2 Chamué 23:10 - Tupanaarü Ore

¹⁰ Natürü nüma ga Ereachá rü tama niña. Rü yema Firitéugüxü̃ nadaiama, rü woo nipa̱xme̱xüchi natürü tama nüxü̃ ninge̱x ga norü tara. Rü yema ngunexü̃gu rü Cori ya Tupana yexeraãcü norü uanügüxü̃ nanaporamaexẽxẽ. Rü yemaxü̃ nax nadaugüxü̃ ga Iraéanearü churaragü, rü Ereacháca̱x nawoegu nax nügüaxü̃́ nadeaxü̃ca̱x ga yema yemaxü̃gü ga norü uanügüna napuxü̃xü̃.

2 Chamué 23:10 Referans Kwoze

1 Chamué 19:5

¿Ẽ̱xna marü nüxü̃ curüngü̃ma ga yexguma norü maxü̃ ãũcümaxü̃wa nayexmaxẽẽgu ga Goriáxü̃ yama̱xgu, rü yemaacü ga Cori ya Tupana rü Iraéanecüã̱xgüxü̃ guxchaxü̃wa ínanguxü̃xẽxẽ? Cumax, Pa Ãẽ̱xgacüx, rü nüxü̃ cudau ga yema, rü cutaãxẽ. ¿Rü tü̱xcüü̃, Pa Ãẽ̱xgacüx, i cuyamáxchaü̃xü̃ i wüxi i duü̃xü̃ i taxuxü̃ma i chixexü̃ cumaxã üxü̃? ¿Rü ta̱xacüca̱x tá cuyama̱x ya Dabí? —ñanagürü.

1 Chamué 11:13

Natürü nüma ga Chaú rü naétüwa nachogü rü ñanagürü: —Ñoma i ngunexü̃gu rü taxúetama tayu, erü Cori ya Tupana rü Iraéanecüã̱xgüxü̃ narüngü̃xẽxẽ nax norü uanüxü̃ naporamaegüxü̃ca̱x —ñanagürü.

2 Corintios 4:5

Rü toma rü tama tochigaxü̃tama nixĩ i tixugüxü̃. Natürü nüxü̃ tixu nax Ngechuchu ya Cristu rü tórü Cori yixĩxü̃, rü toma rü Ngechuchugagu perü ngü̃xẽẽruü̃gümare tixĩgüxü̃.

Romanos 15:18

Rü ñu̱xma rü yema Cristu chowa üxü̃xicatama tá nixĩ i nüxü̃ chixuxü̃. Rü nüma nixĩ ga choxü̃ nangü̃xẽẽxü̃ nax Tupanaxü̃tawa chanagagüxü̃ca̱x ga yema duü̃xü̃gü i tama Yudíugü ixĩgüxü̃, nax nümagü rü ta Tupanaga naxĩnüexü̃ca̱x. Rü yemaacü chorü oremaxã, rü chorü puracümaxã, rü cua̱xruü̃gü ga taxü̃ ga Tupana üxü̃maxã, rü Naãxẽ ya Üünexü̃arü poramaxã Tupanaxü̃tawa chanagagü ga yema duü̃xü̃gü. Rü yemaacü Yerucharéü̃wa ichanaxügü rü guxü̃wama ñu̱xmata Ilíriaarü naanewa meama chayanguxẽxẽ nax nüxü̃ chixuxü̃ ga yema ore i tüxü̃ maxẽxẽẽxü̃ i Cristuchiga.

Ichaía 53:12

Rü ngẽmaca̱x i nüma ya Tupana rü tá ñoma i naanearü ãẽ̱xgacügü i iporaexüchixü̃tanüwa nanangexmaxẽxẽ, rü tá nanatachigaxẽxẽ, yerü nügü inaxã nax pecaduca̱x nayuxü̃ca̱x. Rü nüma ga duü̃xü̃gü rü ñoma wüxi ga máetaxü̃ãcü nüxü̃ narüdaunü, natürü ga nüma rü guxü̃ma ga duü̃xü̃güarü pecadu ninge nax ngẽmaãcü naétüwa nachogüxü̃ca̱x i pecaduã̱xgüxü̃.

Wiyaegü 144:10

Rü cuma nixĩ i nachixü̃anegüarü ãẽ̱xgacügüxü̃ curüngü̃xẽẽxü̃ nax norü uanügüxü̃ naporamaegüxü̃ca̱x. Rü cuma nixĩ ga curü duü̃ ga Dabíxü̃ ícunguxũchixẽẽxü̃ naxme̱xwa ga norü uanügü. ¡Rü ñu̱xma rü choxü̃ ínapoxü̃ nax tama norü taramaxã choxü̃ yama̱xgüxü̃ca̱x i chorü uanügü! ¡Rü choxü̃ napu naxme̱xwa i ñaa chorü uanügü i dorata̱a̱xgüxü̃ i norü doramaxã choxü̃ íxuaxü̃güxü̃!

Wiyaegü 108:13

Natürü curü ngü̃xẽẽmaxã Pa Tupanax, rü tá nüxü̃ tarüporamae i ngẽma torü uanügü, erü cuma rü tá cuyayitanüxẽxẽ.

Wiyaegü 68:12

—Yema uanügüarü ãẽ̱xgacügü rü norü churaragümaxã nibuxmü. Rü yema ngexü̃gü ga ĩpatawachigü yexmagüxü̃ rü nügümaxã nayatoye ga yema norü uanügüarü yemaxü̃gü ga nüxna yéma yabuxmüxü̃.

