2 Chamué 7:8 - Tupanaarü Ore8 Rü ngẽmaca̱x ¡namaxã nüxü̃ ixu ya chorü duü̃ ya Dabí rü choma ya Cori ya Tupana ya Guxãétüwa Ngẽxmaxe, rü ñacharügü nüxü̃! ‘Yexguma carnérugüarü dauruxü̃ quixĩxgu rü yea naanewa nüxna cuda̱u̱xgu, rü choma cuxü̃ chayaxu nax ñaa chorü duü̃xü̃gü i Iraétanüxü̃arü ãẽ̱xgacü nax quixĩxü̃ca̱x. Gade chapit la |
Rü ñu̱xma rü chanaxwa̱xe i namaxã nüxü̃ quixu ya yimá chorü duü̃ ya Dabí rü chomax ya Cori ya Tupana ya Guxãétüwa Ngẽxmacü nax chixĩxü̃ rü ñachagürü: “Choma rü cuxü̃ íchamuxũchi ga carnérugüpǘxü̃wa rü cuxü̃ chayaxu nax marü tama carnérugüna cudauxü̃ca̱x. Rü ñu̱xmax, rü chanaxwa̱xe nax namaxã icucuáxü̃ i ngẽma chorü duü̃xü̃gü i cutanüxü̃ i Iraétanüxü̃.
Rü yexguma ga nüma ga Chamué rü wüxiwexü̃ ga chíxü̃ nayaxu, rü Chaúxü̃ namaxã nabaeru. Rü ñu̱xũchi nüxü̃ nachúxu rü ñanagürü nüxü̃: —Cori ya Tupana cuxü̃ nayaxu i ñu̱xma nax norü duü̃xü̃gü i Iraéanecüã̱xgüarü ãẽ̱xgacü quixĩxü̃ca̱x. Rü cuma tá namaxã icucua̱x rü norü uanügü i nüxü̃ íchomaeguãchixü̃me̱xẽwa tá ícunanguxü̃xẽxẽ. Rü ngẽma cua̱xruü̃gü i nawa tá nüxü̃ cucuáxü̃ nax aixcüma Cori ya Tupana cuxü̃ unetaxü̃ nax norü duü̃xü̃gü i Iraéanecüã̱xgüarü ãẽ̱xgacü nax quixĩxü̃, rü ñaagü tá nixĩ.
Tupana rü tümaarü guxchaxü̃wa tüxü̃ narüngü̃xẽxẽ ya yíxema ngearü diẽruã̱xgüxe. Rü guxchirepáü̃wa tüxü̃ ínayaxuchi ya yíxema diẽruca̱x caxaxü̃wa̱xegüxe rü ãẽ̱xgacüxü̃ tüxü̃ nixĩxẽxẽ nax ngẽmaãcü tachigaxü̃ i yatügütanüwa tarütoxü̃ca̱x rü ãẽ̱xgacütanüwa tangexmaxü̃ca̱x. Erü Cori ya Tupana nixĩ i norü yora i ngẽma nagu naxǘnagüxü̃ i ñoma i naane, yerü nüma nixĩ ga nagu naxǘnagüãxü̃.
Rü yexguma Dabí nüxü̃ da̱u̱xgu ga yema Tupanaarü orearü ngeruxü̃ ga daxũcüã̱x ga duü̃xü̃güxü̃ daixü̃, rü nüma ga Dabí rü Cori ya Tupanaxü̃ ñanagürü: —Choma nixĩ ga chixexü̃ chaxüxü̃. Chaugagu nixĩ i ngẽma ngupetüxü̃ ¿Natürü tü̱xcüü̃ cunapoxcu i ñaa duü̃xü̃gü i taxuxü̃ma i chixexü̃ ügüxü̃? Choma rü cuxna naxca̱x chaca nax choxü̃ rü chauxacügüxü̃ cupoxcuxü̃ca̱x —ñanagürü.
Rü nüma ga Charomóü̃ rü nanangãxü̃ga rü ñanagürü: —Cumax, Pa Chorü Tupanax, rü nüxü̃ cungechaü̃xü̃chi ga chaunatü ga Dabí ga curü duü̃xü̃ ixĩcü, yerü nüma rü meama cupe̱xewa inixũ, rü mexü̃ naxü, rü cupe̱xewa rü mea iniwe̱x ga norü maxü̃. Rü yemaca̱x poraãcü nüxü̃ cungechaü̃ rü wüxi ya nanena cunaxã nax nachicawa natoxü̃ca̱x rü Iraéanecüã̱xgüarü ãẽ̱xgacü yixĩxü̃ca̱x.
“Yema ngunexü̃ ga Equítuanewa íchanguxü̃xẽẽgucürüwa ga chorü duü̃xü̃gü ga Iraétanüxü̃, rü taguma nüxü̃ chaxuneta ya wüxi ya ĩane natanüwa ya Iraétanüxü̃ ga duü̃xü̃gü nax yimagu naxüxü̃ca̱x ya chopata ya taxü̃ne ya nawa changexmane. Natürü nüxü̃ chaxuneta ga Dabí nax chorü duü̃xü̃gü ga Iraétanüxü̃maxã inacuáxü̃ca̱x”, ñaxgu nüxü̃ ga Tupana.
Rü nüma ga Dabí rü Tupanaxü̃ naca̱a̱xü̃ rü ñanagürü: —Choma nixĩ ga chanamuxü̃ ga nax yaxugüxü̃ ga duü̃xü̃gü. Rü choma nixĩ i chixexü̃ chaxüxü̃ rü chanaxüxü̃ i pecadu. ¿Rü ta̱xacürü chixexü̃ naxüe i ñaa duü̃xü̃gü rü ngẽmaca̱x cunadai? Pa Corix, Pa Chorü Tupanax, cuxna chaca nax choxü̃ rü chauxacügüxü̃waxi nax cupoxcuxü̃, rü marütama nax cunada̱i̱xü̃ i duü̃xü̃gü —ñanagürü.