2 Chamué 21:7 - Tupanaarü Ore

⁷ Natürü nüma ga ãẽ̱xgacü ga Dabí rü tama inanamu ga Mepi-bóchex ga Yonatáü̃ nane ga Chaútaxa ixĩcü. Yerü ga Dabí rü ü̃paacü marü Tupanape̱xewa Yonatáü̃maxã nügümaxã inaxügagü nax Mepi-bóchexna nadauxü̃.

2 Chamué 21:7 Referans Kwoze

2 Chamué 4:4

Rü nüma ga Yonatáü̃ ga Chaú nane rü nüxü̃́ nayexma ga wüxi ga nane ga Mepi-bóchexgu ãégaxü̃ rü nüma rü guxü̃neparawa naturaepara. Rü yexguma 5 ga taunecü nüxü̃́ yexmagu ga Mepi-bóchex rü ĩane ga Yereéwa ínanguchiga ga Chaú rü Yonatáü̃ ga marü nax nayuexü̃. Rü yemaca̱x ga guxema norü dauruxü̃ rü Mepi-bóchexmaxã tiña. Natürü yema nax ñu̱xãẽãcü tiñaxü̃ rü nüma ga gumá bucü rü narüngu rü yemaca̱x nayuepara.

1 Chamué 23:18

Rü yexguma ga nüma ga Dabí rü Yonatáü̃ rü Cori ya Tupanape̱xewa nügümaxã inaxügagü. Rü yemawena ga Yonatáü̃ rü nataegu, rü nüma ga Dabí rü yexmatama Óregu narüxã̱ũ̱x.

1 Chamué 18:3

Rü Yonatáü̃ rü Dabí rü Tupanaégagu nügümaxã nanaxuegugü nax nügümücügü nax yixĩgüxü̃ca̱x yerü ga Yonatáü̃ rü Dabíxü̃ nangechaü̃ ñoma nügütama nangechaü̃xü̃rüxü̃.

2 Chamué 9:10

Rü ngẽmaca̱x i cuma rü cunegümaxã rü curü puracütanüxü̃maxã rü tá Mepi-bóchexaxü̃́ cupuracü nawa i ngẽma norü naane. Rü ngẽxguma yaxo̱xgu i ngẽma nanetü rü tá namaxã cunguxü̃ nax ngẽmaãcü Mepi-bóchexacügü nüxü̃́ ngẽxmaxü̃ca̱x i norü õna. Natürü nümatama i Mepi-bóchex i Chaútaxa rü guxü̃gutáma chorü mechawa nachibü —ñanagürü ga Dabí. Rü nüma ga Chibá ga 15 ga nanegü rü 20 ga norü puracütanüxü̃ nüxü̃́ yexmacü,

1 Chamué 20:8

Rü choma nax curü duü̃xü̃ chixĩxü̃ rü chanaxwa̱xe i choxü̃ curüngü̃xẽxẽ erü cuma rü ñu̱xũchi choma rü marü Tupanape̱xewa wüxi i uneta yigümaxã taxü nax yigü ingechaü̃güxü̃. Rü ngẽmaca̱x rü ngẽxguma chi ta̱xacürü chixexü̃ chaxüxgu rü chanaxwa̱xe i cumatama choxü̃ quima̱x rü taxuca̱xma cunatüxü̃tawa choxü̃ cuga nax choxü̃ timáxü̃ca̱x —ñanagürü.

1 Chamué 20:42

Yexguma ga Yonatáü̃ rü Dabíxü̃ ñanagürü: —¡Taãxẽãcüma nataegu! Cuma rü ñu̱xũchi choma rü marü Tupanaégagu nüxü̃ tixugü nax guxü̃gutáma mexü̃ i yigümücügü nax ixĩgüxü̃. Rü Tupanana taca nax guxü̃gutáma tamaxã nangẽxmaxü̃ i yixema taxre, rü ñu̱xũchi namaxã i ngẽma cutaagü rü chautaagü —ñanagürü. Rü yemawena ga Dabí rü nixũ, rü nüma ga Yonatáü̃ rü ĩaneca̱x nataegu.

