1 Corintios 2:15 - Tupanaarü Ore

¹⁵ Rü yíxema duü̃xẽ ya Tupanaãxẽ ya Üünecü tümamaxã icuáxe, rü mea nüxü̃ tacua̱x i guxü̃ma i ngẽma mexü̃ ya Tupana tüxü̃́ naxwa̱xexü̃. Rü taxucürüwa texé tümachiga chixexü̃ tixu.

1 Corintios 2:15 Referans Kwoze

1 Tesalonicenses 5:21

Natürü name nixĩ i meama penangugü i guxü̃ma i ore nax nüxü̃ pecuáxü̃ca̱x rü aixcüma yixĩxü̃ i ngẽma ore rüe̱xna tama. ¡Rü ngẽma ore i aixcüma mexü̃xicatama pixõgü!

Ucu̱xẽgüchiga 28:5

Ngẽma chixexü̃gu maxẽxü̃ rü tama nüxü̃ nacua̱xgü nax nagu naxĩxü̃ i ngẽma nacüma i mexü̃. Natürü ngẽma Cori ya Tupanaga ĩnüexü̃ rü meama nüxü̃ nacua̱xgü nax nagu naxĩxü̃ i ngẽma nacüma i mexü̃.

Popera ga Yudíugü ga yaxõgüxü̃ca̱x ümatüxü̃ 5:14

Natürü yíxema yaxṍxe ya nüxü̃ cuáxe nax mea tanangugüxü̃ nax ta̱xacü yixĩxü̃ i ngu̱xẽẽtae i mexü̃ rü ẽ̱xna chixexü̃, rü aixcüma nüxü̃ tacua̱x i Tupanaarü ore. Rü yíxema rü ñoma wüxi i duü̃xü̃ i yáxü̃ i namachimaxã ãwemüxü̃rüxü̃ tixĩ.

Nüxíraxü̃xü̃ ga popera ga Cuáü̃ ümatüxü̃ 4:1

Pa Chauenexẽgü ya Pexü̃ Changechaü̃güxe, ¡Taxṹ i nüxü̃́ peyaxõgüxü̃ i guxü̃ma i ngẽma nügü ixugügüxü̃ nax Tupanaarü orearü uruü̃gü yixĩgüxü̃! Rü name nixĩ i penangugü i norü ore nax nüxü̃ pecuáxü̃ca̱x rü aixcüma Tupanaãxẽ yixĩxü̃ i nawa idexaxü̃, rüe̱xna tama. Erü guxü̃wama i ñoma i naanewa rü nangẽxma i muxü̃ma idorata̱a̱xgüxü̃ i nügü ixugüxü̃ nax Tupanaarü orearü uruü̃gü yixĩgüxü̃.

1 Corintios 14:37

Rü ngẽxguma chi texé tügügu rüxĩnügu nax Tupanaarü orearü uruxü̃ tixĩxü̃ rü ẽ̱xna tügügu tarüxĩnügu nax Tupanaãxẽ ya Üünecü tüxna naxãxü̃ i ta̱xacürü cua̱x, rü name nixĩ i nüxna tacua̱xãchi nax tórü Coriarü mu yixĩxü̃ i ñaa ore i pexca̱x chaxümatüxü̃.

Gálatas 6:1

Pa Chauenexẽgüx, ngẽxguma chi texéxü̃ peda̱u̱xgu nax ta̱xacürü chixexü̃gu tanguxü̃, rü pema nax Tupanaãxẽ ya Üünecü pewa ngẽxmaxü̃, rü name nixĩ i tüxü̃ pengechaü̃ãcüma tüxü̃ perüngü̃xẽxẽ nax itayarüwe̱xãchixü̃ca̱x. ¡Natürü pexuãẽgü i wüxichigü, nax pema rü ta tama ngẽma chixexü̃gu peyixü̃ca̱x!

Filipenses 1:10

Rü ngẽmaãcü pexca̱x chayumüxẽ erü chanaxwa̱xe nax mea penangugüxü̃ i ta̱xacü nixĩ i aixcüma mexü̃ i Tupanape̱xewa. Rü chanaxwa̱xe nax aixcüma namexü̃ i perü maxü̃ nax taxuca̱xma ta̱xacüca̱x Tupana pexna caxü̃ca̱x i ngẽxguma ínanguxgu ya Cristu.

