Norü taxre ga popera ga ãẽ̱xgacügüchiga 21:3 - Tupanaarü Ore

³ Yerü wena nayamexẽẽgü ga yema tupananetagüarü ãmarearü guruü̃gü ga ma̱xpǘnetape̱xewa yexmagüxü̃ ga nanatü ga Echequía nagu pogüexü̃. Rü wena ínanaxüxü̃ ga Baáchicüna̱xãxarü ãmaregüarü guruxü̃. Rü Iraéanearü ãẽ̱xgacü ga Acáxrüxü̃ nanaxü ga wüxi ga Acheráchicüna̱xãxarü ãmaregüarü guruxü̃. Rü ñu̱xũchi nüxü̃ nicua̱xüxü̃ ga üa̱xcü, rü tauemacü rü woramacurigü.

Norü taxre ga popera ga ãẽ̱xgacügüchiga 21:3 Referans Kwoze

Norü taxre ga popera ga ãẽ̱xgacügüchiga 18:4

Rü nüma ga Echequía nixĩ ga duü̃xü̃güxü̃ namuxü̃ nax nagu napogüexü̃ca̱x ga yema nachicagü ga tupananetachicüna̱xãgü nawa yexmagüxü̃. Rü guma nutagü ga duü̃xü̃gü nüxü̃ icua̱xüü̃gücü rü íxraxü̃gu nanapo. Rü yema Acheráchicüna̱xãgü rü nayapuexẽxẽ. Rü nagu nabügüe ga yema ãxtapechicüna̱xã ga bróũchenaxca̱x ga Moiché üxü̃ ga Iraéanecüã̱xgü nape̱xewa pumarate̱xe igugüxü̃. Rü yema ãxtapechicüna̱xã rü Neucháü̃gu nanaxüéga.

Norü taxre ga popera ga ãẽ̱xgacügüchiga 17:16

Rü nüxü̃ narüxoe ga guxü̃ma ga norü Cori ya Tupanaarü mugü. Rü yemaca̱x nügüca̱x nanaxügü ga taxre ga wocaxacüchicüna̱xãgü ga úirunaxca̱x, rü nanaxügü ta ga tupananeta ga Acheráchicüna̱xãx. Rü naétü nüxü̃ nicua̱xüü̃gü ga üa̱xcü rü tauemacü rü woramacurigü rü ñu̱xũchi Baáchicüna̱xã rü ta.

Wenaxarü naxümatü ga Tupanaarü mugü 4:19

Rü ngẽxguma daxũ pedaugügu rü nüxü̃ peda̱u̱xgu ya üa̱xcü, rü tauemacü, rü ẽxtagü, rü guxü̃ma i daxũwa naigüxü̃ rü ¡taxṹ i pexü̃́ nangúchaü̃xü̃ nax nüxü̃ picua̱xüü̃güxü̃ca̱x! Erü nüma ya Cori ya perü Tupana rü guxü̃ma i duü̃xü̃gü i ñoma i naanewa maxẽxü̃ca̱x nixĩ i nango̱xẽẽãxü̃ i ngẽma daxũwa naigüxü̃.

Miquéa 6:16

Erü nagu pexĩ ga yema mugü rü nacümagü ga chixexü̃ ga nagu naxĩxü̃ ga ãẽ̱xgacügü ga Omrí rü Acáxtanüxü̃. Rü pema rü yema nümagü namaxẽxü̃ãcütama pemaxẽ. Rü ngẽmaca̱x, Pa Yerucharéü̃x, rü choma rü tá curü uanügüna cuxü̃ chaxã nax cugu napogüexü̃ca̱x. Rü ngẽma curü duü̃xü̃gü rü togü tá nüxü̃ nacugüe rü ãne tá ningegü —ñanagürü.

Yox 31:26

Rü woo nüxü̃ chadau nax poraãcü inabáxixü̃ ya üa̱xcü rü norü ngóonexü̃maxã iyanagoxü̃ ya tauemacü, natürü i chomax rü taguma bexma nüxü̃ chicua̱xü̃xü̃ rü taguma cho̱xme̱xmaxã nüxü̃ chachúxu.

