2 Chamué 2:1 - Tupanaarü Ore

¹ Rü yemawena rü nüma ga Dabí rü Cori ya Tupanana naca rü ñanagürü: —¿Yudáaneca̱x tá chataeguxü̃? —ñanagürü. Rü nüma ga Cori ya Tupana nanangãxü̃ rü ñanagürü: —Ngü̃, name nixĩ i ngéma cuxũ —ñanagürü. Rü yexguma ga Dabí rü ínaca rü ñanagürü: —¿Ngextá tá chaxũxü̃? —ñanagürü. Rü nüma ga Cori ya Tupana nanangãxü̃ rü ñanagürü: —Ĩane ya Ebróü̃wa —ñanagürü.

2 Chamué 2:1 Referans Kwoze

1 Chamué 30:31

Rü yexgumarüxü̃ ta norü ãmare naxca̱x yéma namugü ga yema ãẽ̱xgacügü ga Ebróü̃wa yexmagüxü̃. Rü yexgumarüxü̃ ta norü ãmare naxca̱x yéma namugü ga yema ãẽ̱xgacügü ga guxü̃ma ga yema nachicagü ga nüma ga Dabí rü norü duü̃xü̃gümaxã nagu yaxũgüchigüxü̃wa yexmagüxü̃.

1 Chamué 23:4

Rü yexguma ga nüma ga Dabí rü wena Cori ya Tupanana naca. Rü nüma ya Cori ya Tupana rü nanangãxü̃ rü ñanagürü: —¡Inaxũãchi rü nawa naxũ ya ĩane ya Queirá! Erü choma rü tá cuxme̱xgu chanayixẽxẽ i ngẽma Firitéugü —ñanagürü.

Naanearü ügüchiga 32:2

Rü yexguma Acóbu nüxü̃ da̱u̱xgu rü ñanagürü: —Ñaagü rü Tupanaarü churaragü nixĩ —ñanagürü. Rü yemaca̱x Maanaíü̃gu nanaxüéga ga yema nachica.

Echequié 36:37

Rü choma ya Cori ya Tupana rü ñachagürü: —Choma rü yexeraãcü tá nüxü̃ charüngü̃xẽxẽchigüama i ngẽma Iraétanüxü̃. Rü ngẽxguma ta̱xacüca̱x choxna nacagügu rü tá nüxna chanaxã. Rü tá chayamuxẽxẽ i norü duü̃xü̃gü ñoma carnérugü imuxü̃rüxü̃.

Wiyaegü 143:8

¡Rü pa̱xmama choxü̃ nawe̱x nax poraãcü choxü̃ cungechaxü̃xü̃! Erü cuxü̃́ nixĩ i chayaxõxü̃. ¡Rü choxü̃ nüxü̃ nacua̱xẽxẽ nax ñuxãcü cunaxwa̱xexü̃ nax cupe̱xewa chamaxü̃xü̃! Erü cumaxã nixĩ i nüxü̃ chixuxü̃ i ngẽma chorü ngúchaü̃.

Wiyaegü 27:4

Rü ngẽma Cori ya Tupanana naxca̱x chacaxü̃ rü choxü̃́ ngúchaü̃xü̃ rü wüxitama nixĩ. Rü ngẽma nixĩ nax guxü̃ma i chorü maxü̃gu Cori ya Tupanapatawa changexmaxü̃ nax ngẽmaãcü nüxü̃ chicua̱xüü̃xü̃ca̱x rü norü üünemaxã chataãẽxü̃ca̱x.

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 29:7

Rü yema norü ãmaregü ga Tupanapata ga taxü̃neca̱x inaxãgüxü̃ rü 165,000 quíru nagúxü̃ ga úiru nixĩ. Rü naétü ngĩxü̃ inaxãgü ga 10,000 tachinü ngĩgu̱xcü ga diẽru ga úirungixca̱x, rü 330,000 quíru nagúxü̃ ga diẽrumü, rü wixgutaa̱x 600,000 quíru nagúxü̃ ga bróũche, rü 3’300,000 quíru nagúxü̃ ga fieru.

Nüxíraxü̃xü̃ ga popera ga ãẽ̱xgacügüchiga 2:11

Rü 40 ga taunecü nixĩ ga Iraéanecüã̱xgüarü ãẽ̱xgacü yixĩxü̃. Rü 7 ga taunecü nixĩ ga Ebóü̃wa ãẽ̱xgacü yixĩxü̃ rü 33 ga Yerucharéü̃wa.

