1 Corintios 3:6 - Tupanaarü Ore

⁶ Rü chauxü̃tawa nixĩ ga nüxü̃ pexĩnüexü̃ rü peyaxõgüxü̃ ga Tupanaarü ore ga noxrix. Rü Apóru nixĩ ga pexü̃ rüngü̃xẽẽcü nax yexeraãcü mea peyaxõgüxü̃ ga yema ore. Natürü Tupana nixĩ ga pexü̃ maxẽxẽẽcü.

1 Corintios 3:6 Referans Kwoze

Ucu̱xẽgüchiga 11:25

Yíxema toguxemaxã ngauxe i ngẽma tüxü̃́ ngẽxmaxü̃, rü yexera tá tüxü̃́ nangẽxma. Ngẽxgumarüxü̃ ta ya yíxema inaxãxẽ i ngẽma tüxü̃́ ngẽxmaxü̃, rü yexeraxü̃ tayaxu.

1 Corintios 1:30

Rü nümatama ga Tupana nixĩ ga Ngechuchu ya Cristuarü duü̃xü̃güxü̃ pexü̃ yaxĩgüxẽẽxü̃. Rü tatanüwa nanamu ga Cristu nax nüma rü Tupanaarü cua̱x taxca̱x yixĩxü̃ca̱x. Rü Cristugagu nixĩ nax Tupana tüxü̃ dexü̃ rü tüxü̃ yamexẽẽxü̃ nax nape̱xewa ixüünegüxü̃ca̱x rü pecaduwa ínguxü̃xü̃ca̱x.

1 Corintios 9:1

Pemaxã nüxü̃ chixu rü tórü Coritama nixĩ ya choxü̃ yaxucü rü choxü̃ mucü nax norü puracü chaxüxü̃ca̱x, rü ngẽmaca̱x taxuxü̃ma i duü̃xü̃güme̱xẽwa changexma i ñu̱xmax. Rü chomatama chauxetümaxã tórü Cori ya Ngechuchuxü̃ chadau, rü ngẽma puracü i nüxü̃́ chaxüxü̃gagu nixĩ i peyaxõgüxü̃ i pemax.

Ichaía 61:11

Rü ñoma naxchiregü waixü̃müwa rüxügünerüxü̃ rü ñoma wüxi i naanewa nanetü rüxügüxü̃rüxü̃ rü Tupana rü ngẽxgumarüxü̃ tá ta nanango̱xẽxẽ i nacüma i aixcüma mexü̃ nax guxü̃ma i nachixü̃anegüwa nüxü̃ yacua̱xüü̃güxü̃ca̱x.

Ngechuchuarü ngúexü̃gü ga yamugüxü̃arü puracüchiga 19:1

Rü yexguma Coríntiuwa nayexmayane ga Apóru, rü Pauru rü naxpü̱xanegu idaxü̃ ga namawa nixüpetü, rü Epéchiuwa nangu. Rü yexma nüxü̃ nayangau ga ñuxre ga yaxõgüxü̃.

Ngechuchuarü ngúexü̃gü ga yamugüxü̃arü puracüchiga 11:18

Rü yexguma yema orexü̃ naxĩnüegu ga yema yaxõgüxü̃ ga Yerucharéü̃cüã̱x, rü nachianegümare. Rü Tupanaxü̃ nicua̱xüü̃gü. Rü ñanagürügü: —Rü ngẽmawa nüxü̃ tacua̱x nax Tupana tüxü̃ dexü̃ ya yíxema woo tama Yudíugü ixĩgüxe. Rü ngẽxguma nüxü̃ tarüxoegu i tümaarü chixexü̃ rü Tupanaca̱x tadaugügu, rü nüma tüxna nanaxã i maxü̃ i taguma gúxü̃ —ñanagürügü.

