1 Corintios 3:10 - Tupanaarü Ore

¹⁰ Rü choma nixĩ ga Tupana choxü̃ muxü̃ nax chaxíra pemaxã nüxü̃ chixuxü̃ca̱x ga Cristuchiga. Rü togü nixĩ ga chowena yexeraãcü pexü̃ ngúexẽẽxü̃. Natürü guxãma ya texé ya naxǘxe i ñaa puracü rü name nixĩ i taxuãxẽ nax mea tanaxüxü̃ca̱x.

1 Corintios 3:10 Referans Kwoze

1 Corintios 3:11

Rü ngẽma puracü rü Ngechuchu ya Cristu nixĩ ga inaxügücü, rü ngẽmaca̱x taxucürüwama texé toguena tanaxü i ngẽma puracü ga noxri Ngechuchu ya Cristu ixügüxü̃.

Efesios 2:20

Pema rü ñoma wüxi ya ĩpata ya mexü̃nerüxü̃ pixĩgü. Rü yima ĩpata namaxã ixügüne nixĩ i norü ngu̱xẽẽtae ga yema ngúexü̃gü ga Tupana imugüxü̃ rü yema norü orearü uruü̃gü. Rü nüma ya Cristu nixĩ ya yimá nüxíraü̃cü ya nuta ga naétüwa inaxügücü ya yimá ĩpata.

Romanos 15:20

Rü yemaacü chapuracü nax nüxü̃ chixuxü̃ca̱x i Tupanaarü ore i mexü̃ i ngextá taguma ñuxgu Cristuchigaxü̃ ínaxĩnüexü̃wa ga duü̃xü̃gü. Erü tama chanaxwa̱xe nax marü togü nüxü̃ íxuxü̃wa rü duü̃xü̃gü marü nüxü̃ ícuáxü̃wa nüxü̃ chixuxü̃ i ngẽma ore. Erü tama chanaxwa̱xe i chayoxnie i togüarü puracü.

Danié 12:3

Rü ngẽma naãẽxü̃ icuáxü̃ i Tupanaga ĩnüexü̃ rü ñoma ngóonexü̃rüxü̃ tá nanangóonexẽẽgü. Rü ngẽma to̱xguexü̃ ngúexẽẽxü̃ nax Tupanawe tarüxĩxü̃ca̱x rü ñoma woramacurigürüxü̃ tá ngéma nanaitanü.

Ore i mexü̃ ga Matéu ümatüxü̃ 24:45

¿Rü texé tixĩxü̃ ya tümaarü coriarü duü̃xü̃ ya aixcüma yanguxẽẽ́xẽ rü tümaãẽxü̃ cuáxe? ¿Tama ẽ̱xna yíxema tixĩxü̃ ya tümaarü cori tüxna ãgaxe nax mea nüxna tadauxü̃ca̱x rü mea oragu tanachibüexẽxẽxü̃ca̱x i norü duü̃xü̃gü?

Yema Cuáü̃ nüxü̃ dauxü̃ i yixcüra tá ngupetüxü̃chiga 21:19

Rü gumá nutagü ga itacü ga norü poxeguxü̃paragü ixĩcü, rü naguxü̃raü̃cü ga nuta ga imexẽchicümaxã nanga̱xãẽ. Rü guma nüxíraü̃cü ga napara rü nuta ga diamántemaxã nanga̱xãẽ. Rü guma norü taxre ga napara rü nuta ga chafírumaxã nanga̱xãẽ. Rü guma norü tomaepü̱x ga napara rü nuta ga ágatamaxã nanga̱xãẽ. Rü guma norü ãgümücü ga napara rü nuta ga esmerádamaxã nanga̱xãẽ.

1 Corintios 9:2

Rü woo togü i duü̃xü̃gü tama choxü̃ cua̱xgüchaü̃gu nax tórü Cori choxü̃ muxü̃, natürü i pema rü meama nüxü̃ pecua̱x nax nüma yixĩxü̃ ga choxü̃ namuxü̃. Rü chauxü̃tawa nixĩ ga tórü Coriaxü̃́ peyaxõgüxü̃, rü ngẽmawa nüxü̃ pecua̱x nax aixcüma yixĩxü̃ nax nüma choxü̃ namuxü̃.

