1 Corintios 8:3 - Tupanaarü Ore

³ Natürü ngẽxguma texé aixcüma Tupanaxü̃ ngechaü̃gu, rü Tupana rü tüxü̃ nacua̱x.

1 Corintios 8:3 Referans Kwoze

Ínachoxü̃xü̃chiga 33:17

Rü yexguma ga Cori ya Tupana rü nanangãxü̃ rü ñanagürü: —Ngẽma ñu̱xma nüxü̃ quixuxü̃ rü tá chanaxü, erü cugu chayaxõ rü marü cumaxã chataãxẽ. Rü aixcüma nixĩ i ngẽma cumaxã nüxü̃ chixuxü̃ —ñanagürü ga Cori ya Tupana.

Naúü̃ 1:7

Rü nüma ya Cori ya Tupana rü namecüma. Rü ngẽxguma guxchaxü̃ ínguxgu rü nüma nixĩ i tüxna nadauxü̃. Rü nüma rü tüxü̃ ínapoxü̃ ya yíxema nüxü̃́ yaxõgüxe.

Norü taxre ga popera ga Timutéuca̱x naxümatüxü̃ ga Pauru 2:19

Natürü Tupanaarü ore rü taguma inayarüxo rü taguma naxüchicüü. Rü ngẽma norü orewa rü ñanagürü: “Tórü Cori ya Tupana nüxü̃ nacua̱x i texé tixĩ ya norü duü̃xü̃gü ixĩgüxe. Rü guxãma ya yíxema nüxü̃ ixuxe nax Ngechuchu ya Cristu rü tümaarü Cori yixĩxü̃, rü name nixĩ i nüxna tixĩgachi i guxü̃ma i chixexü̃”, ñanagürü i ngẽma norü orewa.

1 Corintios 2:9

Rü ngẽmachiga nixĩ i Tupanaarü ore i ümatüxü̃wa i ñaxü̃: “Rü ngẽma duü̃xü̃gü i Tupanaxü̃ ngechaü̃güxü̃ca̱x, rü nüma nanamexẽxẽ i ta̱xacü i taxúema nüxü̃ dauxü̃, rü taguma texé nüxü̃ ĩnüxü̃, rü bai i texé nagu rüxĩnüxü̃”, ñaxü̃.

Gálatas 4:9

Natürü i ñu̱xma nax Tupanaxü̃ pecuáxü̃ rü nüma nax pexü̃ nacuáxü̃, rü ¿tü̱xcüü̃ wena naxca̱x pewoeguchaü̃ i ngẽma mugü i ñoma i naanemaxã icua̱xgüxü̃? ¿Rü tü̱xcüü̃ penaxwa̱xe nax wena natüü̃wa pegü pengẽxmagüxẽẽxü̃ i ngẽma mugü i tama aixcüma poraexü̃ i natüca̱xmamare ixĩgüxü̃?

Yema Cuáü̃ nüxü̃ dauxü̃ i yixcüra tá ngupetüxü̃chiga 2:19

Rü ñanagürü i nümax: “Choma nüxü̃ chacua̱x i guxü̃ma i ngẽma mexü̃ i cuxüxü̃. Rü nüxü̃ chacua̱x nax aixcüma cumücügüxü̃ cungechaü̃xü̃, rü meama choxü̃́ nax cuyaxõxü̃, rü nüxü̃ nax curüngü̃xẽẽxü̃ i ngẽma togü i yaxõgüxü̃, rü yáxna namaxã cuxĩnüxü̃ i guxchaxü̃gü. Rü nüxü̃ chacua̱x nax noxriarü yexera cunaxüxü̃ i ngẽma cuxü̃́ chanaxwa̱xexü̃.

Popera ga Chantiágu ümatüxü̃ 1:12

Rü tataãxẽ ya yíxema yáxna namaxã ĩnüxe i ngẽxguma ta̱xacü tüxna ĩnügu. Erü ngẽxguma yáxna namaxã taxĩnügu, rü Tupana tá tümamaxã nataãxẽ rü tá tüxna nanaxã i norü ãmare i maxü̃ i taguma gúxü̃. Rü ngẽma nixĩ i ãmare ya Tupana tümamaxã ixunetaxü̃ ya yíxema nüxü̃ ngechaü̃güxe.

Yeremía 1:5

—Yexguma taxũta cuxü̃ chango̱xẽẽgu rü woetama marü choma cuxü̃ chaxuneta. Rü naxü̃pa nax cubuxü̃ rü choma rü marü cuxü̃ chayaxu rü nachixü̃anegüarü orearü uruxü̃ cuxü̃ chixĩxẽxẽ —ñanagürü.