Norü taxre ga to ga popera ga ãẽ̱xgacügüchiga ümatüxü̃ 34:3

Rü yexguma marü 8 ga taunecü ãẽ̱xgacü yixĩxgu rü woo nax nangextü̱xüxü̃ ga Yochía, rü inanaxügü nax nũxcümaü̃cü ga norü o̱xi ga Dabíarü Tupanaca̱x nadauxü̃. Rü yexguma marü 12 ga taunecü ãẽ̱xgacü yixĩxgu rü Yudáanewa rü Yerucharéü̃wa inanaxügü nax nagu napogüxü̃ ga yema nachicagü ga ma̱xpǘnegüwa yexmagüxü̃ ga nawa tupananetagüxü̃ yacua̱xüü̃güxü̃. Rü ínanawogü ga Acheráchicüna̱xãgü, rü yema togü ga naxchicüna̱xãgü rü yema naxchicüna̱xãgü ga bróũchewa naxügüxü̃.

Norü taxre ga to ga popera ga ãẽ̱xgacügüchiga ümatüxü̃ 32:12

¿Rü tama ẽ̱xna nüxü̃ pecua̱x nax Echequía rü nagu napogüexü̃ ga yema ngutaque̱xechicaxü̃gü rü yema ãmarearü guruü̃gü ga nawa Tupanaxü̃ picua̱xüü̃güxü̃? ¿Rü tama ẽ̱xna nüxü̃ pecua̱x nax nüma yixĩxü̃ ga namuaxü̃ ga Yudáanecüã̱x rü Yerucharéü̃cüã̱x nax wüxitama i ãmarearü guruü̃wa Tupanaxü̃ yacua̱xüü̃güxü̃ rü naxca̱x ínaguaxü̃ ga pumarate̱xe?

Norü taxre ga popera ga ãẽ̱xgacügüchiga 18:22

Rü ngẽxguma chi pema choxü̃ ñapegügu: ‘Toma rü torü Cori ya Tupanana nixĩ i tarüyoegüxü̃’, ñapegügu, ¿rü tü̱xcüü̃ ga Echequía rü nagu napogüxü̃ ga yema nachicagü ga nawa Tupanaca̱x nangutaque̱xegüxü̃ rü yema nachicagü ga nawa Tupanaca̱x yagugüxü̃ ga ãmaregü? ¿Rü ñu̱xũchi tü̱xcüü̃ Yudáanecüã̱xgüxü̃ rü Yerucharéü̃cüã̱xgüxü̃ namuxü̃ nax ngẽma Yerucharéü̃wa ngẽxmaxü̃ i ãmarearü guruü̃wa nüxü̃ yacua̱xüü̃güxü̃ca̱x ga Tupana?

Norü taxre ga popera ga ãẽ̱xgacügüchiga 8:27

Rü nüma ga Ocochía rü poraãcü nachixecüma yema norü o̱xi ga Acáxrüxü̃ rü Acáxtanüxü̃rüxü̃. Rü yemaca̱x ga yema Ocochía üxü̃ rü tama name ga Cori ya Tupanape̱xewa.

Norü taxre ga popera ga ãẽ̱xgacügüchiga 8:18

Natürü yema Iraéanearü ãẽ̱xgacügücüma ga chixexü̃gu nixũ rü ñu̱xũchi yema Acáxtaagücümagu nixũ yerü guxema naxma̱x rü Acáxacü tixĩ. Rü yemaacü ga yema naxüxü̃ rü Cori ya Tupanape̱xewa rü nachixe.

Nüxíraxü̃xü̃ ga popera ga ãẽ̱xgacügüchiga 18:26

Rü yemaacü ga nümagü rü nayayauxgü ga yema wocaxacü ga nüxna namugüxü̃. Rü nanamexẽẽgü rü pa̱xmamacürüwa inanaxügüe ga norü tupana ga Baána nax nacagüexü̃ rü ñu̱xmata tocuchiwa nangu. Rü ñanagürügü: —¡Toxü̃ nangãxü̃ga Pa Baáx! —ñanagürügü. Rü yema ãmarearü guruxü̃ ga naxügüxü̃xü̃ íniyuxeguãchitanücüü, natürü nataxuma ga ta̱xacü ga nangãxü̃güxü̃.

