2 Chamué 12:9 - Tupanaarü Ore

⁹ ¿Rü tü̱xcüü̃ tama naga cuxĩnü i chorü ore, rü cunaxü i ngẽma tama chauãẽwa mexü̃? Rü cuma rü Amóü̃tanüxü̃arü taramaxã cuyama̱x ya Uría ya Itítanüxü̃ rü naxma̱xca̱x cungĩ̱x.

2 Chamué 12:9 Referans Kwoze

1 Chamué 15:19

¿Rü ñu̱xma ta̱xacüca̱x tama Tupanaga cuxĩnü? ¿Rü tü̱xcüü̃ cuñuxãẽ nax cunadexü̃ i ngẽma ngẽmaxü̃gü ya Tupana cuxna chu̱xuxü̃ rü tama cunaxü i ngẽma cuxü̃ namuxü̃? —ñanagürü.

Amúx 2:4

Rü ñanagürü ta ya Cori ya Tupana: —Ngẽma Yudáanecüã̱xgü rü poraãcü chixexü̃ naxügü rü ngẽmaca̱x taxũtáma íchayachaxãchi nax chanapoxcuexü̃. Yerü nüma rü tama nanayaugü ga yema chorü ucu̱xẽgü, rü ñu̱xũchi tama naga naxĩnüe ga yema chorü mugü. Rü nüxü̃ nicua̱xüü̃gü ga yematama naxchicüna̱xãgü ga norü o̱xigü nüxü̃ icua̱xüü̃güxü̃.

Yeremía 18:10

Natürü ngẽxguma chi ngẽma nachixü̃ane chixexü̃ naxü̱xgu rü tama naga naxĩnügu i ngẽma chorü ucu̱xẽ, rü taxũtáma nüxna chanaxã i ngẽma mexü̃gü i namaxã chaxueguxü̃.

Wiyaegü 90:8

Rü torü pecadugü rü torü chixexü̃gü i cúãcü taxüxü̃ rü cupe̱xewa nango̱xoma.

1 Chamué 15:23

Rü yíxema tama Tupanaga ĩnüxe rü ñomatama tayuüxü̃rüxü̃ poraãcü chixexü̃ taxü i Tupanape̱xewa. Rü yíxema chixri Tupanaga ĩnüxe rü ñomatama tupananetaxü̃ ticua̱xüü̃rüxü̃ chixexü̃ taxü. Rü dücax, rü ñu̱xma nax nüxü̃ cuxoxü̃ i norü mugü, rü nüma ya Tupana rü cuxü̃ naxo nax Iraéanecüã̱xgüarü ãẽ̱xgacü quixĩxü̃ —ñanagürü ga Chamué.

Ichaía 5:24

Rü ngẽmaca̱x i pema rü ñoma maxẽ i paxü̃ i üxüemawa ixaxü̃rüxü̃ tá iperüxo. Rü ñoma nai i yixchúma̱xaxü̃rüxü̃ rü ñoma nachacu i waixü̃müchicute̱xe yanguxuchixü̃rüxü̃ tá pixĩgü. Erü nüxü̃ pexo i norü ngu̱xẽẽtaegü rü norü mugü ya Cori ya Iraéarü Tupana ya Üünecü ya Guxãétüwa Ngẽxmacü.

Wiyaegü 51:4

Rü cupe̱xewatama nixĩ i chanaxüxü̃ i ngẽma pecadu. Rü cuxetümaxã nüxü̃ cudau i ngẽma chaxüxü̃. Rü ngẽmaca̱x i ngẽma poxcu i chomaxã cuxueguxü̃ rü aixcüma name rü taxucürüwa texé nüxü̃ tixu nax chixri choxü̃ cungugüxü̃.