2 Chamué 15:7

Rü yexguma 4 ga taunecü ngupetügu, rü nüma ga Acharóü̃ rü nanatü ga ãẽ̱xgacüxü̃ ñanagürü: —Cuxna chaca, Pa Ãẽ̱xgacüx ¿rü marü curü me yixĩxü̃ nax Ebróü̃wa chaxũxü̃ nax chayanguxẽxẽxü̃ca̱x ga yema uneta ga Cori ya Tupanamaxã nüxü̃ chixuxü̃?

2 Chamué 5:23

Rü yemaca̱x nüma ga Dabí rü wenaxarü Cori ya Tupanana naca. Rü nüma ga Tupana rü Dabíxü̃ nangãxü̃ rü ñanagürü: —¡Taxṹ i nape̱xewaama naxca̱x ípeyaxüãchixü̃! ¡Rü nüxü̃ ípechoegu rü naweama tá naxca̱x ípeyaxüãchi i ngẽxguma ngẽma bálsamunecüwa pengugügu!

2 Chamué 5:19

Rü yemaca̱x nüma ga Dabí rü Tupanana naca rü ñanagürü: —¿Namexü̃ nax chanadaixü̃ i Firitéugü? ¿Rü nüxü̃ chi choxü̃ curüporamaexẽxẽxü̃? —ñanagürü. Rü nüma ga Cori ya Tupana rü Dabíxü̃ nangãxü̃ rü ñanagürü: —¡Ẽcü nadai! Rü choma rü tá nüxü̃ cuxü̃ charüporamaexẽxẽ —ñanagürü.

2 Chamué 2:11

Rü yemaacü ga Dabí rü 7 ga taunecü rü naétü 6 ga tauemacü Yudáanewa ãẽ̱xgacü nixĩ. Rü ĩane ga Ebróü̃wa nayexma.

Ãẽ̱xgacügü ga guxchaxü̃güarü mexẽxẽruü̃gü 1:1

Nawena ga nax nayuxü̃ ga Yochué rü nümagü ga Iraétanüxü̃ rü Cori ya Tupanana nacagüe nax nüxü̃ nacua̱xgüxü̃ca̱x rü ngexü̃rüüxü̃ i natücumü tá nixĩ i nüxíra Canaáü̃tanüxü̃maxã nügü daixü̃.

Iraétanüxü̃arü muxchiga 27:21

Natürü nüma i Yochué rü nanaxwa̱xe nax chacherdóte ya Ereacháxü̃tawa naxũxü̃. Rü nüma i Ereachá rü tá Uríü̃wa choxna naca nax ta̱xacü tá naxüxü̃ i Yochué. Rü nüma i Yochué tá nixĩ i ngẽma Iraétanüxü̃xü̃ namuxü̃ rü namaxã inacuáxü̃ i guxü̃ma i naxügüxü̃wa —ñanagürü.

Iraétanüxü̃arü muxchiga 13:22

Rü yema chianexü̃ ga Néguewaama nachocu rü ñu̱xmata ĩane ga Ebróü̃wa nangugü. Rü guma ĩanegu nixĩ ga naxãchiü̃güxü̃ ga Aimáü̃tanüxü̃, rü Checháitanüxü̃ rü Tarmáitanüxü̃ ga Anáxtaagü ixĩgüxü̃. Rü guma ĩane ga Ebróü̃ rü marü nũxcüma naxü. Rü marü 7 ga taunecü nüxíra naxü naxü̃pa ga guma ĩane ga Choáü̃ ga Equítuanewa yexmane.

Naanearü ügüchiga 13:18

Rü yexguma ga Abráü̃ rü inaxũãchi. Rü Mamréarü castañanecügu nayaxãchiü̃ ga ĩane ga Ebróü̃arü ngaicamana. Rü yexma nanaxü ga wüxi ga ãmarearü guruxü̃ nax yéma Cori ya Tupanaxü̃ yacua̱xüxü̃xü̃ca̱x.

Yochué 15:13

Rü nüma ga Yochué rü Yudátanüxü̃arü naanewa nixĩ ga Caréx ga Yeponé nanena tanaxãxü̃ ga naane. Yerü yemaacü nixĩ ga Cori ya Tupana ga namuaxü̃. Rü guma ĩane ga nüxna naxãxü̃ne nixĩ ga Quiriáx-abá. Rü to ga naéga nixĩ ga Ebróü̃. Rü noxri guma nixĩ ga Anáxarü ĩane ga taxü̃ne ga nawa nayexmagüne ga nataagü.

1 Chamué 10:22

Rü yemaca̱x wenaxarü Cori ya Tupanana nacagüe ga nüxü̃ nax nacua̱xgüxü̃ca̱x rü aixcüma nayexma ga Chaú. Rü nüma ga Cori ya Tupana rü nüxü̃ nixu ga yéma nax nayexmaxü̃, rü Iraéanecüã̱xgüarü yemaxü̃tanügu nax yacúxü̃.