Ore i mexü̃ ga Matéu ümatüxü̃ 7:24

Rü ngẽmaca̱x ya yíxema choxü̃ ĩnüxe rü naxǘxe i ngẽma choma tüxü̃ chamuxü̃, rü wüxi ga yatü ga mea naãẽxü̃ cuácü ga nuta ga tacüétügu üpatacürüxü̃ tixĩ.

Nüxíraxü̃xü̃ ga popera ga Pedru ümatüxü̃ 4:11

Rü yíxema nüxü̃ cuáxe nax mea tidexaxü̃, rü name nixĩ nax Tupanaarü orexü̃ tixuxü̃. Rü ngẽxguma texé tüxü̃́ nangẽxmagu i cua̱x nax togüxü̃ tarüngü̃xẽẽxü̃, rü name nixĩ i ngẽma pora ya Tupana tüxna ãxü̃maxã nüxü̃ tarüngü̃xẽxẽ. Rü guxü̃ma i ngẽma pexüxü̃ rü name nixĩ i meama penaxü nax ngẽmaãcü Ngechuchu ya Cristugagu Tupanaxü̃ picua̱xüü̃güxü̃ca̱x. Erü nüma ya Tupana rü guxü̃guma naxüüne rü naporaxüchi. Rü ngẽmaãcü yixĩ.

Norü taxre ga popera ga Timutéuca̱x naxümatüxü̃ ga Pauru 2:15

¡Rü mea naxü i Tupanaarü puracü nax cumaxã nataãẽxü̃ca̱x i ngẽxguma nape̱xewa cunguxgux rü ngẽmaãcü taxuca̱xma cuxãnexü̃ca̱x i ngẽxguma nüma cuxna nacaxgu naxca̱x i curü puracü! Rü ngẽmaca̱x name i aixcüma mea namaxã cungúexẽẽtae i ngẽma ore i mexü̃ i aixcüma ixĩxü̃.

Colosenses 4:17

Rü chanaxwa̱xe i Ariquípumaxã nüxü̃ pixu, rü ñapegürügü nüxü̃: “¡Mea napuracü rü yanguxẽxẽ i ngẽma puracü i tórü Cori cuxna ãxü̃!” ñapegürügü nüxü̃.

Romanos 12:3

Rü Tupana ya chomaxã mecümacü, rü choxü̃ namu nax pemaxã nüxü̃ chixuxü̃ca̱x i guxãma i pemax nax tama namexü̃ nax texé i petanüwa tügü írütaxü̃ rü tügügu tarüxĩnüxü̃ nax togüarü yexera tixĩxü̃. Natürü name nixĩ nax wüxichigü mea tügü ngugüarü maxü̃ã́xü̃ rü tügügu rüxĩnüxü̃ nax Tupana yixĩxü̃ i tüxna naxãxü̃ i tümaarü cua̱x wüxigu namaxã i tümaarü õ.

Romanos 1:5

Rü Ngechuchu ga Cristugagu Tupana chomaxã namecüma rü choxü̃ naxuneta nax norü puracü chaxüxü̃ca̱x. Rü yemaca̱x Ngechuchuégagu choxü̃ namu nax guxü̃ i nachixü̃anewa nüxü̃ chixuxü̃ca̱x i norü ore nax yaxõgüãxü̃ca̱x i duü̃xü̃gü rü Tupanaga naxĩnüexü̃ca̱x.

Ngechuchuarü ngúexü̃gü ga yamugüxü̃arü puracüchiga 18:27

Rü yexguma Acáyaanewa naxũxchaü̃gu ga Apóru, rü yema yaxõgüxü̃ ga Epéchiucüã̱x nüxü̃ narüngü̃xẽẽgü. Rü popera yéma namugü naxca̱x ga yema yaxõgüxü̃ ga Acáyaanecüã̱x nax mea Apóruxü̃ nayauxgüxü̃ca̱x. Rü yexguma Acáyaanewa nanguxgu ga Apóru rü poraãcü nüxü̃ narüngü̃xẽxẽ ga yema duü̃xü̃gü ga Tupanaarü ngechaü̃gagu Ngechuchuaxü̃́ yaxõgüxü̃.