Ore i mexü̃ ga Cuáü̃ ümatüxü̃ 10:14

Choma nixĩ i carnérugüarü dauruxü̃ ya mecü chixĩxü̃. Rü ngẽxgumarüxü̃ ya Chaunatü nax choxü̃ nacuáxü̃ rü choma rü Chaunatüxü̃ nax chacuáxü̃, rü ngẽxgumarüxü̃ ta nüxü̃ chacua̱x i chorü carnérugü, rü nümagü rü choxü̃ nacua̱xgü. Rü choma rü naxca̱x chayu i chorü carnérugü.

Ore i mexü̃ ga Matéu ümatüxü̃ 7:23

Natürü ngẽxguma i choma rü tá ñachagürü nüxü̃: ‘Taguma pexü̃ chacua̱x nax chorü duü̃xü̃gü pixĩgüxü̃. ¡Rü choxna pixĩgachi i pema i chixexü̃arü üruü̃gü!’ ñachagürü tá.

Wiyaegü 1:6

Erü nüma ya Cori ya Tupana rü meama tüxna nadau ya yíxema aixcüma naga ĩnüexe, natürü ngẽma chixexü̃ i duü̃xü̃gü i tama naga ĩnüechaü̃xü̃ rü nagagutama poxcuwa naxĩ.

Nüxíraxü̃xü̃ ga popera ga Cuáü̃ ümatüxü̃ 4:19

Rü yixema rü Tupanaxü̃ tangechaü̃gü, yerü nüma rü nüxíra tüxü̃ nangechaü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 2:9

Choma nüxü̃ chacua̱x i ngẽma cuxüxü̃ rü nüxü̃ chacua̱x nax ngúxü̃ quingexü̃. Rü nüxü̃ chacua̱x ta nax cungearü diẽruã́xü̃ i ñoma i naanewa, natürü daxũguxü̃ i naanewa cuxü̃́ nangẽxma i ngẽma taguma gúxü̃. Rü nüxü̃ chacua̱x nax chixri cuchiga yadexagüxü̃ i ngẽma duü̃xü̃gü i nügü ixugüxü̃ nax Yudíugü yixĩgüxü̃. Natürü i nümagü rü aixcüma Chatanáarü duü̃xü̃gümare nixĩgü.

Nüxíraxü̃xü̃ ga popera ga Pedru ümatüxü̃ 1:8

Pema rü Ngechuchu ya Cristuxü̃ pengechaü̃gü woo taguma nüxü̃ nax pedaugüxü̃. Rü ñu̱xma rü ta woo tama nüxü̃ pedaugü, natürü nüxü̃́ peyaxõgü, rü poraãcü petaãẽgü. Rü ngẽma perü taãẽmaxã rü pexü̃́ nataxuma i perü dexa nax ñuxãcü nüxü̃ pixugüxü̃ca̱x i ngẽma perü taãxẽ. Erü ngẽma perü õgagu marü penayauxgü i perü maxü̃ i taguma gúxü̃.

Ínachoxü̃xü̃chiga 33:12

Rü nüma ga Moiché rü Cori ya Tupanaxü̃ ñanagürü: —Dücax, cuma choxü̃ cumu nax ñaa duü̃xü̃gümaxã ichacuáxü̃ca̱x, natürü tama chomaxã nüxü̃ quixu nax texé tá chowe tüxü̃ curümuxü̃ nax choxü̃ taxümücüxü̃ca̱x. Rü ngẽxgumarüxü̃ ta chomaxã nüxü̃ quixu nax chaugu cuyaxõxü̃ rü ngẽmaca̱x chomaxã cutaãxẽ.

Wiyaegü 17:3

Rü cuma rü marü mea nüxü̃ cucua̱x i ngẽma chauãẽwa nagu charüxĩnüxü̃. Rü chütacü rü choxü̃ cuxü rü taxuxü̃ma i chixexü̃ chowa icuyangau. Rü nüxü̃ cucua̱x nax aixcüma yixĩxü̃ i ngẽma nüxü̃ chixuxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 2:13

Choma nüxü̃ chacua̱x nax yima ĩane ya Chataná namaxã icuáxü̃newa nax cumaxü̃xü̃. Natürü woo ngẽxma nax cuxãchiü̃xü̃, rü tama choxna quixũgachi. Rü woo yexguma chorü orearü uruxü̃ ga mecü ga Antípaxü̃ yama̱xgügu nagu ga guma ĩane ga nawa Chataná duü̃xü̃gümaxã icuáxü̃ne, rü tama nüxü̃ curüxo nax choxü̃́ cuyaxõõmaxü̃.

