2 Chamué 2:6 - Tupanaarü Ore

⁶ ¡Rü Tupana rü pemaxã namecüma rü pemaxã nixaixcüma! Rü chomax rü tá ta pemaxã chamecüma naxca̱x ga yema mexü̃ ga pexüxü̃.

2 Chamué 2:6 Referans Kwoze

Ucu̱xẽgüchiga 14:22

Ngẽma naxca̱x daugüxü̃ nax chixexü̃ naxügüxü̃, rü nüxna ínachocu i ngẽma nacüma i mexü̃. Natürü yíxema naxca̱x daugüxe nax mexü̃ taxügüxü̃, rü duü̃xü̃gü tüxü̃ nangechaü̃.

Ínachoxü̃xü̃chiga 34:6

Rü Moichépe̱xewa naxüpetü rü tagaãcü ñanagürü: —Chomax rü Cori chixĩ. Chomax rü Cori chixĩ. Rü choma nixĩ ya Tupana ya mecümacü rü ngechaü̃wa̱xecü, rü yáxna ĩnüwa̱xecü, rü aixcüma ngechaü̃cü choxü̃́ ngẽxmacü rü aixcümaxü̃ ixucü chixĩ i chomax.

Ore i mexü̃ ga Matéu ümatüxü̃ 5:44

Natürü i choma rü pemaxã nüxü̃ chixu rü: ¡Nüxü̃ pengechaü̃ i perü uanügü! ¡Rü naxca̱x peyumüxẽ i ngẽma duü̃xü̃gü i chixexü̃maxã pewe ingẽxü̃tanüxü̃!

Ore i mexü̃ ga Matéu ümatüxü̃ 5:7

Tataãẽgü ya yíxema togü tüxü̃́ ngechaxü̃tümüxü̃güxe, erü tümagü rü tá ta Tupanaaxü̃́ tangechaxü̃tümüxü̃gü.

Ore i mexü̃ ga Matéu ümatüxü̃ 10:16

Dücax, choma rü ñoma carnérugü i airugü i düraexü̃tanüwa imugüxü̃rüxü̃ pexü̃ chamugü. ¡Rü ngẽmaca̱x penaxwa̱xe i ãxtapegürüxü̃ pexuãẽgü, natürü muxtucugürüxü̃ taxuxü̃ma i chixexü̃ pexügü!

Wiyaegü 57:3

Rü nüma rü dauxü̃wa cha̱u̱xca̱x ne nanamu i norü ngü̃xẽxẽ nax naxme̱xwa choxü̃ ínanguxuchixẽẽxü̃ca̱x i ngẽma nuãcüma chowe ingẽxü̃tanüxü̃. Erü nüma rü nixaixcüma rü poraãcü choxü̃ nangechaü̃.

2 Chamué 15:20

Cuma rü ĩnetama nua cungu ¿Rü ñuxãcü chi i cuxna naxca̱x chacaxü̃ nax towe curüxũxü̃ca̱x ega woo i choma rü tama nüxü̃ chacua̱xgu nax ngextá chaxũxü̃? Rü ngẽmaca̱x narümemae nax cutaeguxü̃ rü ícuyagagüxü̃ i ngẽma cutanüxü̃. ¡Rü Tupana cuxü̃ rüngü̃xẽxẽ̱x rü guxü̃guma cuxü̃tawa nangẽxma! —ñanagürü.

2 Chamué 10:2

Rü nüma ga Naáx rü Dabímaxã namecüma, rü yemaca̱x Dabí nagu narüxĩnü nax yexgumarüxü̃ ta Naáx nane ga Anúü̃maxã namecümaxü̃. Rü yemaca̱x ga Dabí rü ñuxre ga norü churaragüeruxü̃ Anúü̃xü̃tawa namugü nax yataãẽxẽẽgüaxü̃ca̱x nawa ga norü ngechaü̃ nax nanatü yuxü̃. Natürü yexguma Dabíarü churaragüerugü yéma Amóü̃tanüxü̃arü naanewa ngugügu, rü nümagü ga Amóü̃tanüxü̃arü churaragüerugü rü norü ãẽ̱xgacü ga Anúü̃xü̃ ñanagürügü: —¿Ẽ̱xna cuma i nüxü̃́ cuyaxõxü̃, Pa Ãẽ̱xgacüx, nax ngẽma yatügü i Dabí nua mugüxü̃ rü aixcüma yixĩxü̃ i curü taãẽxẽẽwa nua naxĩxü̃? Ngẽma nawa nua namugüãxü̃ nixĩ nax tórü ĩane nax iyadauxgüxü̃ rü nangugüãxü̃ nax yixcama rü nagu nachocuxü̃ca̱x rü tüxü̃ nada̱i̱xü̃ca̱x —ñanagürügü.

2 Chamué 9:7

Rü nüma ga Dabí rü ñanagürü nüxü̃: —¡Taxuca̱xma cumuü̃! Erü choma rü meatama cumaxã ichacua̱x cunatü ga Yonatáü̃égagu. Rü tá chanamu nax cuxü̃ natáegugüxẽẽãxü̃ca̱x i guxü̃ma i ngẽma naane ga curü o̱xi ga Chaúarü ixĩxü̃. Rü guxü̃gutáma chorü mecha i choma íchachibüxü̃wa tá cuchibü —ñanagürü.

2 Chamué 9:3

Rü yexguma ga nüma ga ãẽ̱xgacü rü nüxna naca rü ñanagürü: —¿Tangexmaxü̃ ya maxü̃́xẽ ya Chaútanüxü̃wa íyaxüxe? Rü ngẽxguma tangexmagu, rü Tupanaégagu tüxü̃ charüngü̃xẽẽchaü̃ —ñanagürü. Rü nüma ga Chibá rü nanangãxü̃ rü ñanagürü: —Nangexma nixĩ ya wüxi ya Yonatáü̃ nane ya norü guxü̃neparawa chixecü —ñanagürü.

2 Chamué 2:7

Rü ngẽmaca̱x i ñu̱xmax rü woo nax nayuxü̃ i Chaú rü ¡taxṹ i perümaãchitanüxü̃ rü taxṹ i pemuü̃exü̃! Erü ngẽma Yudáanecüã̱x i duü̃xü̃gü rü marü ãẽ̱xgacüxü̃ choxü̃ ningucuchixẽẽgü —ñaxü̃ ga Dabí.

Yochué 2:14

Rü nümagü rü ngĩxü̃ nangãxü̃gü rü ñanagürügü ngĩxü̃: —Toma tátama pexü̃ ítapoxü̃ rü pexna tadau nax taxuxü̃ma pexü̃ üpetüxü̃ca̱x, ega cuma rü tama toxü̃ quixuxgu. Rü ngẽxguma Cori ya Tupana toxna naxãxgu i ñaa naane rü aixcüma tá mea cuxna tadau —ñanagürügü.

Rux 1:8

Natürü ga namawa rü ngĩnea̱xgüxü̃ ngĩgürügü: —¡Ẽcü pewoegu rü peéxü̃tawa pexĩ! ¡Rü Cori ya Tupana guxü̃guma mea pexü̃ ngechaü̃ yema choxü̃ rü chaunegüxü̃ mea pengechaxü̃xü̃rüxü̃, rü pexü̃́ natauxchaxẽẽã nax wena mea pixãtegüxü̃, rü ngẽmaãcü petaãẽgüxü̃ca̱x! —ngĩgürügü. Rü ñu̱xmachi ga Noemí rü wüxi ga chúxumaxã ngĩnea̱xgüxü̃ irümoxẽ. Natürü ga ngĩma ga ngĩnea̱xgü rü ixauxeama.