Ore i mexü̃ ga Luca ümatüxü̃ 11:35

¡Mea cugüna nadau nax tama ẽanexü̃xü̃ nanguxuchixü̃ca̱x i ngẽma ngóonexü̃ i cuwa ngẽxmaxü̃.

Ngu̱xẽẽtaeruü̃arü ore 12:9

Rü yexguma yexera cua̱x nüxü̃́ yexmagu ga gumá orearü uruxü̃ rü yexera ga cua̱x duü̃xü̃güna naxã. Rü poraãcü nagu narüxĩnü rü nanangugü rü mea inananu ga muxü̃ma ga dexagü ga cua̱x nawa yexmagüxü̃.

Popera ga Chantiágu ümatüxü̃ 3:1

Pa Chauenexẽgüx, tama name i muxẽma i pema rü ngúexẽẽruü̃gü pegü pixĩgüxẽxẽ. Erü pema nüxü̃ pecua̱x i yixema nax ngu̱xẽẽruü̃gü ixĩgüxü̃, rü Tupana rü ngẽma togüarü yexera tá tüxna naca i tórü maxü̃chiga rü tórü puracüchiga.

Nüxíraxü̃xü̃ ga popera ga Timutéuca̱x naxümatüxü̃ ga Pauru 4:16

¡Naxuãxẽ rü mea cugüna nadau rü mea nangúexẽxẽ i ngẽma ore rü mea naxüama i ngẽma puracü ya Tupana nagu cuxü̃ muxü̃! Erü ngẽxguma mea cunaxü̱xgu i ngẽma puracü, rü tá cunayaxu i maxü̃ i taguma gúxü̃ rü ngẽma cuxü̃́ irüxĩnüexü̃ rü tá ta nanayauxgü i ngẽma maxü̃.

Colosenses 1:29

Rü ngẽmaca̱x woo guxchaxü̃gü cha̱u̱xca̱x ínguxgu rü poraãcü chapuracüama namaxã i ngẽma pora i chowa ngẽxmaxü̃ i Cristu choxna ãxü̃.

Romanos 15:15

Natürü ñaa poperawa rü tama chamuü̃ãcüma pexca̱x chanaxümatü i ñuxre i ucu̱xẽgü, erü tama chanaxwa̱xe i nüxü̃ ipeyarüngümae i ngẽma ucu̱xẽgü. Rü pexca̱x chanaxümatü i ngẽmachiga yerü Tupana chomaxã namecüma rü choxü̃ namu nax pexca̱x chanaxümatüxü̃ca̱x.

Ore i mexü̃ ga Luca ümatüxü̃ 21:8

Rü Ngechuchu rü ñanagürü: —¡Pexũãxẽgü nax taxuxü̃táma pexü̃ womüxẽẽxü̃ca̱x! Erü muxũchixü̃ tá chauégagu ínangugü rü ñanagürügü tá: “Choma nixĩ i Cristu, rü paxa tá nagu̱x i naane”, ñanagürügü tá. ¡Natürü taxũtáma nüxü̃́ peyaxõgü!

Chacaría 4:9

—Chorobabé nixĩ ga inanucü ga guma nuta ga naxtapü̱xarü ügü ya daa Tupanapata ya taxü̃ne rü nüma tátama nixĩ i yangu̱xẽẽãxü̃ —ñaxü̃. Rü ngẽmawa tá nüxü̃ pecua̱x i pemax nax Cori ya Tupana ya Guxãétüwa Ngẽxmacü yixĩxü̃ i núma choxü̃ muxü̃.

Norü taxre ga to ga popera ga ãẽ̱xgacügüchiga ümatüxü̃ 2:12

Rü yexgumarüxü̃ ta yexma nanaxümatü ga ñaxü̃: —Nüxü̃ chicua̱xüxü̃ ya Cori ya Iraétanüxü̃arü Tupana ga naxücü ga dauxü̃guxü̃ ga naane rü ñoma ga naane. Erü nüma ya Tupana rü ãẽ̱xgacü ga Dabína nanamu ya wüxi ya nane ya cua̱x nüxü̃́ ngẽxmacü, rü aixcüma naãẽxü̃ cuácü. Rü nüma tá nixĩ i naxüaxü̃ ya Cori ya Tupanapata ya taxü̃ne rü wüxi ya ĩpata ya ãẽ̱xgacüpata ixĩxü̃ne.