Ore i mexü̃ ga Cuáü̃ ümatüxü̃ 21:17

Rü norü tomaepü̱xcüna Pedruna naca, rü ñanagürü: —Pa Chimóü̃ Pa Cuáü̃ Nanex, ¿aixcümaxü̃chi yixĩxü̃ i choxü̃ cungechaü̃xü̃? —ñanagürü. Rü yexguma ga Pedru rü nangechaü̃, yerü norü tomaepü̱xcüna Ngechuchu nüxna naca rü aixcüma nüxü̃ nangechaü̃. Rü ñanagürü ga Pedru: —Pa Corix, cuma nüxü̃ cucua̱x i guxü̃ma. Rü cuma nüxü̃ cucua̱x nax aixcümaxü̃chi cuxü̃ changechaü̃xü̃ —ñanagürü. Rü Ngechuchu ñanagürü nüxü̃: —Ẽcü, ¡nüxna nadau i chorü duü̃xü̃gü i ñoma carnérugürüxü̃ ixĩgüxü̃!

Popera ga Chantiágu ümatüxü̃ 2:5

Pa Chauenexẽgü ya Pexü̃ Changechaü̃güxe, ¡Iperüxĩnüe i ñaa ore! Tupana tüxü̃ nade ya yíxema ñoma i naanewa ngearü diẽruã̱xgüxe, erü nanaxwa̱xe nax nüxü̃́ tayaxõgüxü̃ rü tanayauxgüxü̃ i ngẽma maxü̃ i taguma gúxü̃ i tümamaxã inaxunetaxü̃ ya yíxema nüxü̃ ngechaü̃güxe.

Romanos 11:2

Rü nũxcümamatama Tupana Iraétanüxü̃maxã inaxuneta nax norü duü̃xü̃gü yixĩgüxü̃ca̱x, rü ñu̱xma rü tama Yudíugüxü̃ naxo. ¿Tama ẽ̱xna nüxü̃ pecua̱x nax ñuxũ ñaxü̃ ga Tupanaarü orearü uruxü̃ ga Ería? Rü Tupanaarü orewa nüxü̃ tadaugü rü Ería rü Tupanape̱xewa poraãcü yema Yudíugüxü̃ nixugü.

Nüxíraxü̃xü̃ ga popera ga ãẽ̱xgacügüchiga 3:3

Rü nüma ga Charomóü̃ rü Cori ya Tupanaxü̃ nangechaü̃ rü nayanguxẽxẽ ga yema mugü ga nanatü ga Dabí nüxü̃ ixuxü̃. Natürü Cori ya Tupanaca̱x ãmare nadai rü pumarate̱xe ínagu nawa ga yema nachicagü ga ma̱xpǘnewa yexmagüxü̃.

Amúx 3:2

Rü ñanagürü: —Dücax, rü natanüwa i guxü̃ma i duü̃xü̃gü i ñoma i naanewa maxẽxü̃ rü pexü̃xicatama nixĩ ga chaxunetaxü̃ nax chorü duü̃xü̃gü pixĩgüxü̃ca̱x. Rü ngẽmaca̱x yexeraãcü tá pexna naxca̱x chaca i guxü̃ma ga yema chixexü̃ ga pexügüxü̃.

1 Corintios 13:12

Rü ngẽma ñu̱xma nüxü̃ idauxü̃ i Tupanachiga, rü ñoma wüxi i worua ya üxachametüxewa yigü idauxü̃rüxü̃ nixĩ nax taxca̱x naxẽxü̃. Natürü yixcüra rü tá aixcüma mea nüxü̃xüchi tadau ya Tupana. Rü ñu̱xma rü írarüwatama nüxü̃ chacua̱x i Tupanachiga. Natürü wüxi i ngunexü̃gu rü tá mea nüxü̃ chacua̱x i guxü̃ma i nachiga, ngẽma nüma ya Tupana choxü̃ nacuáxü̃rüxü̃.

Nüxíraxü̃xü̃ ga popera ga Cuáü̃ ümatüxü̃ 4:7

Pa Chauenexẽgü ya Pexü̃ Changechaü̃güxe, name nixĩ nax yigü ingechaü̃güxü̃, erü Tupanawa ne naxũ i ngẽma nax yigü ingechaü̃güxü̃. Rü guxãma ya yíxema tümaenexẽxü̃ ngechaü̃xe rü Tupanaxacü tixĩ rü Tupanaxü̃ tacua̱x.