1 Corintios 16:16 - Tupanaarü Ore

¹⁶ Rü chanaxwa̱xe i naga pexĩnüe i ngẽma duü̃xü̃gü i Etéfanatanüxü̃rüxü̃ ixĩgüxü̃. Rü ngẽxgumarüxü̃ ta chanaxwa̱xe i naga pexĩnüe i guxü̃ma i ngẽma duü̃xü̃gü i ñaa Tanatüarü puracüwa puracüexü̃ rü ngü̃xẽẽtaegüxü̃.

1 Corintios 16:16 Referans Kwoze

Popera ga Yudíugü ga yaxõgüxü̃ca̱x ümatüxü̃ 13:17

¡Rü naga pexĩnüe i ngẽma perü dauruü̃gü i pemaxã icua̱xgüxü̃, rü penaxü̱x i ngẽma pemaxã nüxü̃ yaxuxü̃! Erü nümagü rü mea Tupanape̱xewa pexna nadaugü, rü nüxü̃ nacua̱xgü nax Tupana tá nüxna ca̱xaxü̃ nachiga nax ñuxãcü pexna nadaugüxü̃. Rü name nixĩ i naga pexĩnüe i perü dauruü̃gü nax taãẽãcüma naxügüã̱xü̃ca̱x i norü puracü rü tama wüxi i norü guxchaxü̃ nax yixĩxü̃ca̱x. Erü ngẽxguma chi wüxi i norü guxchaxü̃ yixĩxgu i ngẽma norü puracü nax pexna nadauxü̃, rü pema rü chi taxuxü̃ma i mexü̃ nawa peyaxu i ngẽma norü puracü.

1 Tesalonicenses 5:12

Pa Chauenexẽgüx, pexü̃ taca̱xaxü̃gü nax nüxü̃ pengechaü̃güxü̃ i ngẽma taenexẽgü i petanüwa puracüexü̃ rü pemaxã icua̱xgüxü̃ rü pexü̃ ngúexẽẽxü̃ i Cori ya Ngechuchuarü ore.

Yema Cuáü̃ nüxü̃ dauxü̃ i yixcüra tá ngupetüxü̃chiga 2:3

Rü woo guxchaxü̃gü cuxca̱x ínguxgu, natürü cunaxüama i ngẽma puracü i cha̱u̱xca̱x cuxüxü̃. Rü woo chaugagu ngúxü̃ quinge, natürü yáxna namaxã cuxĩnü, rü tama nüxü̃ curüchau.

Nüxíraxü̃xü̃ ga popera ga Pedru ümatüxü̃ 5:5

Rü ngẽxgumarüxü̃ ta i pemax, Pa Ngextü̱xücügüx, rü name nixĩ i naga pexĩnüe i ngẽma perü ãẽ̱xgacügü i Tupanaarü puracümaxã icua̱xgüxü̃. Rü guxãma i pema i yaxõgüxü̃, rü name nixĩ i wüxichigü mea pegüga pexĩnüe rü tama pegügu perüxĩnüe nax pemücügüarü yexera pixĩgüxü̃. Erü Tupanaarü ore i ümatüxü̃wa rü ñanagürü: “Tupana rü tama norü me nixĩ i ngẽma duü̃xü̃gü i nügü icua̱xüxü̃güxü̃. Natürü nüxü̃ narüngü̃xẽxẽ rü namaxã namecüma i ngẽma duü̃xü̃gü i tama nügü icua̱xüxü̃güxü̃”, ñanagürü i ngẽma ore.

Popera ga Yudíugü ga yaxõgüxü̃ca̱x ümatüxü̃ 6:10

Erü nüma ya Tupana rü aixcümacü nixĩ. Rü nüma rü taxũtáma nüxü̃ inayarüngüma ga yema mexü̃ ga pexüxü̃ rü ñuxãcü taenexẽgü i yaxõgüxü̃xü̃ nax pengechaü̃güxü̃ ga yexguma nüxü̃ perüngü̃xẽẽgügu, ngẽma ñu̱xma ípenaxüxü̃rüü̃tama.

Nüxíraxü̃xü̃ ga popera ga Timutéuca̱x naxümatüxü̃ ga Pauru 5:17

Rü ngẽma yaxõgüxü̃arü ãẽ̱xgacügü i aixcüma meama ngẽma yaxõgüxü̃maxã icua̱xgüxü̃, rü name nixĩ i ngẽma yaxõgüxü̃ aixcüma nüxü̃ nangechaü̃gü rü namaxã nataãẽgü. Rü yexera name i nüxü̃ nangechaü̃gü rü namaxã nataãẽgü i ngẽma Tupanaarü orexü̃ ixugüxü̃ rü nangúexẽẽxü̃.

1 Tesalonicenses 2:9

Pa Chauenexẽgüx, pema rü nüxna pecua̱xãchie nax ñuxãcü poraãcü tapuracüexü̃ nax torü õnaca̱x tataxegüxü̃ca̱x ga yexguma petanüwa tayexmagügu. Rü ngunecü rü woo chütacü tapuracüe nax taxúeãxü̃ma wüxi ga guxchaxü̃ tixĩgüxü̃ca̱x ga yexguma petanüwa pemaxã nüxü̃ tixuxgu ga Tupanaarü ore.

1 Tesalonicenses 1:3

Rü guxü̃guma i ngẽxguma Tanatü ya Tupanamaxã tidexagügu, rü nüxna tacua̱xãchie nax aixcüma mea peyaxõgüãcüma penaxüxü̃ i Tupanaarü puracü, rü nüxü̃ pengechaü̃güãcüma togüxü̃ perüngü̃xẽẽxü̃. Rü mea ípenangu̱xẽẽxü̃ ya tórü Cori ya Ngechuchu ya Cristu rü ngẽmaca̱x yáxna namaxã pexĩnüe i ngẽma ngúxü̃ i ñu̱xma pingegüxü̃.