1 Chamué 20:17

Rü ñu̱xũchi nüma ga Yonatáü̃ rü Dabímaxã nüxü̃ nixu nax nüma rü ta wenaxarü Yonatáü̃maxã inaxunetaxü̃ yerü poraãcü nüxü̃ nangechaü̃ yema nügütama nangechaü̃xü̃rüxü̃.

2 Chamué 16:4

Rü yexguma nüma ga ãẽ̱xgacü ga Dabí rü Chibáxü̃ nangãxü̃ rü ñanagürü nüxü̃: —Ñu̱xma rü cuxrügü nixĩ i guxü̃ma i ngẽma noxri Mepi-bóchexarü ixĩxü̃ —ñanagürü. Rü nüma ga Chibá rü ãẽ̱xgacüpe̱xe nangücuchiãcüma nanangãxü̃ rü ñanagürü: —Chierüx guxü̃guma chomaxã cutaãẽgu, Pa Ãẽ̱xgacüx —ñanagürü.

2 Chamué 9:7

Rü nüma ga Dabí rü ñanagürü nüxü̃: —¡Taxuca̱xma cumuü̃! Erü choma rü meatama cumaxã ichacua̱x cunatü ga Yonatáü̃égagu. Rü tá chanamu nax cuxü̃ natáegugüxẽẽãxü̃ca̱x i guxü̃ma i ngẽma naane ga curü o̱xi ga Chaúarü ixĩxü̃. Rü guxü̃gutáma chorü mecha i choma íchachibüxü̃wa tá cuchibü —ñanagürü.

1 Chamué 20:12

Rü yéma rü nüma ga Yonatáü̃ rü Dabíxü̃ ñanagürü: —Cori ya Iraétanüxü̃arü Tupanaégagu cumaxã nüxü̃ chixu rü moxü̃ rüe̱xna pa̱xmaacü i ñaatama i oragu rü chaunatüna tá chaca nax ta̱xacü yixĩxü̃ i cumaxã nagu tarüxĩnüxü̃. Rü ngẽxguma ngẽma cumaxã nagu tarüxĩnüxü̃ rü namexgu rü tá nua cuxca̱x chamuga.

2 Chamué 9:1

Rü wüxi ga ngunexü̃gu ga Dabí rü ínaca rü ñanagürü: —¿Tayíxemaxü̃ ya wüxíe ya Chaútanüxü̃ i ñu̱xma rü ta ngextá maxü̃́xẽ? Erü ngẽxguma tayíxemagu rü Yonatáü̃égagu tüxü̃ charüngü̃xẽẽchaü̃ —ñanagürü.

Ngu̱xẽẽtaeruü̃arü ore 8:2

¡Yanguxẽxẽ i ngẽma ãẽ̱xgacüarü mugü! Erü ngẽmaãcü nixĩ i Tupanape̱xewa cunaxueguxü̃.

1 Chamué 24:22

Rü nüma ga Dabí rü Tupanaégagu Chaúmaxã inaxuneta. Rü yemawena ga nüma ga Chaú rü napataca̱x nataegu. Rü nüma ga Dabí rü norü churaragümaxã wenaxarü yema nagu yacu̱xgüxü̃ ga ma̱xpǘnearü ãxmaxü̃wa naxũ.

2 Chamué 9:6

Rü yexguma Dabíxü̃tawa nanguxgu ga nüma ga Mepi-bóchex ga Yonatáü̃ nane ga Chaútaxa ixĩcü, rü nape̱xegu nanangücuchi ga nüxü̃ nax namoxẽxü̃ca̱x. Rü nüma ga Dabí rü nüxna naca rü ñanagürü: —¿Ẽ̱xna cuma quixĩxü̃, Pa Mepi-bóchex? —ñanagürü. Rü nüma nanangãxü̃ rü ñanagürü: —Cuxme̱xwa changexma, Pa Ãẽ̱xgacüx —ñanagürü.