Norü taxre ga popera ga ãẽ̱xgacügüchiga 24:3 - Tupanaarü Ore

^3-4 Rü yema guxchaxü̃ naxca̱x ínangu ga yema Yudáanecüã̱xgü, yerü nüma ga Cori ya Tupana rü marü namaxã nanaxuegu nax nügüpe̱xewa ínawoxü̃ãxü̃ca̱x nagagu ga yema chixexü̃gü ga Manaché üxü̃. Yerü nanadai ga muxü̃ma ga duü̃xü̃gü ga taxuxü̃ma ga chixexü̃ ügüxü̃, rü yemaacü nagü inabaxẽxẽ rü gumámaxã nanapáxẽxẽ ga Yerucharéü̃. Rü yema chixexü̃ ga Manaché üxü̃gagu nixĩ ga Cori ya Tupana ga tama nüxü̃́ nüxü̃ iyanangümaxü̃ ga norü chixexü̃gü.

Norü taxre ga popera ga ãẽ̱xgacügüchiga 24:3 Referans Kwoze

Norü taxre ga popera ga ãẽ̱xgacügüchiga 18:25

¿Cuma nagu curüxĩnügu nax ngüxrümare nua chaxũxü̃ i choma nax ñaa nachixü̃anewa pexca̱x íchayagoõchixü̃ rü pexü̃ chadaixü̃ca̱x, rü tama Cori ya Tupanaarü ngü̃xẽẽmaxã yixĩxü̃? Rü, dücax, nüma nixĩ i choxü̃ namuxü̃ nax pexca̱x íchayagoõchixü̃ nax pexü̃ chadaixü̃ca̱x” —ñanagürü.

Miquéa 2:10

¡Rü ẽcü ipechigü, Pa Ãẽ̱xgacügüx i Chixexü̃güx, rü ípechoxü̃ i nua! Rü daa ĩane rü taxũtáma nawa pengẽxmagüecha. Erü ngẽma chixexü̃ i nua pexüxü̃ rü nataxüchi, rü ngẽmaca̱x i guxü̃ma i ñaa ĩane rü tá inayarüxo.

Amúx 3:6

Rü ngẽxguma ĩanewa yacuegüãgu ya cornéta rü ngẽmawa duü̃xü̃gü nüxü̃ nacua̱x nax nangẽxmaxü̃ i ãũcümaxü̃. Rü ngẽxguma ta̱xacürü guxchaxü̃ ngupetügu i ĩanewa rü nüxü̃ tacua̱x nax Cori ya Tupana yixĩxü̃ i ngéma namuxü̃ i ngẽma guxchaxü̃.

Ichaía 45:7

Rü choma nixĩ ga chanango̱xẽẽxü̃ ga ngóonexü̃ rü waanexü̃. Rü choma nixĩ i íchananguxẽẽxü̃ i mexü̃ rü guxchaxü̃. Rü chomatama ya Tupana nixĩ i chanaxüxü̃ i guxü̃ma i ngẽma —ñanagürü.

Norü taxre ga to ga popera ga ãẽ̱xgacügüchiga ümatüxü̃ 25:16

Rü yexguma yemaxü̃ iyaxuxgu ga gumá Tupanaarü orearü uruxü̃, rü nüma ga ãẽ̱xgacü ga Amachía rü nanangãxü̃ga rü ñanagürü nüxü̃: —¿Rü texé cuxü̃ taxuneta nax ãẽ̱xgacüarü ucu̱xẽruxü̃ quixĩxü̃ca̱x? ¡Marütama i ngẽma nüxü̃ quixuxü̃! ¡Ẽ̱xna cunaxwa̱xe nax cuxü̃ yama̱xgüxü̃! —ñanagürü. Rü nüma ga gumá Tupanaarü orearü uruxü̃ rü marü tama nüxü̃ nica̱a̱xü̃chigü. Natürü nüxü̃ ñanagürü: —Choma rü nüxü̃ chacua̱x nax Tupana rü marü cumaxã naxueguãxü̃ nax cuyuxü̃ nagagu i ñaa cuxüxü̃ rü ngẽma nax tama cunayauxchaü̃xü̃ i chorü ucu̱xẽ —ñanagürü.