1 Corintios 3:1

Pa Chauenexẽgüx, yexguma noxri petanüwa changuxgu, rü taxucürüwa duü̃xü̃gü i meama Tupanaxü̃ cua̱xgüxü̃rüxü̃ãcü pemaxã nüxü̃ chixu i Tupanaarü ore. Natürü duü̃xü̃gü ga yexwacax yaxõgüxü̃rüü̃ãcü pemaxã nüxü̃ chixu yerü pema rü yexwacax peyaxõgü ga yexguma. Rü yemaca̱x yexwacax yaxõgüxü̃rüü̃ãcü pemaxã nüxü̃ chixu ga Cristuchiga.

Colosenses 1:9

Rü ngẽmaca̱x i toma ga noxritama pexü̃ tacuáchigagu, rü taguma nüxü̃ tarüchau nax pexca̱x tayumüxẽgüxü̃. Rü guxü̃guma Tupanana naxca̱x tacagü nax mea pexü̃ nüxü̃ nacua̱xẽẽxü̃ca̱x i ngẽma norü ngúchaü̃ nax penaxüxü̃. Rü ngẽxgumarüxü̃ ta nüxna naxca̱x taca nax pexna naxããxü̃ca̱x i naguxü̃raü̃xü̃ i cua̱x i Naãxẽ ya Üünexü̃wa ne ũxü̃.

1 Corintios 4:5

Rü ngẽmaca̱x tama name nax yaxtacüma texéxü̃ pengugüarü maxü̃ã́xü̃. Natürü name nixĩ i ípenangu̱xẽxẽ nax núma naxũxü̃ ya tórü Cori. Rü nüma tá nixĩ i nango̱xẽẽãxü̃ i guxü̃ma i ngẽma ñu̱xma icúxü̃ rü guxü̃ma i ngẽma duü̃xü̃gü naãẽwa nagu rüxĩnüexü̃. Rü ngẽxguma tá nixĩ ya Tupana i tüxü̃ yacua̱xüxü̃ ya wüxichigü ya yíxema aixcüma mexü̃ ügüxe.

Ngechuchuarü ngúexü̃gü ga yamugüxü̃arü puracüchiga 16:3

Rü Pauru rü nanaxwa̱xe nax Timutéu íyaxümücüxü̃. Natürü naxü̃pa nax yagaãxü̃ rü ínanawíecha̱xmüpe̱xechiraü̃, yerü yemaacü nanaxwa̱xegü ga yema Yudíugü ga yema naanewa yexmagüxü̃. Yerü guxü̃ma nüxü̃ nacua̱xgü nax Griégu yixĩxü̃ ga nanatü.

Ore i mexü̃ ga Cuáü̃ ümatüxü̃ 7:17

Ngẽxguma texé naxüxchaü̃gu i Tupanaarü ngúchaü̃ rü tá nüxü̃ tacua̱x rü aixcüma Tupanaxü̃tawa chanayaxu i ngẽma chorü ngu̱xẽẽtae rü ẽ̱xna chaugüxü̃tawatama chanayaxu i ngẽma.

Ngu̱xẽẽtaeruü̃arü ore 8:5

Rü yíxema ãẽ̱xgacüga ĩnüxe rü taxuxü̃ma i guxchaxü̃ tüxü̃ nangupetü. Rü yíxema tümaãẽxü̃ cuáxe rü nüxü̃ tacua̱x i ñuxgu rü ñuxãcü tá tayanguxẽẽxü̃ i ngẽma ãẽ̱xgacüarü mugü.

Wiyaegü 25:14

Rü nüma ya Cori ya Tupana rü tümamücü nixĩ ya yíxema nüxü̃ ngechaü̃güxe. Rü tümaca̱x nanango̱xẽxẽ i norü uneta.

2 Chamué 14:17

Rü chomax nax curü duü̃xü̃ chixĩxü̃ rü íchayanguxẽxẽ i ngẽma curü ngãxü̃, Pa Ãẽ̱xgacüx, nax choxü̃ nataãẽxẽẽxü̃ca̱x, erü cumax, Pa Ãẽ̱xgacüx, rü ñoma wüxi i daxũcüã̱x i Tupanaarü orearü ngeruxü̃rüxü̃ nüxü̃ cucua̱x nax ngexü̃rüüxü̃ yixĩxü̃ i mexü̃ rü chixexü̃. ¡Rü Cori ya Tupana cuxü̃tawa ngexma̱x, Pa Ãẽ̱xgacü! —ngĩgürügü.

Nüxíraxü̃xü̃ ga popera ga Cuáü̃ ümatüxü̃ 2:20

Natürü guxãma i pema rü Cristu ya Üünecü marü pexna nanamu i Naãxẽ ya Üünexü̃, rü ngẽmaca̱x meama nüxü̃ pecua̱x i Tupanaarü ore i aixcüma ixĩxü̃.