Norü taxre ga popera ga ãẽ̱xgacügüchiga 5:1

Rü nüma ga Naamáü̃ rü guma Chíriaanearü ãẽ̱xgacü ga réiarü churaragüeru nixĩ. Rü norü ãẽ̱xgacü rü poraãcü nüxü̃ nangechaü̃ rü nüxü̃ narüngü̃xẽxẽ yerü muẽ̱xpü̱xcüna rü norü churaragümaxã norü uanügüxü̃ narüporamae. Natürü nüma ga Naamáü̃ rü chaxünemaxã nida̱xawe.

1 Chamué 14:23

Rü yema nügü nax nada̱i̱xü̃ rü ñu̱xmata Bex-abéü̃wa nangu. Rü nüma ya Cori ya Tupana rü yema ngunexü̃gu Iraétanüxü̃xü̃ ínanguxü̃xẽxẽ.

1 Chamué 14:6

Rü nüma ga Yonatáü̃ rü norü ngü̃xẽẽruxü̃xü̃ ñanagürü: —Ngĩxã, rü tocutüwa taxĩ, ñu̱xmatáta ngẽma Firitéugüarü churaragütücumü i tama Tupanaaxü̃́ yaxõgüxü̃ íngẽxmaxü̃wa ingugü. Bexmana nüma ya Cori ya Tupana rü tá tüxü̃ narüngü̃xẽxẽ, erü taxuxü̃ma nüxü̃́ naguxcha nax tüxü̃ naporamaexẽẽxü̃ woo imuxgu rüe̱xna inoxregu —ñanagürü.

Ãẽ̱xgacügü ga guxchaxü̃güarü mexẽxẽruü̃gü 15:18

Rü nüma ga Chanchóü̃ rü poraãcüma nita̱xawa rü yemaca̱x Tupanamaxã nidexa rü ñanagürü: —Ñu̱xma nax poraãcü choxü̃ nüxü̃ curüporamaexẽẽxü̃ i chorü uanügü rü ¿Tü̱xcüü̃ ta̱xawamaxã tá choxü̃ cuyuxẽxẽxü̃? ¿Ẽ̱xna naxme̱xgu tá choxü̃ cunguxẽxẽ i ñaa Firitéugü i tama cuxü̃́ yaxõgüxü̃? —ñanagürü.

Ãẽ̱xgacügü ga guxchaxü̃güarü mexẽxẽruü̃gü 15:14

Rü yexguma Leíwa nangugügu ga yema Chanchóü̃xü̃ iyauxgüxü̃, rü nüma ga Firitéugü rü taãẽmaxã aita naxüe. Natürü Cori ya Tupanaãxẽ rü Chanchóü̃maxã inacua̱x, rü yema napana̱xã ga namaxã yana̱i̱xgüãxü̃ rü ñoma tünütarüxü̃ inacaũgü rü napü̱xme̱xẽwa ínayi.

Yochué 11:8

Rü nüma ga Cori ya Tupana rü nanaporamaexẽxẽ ga Iraétanüxü̃. Rü yemaca̱x norü uanügüxü̃ nibuxmüxẽxẽ rü nawe nangẽgü ñu̱xmata guma ĩane ga taxü̃ne ga Chidóü̃wa rü Mirepóx-maíü̃wa nangugü rü ñu̱xmata Mispáarü éstewaama yexmaxü̃ ga doxonexü̃wa nangugü. Rü bai ga wüxi ga maxü̃xü̃ ga íyaxüxü̃, rü guxü̃xü̃ma nadai.

Yochué 10:10

Rü nüma ga Cori ya Tupana rü poraãcü yema Amoréutanüxü̃xü̃ namuü̃exẽxẽ nape̱xewa ga Iraétanüxü̃. Rü yemaca̱x ga Yochuéarü churaragü rü ĩane ga Gabaóü̃gu nanadai ga muxü̃ma. Rü ñu̱xũchi nawe nangẽgü nagu ga yema nama ga Bex-oróü̃wa nadaxü̃. Rü nayadaietanü ga yema Amoréutanüxü̃ ñu̱xmata ĩanegü ga Achecá rü Machedáwa nangugü.

2 Chamué 23:12

Natürü nüma ga Chamá rü yema naanearü ngãxü̃wa nüxica nayaxǘ rü yema naane ínapoxü̃ rü Firitéugüxü̃ nadai. Rü nüma ga Cori ya Tupana rü Chamáxü̃ narüngü̃xẽxẽ rü yemaca̱x yema Firitéugüxü̃ narüporamae.

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 11:13

Rü nüma ga Ereachá nixĩ ga Dabíxü̃tawa nayexmaxü̃ ga Pax-damíü̃wa ga yexguma Firitéugü daica̱x yexma ngutaque̱xegügu. Yéma nayexma ga wüxi ga chebádanecü. Rü yexguma Firitéugücha̱xwa yabuxmügu ga Iraétanüxü̃, rü nüma ga Ereachá rü Dabímaxã yema chebádanecüarü ngãxü̃wa Firitéugüxü̃ nananguxẽẽgü. Rü ínanapoxü̃ ga yema naane rü Firitéugüxü̃ narüporamaegü. Rü yemaacü nüma ga Cori ya Tupana rü poraãcü nanaporamaexẽẽgü.

1 Chamué 17:53

Rü nüma ga Iraéanecüã̱xgü rü yema Firitéugüwe nangẽgüguwena, rü yema ínapegüxü̃wa naxĩ rü nanade ga guxü̃ma ga norü yemaxü̃gü ga yéma nüxna yabuxmüxü̃.