Norü taxre ga popera ga Pedru ümatüxü̃ 2:21 - Tupanaarü Ore

²¹ Erü ngẽxguma chi tanayauxgügu i ngẽma ore i mexü̃ ga marü tayauxgüxü̃, rü ñu̱xũchi nüxü̃ tarüxoegu, rü narümemae chi nixĩ ga noxtacüma taxũchima nüxü̃ nax tacua̱xgüxü̃ i ngẽma ore i üünexü̃ i noxri tüxna ãxü̃.

Norü taxre ga popera ga Pedru ümatüxü̃ 2:21 Referans Kwoze

Echequié 18:24

Natürü ngẽxguma chi wüxi i duü̃xü̃ i mea maxchiréxü̃ nüxü̃ rüxoxgu nax mea namaxü̃xü̃, rü naxüãxgu i guxü̃ma i chixexü̃ i tama namaxã chataãẽxü̃ ¿rü namexü̃ yixĩxü̃ nax tama napoxcuxü̃? Rü pemaxã nüxü̃ chixu rü tá napoxcu. Rü guxü̃ma ga yema mexü̃ ga noxri naxüxü̃ rü choma rü tá nüxü̃ icharüngüma. Rü nüma rü tá nayu nagagu i ngẽma norü chixexü̃gü. Rü choma ya Cori ya Tupana nixĩ i ngẽma ñachaxü̃.

Popera ga Chantiágu ümatüxü̃ 4:17

Yíxema nüxü̃ cuáxe nax mexü̃ taxüxü̃, natürü tama naxǘxe, rü pecadu taxü.

Echequié 3:20

Rü ngẽxguma chi wüxi i duü̃xü̃ i noxri mea maxü̃xü̃ rü nüxü̃ naxoxgu nax mea namaxü̃xü̃ rü poxcu namaxã chaxueguxgu rü ngẽxguma cuma rü tama cunaxucu̱xẽgu rü nüma rü norü chixexü̃gu tá nayu. Rü yema mexü̃ ga noxri naxüxü̃ rü taxũtáma chope̱xewa ínanapoxü̃. Rü nüma rü norü chixexü̃gagu tá nayuama, natürü i choma rü tá cuxna naxca̱x chaca i ngẽma duü̃xü̃ erü tama cunaxucu̱xẽ.

Ore i mexü̃ ga Luca ümatüxü̃ 12:47

Rü ngẽma coriarü duü̃xü̃ i nüxü̃ cua̱xchiréxü̃ nax ta̱xacü nanaxwa̱xexü̃ i norü cori, natürü tama yanguxẽẽxü̃ rü tama norü coriga ĩnüxü̃, rü tá poraãcü nanacua̱xi.

Ore i mexü̃ ga Cuáü̃ ümatüxü̃ 15:22

Rü ngẽxguma chi choma tama namaxã chanango̱xẽẽgu nax chixri namaxẽxü̃, rü taxũchima nüxü̃ nacua̱xgü ga pecadu nax naxügüxü̃. Natürü ñu̱xma namaxã nüxü̃ nax chixuxü̃ nax chixri namaxẽxü̃, rü ngẽmaca̱x i ñu̱xma rü taxuacüma nüxü̃ nixugü nax yangearü pecaduã́xü̃.

1 Tesalonicenses 4:2

Pema rü marü nüxü̃ pecua̱x ga yema torü ucu̱xẽgü ga tórü Cori ya Ngechuchu toxü̃ muxü̃ nax pexü̃ tangúexẽẽxü̃ca̱x.

Ore i mexü̃ ga Cuáü̃ ümatüxü̃ 9:41

Rü Ngechuchu nanangãxü̃ rü ñanagürü nüxü̃: —Ngẽxguma chi ngexetügüxü̃ pixĩgügu rü taxũchima pegagu nixĩ nax pepecaduã̱xgüxü̃. Natürü ngẽma nax pegü pixuxü̃ nax pidauuchixü̃ rü ngẽmaca̱x pegagutama nixĩ nax pepecaduã̱xgüxü̃ —ñanagürü.

Chofonía 1:6

Rü ngẽxgumarüxü̃ tá ta ichayanaxoxẽxẽ i ngẽma duü̃xü̃gü i choxna ixĩgachixü̃, rü tama cha̱u̱xca̱x daugüxü̃ rü tama choxna cagüexü̃ ega ta̱xacü nanaxwa̱xegügu —ñanagürü tá.

Ore i mexü̃ ga Matéu ümatüxü̃ 21:32

Yerü Cuáü̃ ga báiü̃xẽẽruxü̃ rü núma naxũ nax pemaxã nüxü̃ yaxuxü̃ca̱x nax ñuxãcü tá pemaxẽxü̃, natürü ga pema rü tama nüxü̃́ peyaxõgü. Natürü ga yema yatügü ga Rómaarü ãẽ̱xgacüca̱x diẽru ngĩxü̃ dexü̃ rü yema ngexü̃gü ga naxü̃nemaxã taxexgüxü̃ rü Cuáü̃axü̃́ nayaxõgü. Natürü ga pema rü woo nüxü̃ nax pedaugüxü̃ nax yaxõgüãxü̃, rü tama nüxü̃ perüxoechaü̃ i pecüma i chixexü̃ nax peyaxõgüxü̃ca̱x —ñanagürü.

