Norü taxre ga popera ga Pedru ümatüxü̃ 3:17 - Tupanaarü Ore

¹⁷ Rü ngẽmaca̱x, Pa Chauenexẽgü ya Pexü̃ Changechaü̃güxe, rü ñu̱xma nax nüxü̃ pecuáxü̃ i ta̱xacü tá nax ngupetüxü̃, rü name nixĩ i pexuãẽgü nax tama pexü̃ nawomüxẽẽgüxü̃ca̱x i ngẽma chixexü̃ i duü̃xü̃gü rü tama nüxü̃ perüxoexü̃ca̱x nax mea peyaxõgüxü̃.

Norü taxre ga popera ga Pedru ümatüxü̃ 3:17 Referans Kwoze

Popera ga Yudíugü ga yaxõgüxü̃ca̱x ümatüxü̃ 3:14

Rü ñu̱xma rü Cristumaxã tüxü̃́ nangẽxma i maxü̃ i taguma gúxü̃ ega yaxõgüechagu rü noxrirüü̃tama naga ixĩnüegu ñu̱xmatata nawa nangu nax nataeguxü̃ i nüma.

Colosenses 2:8

¡Rü naxca̱x pexuãẽgü i ngẽma duü̃xü̃gü i pexü̃ womüxẽẽgüchaü̃xü̃ namaxã i norü ore i tama aixcüma ixĩxü̃ rü taxuwama mexü̃! Rü nümagü rü tama Cristuchigaxü̃ nixugü, natürü pexü̃ nangúexẽẽchaü̃ i ngẽma nũxcümaü̃güxü̃ i nacümagü ga duü̃xü̃gü nagu ĩxü̃ rü ngẽma ngu̱xẽẽtaegü i ñoma i naanearü ixĩxü̃. Natürü nüma ya Cristu rü Tupanaxü̃chi nixĩ rü guxü̃ma i Tupanaarü pora rü Cristuwa nangẽxma.

Efesios 4:14

Rü taũtáma ñoma buxü̃gürüxü̃ tixĩgü i tórü õwa. Rü ngẽxguma ta̱xacürü to i ngu̱xẽẽtaexü̃ ixĩnüegu rü taxũtáma naga taxĩnüe nax tama ñoma buanecü ngextámare cuecürüxü̃ tüxü̃ yaxĩgüxẽẽxü̃ca̱x. Rü taxũtáma nawe tarüxĩ i ngẽma duü̃xü̃gü i norü doramaxã tüxü̃ womüxẽẽgüxü̃ rü norü ngu̱xẽẽtaemaxã tüxü̃ ítüexẽẽchaü̃xü̃.

1 Corintios 15:58

Rü ngẽmaca̱x, Pa Chauenexẽgü ya Pexü̃ Changechaü̃güxex, rü name nixĩ i mea peyaxõgüama rü taguma ípenata̱x i Tupanaarü ore. Rü name nixĩ i guxü̃guma mea penaxü i tórü Coriarü puracü, erü pema nüxü̃ pecua̱x rü ngẽma puracü i nüxü̃́ pexüxü̃, rü tama natüca̱xma nixĩ.

1 Corintios 10:12

Rü ngẽmaca̱x ya yíxema tügügu rüxĩnüxe nax tamexü̃, rü name nixĩ nax mea tügüna tadauxü̃ nax tama chixexü̃gu tanguxü̃ca̱x.

Ore i mexü̃ ga Matéu ümatüxü̃ 7:15

Rü naxca̱x pexuãẽgü i ngẽma dorata̱a̱xgüxü̃ i nügü ixugünetaxü̃ nax Tupanaarü orearü uruü̃gü yixĩgüxü̃. Erü nümagü rü ñoma carnérugü i tama ãũcümaxü̃rüxü̃ pepe̱xewa nügü nixĩgüxẽxẽ, natürü norü ĩnüwa rü ñoma dauxchitacüã̱x i airugü i düraexü̃rüxü̃ nixĩgü.

Romanos 16:18

Erü ngẽma duü̃xü̃gü rü tama tórü Cori ya Ngechuchu ya Cristuarü ngúchaü̃ naxügü, natürü noxrütama ngúchaü̃ nixĩ i naxügüxü̃. Norü dexa ga maixcuraxü̃maxã nayaxucu̱xẽgü i duü̃xü̃gü, rü ngẽmaãcü nanawomüxẽẽgü i ngẽma duü̃xü̃gü i tama mea nüxü̃ cua̱xgüxü̃.

Ucu̱xẽgüchiga 1:17

Natüca̱xmamare werigüca̱x tanaxü i wüxi i toxyepe̱xeruxü̃ ega ngẽma werigü nüxü̃ daugüamagu.

Norü taxre ga popera ga Timutéuca̱x naxümatüxü̃ ga Pauru 4:15

¡Mea cugüna nadau nax tama guxchaxü̃ cuxca̱x ínanguxẽẽxü̃ca̱x! Erü poraãcü naxchi naxai i Tupanaarü ore i nüxü̃ ixugüxü̃.