Norü taxre ga to ga popera ga ãẽ̱xgacügüchiga ümatüxü̃ 24:24

Rü woo nax noxretama yixĩxü̃ ga yema Chíriaanearü churaragü, natürü Cori ya Tupana rü nüxü̃́ nanatauxchaxẽxẽ ga yema noxremarexü̃ ga churaragü nax nada̱i̱xü̃ca̱x ga yema muxü̃ma ga Yudáanearü churaragü. Rü yemaacü nangupetü yerü nüma ga Yoá rü yema Yudátanüxü̃ rü tama Cori ya norü o̱xigüarü Tupanaga naxĩnüe. Rü yemaacü ga Yoá rü yema taxü̃ ga poxcu ga nümatama naxca̱x nadauxü̃maxã napoxcu.

Yochué 23:15

Natürü ngẽxgumarüxü̃ marü nax yangu̱xẽẽãxü̃ i guxü̃ma i ngẽma mexü̃ ga pemaxã inaxunetaxü̃, rü ngẽxgumarüxü̃ tá ta pexca̱x ínanangu̱xẽxẽ i naguxü̃raü̃xü̃ i guxchaxü̃ i ngẽxguma tama aixcüma naga pexĩnüegu ga yema norü uneta ga pemaxã nüxü̃ yaxuxü̃. Rü ngẽxguma ta̱xacürü tupananetagu perüxĩnüegu rü naxca̱x pemaxẽgu, rü nüma ya Cori ya Tupana rü tá pemaxã nanu, rü paxaxüchi tá pexü̃ inayarüxoxẽxẽ nawa i ñaa naane i mexü̃ i nüma pexna naxãxü̃. Rü bai tá ya wüxíe ípeyaxüxü̃ —ñanagürü ga Yochué.

Wenaxarü naxümatü ga Tupanaarü mugü 29:28

Rü yemaca̱x nixĩ ga Cori ya Tupana rü namaxã nanuxũchixü̃ rü nachixü̃anewa ínawoxü̃ãxü̃ rü to ga nachixü̃anegüwa namugüãxü̃. Rü yema nixĩ ga namaxã ngupetüxü̃ ga yema duü̃xü̃gü. Rü ñu̱xma rü ta rü ngẽmaãcü nixĩ”, ñanagürügü tá.

Wenaxarü naxümatü ga Tupanaarü mugü 28:63

Rü yexgumarüxü̃ nax Cori ya Tupana cutanüxü̃maxã taãẽxü̃ ga noxri rü mexü̃ naxca̱x naxüxü̃ rü yamuxẽẽãxü̃, rü ngẽxgumarüxü̃ ta norü taãxẽ tá nixĩ nax iyanaxoxẽẽãxü̃. Rü tá nawa ínanawoxü̃ i ngẽma naane i nawa tá nangẽxmagüxü̃.

Ínachoxü̃xü̃chiga 20:5

¡Rü taxũtáma ta̱xacürü naxchicüna̱xãpe̱xegu cucaxã́pü̱xü rü nüxü̃ quicua̱xüxü̃! Erü choma ya curü Cori ya Tupana ya poracü rü poraãcü cuxü̃ chinuxü̃, rü ngẽmaca̱x tümaarü chixexü̃ca̱x tá tüxü̃ chapoxcu ya yíxema chauxchi aixe, rü ñu̱xmata tümaxacügüwa, rü tümataagüwa chananguxẽxẽ i ngẽma poxcu.

Naanearü ügüchiga 50:20

Pema nagu perüxĩnüegu rü chixexü̃ chomaxã pexüxü̃, natürü Tupana rü mexü̃xü̃ nananguxuchixẽxẽ ga yema chixexü̃ ga chomaxã pexüxü̃. Rü yemaca̱x ãẽ̱xgacüxü̃ choxü̃ ningucuchixẽxẽ i nua nax ngẽmaãcü namaxẽxü̃ca̱x i muxü̃ma i duü̃xü̃gü.