1 Tesalonicenses 1:5

Rü yexguma pemaxã nüxü̃ tixuxgu ga Tupanaarü ore i tüxü̃ maxẽxẽẽxü̃, rü tama toechama tidexagümare, yerü Tupanaãxẽ ya Üünecü toxü̃ narüngü̃xẽxẽ nax Tupanaarü poramaxã pemaxã nüxü̃ tixuxü̃. Rü mea nüxü̃ tacuáãcüma pemaxã nüxü̃ tixu ga yema ore yerü toõxẽwatama nüxü̃ tacua̱x nax aixcüma yixĩxü̃. Rü pematama meama nüxü̃ pecua̱x nax aixcüma mea pepe̱xewa tamaxẽxü̃ nax yemaacü pexü̃ tarüngü̃xẽẽgüxü̃ca̱x.

Romanos 15:18

Rü ñu̱xma rü yema Cristu chowa üxü̃xicatama tá nixĩ i nüxü̃ chixuxü̃. Rü nüma nixĩ ga choxü̃ nangü̃xẽẽxü̃ nax Tupanaxü̃tawa chanagagüxü̃ca̱x ga yema duü̃xü̃gü i tama Yudíugü ixĩgüxü̃, nax nümagü rü ta Tupanaga naxĩnüexü̃ca̱x. Rü yemaacü chorü oremaxã, rü chorü puracümaxã, rü cua̱xruü̃gü ga taxü̃ ga Tupana üxü̃maxã, rü Naãxẽ ya Üünexü̃arü poramaxã Tupanaxü̃tawa chanagagü ga yema duü̃xü̃gü. Rü yemaacü Yerucharéü̃wa ichanaxügü rü guxü̃wama ñu̱xmata Ilíriaarü naanewa meama chayanguxẽxẽ nax nüxü̃ chixuxü̃ ga yema ore i tüxü̃ maxẽxẽẽxü̃ i Cristuchiga.

Ngechuchuarü ngúexü̃gü ga yamugüxü̃arü puracüchiga 21:19

Rü nüxü̃ narümoxẽ ga Pauru, rü ñu̱xũchi meama namaxã nüxü̃ nixu ga guxü̃ma ga yema Tupana nawa üxü̃ ga yexguma yema tama Yudíugü ixĩgüxü̃maxã nüxü̃ yaxuxgu ga Tupanaarü ore.

Ngechuchuarü ngúexü̃gü ga yamugüxü̃arü puracüchiga 18:24

Rü yexgumaü̃cüxü rü Epéchiuwa nangu ga wüxi ga Yudíu ga Apórugu ãégaxü̃. Rü nüma rü ĩane ga Areyandríacüã̱x nixĩ, rü nüxü̃́ natauxcha nax duü̃xü̃güpe̱xewa yadexaxü̃. Rü meama nüxü̃ nacua̱x ga Tupanaarü ore i ümatüxü̃.

Ngechuchuarü ngúexü̃gü ga yamugüxü̃arü puracüchiga 16:14

Rü yéma iyexma ga wüxi ga ngecü ga Lídia ga ngĩéga ga Tupanaxü̃ icua̱xüxü̃cü. Rü Tiatíra ga ĩanecüã̱x iyixĩ. Rü dauxracharaxü̃ ga naxchirumaxã itaxe yerü yema nixĩ ga ngĩrü puracü. Rü ngĩma rü meama yéma irüxĩnü, yerü nüma ga Cori ya Tupana rü ngĩxü̃́ nanangúchaü̃xẽxẽ nax mea inaxĩnüxü̃ca̱x ga yema ore ga Pauru nüxü̃ ixuxü̃.

Wiyaegü 127:1

Rü ngẽxguma chi tama Tupanaarü ngü̃xẽẽmaxã yixĩxgu nax naxüxü̃ ya wüxi ya ĩpata rü natüca̱xmamare chi nixĩ i nawa napuracüexü̃ i ngẽma norü üruü̃gü. Rü ngẽxguma chi nüma ya Cori tama nüxna nada̱u̱xgu ya wüxi ya ĩane rü natüca̱xmamare chi nixĩ i nüxna nadaugüxü̃ i ngẽma norü dauruü̃gü.