Norü taxre ga to ga popera ga ãẽ̱xgacügüchiga ümatüxü̃ 33:6

Rü nüma ga Manaché rü nanegüxü̃tama nigu nawa ga yema ãmarearü guruxü̃ ga doxonexü̃ ga Ben-inóü̃wa yexmaxü̃. Rü chixexü̃ ga naãẽgüca̱x nangema nax namaxã yadexaxü̃ca̱x, rü ngẽma ẽxü̃guxü̃ i chixexü̃wa nangu̱x, rü duü̃xü̃güxü̃ namu nax naxca̱x nangúexü̃ nax yuetaãẽgüca̱x nangemagüxü̃, rü nagu nixũ nax duẽxẽgüxü̃ nachixexẽẽgüxü̃. Rü yema taxü̃ ga chixexü̃gü ga Tupanape̱xewa naxüxü̃maxã poraãcü Tupanaxü̃ nanuxẽxẽ.

2 Chamué 12:10

Rü ngẽma nax choxü̃ cuxoxü̃, rü ngẽmaca̱x Uría ya Itítanüxü̃ naxma̱x tüxü̃ cuyapu rü cuxma̱xü̃ tüxü̃ quixĩxẽxẽ. Rü ngẽmagagu rü guxü̃gutáma ãũcümaxü̃wa nangẽxmagü i cutanüxü̃.

1 Chamué 15:26

Rü Chamué nanangãxü̃ rü ñanagürü: —Taxũtáma cuwe chataegu erü cuma rü nüxü̃ cuxo i Cori ya Tupanaarü mu, rü ñu̱xma i nüma rü ta cuxü̃ naxo nax Iraétanüxü̃arü ãẽ̱xgacü quixĩxü̃ —ñanagürü.

2 Chamué 16:7

Rü yemaacü chixexü̃ Dabímaxã nixugü rü ñanagürü: —¡Ixũgachi i nua, Pa Máetaxü̃ rü Chixexü̃arü Üruxü̃x!

Nüxíraxü̃xü̃ ga popera ga ãẽ̱xgacügüchiga 15:5

Rü nüma ga Dabí rü mea Tupanape̱xewa namaxü̃ rü guxü̃guma naga naxĩnü rü nayanguxẽxẽ ga yema norü mu. Rü yema chixexü̃ ga Dabí üxü̃, rü Itítanüxü̃ ga Uríaxü̃ nax yamáxü̃xicatama nixĩ.

Nüxíraxü̃xü̃ ga popera ga ãẽ̱xgacügüchiga 21:19

Rü ñacurügü tá nüxü̃: “Pa Acáx, rü Cori ya Tupana rü ñanagürü cuxü̃: ‘Ñu̱xma nax cuyamáxü̃ ya Nabú rü nüxna nax cuyapuxü̃ i ngẽma noxrütama ixĩxü̃, rü ngẽmaca̱x i ñu̱xma i cumax rü tá ta cugü nadexgü i airugü ngẽmatama nachica ga Nabúgü nawa nadexgüãxü̃wa’ ” —ñanagürü. Rü nüma ga Ería rü yéma Acáxü̃tawa naxũ nax namaxã nüxü̃ yanaxuxü̃ca̱x.

Wiyaegü 51:14

Pa Tupana ya Chorü Maxẽxẽruxü̃x ¡choxü̃ ínanguxuchixẽxẽ nax yexü̃cürü nagü ichanabaxẽxẽxü̃! Rü choma rü wiyaeãcüma tá nüxü̃ chixu nax cuma rü aixcümacü quixĩxü̃.

Wiyaegü 51:16

Erü cuma rü tama cunaxwa̱xe nax ta̱xacürü ãmare cuxna chaxãxü̃ rüe̱xna ta̱xacürü ãmare cuxca̱x chiguxü̃. Rü choma rü chi cuxna chanaxã, natürü tama ngẽma nixĩ i namaxã cutaãẽxü̃.

Ucu̱xẽgüchiga 14:2

Yimá yatü ya mecümacü, rü Cori ya Tupanaga naxĩnü. Natürü ngẽma yatü i chixexü̃ i nacümagu maxü̃xü̃, rü tama Cori ya Tupanaga naxĩnü.