Yeremía 32:31

Rü daa ĩane rü noxri inaxügügucürüwa rü ñu̱xmata ñoma i ngunexü̃wa nangu rü norü duü̃xü̃gü rü guxü̃guma poraãcü choxü̃ nanuxẽẽgü. Rü ngẽmaca̱x i choma rü tá chayanaxoxẽxẽ ya daa ĩane nagagu ga yema chixexü̃ ga naxügüxü̃ ga yema Iraéanecüã̱xgü rü Yudáanecüã̱xgü, rü norü ãẽ̱xgacügü, rü norü ngü̃xẽẽruü̃gü, rü norü chacherdótegü, rü norü orearü uruü̃gü, rü guxü̃ma i Yudáanearü duü̃xü̃gü rü Yerucharéü̃arü duü̃xü̃gü.

Yeremía 52:28

Rü yexguma 7 ga taunecü ãẽ̱xgacü yixĩxgu ga Nabucudonochó rü 3,023 nixĩ ga norü mu ga yema Yudátanüxü̃ ga Babiróniaanewa nagagüxü̃.

Echequié 24:6

Rü nüma ya Cori ya Tupana rü ñanagürü: —¡Wüxi i taxü̃ i ngechaü̃ nixĩ i cuxca̱x, Pa Máetatanüxü̃arü Ĩanex ya Yerucharéü̃x! Erü ngẽma curü chixexü̃ rü ñoma wüxi ya panera ya ãü̃cürüxü̃ nixĩ rü tama inayi i ngẽma curü ãũãchixü̃. ¡Rü ñu̱xmax i cumax, Pa Echequiéx, rü ínacuixü̃ i wüxichigü i ngẽma namachi ñu̱xmata nangeãcu ya yima panera!

Norü taxre ga popera ga ãẽ̱xgacügüchiga 17:18

Rü yemaca̱x ga Cori ya Tupana rü yema Iraéanecüã̱xgümaxã nanu, rü ínanawogü. Rü Yudáanecüã̱xgüxü̃tawaxicatama nayexma.

Norü taxre ga popera ga ãẽ̱xgacügüchiga 17:20

Rü yema naxügüxü̃gagu rü nüma ga Cori ya Tupana rü Iraétanüxü̃güxü̃ naxo, rü nanaxãneexẽxẽ. Rü ngĩ́ta̱xagüxü̃me̱xẽwa nanamugü. Rü yemaacü nüxna nixũgachi.

Norü taxre ga popera ga ãẽ̱xgacügüchiga 17:23

Rü yemaca̱x ga Cori ya Tupana rü düxwa Iraéanecüã̱xgüna nixũgachi, yema guxü̃ma ga norü orearü uruxü̃güwa nüxü̃ yaxuxü̃rüxü̃. Rü yemaacü ga yema Iraéanecüã̱xgü, rü Achíriaanewa nanagagü. Rü yexguma nachiga naxümatügu rü yématama nayexmagü.

Norü taxre ga popera ga ãẽ̱xgacügüchiga 21:16

Rü yema Manaché üxü̃ rü Tupanape̱xewa poraãcü nachixe, rü ñu̱xũchi yema duü̃xü̃gü ga Yudáanecüã̱xgüxü̃ namu nax nümagü rü ta naxügüãxü̃ ga yema chixexü̃gü. Rü naétü rü nüma ga Manaché rü Yerucharéü̃wa nanadai ga muxü̃ma ga duü̃xü̃gü ga taxuxü̃ma ga chixexü̃ ügüxü̃. Rü yemaacü ga guma ĩane rü nagümaxã nanapa.

Norü taxre ga popera ga ãẽ̱xgacügüchiga 24:20

Rü yemaca̱x ga nüma ga Cori ya Tupana rü ĩane ga Yerucharéü̃cüã̱xgümaxã rü Yudátanüxü̃maxã nanu rü nügüpe̱xewa ínanawoxü̃.

Echequié 22:3

Rü namaxã idexa ya yima ĩane rü namaxã nüxü̃ ixu rü choma ya Cori ya Tupana rü ñachagürü: “Pa Ĩane ya Yerucharéü̃x, paxa tá cuxca̱x ínangu i curü poxcu erü cuma rü cunadai i curü duü̃xü̃gü rü nüxü̃ quicua̱xüxü̃gü i ngẽma naxchicüna̱xãgü i cumatama cuxüxü̃.