2 Corintios 11:3

Natürü chaxoegaãxẽ erü yema ãxtape norü doramaxã Ébaxü̃ nawomüxẽẽxü̃rüxü̃, ngürüãchi tá ta texé pexü̃ tawomüxẽxẽ nax nüxü̃ perüxoexü̃ca̱x nax Cristugu perüxĩnüexü̃ rü naxca̱xicatama nax pemaxẽxü̃.

Ore i mexü̃ ga Matéu ümatüxü̃ 16:6

Rü yexguma ga Ngechuchu rü ñanagürü nüxü̃: —¡Dücax, pexuãẽgü naxca̱x i Parichéugüarü rü Chaduchéugüarü paũarü pu̱xẽẽruxü̃! —ñanagürü.

Ngechuchuarü ngúexü̃gü ga yamugüxü̃arü puracüchiga 2:42

Rü yema yexwacax yaxõgüxü̃ rü guxü̃guma inarüxĩnüe ga yema ngúexü̃gü ga Ngechuchu imugüxü̃arü ngu̱xẽẽtae. Rü mea nügümaxã nangaugü ga norü yemaxü̃gü. Rü guxü̃guma nayumüxẽgüxü̃ rü chibüca̱x nangutaque̱xegüxü̃.

Ore i mexü̃ ga Matéu ümatüxü̃ 16:11

¿Rü ñuxãcü nixĩ i tama nüxü̃ pecuáxü̃ i tama paũchiga nax chidexaxü̃ i ngẽxguma ñachagu: “¡Pexũãẽgü naxca̱x i Parichéugüarü rü Chaduchéugüarü paũarü pu̱xẽẽruxü̃!” ñachagu? —ñanagürü ga Ngechuchu.

Yema Cuáü̃ nüxü̃ dauxü̃ i yixcüra tá ngupetüxü̃chiga 2:5

¡Rü ngẽmaca̱x nüxna nacua̱xãchi i ngẽma chixexü̃ i cuxüxü̃ rü Tupanaca̱x nataegu rü wenaxarü noxrirüxü̃ nüxü̃ nangechaxü̃! Natürü ngẽxguma chi tama nüxü̃ curüxoxgu i curü chixexü̃, rü paxa tá cuxü̃ íchayadau, rü tá nachicawa cuxna chanayaxu i curü omüarü üruxü̃ ega tama Tupanaca̱x cutaegu̱xgu.

Nüxíraxü̃xü̃ ga popera ga Pedru ümatüxü̃ 5:9

¡Rü peporaeama rü peyaxõgüama i ngẽxguma ta̱xacürü chixexü̃gu pexü̃ nayixẽẽchaü̃gu! Erü nüxü̃ pecua̱x rü guxü̃ma i taenexẽgü i guxü̃wama ngẽxmagüxü̃ rü pexrüxü̃ ngẽmatama ngúxü̃ ningegü.

Colosenses 2:5

Rü woo tama petanüwa nax changexmaxü̃, natürü chauãẽwa rü poraãcü pegu charüxĩnü. Rü wüxi i chorü taãxẽ nixĩ nax nüxü̃ chacuáxü̃ nax mea pegümaxã ipecuáxü̃ rü tama nüxü̃ perüxoexü̃ nax Cristuaxü̃́ peyaxõgüxü̃.

Filipenses 3:2

¡Rü pegüna peda̱u̱x nüxna i ngẽma duü̃xü̃gü i chixexü̃gu maxẽxü̃, rü ngẽma orearü uruü̃güneta, rü ngẽma nüxü̃ ixuxü̃ rü ngẽxguma tama yigü íiwíecha̱xmüxü̃pe̱xechiraü̃gu rü taxucürüwama Tupanape̱xewa time!

Ore i mexü̃ ga Cuáü̃ ümatüxü̃ 16:4

Rü pemaxã nüxü̃ chixu i ñaa ore i ñu̱xmax, nax nüxna pecua̱xãchiexü̃ca̱x i ngẽxguma tá ngẽmaãcü pexü̃ nangupetügu. Noxri rü tama pemaxã nüxü̃ chixu i ñaa ore, yerü petanüwa chayexma.

Gálatas 5:4

Rü pema i nagu rüxĩnüexe nax Tupanape̱xewa pimexü̃ ega nagu pexĩxgu i ngẽma mugü, rü pemaxã nüxü̃ chixu rü marü Cristuna pixĩgachi. Rü ngẽxgumarüxü̃ ta nüxü̃ pexoe i ngẽma ngechaü̃ ga Tupana namaxã pexü̃ ngechaü̃xü̃.

Norü taxre ga popera ga Pedru ümatüxü̃ 2:7

Natürü Tupana nanamaxẽxẽ ga Lox ga wüxi ga yatü ga mecü ixĩcü ga poraãcü ngechaü̃cü ga yexguma nüxü̃ nada̱u̱xgu ga ñuxãcü chixexü̃ naxügüxü̃ ga yema duü̃xü̃gü ga natanüwa nayexmaxü̃.

Norü taxre ga popera ga Pedru ümatüxü̃ 3:1

Pa Chauenexẽgü ya Pexü̃ Changechaü̃güxe, ñaa nixĩ i ngẽma norü taxre i popera i pexca̱x chaxümatüxü̃. Rü ñaa taxre i poperawa wena pexü̃ chixucu̱xẽgü nax mea Tupanaarü oregu perüxĩnüexü̃ca̱x.