Ucu̱xẽgüchiga 16:31

Ngẽma nax ípuxyaexü̃, rü ñoma wüxi i nga̱xcueruxü̃ i mexü̃rüxü̃ nixĩ, rü ngẽmawa nango̱x nax Tupanape̱xewa namexü̃ i tacüma.

Romanos 7:12

Natürü yema mugü rü aixcüma naxüüne i Tupanape̱xewa. Rü guxü̃ma i ngẽma Tupana tamaxã nüxü̃ ixuxü̃ rü naxüüne rü nixaixcüma rü name.

Echequié 23:13

Rü nüxü̃ chicua̱xãchi nax ngĩma rü ta ngĩgü naxãũãchixü̃ rü naxca̱x nadauxü̃taexü̃ ga ngĩeya̱xcüma.

Ucu̱xẽgüchiga 12:28

Ngẽma mexü̃ i nacümagü, rü maxü̃wa tüxü̃ naga, natürü ngẽma chixexü̃ i nacümagü, rü yuwa tüxü̃ naga.

Wiyaegü 125:5

Natürü ngẽma duü̃xü̃gü i chixexü̃ i nacümagu ĩxü̃ ¡rü poxcu namaxã naxuegu! Erü ngẽmatama nixĩ i woetama naxca̱x ixĩxü̃ i ngẽma chixexü̃ ügüxü̃. ¡Rü Iraétanüxü̃na naxã i taãxẽ!

Wiyaegü 85:8

Rü ñu̱xma rü tá icharüxĩnü i ngẽma nüxü̃ yaxuxü̃ ya Cori ya Tupana erü norü duü̃xü̃gü i naga ĩnüexü̃maxã tá nüxü̃ nixu nax marü namaxã inangüxmüxü̃. Natürü tama nanaxwa̱xe nax wena norü chixexü̃ca̱x nawoeguxü̃.

Echequié 33:13

Rü ngẽxguma chi choma ya Cori ya Tupana rü maxü̃ namaxã chixuxgu i wüxi i yatü i mea maxü̃xü̃ rü nüma rü norü mecümagu yaxõõgu natürü chixexü̃ naxü̱xgu, rü choma rü taxũtáma nüxü̃́ nüxna chacua̱xãchi ga yema mexü̃ ga nacüma ga ü̃paacü naxüxü̃. Rü ngẽma chixexü̃ i naxüxü̃gagu tá nayu.

Gálatas 6:2

¡Rü ngẽxguma texé petanüwa guxchaxü̃gü tüxü̃́ ngẽxmagu, rü pegü perüngü̃xẽxẽgü! Erü ngẽmaãcü tá peyangu̱xẽxẽ i ngẽma Cristu pexü̃ muxü̃.

Popera ga Yudíugü ga yaxõgüxü̃ca̱x ümatüxü̃ 10:26

Erü ngẽxguma chi Cristuaxü̃́ tayaxõchire̱xgu rü ñu̱xũchi tórü ngúchaü̃maxã pecadu taxüechagu, rü marü nataxuma i ãmare íyaxüxü̃ i tórü pecaduarü ütanüruxü̃.

Norü taxre ga popera ga Pedru ümatüxü̃ 3:2

Rü chanaxwa̱xe i nüxna pecua̱xãchie i ngẽma ore ga nũxcümaü̃güxü̃ ga Tupanaarü orearü uruü̃gü ga ixüünexü̃ nüxü̃ ixugügüxü̃. Rü ngẽxgumarüxü̃ ta chanaxwa̱xe i nüxna pecua̱xãchie i ngẽma tórü Cori ya Ngechuchu ya tórü Maxẽxẽẽruü̃arü mugü ga pexü̃ nangúexẽẽxü̃ ga norü orearü uruü̃gü ga nüma pexü̃tawa namugüxü̃.

Popera ga Yúda ümatüxü̃ 1:3

Pa Chauenexẽgü ya Pexü̃ Changechaü̃güxex, noxri rü poraãcü choxü̃́ nangúchaü̃ nax pexca̱x chanaxümatüxü̃ nachiga i ngẽma maxü̃ i taguma gúxü̃ i pema rü choma tüxü̃́ ngẽxmaxü̃. Natürü ñu̱xma rü chauãẽwa ínangu nax namexü̃ nax pexca̱x chanaxümatüxü̃ nax pexü̃ chaxucu̱xẽxü̃ca̱x rü ípenapoxü̃xü̃ca̱x i ngẽma ore i aixcüma ixĩxü̃ ga nũxcüma wüxicanatama Tupana norü duü̃xü̃güna ãxü̃.