Filipenses 4:3

Rü cumax, Pa Chomücü ya Mecü i Wüxigu Tupanaarü Puracüwa Chomaxã Puracücüx, rü cuxna naxca̱x chaca nax nüxü̃ curüngü̃xẽẽxü̃ca̱x i ngẽma taxre i taeya̱xgü. Erü nümagü rü wüxigu chomaxã rü Creméntemaxã rü ngẽma togü i chomücügü i Tupanaarü poperawa marü ngo̱xégagüxü̃maxã napuracüe i Tupanaarü orearü uwa.

Efesios 5:21

Rü ñu̱xma nax Cristuaxü̃́ peyaxõgüxü̃ rü nüxü̃ pengechaü̃gü̃xü̃, rü name nixĩ i pegüga pexĩnüe i wüxichigü.

1 Corintios 12:28

Rü ngẽmaca̱x ya Tupana rü nanaxwa̱xe nax mea nügü inanuxü̃ i ngẽma yaxõgüxü̃. Rü yíxema tüxíra tüxü̃ naxunetagüxe tixĩ ya yíxema norü puracüwa tüxü̃ namugüxe. Rü ngẽmawena tüxü̃ naxuneta ya toguxegü nax nüxü̃ tixugüxü̃ca̱x i norü ore. Rü ngẽmawena tüxü̃ naxuneta ya toguxegü nax duü̃xü̃güxü̃ tangúexẽẽxü̃ca̱x i norü ore. Rü ngẽxgumarüxü̃ ta tüxü̃ naxuneta ya toguxegü nax tanaxügüxü̃ca̱x i cua̱xruü̃gü i Tupanaarü poramaxã taxügüxü̃, rü toguxegü rü tüxna nanaxã i cua̱x nax tanameexẽẽxü̃ca̱x i ida̱xaweexü̃, rü toguxegü rü tüxna nanaxã i cua̱x nax nüxü̃ tarüngü̃xẽẽgüxü̃ca̱x i ngẽma togü, rü toguxegü rü tüxna nanaxã i cua̱x nax yaxõgüxü̃arü ãẽ̱xgacügü tixĩgüxü̃ca̱x. Rü toguxegü rü tüxna nanaxã i cua̱x nax ngẽma nagagü i tama nüxü̃ tacuáxü̃wa tidexagüxü̃ca̱x.

1 Corintios 3:9

Rü toma rü wüxigu Tupanaaxü̃́ tapuracüe. Rü ngẽmaãcü nixĩ i perü maxü̃wa napuracüxü̃ ya Tupana nax nüma nanaxwa̱xexü̃ãcüma noxrü pixĩgüxü̃ca̱x.

Romanos 16:12

¡Rü ngĩxü̃ perümoxẽgü i Triféna rü Trifócha! Rü ngĩmagü rü tórü Coriaxü̃́ ipuracüe. ¡Rü ngẽxgumarüxü̃ ta ngĩxü̃ perümoxẽgü i taeya̱x i Pérchide i ngĩxü̃ ingechaü̃gücü! Rü ngĩma rü marü poraãcü tórü Coriaxü̃́ ipuracü.

Romanos 16:9

¡Rü nüxü̃ perümoxẽgü ya Urubáno ya tomücü ixĩcü i Cristuarü puracüwa! ¡Rü ngẽxgumarüxü̃ ta nüxü̃ perümoxẽgü ya Echatáqui ya nüxü̃ changechaü̃cü!

Romanos 16:6

¡Rü ngĩxü̃ perümoxẽgü i María ga poraãcü petanüwa Tupanaaxü̃́ puracücü!

Romanos 16:3

¡Rü nüxü̃ perümoxẽgü i Prichíra rü Aquíra! Rü nümagü rü chomücügü nixĩgü ya Ngechuchu ya Cristuarü puracüwa.

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 12:18

Rü Tupanaãxẽ nüxna nangu ga Amachái ga namaxã icuácü ga yema 30 ga Dabíarü churaragü ga rüporamaegüxü̃, rü ñanagürü: —Pa Dabíx Pa Ichaxí Nanex, toma rü curü ngü̃xẽẽruü̃gü tixĩgü, rü tanaxwa̱xe nax mea cuxü̃́ ínanguxuchixü̃ i guxü̃ma i nagu curüxĩnüxü̃wa. Rü tanaxwa̱xe i mea nüxü̃ naxüpetüxü̃ i guxü̃ma i ngẽma cuwa ügüxü̃, erü yimá curü Tupana cuxü̃ narüngü̃xẽxẽ —ñanagürü. Rü yexguma nüma ga Dabí rü nanade rü norü churaragüeruxü̃ nayaxĩgüxẽxẽ.

Ngu̱xẽẽtaeruü̃arü ore 1:3

¿Rü nüma ya yatü rü ta̱xacürü mexü̃ nawa nayaxu i norü puracü i taxü̃ i ñoma i naanewa naxüxü̃?

Popera ga Yudíugü ga yaxõgüxü̃ca̱x ümatüxü̃ 13:24

¡Rü nüxü̃ perümoxẽgü i guxü̃ma i ngẽma perü dauruü̃gü i pemaxã icuáxü̃! ¡Rü ngẽxgumarüxü̃ ta nüxü̃ perümoxẽgü i guxü̃ma i togü i taenexẽgü i yaxõgüxü̃! Rü ngẽma taenexẽgü i nua Itáriaanewa ngẽxmagüxü̃ rü ta pexü̃ narümoxẽgü.