Yema Cuáü̃ nüxü̃ dauxü̃ i yixcüra tá ngupetüxü̃chiga 21:14

Rü guma ĩanearü poxeguxü̃ rü 12 ga nuta ga taxüchicüétüwa inaxügü. Rü wüxichigü ga gumá 12 ga nutagüwa nango̱xéga ga yema 12 ga norü ngúexü̃gü ga gumá Carnéruxacü.

2 Corintios 10:15

Rü ngẽmaca̱x tama togüarü puracümaxãmare nixĩ i togü ticua̱xüü̃güxü̃. Rü tama nüxü̃ tachopetüchaü̃ i ngẽma Tupana nagu tomaxã unetaxü̃, rü ngẽmaca̱x nixĩ i pexü̃ tangúexẽẽxü̃. Rü ngẽma pexü̃́ tanaxwa̱xexü̃ nixĩ nax yexeraãcü nüxü̃ pecuáxü̃ i Tupanaarü ore nax ngẽmaãcü yexera peyaxõgüxü̃ca̱x.

Ucu̱xẽgüchiga 9:1

Ngẽma cua̱x rü naxüpata rü 7 nixĩ ga napataarü caxtagü.

1 Tesalonicenses 3:2

Rü nagu tarüxĩnüe nax pexü̃tawa tanamuxü̃ ga taenexẽ ga Timutéu nax pexü̃ íyadauxü̃ca̱x. Rü nüma nixĩ i Tupanaarü puracütanüxü̃ i wüxigu tomaxã puracüxü̃ nax nüxü̃ tixuxü̃ca̱x i ngẽma ore i mexü̃ i Cristuchiga. Rü yéma petanüwa tanamu nax pexü̃ nangü̃xẽẽxü̃ca̱x nax yexeraãcü peyaxõgüxü̃ca̱x rü aixcüma petaãẽgüxü̃ca̱x rü yemaacü taguma texé ga petanüwa nüxü̃ rüxoxü̃ca̱x ga yexguma yema guxchaxü̃gü pexü̃́ yexmagu. Erü pematama marü nüxü̃ pecua̱x nax guxãma i yixema nax yaxõgüxü̃ rü ngúxü̃ tá tingegü.

Norü taxre ga popera ga Pedru ümatüxü̃ 3:15

Rü name nixĩ i nüxna pecua̱xãchie nax yáxna tamaxã naxĩnüxü̃ ya tórü Cori, erü nanaxwa̱xe nax tüxü̃́ nangẽxmaxü̃ i maxü̃ i taguma gúxü̃. Rü ngẽmatama ucu̱xẽ i pexca̱x chaxümatüxü̃rüxü̃ nixĩ ga pexca̱x naxümatüaxü̃ ga taenexẽ ya nüxü̃ ingechaü̃gücü ya Pauru ga yexguma Tupana cua̱x nüxna ãxgu nax pexca̱x naxümatüaxü̃ca̱x.

Ínachoxü̃xü̃chiga 36:4

Rü nümagü ga yema puracütanüxü̃ ga guma Tupanapata ügüxü̃ rü ínayachaxãchitanü nax Moichémaxã nüxü̃ yanaxugüexü̃ca̱x, rü ñanagürügü: —Ngẽma duü̃xü̃gü rü marü nanangupetüxẽẽxü̃chi nax toxü̃tawa nanaãxü̃ i norü ãmaregü naxca̱x ya yima Tupanapataarü puracü ga Cori ya Tupana nagu unetaxü̃ —ñanagürügü.

Ucu̱xẽgüchiga 12:8

Yimá yatü ya mea naãẽxü̃ cuácü, rü duü̃xü̃gü nüxü̃ nicua̱xüü̃gü naxca̱x i norü cua̱x. Natürü ngẽma yatü i tama naãẽxü̃ cuáxü̃, rü duü̃xü̃gü nüxü̃ naxoe.