Norü taxre ga popera ga ãẽ̱xgacügüchiga 7:4 - Tupanaarü Ore

⁴ Rü ngẽxguma chi ĩanegu ichocuxgu rü chi tayue erü ngéma aixepewa rü poraãcü taiya nangu̱x. Rü ngẽxguma chi nua rütogüechagu rü ngẽxgumarüxü̃ chitama tayue. Rü ngĩxã rü Chíriaarü churaragü íngẽxmagüxü̃wa taxĩ. Rü ngẽxguma taxũtáma tüxü̃ nadaixgu rü tá tamaxẽ. Rü ngẽxguma tüxü̃ nadaixgu rü tayueama tátama —ñanagürügü.

Norü taxre ga popera ga ãẽ̱xgacügüchiga 7:4 Referans Kwoze

Yeremía 14:18

Rü ngẽxguma tá naanewa chaxũxgu, rü tá nüxü̃ chadau i ngẽma daigu yuexü̃ i duü̃xü̃gü. Rü ngẽxguma ĩanegu chaxücugu, rü tá nüxü̃ chadau i duü̃xü̃gü i taiyamaxã iyuetanüxü̃. Rü woo ngẽma orearü uruü̃gü, rü ngẽma chacherdótegü rü wüxi i nachixü̃ane i tama nüxü̃ nacua̱xgüxü̃wa tá nanagagü” —ñanagürü.

Yoná 3:9

Rü bexmana ngẽxguma ya Tupana rü tá nüxü̃́ ingechaü̃tümüxü̃gü rü tá narüngüxmü nax tamaxã nanuxü̃, rü taxũtáma tüxü̃ nadai —ñanagürügü.

Yeremía 8:14

Rü ngẽma duü̃xü̃gü rü ñanagürügü tá: —¿Rü ta̱xacüca̱x nuatama tangexmagü? ¡Ngĩxã rü yima ĩanegü ya ípoxegugünewa taxĩ i guxãma i yixema nax ngẽxma wüxicana tüxü̃ nada̱i̱xü̃ca̱x! Rü nüma ya Cori ya tórü Tupana rü dexá i üxü̃chiüxü̃wa tá tüxü̃ nixaxexẽẽgü, rü ngẽmaãcü tá tüxü̃ nadai, erü nape̱xewa chixexü̃ taxügü.

Ester 4:16

—¡Ẽcü ngéma naxũ rü nangutaque̱xexẽxẽ i guxü̃ma i Yudíugü i Chúchawa ngẽxmagüxü̃ nax cha̱u̱xca̱x aureãcü nayumüxẽgüxü̃ca̱x! ¡Rü tomaepü̱x i ngunexü̃ rü tomaepü̱x i chütaxü̃ rü taxuxü̃táma ta̱xacü nangõ̱xgü rüe̱xna ta̱xacü nixaxgü! Rü chomax, rü namaxã i chauxü̃taxü̃gü rü ngẽmaãcü tátama tanaxügü. Rü ngẽmawena rü tá ãẽ̱xgacüxü̃tawa íchayadau woo nachu̱xu nax texé ngéma ũmarexü̃ tama tümaca̱x nangemayane. Natürü tá ngéma chaxũama rü nüetama ega woo chayu̱xgu —ngĩgürügü.

2 Chamué 14:14

Rü aixcüma nixĩ nax guxãtáma yuexü̃. Erü tórü maxü̃ rü ñoma dexá i waixü̃müanegu baxü̃rüxü̃ nixĩ nax taxucürüwama wena nayaxuxü̃. Natürü nüma ya Tupana rü taxúenama nanayaxu i maxü̃, natürü tüxü̃́ nanatauxchaxẽxẽ nax tataeguxü̃ca̱x ya yíxema nüxna yáxü̃guxe.

Popera ga Yudíugü ga yaxõgüxü̃ca̱x ümatüxü̃ 9:27

Rü ngẽxgumarüxü̃ nax wüxicanatama nayuexü̃ i duü̃xü̃gü rü ngẽmawena Tupana tá nüxü̃ nicagü, rü yexgumarüü̃tama ga Cristu rü wüxicanatama nügü inaxã rü nayu nax naxütanüxü̃ca̱x i muxü̃ma i duü̃xü̃güarü pecadugü. Rü nüma ya Cristu rü wena tá núma naxũ, natürü tama pecaduarü ütanüwa. Rü tá núma naxũ nax namaxẽxẽẽãxü̃ca̱x i guxü̃ma i duü̃xü̃gü i aixcüma ínangu̱xuxẽẽgüxü̃.

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 12:19

Rü yexgumarüxü̃ ta ga ñuxre ga Manachétanüxü̃ rü Dabíwa nachoü̃ ga yexguma Firitéugütanüwa nayexmagu nax Chaúmaxã nügü nada̱i̱xü̃ca̱x. Natürü nüma ga yema Firitéugüarü churaramaxã icua̱xgüxü̃ rü tama nanaxwa̱xe nax Dabí rü norü churaragümaxã Firitéugütanügu naxãgüxü̃ ga yema daiwa. Rü yemaca̱x ñanagürügü: —Dabí rü ngürüãchi tá tüxü̃ nadai, rü ngẽmawena rü tá norü ãẽ̱xgacü i Chaúca̱x nataegu —ñanagürügü.

Norü taxre ga popera ga ãẽ̱xgacügüchiga 6:24

Rü yemawena nüma ga Chíriaarü ãẽ̱xgacü ga Ben-adáxü̃ rü nananutaque̱xe ga norü churaragü rü Chamáriaca̱x ínayaxüãchi. Rü guma ĩanexü̃ ínachomaeguãchi nax yemaacü namaxã nügü nada̱i̱xü̃ca̱x.

Norü taxre ga popera ga ãẽ̱xgacügüchiga 7:5

Rü yexguma noxri nachütagu rü inachigü rü Chíriaarü churaragü íyexmagüxü̃wa naxĩ. Natürü yexguma yangaicagügu rü nüxü̃ nicua̱xãchitanü rü marü taxuxü̃ma yéma yaxüxü̃.