1 Corintios 6:2 - Tupanaarü Ore

² ¿Tama ẽ̱xna nüxü̃ pecua̱x nax yixema nax yaxõgüxü̃ tá yixĩxü̃ i naanearü gu̱xgu nüxna icagüxü̃ i guxü̃ma i ñoma i naanecüã̱x i duü̃xü̃gü? Rü ñu̱xma nax pema tá yixĩxü̃ i ñoma i naanecüã̱x i duü̃xü̃güxü̃ picagüxü̃, ¿rü tü̱xcüü̃ taxucürüwa i pematama penamexẽxẽ i ngẽma perü guxchaxü̃gü i íxrachiréxü̃?

1 Corintios 6:2 Referans Kwoze

Ore i mexü̃ ga Matéu ümatüxü̃ 19:28

Rü Ngechuchu nanangãxü̃ rü ñanagürü nüxü̃: —Aixcüma pemaxã nüxü̃ chixu rü ngẽma ngunexü̃ ya Tupana nagu nangexwaca̱xü̃xẽẽxü̃ i guxü̃ma, rü Tupana Nane ya duü̃xü̃xü̃ ixĩcü rü norü tochica i mexẽchixü̃wa tá narüto. Rü pema i 12 i chorü ngúexü̃gü nax chowe perüxĩxü̃, rü pema rü tá ta pexü̃́ nangẽxma i perü tochicaxü̃ i chauxü̃tawa. Rü ngéma tá perütogü nax namaxã ipecuáxü̃ca̱x i ngẽma 12 i Iraétücumügü.

Ore i mexü̃ ga Luca ümatüxü̃ 22:30

Rü ngẽmaãcü ãẽ̱xgacü íchixĩxü̃wa rü chomaxã tá pechibüe rü tá pexaxegü. Rü ãẽ̱xgacügüca̱x ixĩxü̃ i toruü̃wa tá perütogü nax nüxna pecagüxü̃ca̱x i ngẽma 12 i Iraétücumügü —ñanagürü.

Danié 7:22

Rü yexguma yéma nangu ga guma Ãẽ̱xgacü ya Guxü̃guma Maxü̃cü rü Guxãétüwa Ngẽxmacü nax norü duü̃xü̃güxü̃ iyapoxü̃xü̃ca̱x. Yerü marü nawa nangu ga ngunexü̃ nax norü duü̃xü̃gü yapugüãxü̃ca̱x ga norü naane.

Yema Cuáü̃ nüxü̃ dauxü̃ i yixcüra tá ngupetüxü̃chiga 20:4

Rü ñu̱xũchi nüxü̃ chadau ga ñuxre ga tochicaxü̃gü. Rü yema tochicaxü̃wa tarütogü ga guxema Tupanaxü̃tawa nayauxgüxe ga pora nax duü̃xü̃güna naca̱xaxü̃ i norü maxü̃chiga. Rü yexgumarüxü̃ ta nüxü̃ chadau ga naãxẽgü ga yema duü̃xü̃gü ga Tupanaarü oreca̱x rü Ngechuchuchigaxü̃ nax yaxugüxü̃ca̱x nadaü̃naagüxü̃. Rü yema nixĩ ga duü̃xü̃gü ga tama yema ngo̱xoxü̃ icua̱xüü̃güxü̃ rü bai ga yema ngo̱xochicüna̱xãxü̃ icua̱xüü̃güxü̃, rü tama nügü ixãgüxü̃ nax nacatüwa rü ẽ̱xna naxme̱xwa yema ngo̱xoégamaxã yaxãégaxü̃. Rü nüxü̃ chadau ga wena nax namaxẽxü̃ ga yema duü̃xü̃gü, rü 1,000 ga taunecü Cristumaxã wüxigu ãẽ̱xgacügü nixĩgü.

Yema Cuáü̃ nüxü̃ dauxü̃ i yixcüra tá ngupetüxü̃chiga 3:21

Rü yíxema nüxü̃ rüporamaexe i chixexü̃, rü tá chaugüxü̃tawa tüxü̃ charütoxẽxẽ, yexgumarüxü̃ ga choma rü nüxü̃ nax charüporamaexü̃ ga chixexü̃, rü ñu̱xũchi Chaunatüxü̃tawa nax chayarütoxü̃rüxü̃’.

Danié 7:18

Natürü ngẽmawena rü Cori ya Tupana ya Guxü̃étüwa Ngẽxmacü rü tá norü duü̃xü̃güna nanaxã i pora nax norü naanemaxã inacua̱xgüxü̃ca̱x. Rü guxü̃gutáma norü nixĩ.

2 Corintios 4:18

Rü tama ngẽma ñu̱xma nüxü̃ idauxü̃gu nixĩ itarüxĩnüexü̃, natürü nagu tarüxĩnüe i ngẽma ñu̱xma tama nüxü̃ idauxü̃. Erü ngẽma ñu̱xma nüxü̃ idauxü̃ rü tama natai, natürü ngẽma ñu̱xma tama nüxü̃ idauxü̃, rü guxü̃gutáma nangẽxmaecha.