Wiyaegü 62:11

Tupana rü wüxi i orexü̃ nixu, rü choma rü marü taxree̱xpü̱xcüna nüxü̃ chaxĩnü i ngẽma ore. Cuma, Pa Corix, rü cupora rü aixcüma toxü̃ cungechaü̃. Rü yíxema mexü̃ ügüxe rü cuma rü tá tüxna cunaxã i ngẽma natanü i tüxna üxü̃. Natürü yíxema chixexü̃ ügüxe rü tá tanayaxu i ngẽma poxcu i tüxna üxü̃.

Wiyaegü 62:9

¿Rü ta̱xacüwa name i ngẽma nax nadiẽruã̱xgüxü̃ i duü̃xü̃gü rü ngẽma nax nangearü diẽruã̱xgüxü̃? Rü nümagü rü ngẽxguma chi wüxigu yáruü̃wa nangugügu, rü ñoma buanecürüxü̃ tama nayá.

Ngechuchuarü ngúexü̃gü ga yamugüxü̃arü puracüchiga 14:27

Rü yexguma ínangugügu ga Pauru rü Bernabé, rü nanangutaque̱xexẽxẽ ga guxü̃ma ga yema duü̃xü̃gü ga yaxõgüxü̃. Rü namaxã nüxü̃ nixugügü ga guxü̃ma ga ñuxãcü Tupana poraãcü nüxü̃ nax rüngü̃xẽẽxü̃. Rü yexgumarüxü̃ ta namaxã nüxü̃ nixugügü nax yaxõgüãxü̃ ga yema duü̃xü̃gü ga tama Yudíugü ixĩgüxü̃, yerü Tupana nüxü̃́ nanatauxchaxẽxẽ nax yaxõgüãxü̃ca̱x.

1 Corintios 1:12

Rü pemaxã nüxü̃ chixu i ngẽma erü ñuxre i pema rü ñaperügügü: “Choma rü Pauruwe charüxũ”, ñaperügügü. Rü togue rü: “Choma rü Apóruwe charüxũ”, ñaperügügü. Rü togue rü: “Choma rü Pedruwe charüxũ”, ñaperügügü. Rü togue rü: “Choma rü Cristuwe charüxũ”, ñaperügügü.

1 Corintios 3:7

Rü ngẽmaca̱x woo yíxema tüxíra duü̃xü̃gümaxã nüxü̃ ixuxe i Tupanaarü ore rü woo yíxema wixwena yexeraãcü duü̃xü̃güxü̃ ngúexẽẽ́xe, rü taxuxü̃ma tixĩgü. Natürü Tupana nixĩ ya guxü̃ma ücü, erü nüma nixĩ i duü̃xü̃güxü̃ namaxẽxẽẽxü̃.

1 Corintios 3:22

Rü ngẽmaca̱x i choma i Pauru, rü Apóru, rü Pedru rü ñoma i naane, rü tórü maxü̃, rü tórü yu, rü ngẽma ñu̱xma ngẽxmaxü̃ rü ngẽma yixcüra tá ngẽxmaxü̃, rü guxü̃ma i ngẽma rü pexrü nixĩ.

Efesios 3:17

Rü ngẽxgumarüxü̃ ta nüxna naxca̱x chaca nax perü õgagu pewa namaxü̃xü̃ca̱x ya Cristu. Rü nüxna chaca nax ngẽma Tupanaarü ngechaü̃ i pewa ngẽxmaxü̃ca̱x rü pema rü wüxigu guxü̃ma i yaxõgüxü̃maxã nüxü̃ pecuáxü̃ nax ñuxãcü nataxüchixü̃ i norü ngechaü̃ i namaxã tüxü̃ nangechaü̃xü̃ ya Cristu.