxü̃, rü Amóü̃tanüxü̃ rü Amaréxtanüxü̃ rü Firitéucüã̱xgü, rü Tírucüã̱xgü.

1 Chamué 22:3

Rü yéma inaxũãchi ga Dabí rü Mispáwa naxũ ga Moáanewa. Rü Moáarü ãẽ̱xgacüxü̃ ñanagürü: —Rü cuxna chaca, Pa Ãẽ̱xgacüx, nax chaunatü rü chaué napexü̃tawa tangexmagüxü̃ca̱x ñu̱xmatáta Cori ya Tupana choxü̃ nawé i ngẽma chomaxã nanaxwa̱xexü̃ —ñanagürü.

1 Chamué 22:4

Rü yemaca̱x ga Dabí rü nanatüxü̃ rü naeü̃ Moáarü ãẽ̱xgacüxü̃tawa tüxü̃ nagagü. Rü yéma tayexmagü ga yexguma Dabí yema ãxmaxü̃gu yacu̱xyane.

Nüxíraxü̃xü̃ ga popera ga ãẽ̱xgacügüchiga 4:21

Rü yema naane ga Charomóü̃ namaxã icuáxü̃ rü taxtü ga Eufrátewa inaxügü ga éstewaama ñu̱xmata Firitéugüarü üyeanewa rü Equítuanearü üyeanewa nangu ga oéstewaama. Rü guxü̃ma ga yema nachixü̃anegü ga Charomóü̃ namaxã icuáxü̃ rü nanaxütanügü ga diẽru ga Charomóü̃ unagüxü̃. Rü Charomóü̃me̱xẽwa nayexmagü ga yexguma namaxü̃gu.

Wiyaegü 18:45

Rü ngẽma togü i nachixü̃anecüã̱xgü rü choxü̃ namuü̃e, rü ngẽma íyacu̱xgüxü̃wa rü du̱xruxeãcü ínachoxü̃.