Nüxíraxü̃xü̃ ga popera ga ãẽ̱xgacügüchiga 18:21

Rü yexguma ga nüma ga Ería rü guxü̃ma ga duü̃xü̃gümaxã nidexa rü ñanagürü: —¿Ñuxguratáta i pemax i nüxü̃ perüxoexü̃ nax taxre i ĩnügu perüxĩnüexü̃? Rü ngẽxguma Cori ya Tupana rü aixcüma Tupana yixĩxgu ¡rü nawe perüxĩ! Rü ega Baá yixĩxgu ¡rü ngẽmawe perüxĩ! —ñanagürü. Rü nüma ga duü̃xü̃gü rü taxuxü̃maama nanangãxü̃gagü.

Wenaxarü naxümatü ga Tupanaarü mugü 16:21

Rü ngẽxguma Tupanaarü ãmarearü guruxü̃ pexü̱xgu nax tórü Cori ya Tupanaxü̃ picua̱xüü̃güxü̃ca̱x, ¡rü taxũtáma naxü̃tagu penaxü i tupananeta i Acheráchicüna̱xã! ¡Rü taxũtáma nügüétü penanugü ya nutagü nax namaxã petupanaã́xü̃ca̱x! Erü nüma ya Cori ya perü Tupana rü poraãcü ngĩmachi naxai.

Wenaxarü naxümatü ga Tupanaarü mugü 17:2

Rü ngürüãchi yima ĩanegü ya Tupana pexna ãxü̃negu tá nüxü̃ peyangau i wüxi i yatü rüe̱xna wüxi i ngexü̃ i naxüaxü̃ i ngẽma Tupana tama namaxã taãẽxü̃ rü nagu yanachixexẽẽxü̃ i Tupanaarü uneta nagagu nax ta̱xacürü tupananetaxü̃ yacua̱xüxüxü̃ rü nape̱xegu nacaxã́pü̱xü ngẽxgumarüxü̃ ya üa̱xcü rü tauemacü rü woramacurigü ya Tupana chu̱xuxü̃ nax nüxü̃ yacua̱xüü̃güxü̃.

Yeremía 7:30

Rü Cori ya Tupana rü ñanagürü: —Ngẽma duü̃xü̃gü i Yudátanüxü̃ rü taxü̃ i chixexü̃maxã choxü̃ nanuxẽẽgü. Rü daa chopatagu nananucu ga naxchicüna̱xãgü i nawa chanaxoégaxü̃. Rü yemaacü taxü̃ ga chixexü̃ rü ãũãchixü̃ chopatawa naxügü.

Norü taxre ga popera ga ãẽ̱xgacügüchiga 13:6

Natürü woo yemaacü Tupana nüxü̃ nax rüngü̃xẽẽxü̃, rü nagu namaxẽama ga yema pecadugü ga Yeruboáü̃ noxri Iraéanecüã̱xgüxü̃ nagu yixẽẽxü̃ ga yema natanüxü̃ ga Yeruboáü̃ ta nagu maxẽxü̃. Rü yema Iraéanecüã̱xgü nanaxügüama ga yema chixexü̃, rü tama inayanaxoxẽẽgü ga yema tupananeta ga Acheráchicüna̱xã ga Chamáriawa yexmaxü̃.

Ichaía 65:11

Natürü i pema rü choxna pixĩgachitanü, rü nüxü̃ perüngümae ya yima chopata ya ma̱xpǘne ya üünexü̃wa ngẽxmane. Rü ñu̱xũchi ngẽma tupananetagü i Gáx i mexü̃ ueguxü̃, rü Mení i chixexü̃ ueguxü̃, rü pema rü õna rü bínu nüxna pexãgü.