1 Corintios 6:4

Rü ngẽmaca̱x, ngẽxguma ta̱xacürü guxchaxü̃ pexü̃́ ngẽxmagu i petanüwa, ¿rü tü̱xcüü̃ i ngẽma ãẽ̱xgacügü i tama yaxõgüxü̃xü̃tawa pegü ípeyaxuaxü̃güxü̃ nax pexü̃́ namexẽẽgüãxü̃ca̱x i ngẽma?

Wiyaegü 49:14

Rü ngẽma yu nixĩ i namaxã icuáxü̃ i duü̃xü̃gü, erü naxmaxü̃wa nanagagü ñoma carnérugü i daiwa gagüxü̃rüxü̃. Rü duü̃xü̃gü rü napatagü ya imexẽchinearü yáxü̃gu rü naxmaxü̃gu tá niyixe i naxü̃negü. Natürü ngẽma ngunexü̃ i nagu yuwa ínadagüxü̃ i duü̃xü̃gü rü ngẽma mexü̃gu maxẽxü̃ rü tá ngẽma chixexü̃gu maxẽxü̃maxã inacua̱xgü.

1 Tesalonicenses 3:13

Rü tanaxwa̱xegü nax tórü Cori ya Ngechuchu pexü̃ rüngü̃xẽẽxü̃ nax peãẽwa aixcüma mea peyaxõgüxü̃ca̱x rü norü duü̃xü̃gü i aixcüma mexü̃gü nax pixĩgüxü̃ca̱x rü nax nataxuxü̃ca̱x i perü pecadugü i nape̱xewa ya Tanatü ya Tupana i ngẽxguma wena núma naxũxgu ya tórü Cori ya Ngechuchu ya Cristu namaxã i guxü̃ma i ngẽma Tupanaarü Duü̃xü̃gü i Üünexü̃. Rü ngẽmaãcü yixĩx.

Chacaría 14:5

Rü pema rü ngẽma ngategu tá pibuxmü nax pixüxü̃ca̱x. Erü ngẽma ngate rü tá nida ñu̱xmata Acháxwa nangu i norü tocüwawa ya yima ma̱xpǘne. Rü ngẽmaãcü tá pibuxmü naxrüxü̃ ga perü o̱xigü ga yexguma ĩã̱xãchianecha̱xwa nabuxmügu ga yexguma Uchía ãẽ̱xgacü ixĩxgu ga Yudáanewa. Rü Cori ya Tupana rü tá núma naxũ namaxã i guxü̃ma i ngẽma üünegüxü̃.

Romanos 6:16

Rü pema rü meama nüxü̃ pecua̱x rü ngẽxguma wüxi i corime̱xẽwa pegü pengẽxmagüxẽẽgu nax naga pexĩnüexü̃ca̱x rü pema rü norü mugüruxü̃ tá pixĩgü i ngẽma cori i naga pexĩnüexü̃. Rü ngẽxgumarüxü̃ ta nixĩ ega naga pexĩnüegu i ngẽma pecadu i yuwa pexü̃ gagüxü̃ rüe̱xna naga pexĩnüegu ya Tupana nax nape̱xewa pimexü̃ca̱x.

1 Corintios 1:20

Rü ñu̱xmax, Pa Chauenexẽgüx, ¿Tupanape̱xewa rü ta̱xacüwa namexü̃ i ngẽma duü̃xü̃gü i nüxü̃ cua̱xüchixü̃? ¿Rü ta̱xacüwa namexü̃ i ngẽma ngúexẽẽxruü̃gü i Moiché ümatüxü̃ i mugüwa ngu̱xẽẽtaegüxü̃? ¿Rü ta̱xacüwa namexü̃ i ngẽma duü̃xü̃gü i mea nüxü̃ cua̱xgüxü̃ i ñoma i naanearü cuáchigagu nax yadexagüxü̃? Erü guxü̃ma i ngẽma cua̱x rü duü̃xü̃gü nagu rüxĩnüemarexü̃ nixĩ, rü Tupanaca̱x rü taxuwama name.

1 Corintios 1:21

Natürü nüma ya Tupana ya guxü̃xü̃ma cuácü, rü tama nanaxwa̱xe nax ñoma i naanecüã̱x i duü̃xü̃güarü cua̱xgagu nax yixĩxü̃ i naxü̃tawa nangugüxü̃ i nümagü. Natürü nanaxwa̱xe nax ngẽma norü ore i mexü̃gagu nax yixĩxü̃ inamaxẽxẽẽãxü̃ i ngẽma duü̃xü̃gü i yaxõgüxü̃ woo ngẽma togü i duü̃xü̃güca̱x rü natüca̱xmamare yixĩxgu i ngẽma ore.